Read S'gaw Karen လံာ်စီၤပၤခံဘ့ၣ်တဘ့ၣ် 11 Bible Online

လံာ်စီၤပၤခံဘ့ၣ်တဘ့ၣ် 11 - S'gaw Karen bible

လံာ်စီၤပၤခံဘ့ၣ်တဘ့ၣ် 11

¹ဖဲစီၤပၤအဃၤစယၤအမိၢ်နီၢ်ဧသၤလယၤသ့ၣ်ညါဝဲဒၣ်လၢအဖိခွါ ဘၣ်တၢ်မၤသံအီၤတဘျီဃီန့ၣ်အဝဲဟ့ၣ်လီၤအကလုၢ်လၢစီၤပၤအဟံၣ် ဖိဃီဖိခဲလၢာ်ကဘၣ်တၢ်မၤသံကွံာ်အီၤန့ၣ်လီၤ.

²ထဲစီၤအဃၤစယၤအဖိခွါစီၤယိၤအၣ်တဂၤဧိၤပူၤဖျဲးဝဲဒၣ်န့ၣ် လီၤ. ဘူးလၢအဝဲကဘၣ်တၢ်မၤသံအီၤဃုာ်ဒီးပှၤအဂၤတဖၣ်, ဘၣ်ဆၣ်တၢ်မၤပူၤဖျဲးအီၤလၢအမုၢ်ဂၢ်နီၢ်ယဟိၤၡ့ဘၤ, လၢအမ့ၢ်စီၤပၤယဟိရၣ်အဖိမုၣ်ဒီးစီၤအဃၤစယၤအဒီပုၢ်ဝဲၢ်မုၣ် လၢအမိၢ်လီၤဆီဝဲ, အဝဲလဲၤဆှၢအီၤဒီးပိာ်မုၣ်လၢအကွၢ်အီၤန့ၣ်, ဆူလီၢ်မံဒၢးတဖျၢၣ်လၢအအိၣ်လၢယွၤအတၢ်လုၢ်ဟံၣ်အပူၤဒီးပာ် ခူသူၣ်အီၤဒ်သိးကပူၤဖျဲးလၢနီၢ်ဧသၤလယၤအတၢ်မၤသံအီၤန့ၣ် လီၤ.

³လၢဃုနံၣ်အတီၢ်ပူၤန့ၣ်, နီၢ်ယဟိၤၡ့ဘၤအံးထွဲကွၢ်ထွဲဖိသၣ် ပိာ်ခွါန့ၣ်ဒီးပာ်ခူသူၣ်အီၤလၢယွၤအတၢ်လုၢ်ဟံၣ်အပူၤဖဲနီၢ် ဧသၤလယၤပၢတၢ်ဒ်နီၢ်ပၤမုၣ်တဂၤအသိးအခါန့ၣ်လီၤ.

⁴ဘၣ်ဆၣ်လၢနွံနံၣ်တနံၣ်အပူၤန့ၣ်, ပှၤလုၢ်တၢ်အခိၣ်စီၤယဟိယဒါ, မၤလိာ်သုးခိၣ်သုးနၢ်တဖၣ်လၢအအိၣ်မူအိၣ်ဒါ, လၢတၢ်ခိးစီၤပၤအသးသမူဒီးတၢ်ပၢၤနူၢ်ဧိၤစီၤဧိၤအဂီၢ်, ဒီးတဲဘၣ်အဝဲသ့ၣ်ဒ်သိးကဟဲဆူယွၤအတၢ်လုၢ်ဟံၣ်, ဖဲအဝဲမၢအဝဲသ့ၣ်မၤတၢ်ဆိၣ်ဒီးအီၤ, လၢကအၢၣ်လီၤထွဲ တၢ်လၢအဝဲကူၣ်ကျဲၤမၤဝဲန့ၣ်လီၤ. အဝဲဒုးနဲၣ်အဝဲသ့ၣ်စီၤပၤအဃၤစယၤအဖိခွါ, စီၤယိၤအၣ်

⁵ဒီးဟ့ၣ်လီၤအဝဲသ့ၣ်တၢ်မၤလိာ်တဖၣ်ဒ်လာ်အံၤအသိးလီၤ. ဖဲသုဟဲဒ်သိးသုကမၤသုမူသုဒါလၢအိၣ်ဘှံးအနံၤန့ၣ်, သုဝဲပှၤသၢပူတပူကဘၣ်ခိးနူၢ်ဧိၤစီၤဧိၤ,

⁶အဂၤသၢပူတပူ, ကဘၣ်ပၢၤယွၤအတၢ်လုၢ်ဟံၣ်အတြဲၤ, ဒီးအဂၤသၢပူတပူကဘၣ်ဆၢထၢၣ်ခိးတၢ်ဖဲပှၤခိးတၢ်အဂၤတဖၣ် အလီၢ်ခံတြဲၤန့ၣ်လီၤ.

⁷ပှၤခံဖုလၢအမူအဒါတအိၣ်လၢမုၢ်အိၣ်ဘှံးနံၤန့ၣ်, ကဘၣ်ဆၢထၢၣ်ခိးတၢ်ဖဲယွၤအတၢ်လုၢ်ဟံၣ်လၢတၢ်ဒီဒၣ်အိၣ်ပှိၤစီၤ ပၤအဂီၢ်န့ၣ်လီၤ.

⁸သုကဘၣ်အိၣ်ခိးကဟုကယာ်စီၤပၤစီၤယိၤအၣ်အိၣ်ဒီးနးလၢအအိၣ် ထုးထီၣ်အသးတဖၣ်ဒီးအိၣ်ဒီးအီၤဖဲအဝဲလဲၤတၢ်တပူၤလၢ်လၢ်န့ၣ် လီၤ. ပှၤတဂၤလၢ်လၢ်လၢအဟဲဘူးဒီးသုန့ၣ်ကဘၣ်တၢ်မၤသံကွံာ်အီၤန့ၣ် လီၤ.

⁹သုးခိၣ်သုးနၢ်တဖၣ်စူၢ်ပှၤလုၢ်တၢ်အခိၣ်စီၤယဟိယဒါအတၢ်မၤလိာ် ပိာ်လီၤဒီးဟဲကိးအပှၤတဖၣ်ဆူအဝဲအအိၣ်, ပှၤတဖၣ်လၢတအိၣ်ဒီးမူဒါလၢမုၢ်အိၣ်ဘှံးနံၤမ့ၢ်ဂ့ၤ, ပှၤတဖၣ် လၢအအိၣ်ဒီးမူဒါလၢအိၣ်ဘှံးနံၤမ့ၢ်ဂ့ၤန့ၣ်လီၤ.

¹⁰အဝဲဟ့ၣ်လီၤသုးခိၣ်သုးနၢ်တဖၣ်လၢဘီတဖၣ်ဒီးကတီၤတဖၣ်လၢ အမ့ၢ်တ့ၢ်စီၤဒၤဝံးအတၢ်, ဒီးဘၣ်တၢ်ပာ်ဃးအီၤလၢတၢ်လုၢ်ဟံၣ်အပူၤ,

¹¹ဒီးအဝဲပာ်လီၤပှၤတဖၣ်လၢအအိၣ်ဒီးနးတဖၣ်လၢအထုးထီၣ်အသး, ဝးတရံးယွၤအတၢ်လုၢ်ဟံၣ်အမဲာ်ညါလၢကဒီဒၣ်အိၣ်ပှိၤစီၤပၤ အဂီၢ်န့ၣ်လီၤ.

¹²ဝံၤဒီးစီၤယဟိယဒါဆှၢထီၣ်စီၤယိၤအၣ်ဆူတၢ်ချၢ, ဒီးပာ်ထီၣ်ခိၣ်သလုးလၢအဝဲအခိၣ်လိၤ, ဒီးဟ့ၣ်လီၤအီၤစီၤပၤအတၢ်ပၢအတၢ်သိၣ်တၢ်သီတဖၣ်အလံာ်တဘ့ၣ် န့ၣ်လီၤ. ဝံၤဒီးစီၤယိၤအၣ်ဘၣ်တၢ်ဖှူအီၤဒီးဘၣ်တၢ်ဘိးဘၣ်သ့ၣ်ညါအီၤ ဒ်စီၤပၤအသိးန့ၣ်လီၤ. ပှၤဂီၢ်မုၢ်ဒဲအစုတဖၣ်ဒီးကိးထီၣ်ဝဲ, “မ်စီၤပၤမူဝဲလီၤစိၤလီၤထီတက့ၢ်.”

¹³နီၢ်ပၤမုၣ်ဧသၤလယၤနၢ်ဟူဘၣ်ပှၤခိးတၢ်ဖိတဖၣ်ဒီးပှၤဂီၢ်မုၢ် အတၢ်ကလုၢ်သီၣ်အဃိအဝဲလဲၤဝဲချ့ချ့ဆူယွၤအတၢ်လုၢ်ဟံၣ်ဖဲပှၤ ဂီၢ်မုၢ်ပာ်ဖှိၣ်အသးအလီၢ်န့ၣ်လီၤ.

¹⁴ဖဲန့ၣ်အဝဲထံၣ်ဘၣ်စီၤပၤအသီဆၢထၢၣ်ဝဲဖဲတၢ်လဲၤနုာ်လီၤဆူ ယွၤအတၢ်လုၢ်ဟံၣ်အကျဲစၢၤအထူၣ်အကပၤဒ်တၢ်လုၢ်တၢ်လၢ်အိၣ်ဝဲ အသိးန့ၣ်လီၤ. စီၤပၤဘၣ်တၢ်အိၣ်ဝးတရံးအီၤလၢသုးခိၣ်သုးနၢ်တဖၣ်ဒီးပှၤအူ ကွဲၤတဖၣ်, ဒီးပှၤဂီၢ်မုၢ်ကိးထီၣ်လၢတၢ်သူၣ်ခုသးခုအပူၤခဲလၢာ်ဒီးအူ ထီၣ်ကွဲၤတဖၣ်န့ၣ်လီၤ. နီၢ်ဧသၤလယၤဖှီယာ်အကူအသိးတဖၣ်လၢတၢ်သူၣ်ကိၢ်သးဂီၤအပူၤ ဒီးကိးထီၣ်ဝဲ, “တၢ်ပူထီၣ်ထီဒါ, တၢ်ပူထီၣ်ထီဒါ” န့ၣ်လီၤ.

¹⁵စီၤယဟိယဒါတအဲၣ်ဒိးဝဲလၢနီၢ်ဧသၤလယၤကဘၣ်တၢ်မၤသံအီၤလၢ ယွၤအတၢ်လုၢ်ဟံၣ်အလီၢ်ကဝီၤအပူၤန့ၣ်ဘၣ်. လၢတၢ်န့ၣ်အဃိအဝဲဟ့ၣ်လီၤအကလုၢ်ဆူသုးခိၣ်တဖၣ်အအိၣ်စံးဝဲ, “မိၤထီၣ်ကွံာ်အီၤလၢသုးမုၢ်တဖၣ်လၢအအိၣ်ရဲၣ်လီၤအသး, ခံဂ့ၢ်အဘၢၣ်စၢၤ, ဒီးပှၤတဂၤလၢ်လၢ်လၢအဂုာ်ကျဲးစၢးမၤပူၤ ဖျဲးအီၤန့ၣ်မၤသံကွံာ်အီၤတက့ၢ်.”

¹⁶အဝဲသ့ၣ်ဖီၣ်န့ၢ်အီၤ, လဲၤကိးအီၤဆူနူၢ်ဧိၤစီၤဧိၤဒီးဖဲ န့ၣ်အဝဲသ့ၣ်မၤသံကွံာ်အီၤလၢကသ့ၣ်လဲၤထီၣ်က့ၤလီၤအကျဲန့ၣ် လီၤ.

¹⁷ပှၤလုၢ်တၢ်အခိၣ်စီၤယဟိယဒါဒုးမၤစီၤပၤယိၤအၣ်ဒီးပှၤဂီၢ် မုၢ်လၢတၢ်အၢၣ်လီၤဒီးယွၤတမံၤလၢအဝဲသ့ၣ်ကမ့ၢ်ယွၤအပှၤဂီၢ် မုၢ်န့ၣ်လီၤ. အဝဲမၤစ့ၢ်ကီးတၢ်အၢၣ်လီၤတမံၤလၢစီၤပၤဒီးပှၤဂီၢ်မုၢ်အဘၢၣ် စၢၤန့ၣ်လီၤ.

¹⁸ဝံၤဒီးပှၤဂီၢ်မုၢ်လဲၤဆူဘဧၤလးအတၢ်လုၢ်ဟံၣ်, ဒီးမၤလီၤပှီၢ်ကွံာ်အီၤန့ၣ်လီၤ. အဝဲသ့ၣ်မၤကၢ်လီၤကလဲကွံာ် တၢ်လုၢ်လီၢ်တဖၣ်ဒီးတၢ်ဂီၤတၢ်ဖီၣ်တဖၣ်, ဒီးမၤသံကွံာ်ဘဧၤလးအပှၤလုၢ်တၢ်အခိၣ်စီၤမးတၣ်, ဖဲတၢ်လုၢ်လီၢ်တဖၣ်အမဲာ်ညါန့ၣ်လီၤ. စီၤယဟိယဒါပာ်လီၤပှၤပၢၤတၢ်ဖိတဖၣ်ဖဲယွၤအတၢ်လုၢ်ဟံၣ်,

¹⁹ဝံၤဒီးအဝဲဒီးသုးခိၣ်သုးနၢ်တဖၣ်, ပှၤခိးစီၤပၤအသးသမူ တဖၣ်, ဒီးပှၤပၢၤနူၢ်ဧိၤစီၤဧိၤတဖၣ်လဲၤဃုာ်ဒီးကဟုကယာ်စီၤပၤလၢ ယွၤအတၢ်လုၢ်ဟံၣ်ဆူနူၢ်ဧိၤစီၤဧိၤဒီးပှၤဂီၢ်မုၢ်ခဲလၢာ်ပိာ်ထွဲ အခံန့ၣ်လီၤ. စီၤယိၤအၣ်လဲၤနုာ်ခီဖျိတၢ်ခိးတၢ်အတြဲၤဒီး ဟံးန့ၢ်အလီၢ်လၢစီၤပၤအလီၢ်ပစိာ်အဖီခိၣ်န့ၣ်လီၤ.

²⁰ကယဲၢ်ပှၤဂီၢ်မုၢ်ခဲလၢာ်ပှဲၤဝဲဒီးတၢ်သူၣ်ဖှံသးညီ, ဒီးဝ့ၢ်န့ၣ်အိၣ်ဘှ့ၣ်အိၣ်ဘှီၣ်ဝဲမ့ၢ်လၢခဲအံၤနီၢ်ပၤမုၣ်ဧသၤလယၤ ဘၣ်တၢ်မၤသံကွံာ်အီၤလၢနူၢ်ပူၤစီၤပူၤလံအဃိန့ၣ် လီၤ.

²¹စီၤယိၤအၣ်ကဲထီၣ်ကီၢ်ယူဒၤအစီၤပၤဖဲအသးအိၣ်နွံနံၣ်န့ၣ်လီၤ.