Read S'gaw Karen လံာ်စီၤပၤခံဘ့ၣ်တဘ့ၣ် 10 Bible Online

လံာ်စီၤပၤခံဘ့ၣ်တဘ့ၣ် 10 - S'gaw Karen bible

လံာ်စီၤပၤခံဘ့ၣ်တဘ့ၣ် 10

¹စီၤပၤအၤဃာ်အစၢၤအသွဲၣ်တဖၣ်အိၣ်ဝဲအဂၤနွံဆံလၢအအိၣ်ဆိးဝဲ ဖဲဝ့ၢ်ၡၤမရံအပူၤန့ၣ်လီၤ. စီၤယ့ၤဟူကွဲးဝဲလံာ်ပရၢတဘ့ၣ်ဒီးဟ့ၣ်လီၤဝဲလံာ်အဒိတဖၣ် ဆူဝ့ၢ်အပှၤပၢတၢ်တဖၣ်အအိၣ်, ဆူခူဖိဝ့ၢ်ဖိတူၢ်ဒိၣ်ကီၤဒိၣ်တဖၣ်အအိၣ်ဒီးဆူပှၤလၢအကွၢ် ထွဲစီၤအၤဃာ်အစၢၤအသွဲၣ်တဖၣ်အအိၣ်န့ၣ်လီၤ. ဒီးလံာ်ပရၢန့ၣ်စံးဝဲ,

²“သုမ့ၢ်ပှၤတဖၣ်လၢအဘၣ်ကွၢ်ထွဲပၢဆှၢစီၤပၤအစၢၤအသွဲၣ်တဖၣ်, ဒီးသုအိၣ်ဒီးသုတၢ်စိကမီၤလၢလ့ၣ်ကဟၣ်တဖၣ်, ကသ့ၣ်တဖၣ်, တၢ်စုကဝဲၤတဖၣ်ဒီးဝ့ၢ်တဖျၢၣ်လၢတၢ်မၤခၢၣ်သနၢၣ်အီၤအဖီခိၣ်န့ၣ်လီၤ. လၢတၢ်န့ၣ်အဃိ, တုၤသုဒိးန့ၢ်လံာ်ပရၢအံၤတဘျီဃီန့ၣ်,

³သုကဘၣ်ဃုထၢပှၤထီၣ်ဘးအဂ့ၤကတၢၢ်တဂၤလၢစီၤပၤအစၢၤအသွဲၣ် တဖၣ်အကျါ, ပာ်ထီၣ်အီၤလၢစီၤပၤ, ဒီးဒုးတၢ်လၢတၢ်ကဒီဒၣ်အိၣ်ပှိၤအဂီၢ် န့ၣ်လီၤ.”

⁴ဝ့ၢ်ၡၤမရံအပှၤပၢတၢ်တဖၣ်ပျံၤတၢ်ဖုးတၢ်န့ၣ်လီၤ. အဝဲသ့ၣ်စံးဝဲဒၣ်, “ဖဲစီၤပၤယဟိရၣ်မ့ၢ်ဂ့ၤ, စီၤပၤအဃၤစယၤမ့ၢ်ဂ့ၤ, ထီဒါစီၤယ့ၤဟူတသ့ဘၣ်အခါန့ၣ်, ပဝဲပထီဒါအီၤကသ့ဒ်လဲၣ်.”

⁵လၢတၢ်န့ၣ်အဃိပဒိၣ်လၢအအိၣ်မူအိၣ်ဒါလၢနူၢ်ပူၤစီၤပူၤဒီး ပဒိၣ်လၢအအိၣ်ဒီးမူဒါလၢဝ့ၢ်အဖီခိၣ်ဃုာ်ဒီးခူဖိဝ့ၢ်ဖိ အတူၢ်ဒိၣ်ကီၤဒိၣ်တဖၣ်, ဒီးပှၤကွၢ်ထွဲတၢ်တဖၣ်, ဆှၢလီၤတၢ်ကစီၣ်အံၤဆူစီၤယ့ၤဟူအအိၣ်စံးဝဲ, “ပမ့ၢ်နခ့နပှၤတဖၣ်ဒီးပအိၣ်ကတဲာ်ကတီၤပသးလၢ ပကမၤကယဲၢ်တၢ်လၢနစံးဘၣ်ပှၤတမံၤလၢ်လၢ်န့ၣ်လီၤ. ဘၣ်ဆၣ်ပတပာ်ထီၣ်ပှၤနီတဂၤလၢစီၤပၤန့ၣ်ဘၣ်. မၤတၢ်တမံၤလၢ်လၢ်လၢနဆိကမိၣ်လၢအမ့ၢ်တၢ်အဂ့ၤကတၢၢ်န့ၣ် တက့ၢ်.”

⁶စီၤယ့ၤဟူကွဲးန့ၢ်အဝဲသ့ၣ်လံာ်ပရၢအဂၤတဘ့ၣ်စံးဝဲ, “သုမ့ၢ်အိၣ်လၢယအိၣ်တခီဒီး, သုမ့ၢ်အိၣ်ကတဲာ်ကတီၤသု သးလၢသုကပိာ်ထွဲယကလုၢ်တဖၣ်န့ၣ်, ဟဲစိာ်န့ၢ်ယၤစီၤအၤဃာ် အစၢၤအသွဲၣ်တဖၣ်အခိၣ်တဖၣ်ဆူယအိၣ်ဖဲဝ့ၢ်ယံးစရ့လးလၢမုၢ်ဆ့ၣ် ထီၣ်တနံၤ, အကတီၢ်ဒ်သိးအံၤန့ၣ်တက့ၢ်.” စီၤအၤဃာ်အစၢၤအသွဲၣ်အဂၤနွံဆံဘၣ်တၢ်ကွၢ်ထွဲအီၤလၢၡၤမရံ အခူဖိဝ့ၢ်ဖိတူၢ်ဒိၣ်ကီၤဒိၣ်တဖၣ်လၢအကွၢ်ဒိၣ်ထီၣ်အဝဲသ့ၣ်န့ၣ်လီၤ.

⁷တုၤစီၤယ့ၤဟူအလံာ်ပရၢဘၣ်တၢ်ဒိးန့ၢ်အီၤန့ၣ်, ၡၤမရံအပှၤခိၣ်အပှၤနၢ်တဖၣ်မၤသံကွံာ်စီၤအၤဃာ်အစၢၤအသွဲၣ် နွံဆံဂၤလၢာ်, ဒီးဒၢနုာ်ဝဲအခိၣ်တဖၣ်ဆူနာ်တဖၣ်အပူၤ, ဒီးဆှၢလီၤအီၤဆူစီၤယ့ၤဟူအအိၣ်ဖဲဝ့ၢ်ယံးစရ့လးန့ၣ်လီၤ.

⁸ဖဲစီၤယ့ၤဟူဘၣ်တၢ်တဲဘၣ်အီၤလၢစီၤအၤဃာ်အစၢၤအသွဲၣ်တဖၣ် အခိၣ်တဖၣ်ဘၣ်တၢ်ဟဲစိာ်အီၤလံန့ၣ်, အဝဲဟ့ၣ်လီၤအကလုၢ်လၢပှၤကပူၣ်ထီၣ်အီၤခံပူၣ်ဖဲဝ့ၢ်အတြဲၤ, ဒီးပှၤကပာ်တီၢ်အီၤဖဲန့ၣ်တုၤမုၢ်ဆ့ၣ်ထီၣ်တနံၤန့ၣ်လီၤ.

⁹လၢမုၢ်ဆ့ၣ်ထီၣ်န့ၣ်, အဝဲဟးထီၣ်ဆူဝ့ၢ်အတြဲၤဒီးစံးဘၣ်ပှၤ ဂီၢ်မုၢ်လၢအအိၣ်ဖဲန့ၣ်တဖၣ်, “ယမ့ၢ်ပှၤတဂၤ, လၢအကူၣ်ထီၣ်တၢ်အၢထီဒါစီၤပၤယဟိရၣ်ဒီးမၤသံအီၤန့ၣ်လီၤ. သုတအိၣ်ဒီးမူဒါလၢတၢ်န့ၣ်အဖီခိၣ်ဘၣ်. ဘၣ်ဆၣ်ပှၤသ့ၣ်တဖၣ် အံၤ, မတၤမၤသံအီၤန့ၣ်လဲၣ်.

¹⁰တၢ်အံၤမ့ၢ်တၢ်အုၣ်အသးလၢအပာ်ဖျါထီၣ်ကယဲၢ်တၢ်လၢယွၤစံးတ့ၢ် ဝဲဘၣ်ဃးဒီးစီၤအၤဃာ်အစၢၤအသွဲၣ်တဖၣ်အဂ့ၢ်န့ၣ်ကလၢထီၣ်ပှဲၤ ထီၣ်န့ၣ်လီၤ. ယွၤမၤတ့ၢ်တၢ်လၢအအၢၣ်လီၤတ့ၢ်ဝဲခီဖျိအဝံစီၤအ့ၤလံယၤ န့ၣ်လီၤ.”

¹¹ဝံၤဒီးစီၤယ့ၤဟူမၤသံကွံာ်ကယဲၢ်စီၤအၤဃာ်အဘူးအတံၢ်အဂၤ ခဲလၢာ်လၢအအိၣ်ဆိးလၢဝ့ၢ်ယံးစရ့လးအပူၤဒီးကယဲၢ်အပဒိၣ်ပပှၢ် ခဲလၢာ်, အတံၤသကိးဘူးဘူးတံၢ်တံၢ်တဖၣ်ဒီးအပှၤလုၢ်တၢ်အခိၣ်တဖၣ်န့ၣ် လီၤ. တပာ်လီၤတဲာ်မူဒံးအဝဲသ့ၣ်နီတဂၤဘၣ်.

¹²စီၤယ့ၤဟူဟးထီၣ်လၢဝ့ၢ်ယံးစရ့လးဒ်သိးကလဲၤဝဲဆူဝ့ၢ်ၡၤ မရံန့ၣ်လီၤ. လၢကျဲဖဲတၢ်လီၢ်ကိးဝဲလၢ, “ပှၤကွၢ်သိတဖၣ်အသူၣ်ဒဲအလီၢ်” န့ၣ်,

¹³အဝဲထံၣ်လိာ်အသးဒီးစီၤပၤအဃၤစယၤလၢအသံတ့ၢ်လံတဂၤအဘူး အတံၢ်တနီၤဒီးစီၤယ့ၤဟူသံကွၢ်အဝဲသ့ၣ်, “သုမ့ၢ်မတၤလဲၣ်.” အဝဲသ့ၣ်စံးဆၢဝဲ, “ပမ့ၢ်စီၤအဃၤစယၤအဘူးအတံၢ်တဖၣ်လီၤ. ပကလဲၤဆူဝ့ၢ်ယံးစရ့လးလၢပကဟ့ၣ်တၢ်ယူးယီၣ်ဆူနီၢ်ပၤမုၣ် အံစ့ၤဘ့ၤလးအဖိတဖၣ်ဒီးစီၤပၤအဟံၣ်ဖိဃီဖိအဂၤတဖၣ်န့ၣ် လီၤ.”

¹⁴စီၤယ့ၤဟူဟ့ၣ်လီၤအကလုၢ်ဆူအပှၤတဖၣ်စံးဝဲ, “ဖီၣ်န့ၢ်မူဒံးအဝဲသ့ၣ်တက့ၢ်.” အဝဲသ့ၣ်ဖီၣ်န့ၢ်ပှၤတဖၣ်န့ၣ်ဒီးစီၤယ့ၤဟူမၤသံပှၤတဖၣ်န့ၣ် ဖဲတၢ်ပူၤအိၣ်ဖဲန့ၣ်တပူၤလီၤ. ပှၤခဲလၢာ်အိၣ်လွံၢ်ဆံခံဂၤဒီးပှၤလၢအဘၣ်တၢ်ပာ်မူလီၤတဲာ် တ့ၢ်အီၤတအိၣ်နီတဂၤဘၣ်န့ၣ်လီၤ.

¹⁵စီၤယ့ၤဟူစးထီၣ်လဲၤကဒီးတၢ်, ဒီးလၢကျဲန့ၣ်အဝဲဘၣ်တၢ်ဟဲ သဂၢၢ်အီၤလၢစီၤရ့ကာ်အဖိခွါစီၤယိၤနဒာ်န့ၣ်လီၤ. စီၤယ့ၤဟူဆၢဂ့ၤဆၢဝါအီၤဒီးစံးဘၣ်ဝဲ, “နၤဒီးယၤပဆိကမိၣ်တၢ်ဒ်သိးသိးလီၤ. မ့ၢ်နကဆီၣ်ထွဲ မၤစၢၤယၤဧါ.” စီၤယိၤနဒာ်စံးဆၢအီၤ, “မ့ၢ်, ယကမၤလီၤ.” စီၤယ့ၤဟူစံးဆၢဝဲ, “မ့မ့ၢ်ဒ်န့ၣ်ဒီး, ဟ့ၣ်ယၤနစုတက့ၢ်. အဝဲသ့ၣ်စှီၤတံၢ်လိာ်အစု, ဒီးစီၤယ့ၤဟူမၤစၢၤအီၤလၢကထီၣ်ဆူလ့ၣ်ကဟၣ်အပူၤ,

¹⁶ဒီးစံးဝဲ, “ဟဲပိာ်ယခံဒီးကွၢ်လၢနကစၢ်ဒၣ်နဲလၢမ့ၢ်ယတီ ဒီးယွၤထဲလဲၣ်န့ၣ်တက့ၢ်.” ဒီးအဝဲသ့ၣ်လဲၤဒိးသကိးလ့ၣ်ကဟၣ်ဆူဝ့ၢ်ၡၤမရံန့ၣ်လီၤ.

¹⁷တုၤအဝဲသ့ၣ်လဲၤတုၤဖဲန့ၣ်ဒီးစီၤယ့ၤဟူမၤသံကွံာ်ကယဲၢ် စီၤအၤဃာ်အဘူးအတံၢ်ခဲလၢာ်, တပာ်တီၢ်ဝဲနီတဂၤဒၣ်လဲာ်ဘၣ်. တၢ်အံၤမ့ၢ်တၢ်လၢယွၤတဲဘၣ်တ့ၢ်စီၤအ့ၤလံယၤလၢကမၤအသးန့ၣ်လီၤ.

¹⁸စီၤယ့ၤဟူကိးဖှိၣ်ၡၤမရံအပှၤဂီၢ်မုၢ်ဒီးစံးဝဲ, “စီၤပၤအၤဃာ်မၤကစၢ်ဘဧၤလးအတၢ်တဆံးတက့ၢ်န့ၣ်လီၤ. ဘၣ်ဆၣ်ယကမၤအတၢ်ဒိၣ်ဒၣ်တၢ်တက့ၢ်လီၤ.

¹⁹ကိးဖှိၣ်ကယဲၢ်ဘဧၤလးအဝံခဲလၢာ်, ကယဲၢ်ပှၤတဖၣ်လၢဘူၣ်ထီၣ်ဘါ ထီၣ်အီၤ, ဒီးကယဲၢ်အပှၤလုၢ်တၢ်အခိၣ်ခဲလၢာ်တက့ၢ်. ပျဲပှၤအိၣ်တ့ၢ်နီတဂၤတဂ့ၤ. ယကလုၢ်ထီၣ်တၢ်လုၢ်ဖးဒိၣ်တမံၤ ဆူဘဧၤလးအအိၣ်ဒီးပှၤတဂၤလၢ်လၢ်လၢအတဟဲဘၣ်န့ၣ်, ကဘၣ်တၢ်မၤသံကွံာ်အီၤန့ၣ်လီၤ.” (အအံၤမ့ၢ်စီၤယ့ၤဟူအတၢ်ကူၣ်လီတမံၤလၢအဝဲတိာ်ပာ်ဝဲလၢကမၤ သံကယဲၢ်ပှၤဘူၣ်ထီၣ်ဘါထီၣ်ဘဧၤလးခဲလၢာ်န့ၣ်လီၤ.)

²⁰ဝံၤဒီးစီၤယ့ၤဟူဟ့ၣ်လီၤအကလုၢ်စံးဝဲ, “ဒုးဟူထီၣ်သါ လီၤတၢ်ဘူၣ်တၢ်ဘါအမုၢ်တနံၤလၢတၢ်မၤလၤကပီၤဘဧၤလးအဂီၢ်န့ၣ် တက့ၢ်.” တၢ်ဒုးဟူထီသါလီၤန့ၣ်ဘၣ်တၢ်မၤအီၤ,

²¹ဒီးစီၤယ့ၤဟူဆှၢလီၤတၢ်ကစီၣ်ဆူကီၢ်အံၣ်စရ့လးဒီဘ့ၣ်ညါ န့ၣ်လီၤ. ကယဲၢ်ပှၤတဖၣ်လၢအဘူၣ်ထီၣ်ဘါထီၣ်ဘဧၤလးန့ၣ်ဟဲဝဲ, ပှၤအိၣ်လီၤတဲာ်တအိၣ်ဘၣ်နီတဂၤဘၣ်. အဝဲသ့ၣ်ခဲလၢာ်လဲၤနုာ်ဝဲဆူဘဧၤလးအတၢ်လုၢ်ဟံၣ်ပူၤ, မၤပှဲၤအီၤတုၤအပှဲၤလၢအံၤတခီတုၤဆူအဂၤတခီန့ၣ်လီၤ.

²²အန့ၣ်ဝံၤ, စီၤယ့ၤဟူဟ့ၣ်လီၤအကလုၢ်ဆူပှၤလုၢ်တၢ်အခိၣ်လၢအကွၢ် ထွဲဆ့ကၤဖးထီစီဆှံတဖၣ်လၢကဟဲစိာ်ထီၣ်ဆ့ကၤတဖၣ်ဒီးဟ့ၣ် လီၤအီၤဆူပှၤဘူၣ်ထီၣ်ဘါထီၣ်တၢ်တဖၣ်န့ၣ်လီၤ.

²³အန့ၣ်ဝံၤဒီး, စီၤယ့ၤဟူအနီၢ်ကစၢ်ဒၣ်ဝဲလဲၤနုာ်ဆူတၢ်လုၢ် ဟံၣ်အပူၤဃုာ်ဒီးစီၤရ့ကာ်အဖိခွါစီၤယိၤနဒာ်, ဒီးစံးဘၣ်ပှၤဂီၢ်မုၢ်ဖဲန့ၣ်, “မၤလီၤတံၢ်လၢထဲဒၣ်ပှၤဘူၣ်ထီၣ်ဘါထီၣ်ဘဧၤလးဧိၤ, ကအိၣ်ဖဲအံၤတက့ၢ်. ဒီးပှၤဘူၣ်ထီၣ်ဘါထီၣ်ယွၤအသုတဟဲနုာ်နီ တဂၤတဂ့ၤ.”

²⁴ဝံၤဒီးအဝဲဒီးစီၤယိၤနဒာ်လဲၤနုာ်ဝဲဒ်သိးကလုၢ်ထီၣ်ပာ်ထီၣ် တၢ်လုၢ်တၢ်ပာ်တဖၣ်ဒီးတၢ်လုၢ်မ့ၣ်အူတဖၣ်ဆူဘဧၤလးအအိၣ်န့ၣ် လီၤ. အဝဲပာ်လီၤပှၤအဂၤဃိးဆံလၢတၢ်လုၢ်ဟံၣ်အချၢဒီးမၤလိာ်တ့ၢ် အဝဲသ့ၣ်လၢ, “သုကဘၣ်မၤသံကယဲၢ်ပှၤဂီၢ်မုၢ်အံၤခဲလၢာ်ဒီးပှၤတဂၤလၢ်လၢ် လၢအပျဲပူၤဖျဲးပှၤတဖၣ်အံၤအကျါတဂၤဂၤန့ၣ်ကဟ့ၣ်က့ၤတၢ်န့ၣ် အပှ့ၤလၢအဝဲအသးသမူန့ၣ်လီၤ.”

²⁵ဖဲစီၤယ့ၤဟူလုၢ်ထီၣ်တၢ်လုၢ်တၢ်ပာ်ဝံၤတဘျီဃီန့ၣ်, အဝဲစံးဘၣ်ပှၤခိးတၢ်တဖၣ်ဒီးသုးခိၣ်သုးနၢ်တဖၣ်စံးဝဲ, “လဲၤနုာ်ဒီးမၤသံကွံာ်အဝဲသ့ၣ်ခဲလၢာ်တက့ၢ်. ပျဲပှၤပူၤဖျဲးနီတဂၤတဂ့ၤ.” အဝဲသ့ၣ်လဲၤနုာ်ဝဲအိၣ်ဒီးနးတဖၣ်လၢအထုးထီၣ်ပာ်ဝဲ, ဒီးမၤသံကွံာ်အဝဲသ့ၣ်ခဲလၢာ်, ဒီးတွံၢ်ထုးထီၣ်အစိၣ်တဖၣ်ဆူ တၢ်ချၢန့ၣ်လီၤ. အနံၣ်ဝံၤဒီးအဝဲသ့ၣ်လဲၤနုာ်ဝဲဆူဘဧၤလးအတၢ်လုၢ်ဟံၣ်အသးကံၢ်ပူၤ,

²⁶ဒီးဟဲစိာ်ထီၣ်ထူၣ်စီဆှံလၢအအိၣ်ဖဲန့ၣ်ဒီးဆူးထီၣ်ကွံာ် အီၤလၢမ့ၣ်အူန့ၣ်လီၤ.

²⁷သတးဒီး, အဝဲသ့ၣ်မၤဟးဂီၤကွံာ်ထူၣ်စီဆှံဒီးတၢ်လုၢ်ဟံၣ် ဒီးဒုးကဲထီၣ်တၢ်လုၢ်ဟံၣ်န့ၣ်ဆူတၢ်ဟးလီၢ်တဖျၢၣ်လၢအအိၣ်ဝဲ တုၤမုၢ်မဆါတနံၤအံၤန့ၣ်လီၤ.

²⁸တၢ်န့ၣ်မ့ၢ်စီၤယ့ၤဟူမၤဟးဂီၤကွံာ်တၢ်ဘူၣ်ထီၣ်ဘါထီၣ်ဘဧၤ လးလၢကီၢ်အံၣ်စရ့လးအပူၤဒ်လဲၣ်န့ၣ်လီၤ.

²⁹ဘၣ်ဆၣ်အဝဲမၤဒိးစီၤပၤယၤရဘၣ်, အတၢ်ဒဲးဘးန့ၣ်လီၤ. စီၤယၤရၤဘၣ်မ့ၢ်ပှၤလၢအဆှၢဃီၤကီၢ်အံၣ်စရ့လးဆူတၢ်ဒဲးဘး အပူၤခီဖျိတၢ်ဘူၣ်ထီၣ်ဘါထီၣ်ဂီၤဖံးထူတဖၣ်လၢအဝဲပာ်ထီၣ် ဝဲဖဲဝ့ၢ်ဘ့ၤသ့လးဒီးဝ့ၢ်ဒၣ်အပူၤန့ၣ်လီၤ.

³⁰ယွၤစံးဘၣ်စီၤယ့ၤဟူ, “နမၤတ့ၢ်လံတၢ်ခဲလၢာ်လၢယမၢနမၤဘၣ် စီၤအၤဃာ်အစၢၤအသွဲၣ်တဖၣ်န့ၣ်လံ, လၢတၢ်န့ၣ်အဃိ, ယအၢၣ်လီၤနၤလၢနစၢၤနသွဲၣ်တဖၣ်, ကမ့ၢ်ကီၢ်အံၣ်စရ့လးအစီၤပၤ, တုၤလၢပှၤလွံၢ်စိၤတစိၤဒၣ်လဲာ်န့ၣ်လီၤ.”

³¹ဘၣ်ဆၣ်, စီၤယ့ၤဟူတစူၢ်ဘၣ်ယွၤ, အံၣ်စရ့လးအကစၢ်ယွၤအတၢ်သိၣ် တၢ်သီလၢအသးဒီဖျၢၣ်ညါဘၣ်. အခိၣ်တလိာ်အဝဲပိာ်ထွဲစီၤယၤရၤဘၣ်, ပှၤလၢအဆှၢဃီၤကီၢ်အံၣ်စရ့လးဆူတၢ်ဒဲးဘးအပူၤ, အဒိအတဲာ်န့ၣ်လီၤ.

³²ဖဲအဆၢကတီၢ်အဝဲန့ၣ်, ယွၤစးထီၣ်မၤအံၣ်လီၤကီၢ်အံၣ်စရ့လး အလီၢ်ကဝီၤန့ၣ်လီၤ. ကီၢ်စူၤရံအစီၤပၤစီၤဃစ့လးမၤနၢၤကွံာ်ကီၢ်အံၣ်စရ့လး အလီၢ်ကဝီၤခဲလၢာ်,

³³စးထီၣ်လၢထံကျိယၢ်ဒ့ၣ်အမုၢ်ထီၣ်, ယံၤဝဲတုၤလၢကလံၤစိးလၢ ဝ့ၢ်ဧရိၤဧ့ၢ်လၢအအိၣ်လၢထံကျိအၢ်နိၣ်အကၢၢ်နံၤန့ၣ်လီၤ. တၢ်လီၢ်အံၤအိၣ်ဃုာ်ဒီးလီၢ်ကဝီၤတဖၣ်လၢအမ့ၢ်ကီၢ်ကံးလဧးဒီး ကီၢ်ဘၤၡၣ်ဖဲပှၤကးဖိ, ပှၤရူၤဘ့ၣ်ဖိဒီးပှၤမုၢ်ထီၣ်မနၤၡ့ၤဖိအဒူၣ်တဖၣ်အိၣ်ဆိးဝဲန့ၣ်လီၤ.

³⁴ကယဲၢ်တၢ်အဂၤခဲလၢာ်လၢစီၤယ့ၤဟူမၤတ့ၢ်ဝဲဃုာ်ဒီးအတၢ်မၤ အဒူအဃိၤတဖၣ်န့ၣ်, ဘၣ်တၢ်ကွဲးနီၣ်အီၤလၢကီၢ်အံၣ်စရ့လးအစီၤပၤအလံာ်တၢ်စံၣ်စိၤ တဲစိၤအပူၤန့ၣ်လီၤ.

³⁵စီၤယ့ၤဟူသံဝဲဒီးဘၣ်တၢ်ခူၣ်လီၤကွံာ်အီၤလၢကီၢ်ၡၤမရံ အပူၤဒီးအဖိခွါစီၤယဟိအါဃးကဲထီၣ်စီၤပၤလၢအလီၢ်န့ၣ် လီၤ.

³⁶စီၤယ့ၤဟူပၢတၢ်လၢကီၢ်ၡၤမရံအပူၤဒ်ကီၢ်အံၣ်စရ့လးအစီၤပၤ အသိးခံဆံဃိးနံၣ်န့ၣ်လီၤ.