Read S'gaw Karen လံာ်စီၤပၤအခီၣ်ထံးတဘ့ၣ် 9 Bible Online

လံာ်စီၤပၤအခီၣ်ထံးတဘ့ၣ် 9 - S'gaw Karen bible

လံာ်စီၤပၤအခီၣ်ထံးတဘ့ၣ် 9

¹တုၤစီၤပၤၡလိၤမိၤမၤဝံၤတၢ်သူၣ်ထီၣ်ဘှီထီၣ်ယွၤအတၢ်လုၢ်ဟံၣ်, ဒီးနီ, ဒီးကယဲၢ်တၢ်လၢအဝဲအဲၣ်ဒိးဘှီထီၣ်ဝဲတဖၣ်အလီၢ်ခံ န့ၣ်,

²ယွၤလီၣ်ဖျါထီၣ်ကဒီးအသးဒီးအီၤတဘျီဒ်အလီၣ်ဖျါထီၣ်အသးလၢ ဝ့ၢ်ကံးဘိၣ်အသိးန့ၣ်လီၤ.

³ယွၤစံးဘၣ်အီၤ, “ယနၢ်ဟူတ့ၢ်နတၢ်ထုကဖၣ်န့ၣ်လံ. ယမၤစီဆှံလံယွၤအတၢ်လုၢ်ဟံၣ်လၢနသူၣ်ထီၣ်တ့ၢ်အီၤအံၤ, ဒ်တၢ်လီၢ်တတီၤလၢယကဘၣ်တၢ်ဘူၣ်ထီၣ်ဘါထီၣ်ယၤလီၤစိၤလီၤထီ န့ၣ်လီၤ.

⁴ယကအံးလီၤကွၢ်လီၤအီၤ, ဒီးဒီဒၣ်အိၣ်ပှိၤအီၤကိးဆၢကိးကတီၢ် ဒဲးန့ၣ်လီၤ. ဒ်နပၢ်စီၤဒၤဝံးမၤတ့ၢ်ဝဲအသိး, နမ့ၢ်မၤယတၢ်မၤလၢတၢ်တီတၢ်လိၤဒီးတၢ်ကလုၢ်တီအပူၤ, ဒီးနမ့ၢ်စူၢ်ယတၢ်သိၣ်တၢ်သီတဖၣ်ဒီးမၤကယဲၢ်တၢ်လၢယမၤလိာ်တ့ၢ် နၤတဖၣ်န့ၣ်ဒီး,

⁵ယကဟံးဃာ်ဂၢၢ်ကျၢၤတၢ်အၢၣ်လီၤလၢယမၤတ့ၢ်အီၤဒီးနပၢ်စီၤဒၤဝံး, ဖဲယတဲဘၣ်တ့ၢ်အီၤလၢကီၢ်အံၣ်စရ့လးကဘၣ်တၢ်ပၢအီၤလၢအဝဲ အစၢၤအသွဲၣ်တဖၣ်ထီဘိန့ၣ်လီၤ.

⁶မ့မ့ၢ်, နၤမ့ၢ်ဂ့ၤနစၢၤနသွဲၣ်တဖၣ်မ့ၢ်ဂ့ၤ, မ့ၢ်တပိာ်လၢၤဘၣ်ယခံ, တစူၢ်လၢၤဘၣ်ယတၢ်သိၣ်တၢ်သီတဖၣ်ဒီးတၢ်မၤလိာ်တဖၣ်လၢယဟ့ၣ်လီၤ တ့ၢ်သု, ဒီးဘူၣ်ထီၣ်ဘါထီၣ်ကစၢ်အဂုၤအဂၤတဖၣ်န့ၣ်ဒီး,

⁷အန့ၣ်တစု, ယကသုးကွံာ်ယပှၤဂီၢ်မုၢ်အံၣ်စရ့လးလၢထံဧိၤကီၢ် ဧိၤလၢယဟ့ၣ်တ့ၢ်လံအီၤအပူၤန့ၣ်လီၤ. ယကပာ်လီၤတဲာ်ကွံာ်စ့ၢ်ကီးတၢ်လုၢ်ဟံၣ်လၢယမၤစီဆှံတ့ၢ်အီၤဒ် တၢ်လီၢ်တတီၤလၢယကဘၣ်တၢ်ဘူၣ်ထီၣ်ဘါထီၣ်ယၤအဂီၢ်န့ၣ်လီၤ. ပှၤဂီၢ်မုၢ်လၢတၢ်လီၢ်ကိးပူၤဒဲးကဒုၣ်ဒွဲၣ်ပယွဲကီၢ်အံၣ်စရ့လးဒီး ကပာ်အီၤဒ်တၢ်လီၤသးဘၣ်အၢန့ၣ်လီၤ.

⁸ယွၤအတၢ်လုၢ်ဟံၣ်အံၤကကဲထီၣ်တၢ်ဟးဂီၤအပူၣ်တပူၣ်, ဒီးကယဲၢ်ပှၤတဂၤလၢ်လၢ်လၢအလဲၤခီဂာ်အီၤန့ၣ်ကသူၣ်ပျံၤသးဖုး ဒီးကမၢကမၣ်ဝဲဒီးကစံးဝဲ, ယွၤမၤကီၢ်အံၤဒီးယွၤအတၢ်လုၢ်ဟံၣ်အံၤဒ်သိးအံၤ, ဘၣ်မနုၤလဲၣ်.

⁹ပှၤဂီၢ်မုၢ်ကစံးဆၢဝဲ, တၢ်အံၤ, မ့ၢ်လၢအဝဲသ့ၣ်ပာ်လီၤတဲာ်ကွံာ်ယွၤ, အဝဲသ့ၣ်အကစၢ်ယွၤလၢအထုးထီၣ်အဝဲသ့ၣ်အမိၢ်ပၢ်ဖံဖုလၢပျၢၤ တဖၣ်လၢကီၢ်အဲၤကူပတူးအပူၤအဃိန့ၣ်လီၤ. အဝဲသ့ၣ်ဟ့ၣ်လီၤတ့ၢ်အသးဆူတၢ်သးစဲဒီးကစၢ်အဂၤတဖၣ်ဒီးဘူၣ် ထီၣ်ဘါထီၣ်အဝဲသ့ၣ်န့ၣ်လီၤ. လၢတၢ်န့ၣ်အဃိ, ယွၤဒုးလီၤဘၣ်တၢ်တတၢးတနါဒ်သိးအံၤလၢအဝဲ သ့ၣ်အလိၤန့ၣ်လီၤ.”

¹⁰စီၤၡလိၤမိၤသူၣ်ထီၣ်ယွၤအတၢ်လုၢ်ဟံၣ်ဒီးအဝဲအနီ, ယံာ်ဝဲအနံၣ်ခံဆံန့ၣ်လီၤ.

¹¹ကီၢ်ထါယၢၣ်အစီၤပၤဃံရၣ်ဟ့ၣ်လီၤမၤစၢၤအီၤလၢကယဲၢ်သ့ၣ်ဆှိ အ့ရ့း, သ့ၣ်ဆှိဒီးထူဧိၤလွဲဧိၤခဲလၢာ်လၢအဝဲလိၣ်ဘၣ်ဝဲလၢတၢ်မၤ အံၤအဂီၢ်န့ၣ်လီၤ. တုၤတၢ်မၤအံၤဝံၤဝဲန့ၣ်, စီၤပၤၡလိၤမိၤဟ့ၣ်လီၤစီၤဃံရၣ် လၢဝ့ၢ်အဖျၢၣ်ခံဆံလၢအအိၣ်လၢကီၢ်ကၤလံၤလါအလီၢ်ကဝီၤအပူၤန့ၣ်လီၤ.

¹²စီၤဃံရၣ်လဲၤကွၢ်ဝ့ၢ်တဖၣ်န့ၣ်ဒီးတဘၣ်သူၣ်ဘၣ်သးဝဲဒၣ်ဘၣ်.

¹³လၢတၢ်န့ၣ်အဃိအဝဲစံးဘၣ်စီၤၡလိၤမိၤ, “ယဒီပုၢ်ဝဲၢ်ဧၢ, နဟ့ၣ်ယၤဝ့ၢ်မနုၤတရၢအံၤန့ၣ်လဲၣ်.” လၢတၢ်ဂ့ၢ်အံၤအဃိတၢ်လီၢ်ကဝီၤအံၤဘၣ်တၢ်ကိးဒံးဒၣ်အီၤလၢကၤ ဘူလးတုၤမုၢ်မဆါတနံၤအံၤန့ၣ်လီၤ.

¹⁴ထူလၢစီၤဃံရၣ်ဆှၢလီၤန့ၢ်ဆူစီၤၡလိၤမိၤန့ၣ်အိၣ်ဝဲအကံ ကၢ်ဃုဆံန့ၣ်လီၤ.

¹⁵စီၤပၤၡလိၤမိၤသူတၢ်မၢဆူၣ်မၢနၢၤအတၢ်မၤလၢတၢ်သူၣ်ထီၣ်ယွၤ အတၢ်လုၢ်ဟံၣ်, ဒီးနီအဂီၢ်, လၢတၢ်မၤပှဲၤထီၣ်ဟီၣ်ခိၣ်လၢတၢ်လီၢ်ဖဲဝ့ၢ်အမုၢ်ထီၣ်တကပၤအဂီၢ်, ဒီးလၢတၢ်သူၣ်ထီၣ်ဝ့ၢ်ခိၣ်ဒူအဂီၢ်န့ၣ်လီၤ. အဝဲမၢဆူၣ်စ့ၢ်ကီးတၢ်လၢတၢ်သူၣ်ထီၣ်ကဒါက့ၤဝ့ၢ်တဖၣ်လၢအမ့ၢ် ဃါစိၢ်, မကံးဒိၤဒီးက့စ့ၢ်န့ၣ်လီၤ.

¹⁶(ကီၢ်အဲၤကူပတူးအစီၤပၤဟဲထီၣ်ဒုးတ့ၢ်ဝ့ၢ်က့စ့ၢ်ဒီးမၤန့ၢ်တ့ၢ်ဝဲ, မၤသံကွံာ်ပှၤအိၣ်ဝဲဆိးဝဲဖဲန့ၣ်တဖၣ်ဒီးဆူးထီၣ်ကွံာ်ဝဲလၢမ့ၣ်အူ န့ၣ်လီၤ. အန့ၣ်ဝံၤဒီးအဝဲဟ့ၣ်လီၤဝ့ၢ်န့ၣ်ဒ်တၢ်တ့တၢ်ဖျီ အတၢ်ဟ့ၣ်ကနၢၤအသိးဆူအဖိမုၣ်အအိၣ်, ဖဲအဒိးတ့ဒိးဖျီအသးဒီးစီၤၡလိၤမိၤန့ၣ်လီၤ.

¹⁷ဒီးစီၤၡလိၤမိၤသူၣ်ထီၣ်ကဒါက့ၤဝ့ၢ်န့ၣ်လီၤ.) လၢတၢ်သူတၢ်မၤဆူၣ်မၤနၢၤအတၢ်မၤအပူၤန့ၣ်စီၤၡလိၤမိၤသူၣ် ထီၣ်ကဒါက့ၤစ့ၢ်ကီးဝ့ၢ်ဘ့ၤသဃိရိၣ်အလာ်ခီ,

¹⁸ဝ့ၢ်ဘဧၤလဲး, ဝ့ၢ်တးဒမိၣ်လၢယူဒၤအပှၢ်မုၢ်ကနၢအပူၤ,

¹⁹ဝ့ၢ်တဖၣ်ဖဲအဝဲအတၢ်လိၣ်ဘၣ်တဖၣ်ဘၣ်တၢ်ပဒၢးဃာ်အီၤ, ဝ့ၢ်တဖၣ်လၢအဝဲအကသ့ၣ်တဖၣ်ဒီးအလ့ၣ်ကဟၣ်တဖၣ်ဘၣ်တၢ်ပာ်အီၤန့ၣ် လီၤ. ဒ်န့ၣ်အသိးသူစ့ၢ်ကီးတၢ်မၢဆူၣ်မၢနၢၤအတၢ်မၤလၢကယဲၢ်တၢ်လၢ အဝဲအဲၣ်ဒိးသူၣ်ထီၣ်ဝဲလၢဝ့ၢ်ယရူၤၡလ့ၣ်အပူၤမ့ၢ်ဂ့ၤ, လၢလဘၤနိၣ်အပူၤမ့ၢ်ဂ့ၤဒီးလၢတၢ်လီၢ်တပူၤလၢ်လၢ်လၢအဝဲအဘီ အမုၢ်အပူၤမ့ၢ်ဂ့ၤ, အဂီၢ်န့ၣ်လီၤ.

²⁰လၢအဝဲအတၢ်မၢဆူၣ်မၢနၢၤအဂီၢ်န့ၣ်, စီၤၡလိၤမိၤသူတ့ၢ်ကီၢ်ကနၤဧၣ်အပှၤဂီၢ်မုၢ်အစၢၤအသွဲၣ်တဖၣ်လၢ အမ့ၢ်ဝဲဒီးပှၤအမိၢ်ဖိ, ပှၤဃ့ၤသးဖိ, ပှၤဃံၤဝံဖိဒီးပှၤယဘူၣ်ဖိ တဖၣ်န့ၣ်လီၤ.

²¹အဝဲသ့ၣ်န့ၣ်, ပှၤအံၣ်စရ့လးဖိတမၤသံကွံာ်ဘၣ်အီၤဖဲအဟဲနုာ် မၤန့ၢ်အထံအကီၢ်ဒ်တၢ်န့ၢ်သါအသိးအခါန့ၣ်ဘၣ်. အဝဲသ့ၣ်အစၢၤအသွဲၣ်တဖၣ်ကဲထီၣ်ထွဲဒံးကုၢ်တဖၣ်တုၤလၢမုၢ်မဆါ တနံၤအံၤန့ၣ်လီၤ.

²²စီၤၡလိၤမိၤတမၢကဲကုၢ်ဘၣ်ပှၤအံၣ်စရ့လးဖိတဖၣ်န့ၣ်ဘၣ်. အဝဲသ့ၣ်မၤအတၢ်ဒ်အဝဲပှၤသုးဖိသံၣ်ဖိတဖၣ်အသိး, ဒ်ပဒိၣ်ပပှၢ်တဖၣ်အသိး, ဒ်သုးခိၣ်သုးနၢ်တဖၣ်အသိး, ဒ်လ့ၣ်ကဟၣ်သုးအခိၣ်တဖၣ်အသိး, ဒီးဒ်ပှၤဒိးကသ့ၣ်သုးဖိတဖၣ် အသိးန့ၣ်လီၤ.

²³လၢစီၤၡလိၤမိၤအတၢ်သူၣ်ထီၣ်ဘှီထီၣ်အကလုာ်ကလုာ်အတၢ်တိာ်ကျဲၤ တဖၣ်အပူၤန့ၣ်, ပှၤခိၣ်ပှၤနၢ်တဖၣ်လၢတၢ်မၢဆူၣ်မၢနၢၤအတၢ်မၤအဂီၢ်, အိၣ်ဝဲအဂၤယဲၢ်ကယၤယဲၢ်ဆံန့ၣ်လီၤ.

²⁴ဖဲအဝဲအမါလၢအမ့ၢ်ကီၢ်အဲၤကူပတူးအစီၤပၤအဖိမုၣ်, သုးအသးလၢစီၤဒၤဝံးအဝ့ၢ်ဆူနီလၢစီၤၡလိၤမိၤဘှီထီၣ်န့ၢ် လၢအဂီၢ်ဝံၤအလီၢ်ခံန့ၣ်, စီၤၡလိၤမိၤမၤပှဲၤထီၣ်ဟီၣ်ခိၣ်လၢတၢ်လီၢ်လၢအအိၣ်လၢဝ့ၢ် အမုၢ်ထီၣ်တကပၤန့ၣ်လီၤ.

²⁵စီၤၡလိၤမိၤလုၢ်ထီၣ်ပာ်ထီၣ်တၢ်လုၢ်မ့ၣ်အူတဖၣ်ဒီးတၢ်လုၢ်မၤ ဃူမၤဖိးတဖၣ်လၢတၢ်လုၢ်လီၢ်လၢအဝဲဘှီထီၣ်တ့ၢ်ဝဲလၢယွၤ အဂီၢ်အဖီခိၣ်တနံၣ်သၢဘျီန့ၣ်လီၤ. အဝဲဆူးကဲၤထီၣ်စ့ၢ်ကီးတၢ်လုၢ်နၢမူဆူယွၤအအိၣ်န့ၣ်လီၤ. ဒီးလၢတၢ်န့ၣ်အဃိအဝဲမၤဝံၤတၢ်သူၣ်ထီၣ်ယွၤအတၢ်လုၢ်ဟံၣ်န့ၣ်လီၤ.

²⁶စီၤၡလိၤမိၤဘှီထီၣ်စ့ၢ်ကီးကဘီတကရူၢ်ဖဲဝ့ၢ်ဧ့းစယိၣ်က့ ဘ့ၢ်လၢအအိၣ်ဘူးဒီးအ့လိးလၢအအိၣ်ဖဲပီၣ်လဲၣ်က့ၣ်ကျီၤအကၣ် ဘၣ်အနံၤ, လၢကီၢ်အဒိၣ်အပူၤန့ၣ်လီၤ.

²⁷စီၤပၤဃံရၣ်ဆှၢလီၤအပှၤကဘီဖိလၢအတၢ်လဲၤခီဖျိအါဝဲတနီၤ လၢအကဘီကရူၢ်အပူၤဒ်သိးကမၤသကိးတၢ်ဒီးစီၤၡလိၤမိၤအပှၤတဖၣ် အဂီၢ်န့ၣ်လီၤ.

²⁸အဝဲသ့ၣ်လဲၤဝဲဆူကီၢ်အိဖ့ၢ်ဒီးဟဲက့ၤစိာ်ဝဲထူလီၤတယၢၢ် အကံကၢ်တကယၤခံဆံ, ဆူစီၤၡလိၤမိၤအအိၣ်န့ၣ်လီၤ.