Read S'gaw Karen လံာ်စီၤပၤခံဘ့ၣ်တဘ့ၣ် 17 Bible Online

လံာ်စီၤပၤခံဘ့ၣ်တဘ့ၣ် 17 - S'gaw Karen bible

လံာ်စီၤပၤခံဘ့ၣ်တဘ့ၣ် 17

¹လၢကီၢ်ယူဒၤအစီၤပၤအၤဃးပၢတၢ်တဆံခံနံၣ်တနံၣ်အပူၤန့ၣ်, စီၤအ့လၤအဖိခွါစီၤဟိၤၡ့ကဲထီၣ်ကီၢ်အံၣ်စရ့လးအစီၤပၤ ဒီးအဝဲပၢတၢ်လၢၡၤမရံအပူၤခွံနံၣ်န့ၣ်လီၤ.

²အဝဲမၤတ့ၢ်တၢ်ဒဲးဘးထီဒါယွၤ, ဘၣ်ဆၣ်ဒီးတအါထဲသိးဘၣ်စီၤ ပၤတဖၣ်လၢအပၢတ့ၢ်တၢ်လၢကီၢ်အံၣ်စရ့လး, လၢအမဲာ်ညါန့ၣ်ဘၣ်.

³ကီၢ်အၤၡူၢ်အစီၤပၤဖးဒိၣ်ၡၤလမၤန့စ့ၢ်ဒုးတၢ်ထီဒါအီၤန့ၣ် လီၤ. စီၤဟိၤၡ့ဟ့ၣ်လီၤအသးဆူစီၤၡၤလမၤန့စ့ၢ်အစုပူၤ, ဒီးဟ့ၣ်အီၤတၢ်ခိတၢ်သွဲကိးနံၣ်ဒဲးန့ၣ်လီၤ.

⁴ဘၣ်ဆၣ်, ဘၣ်တနံၤန့ၣ်, စီၤဟိၤၡ့ဆှၢလီၤပှၤစိာ်တၢ်ကစီၣ်ဆူ ကီၢ်အဲၤကူပတူးအစီၤပၤစိအအိၣ်, ဒီးဃ့အီၤတၢ်မၤစၢၤ, ဒီးဆိကတီၢ်ကွံာ်အတၢ်ဟ့ၣ်တနံၣ်တဘျီအတၢ်ခိတၢ်သွဲဆူ ကီၢ်အၤၡူၢ်န့ၣ်လီၤ. တုၤစီၤၡၤလမၤန့စ့ၢ်သ့ၣ်ညါတၢ်အံၤ န့ၣ်, အဝဲမၢပှၤဖီၣ်စီၤဟိၤၡ့ဒီးဒၢနုာ်အီၤလၢဃိာ်ပူၤန့ၣ်လီၤ.

⁵ဝံၤဒီးစီၤၡၤလမၤန့စ့ၢ်နုာ်လီၤဒုးကီၢ်အံၣ်စရ့လးဒီး ကဝီၤဃးၡၤမရံန့ၣ်လီၤ. လၢတၢ်ကဝီၤဃးသၢနံၣ်တနံၣ်အပူၤ,

⁶လၢအမ့ၢ်စီၤဟိၤၡ့ပၢတၢ်ခွံနံၣ်တနံၣ်န့ၣ်, ကီၢ်အၤၡူၢ်အစီၤပၤဖးဒိၣ်မၤန့ၢ်ၡၤမရံဒီးစိာ်ထီၣ်ကွံာ်ပှၤ အံၣ်စရ့လးဖိတဖၣ်ဆူကီၢ်အၤၡူၢ်ဒ်ပှၤဘၣ်တၢ်စၢဃာ်တဖၣ်အသိး, ဒီးပာ်လီၤအဝဲသ့ၣ်ပှၤတနီၤလၢဝ့ၢ်ဃၤလၤအပူၤ, တနီၤဘူးဒီးထံကျိဃၤဘိၢ်လၢကီၢ်ဆၣ်ကိစၣ်အပူၤ, ဒီးတနီၤလၢကီၢ်မံးဒယၣ်အဝ့ၢ်တဖၣ်အပူၤန့ၣ်လီၤ.

⁷ၡၤမရံလီၤကွံာ်ဝဲ, မ့ၢ်လၢပှၤအံၣ်စရ့လးဖိတဖၣ်မၤတ့ၢ်တၢ် ဒဲးဘးထီဒါယွၤအဝဲသ့ၣ်အကစၢ်ယွၤ, လၢအမၤပူၤဖျဲးတ့ၢ်အဝဲသ့ၣ်လၢကီၢ်အဲၤကူပတူးအစီၤပၤအစု ပူၤဒီးဒုးဟးထီၣ်ကွံာ်အဝဲသ့ၣ်လၢကီၢ်အဲၤကူပတူးအပူၤ, အဃိန့ၣ်လီၤ. အဝဲသ့ၣ်ဘူၣ်ထီၣ်ဘါထီၣ်ကစၢ်အဂၤတဖၣ်,

⁸ပိာ်ထွဲလုၢ်လၢ်တဖၣ်လၢအအိၣ်ဒီးပှၤဂီၢ်မုၢ်အခံ, ပှၤဂီၢ်မုၢ်လၢယွၤဟီထီၣ်ကွံာ်အီၤဖဲအဝဲအပှၤဂီၢ်မုၢ်ဟဲနုာ် လီၤအခါ, ဒီးတူၢ်လိာ်မၤထွဲလုၢ်လၢ်တဖၣ်လၢကီၢ်အံၣ်စရ့လး အစီၤပၤတဖၣ်ဒုးအိၣ်ထီၣ်တ့ၢ်ဝဲန့ၣ်လီၤ.

⁹ပှၤအံၣ်စရ့လးဖိတဖၣ်မၤတ့ၢ်တၢ်တဖၣ်လၢယွၤ, အဝဲသ့ၣ်အကစၢ်ယွၤတဘၣ်အသးန့ၣ်လီၤ. အဝဲသ့ၣ်ဘှီထီၣ်ပှၤတစူၢ်တနာ်ယွၤအတၢ်ဘူၣ်ထီၣ်ဘါထီၣ် အလီၢ်တဖၣ်လၢကယဲၢ်အဝဲသ့ၣ်အဝ့ၢ်ခဲလၢာ်အပူၤ, စးထီၣ်လၢသဝီအဆံးကတၢၢ်ဖိတုၤလီၤလၢဝ့ၢ်အဒိၣ်ကတၢၢ်န့ၣ်လီၤ.

¹⁰ဒီးလၢကယဲၢ်တၢ်လူၢ်ခဲလၢာ်အဒီခိၣ်ဒီးလၢကယဲၢ်သ့ၣ်လၢအအိၣ် ဒီးအကဒုခဲလၢာ်အဖီလာ်န့ၣ်အဝဲသ့ၣ်ပာ်လီၤလၢၢ်ထူၣ်တဖၣ်ဒီးတၢ် ဂီၤတၢ်ဖီၣ်တဖၣ်လၢအမ့ၢ်ကစၢ်မုၣ်အၡ့ရၤအဂီၤ,

¹¹ဒီးအဝဲသ့ၣ်ဆိၣ်ကဲၤတၢ်နၢမူလၢကယဲၢ်ပှၤတစူၢ်တနာ်ယွၤအတၢ်လုၢ် လီၢ်ခဲလၢာ်အဖီခိၣ်, ပိာ်ထွဲတၢ်မၤလၢပှၤဂီၢ်မုၢ်လၢယွၤဟီထီၣ်တ့ၢ်အီၤလၢထံဧိၤ ကီၢ်ဧိၤအပူၤတဖၣ်မၤဝဲန့ၣ်လီၤ. အဝဲသ့ၣ်ထိၣ်ဂဲၤထီၣ်ယွၤအတၢ်သးထီၣ်လၢကယဲၢ်အဝဲသ့ၣ်အ တၢ်မၤအအၢအသီတဖၣ်,

¹²ဒီးတစူၢ်ဘၣ်ယွၤအတၢ်မၤလိာ်လၢအမ့ၢ်, တၢ်တဘၣ်ဘူၣ်ထီၣ်ဘါထီၣ် တၢ်ဂီၤတၢ်ဖီၣ်ဘၣ်, န့ၣ်လီၤ.

¹³ယွၤဆှၢလီၤတ့ၢ်အပှၤစိာ်တၢ်ကစီၣ်တဖၣ်, ဒီးအဝံတဖၣ်လၢကဟ့ၣ် ပလီၢ်ကီၢ်အံၣ်စရ့လးဒီးကီၢ်ယူဒၤဒ်အံၤ, “ပာ်တ့ၢ်ကွံာ်သုကျဲအၢကျဲသီတဖၣ်ဒီးစူၢ်ယတၢ်မၤလိာ်တဖၣ် လၢအအိၣ်လၢယူဒၤတၢ်သိၣ်တၢ်သီ, လၢယဟ့ၣ်လီၤသုမိၢ်ပၢ်ဖံဖုလၢပျၢၤတဖၣ်ဒီးယဟ့ၣ်ခီလီၤအီၤ ဆူသုအိၣ်ခီဖျိယခ့ယပှၤဝံတဖၣ်န့ၣ်တက့ၢ်.”

¹⁴ဘၣ်ဆၣ်အဝဲသ့ၣ်တစူၢ်ဝဲဒၣ်ဘၣ်. အဝဲသ့ၣ်အခိၣ်ကိၤဝဲဒ်အမိၢ်ပၢ် ဖံဖုလၢပျၢၤတဖၣ်အသိး, ပှၤလၢအတနာ်ဘၣ်ယွၤအဝဲသ့ၣ်အကစၢ်ယွၤန့ၣ်လီၤ.

¹⁵အဝဲသ့ၣ်ဂ့ၢ်လိာ်လၢကစူၢ်အဝဲအတၢ်မၤလိာ်တဖၣ်, အဝဲသ့ၣ်တတိၢ်န့ၢ်ဖံးဃာ်ဘၣ်တၢ်အၢၣ်လီၤအီလီၤလၢယွၤမၤဝဲ ဒီးအဝဲသ့ၣ်အမိၢ်ပၢ်ဖံဖုလၢပျၢၤတဖၣ်, ဒီးအဝဲသ့ၣ်တပာ်လ့ၢ်ပာ်ကါဘၣ်ယွၤအတၢ်ဟ့ၣ်ပလီၢ်တဖၣ်န့ၣ်ဘၣ်. အဝဲသ့ၣ်ဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်လၢအလုၢ်အပှ့ၤတအိၣ် ဒီးအနီၢ်ကစၢ်ဒၣ်ဝဲကဲထီၣ်ပှၤတဖၣ်လၢအလုၢ်အပှ့ၤတအိၣ်ဒီးအဝဲ သ့ၣ်ပိာ်ထွဲလုၢ်လၢ်တဖၣ်လၢအအိၣ်ဒီးပှၤကလုာ်တဖၣ်လၢအအိၣ်ဝး တရံးအီၤ, ဒီးတစူၢ်ဘၣ်ယွၤအတၢ်မၤလိာ်လၢအသု တမၤဒိးအဝဲသ့ၣ်တဖၣ်တဂ့ၤ, န့ၣ်ဘၣ်.

¹⁶အဝဲသ့ၣ်ဘိးဃၣ်ကွံာ်ကယဲၢ်ယွၤ, အဝဲသ့ၣ်အကစၢ်ယွၤအတၢ်ဘူၣ်တၢ်ဘါ အတၢ်သိၣ်တၢ်သီခဲလၢာ်ဒီးသိန့ၢ်ဂီၤဖံးဖါခံဒုအဂီၤလၢ တိၢ်, စ့ဒီးထး, လၢကဘူၣ်ထီၣ်ဘါထီၣ်ဝဲအဂီၢ်န့ၣ်လီၤ. အဝဲသ့ၣ်မၤစ့ၢ်ကီးတၢ်ဂီၤတၢ်ဖီၣ်တခါလၢအမ့ၢ် ကစၢ်မုၣ်အၡ့ရၤအဂီၤ, ဘူၣ်ထီၣ်ဘါထီၣ်ဆၣ်ဧိၤဖီဧိၤတဖၣ်, ဒီးမၤကစၢ်ဘဧၤလးအတၢ်မၤန့ၣ်လီၤ.

¹⁷အဝဲသ့ၣ်လုၢ်ထီၣ်ပာ်ထီၣ်အဖိခွါတဖၣ်ဒီးအဖိမုၣ်တဖၣ်ဒ်တၢ်ဆိၣ် ကဲၤနၢမူဆူပှၤတစူၢ်တနာ်ယွၤအကစၢ်တဖၣ်အအိၣ်လီၤ. အဝဲသ့ၣ်သံကွၢ်တၢ်လၢပှၤသံအကလၤဒီး, ပှၤဖးတၢ်ဟဲဝံဟဲစိာ် တဖၣ်အအိၣ်ဒီးအဝဲသ့ၣ်ဟ့ၣ်လီၤအသးလၢာ်လၢာ်ဆ့ဆ့ဆူတၢ်မၤတၢ် လၢအကမၣ်လၢယွၤအမဲာ်ညါ, သတးဒီးထိၣ်ဂဲၤအဝဲအတၢ်သးထီၣ်န့ၣ်လီၤ.

¹⁸ယွၤအသးဒိၣ်ထီၣ်ပှၤအံၣ်စရ့လးဖိတဖၣ်ဒီးဟီထီၣ်ကွံာ်အဝဲသ့ၣ် လၢအမဲာ်ညါ, ပာ်တ့ၢ်ဒၣ်ထဲကီၢ်ယူဒၤအဘီအမုၢ်ဧိၤန့ၣ်လီၤ.

¹⁹ဘၣ်ဆၣ်ကီၢ်ယူဒၤအပှၤဂီၢ်မုၢ်တဖၣ်ဒၣ်လဲာ်တစူၢ်ဘၣ်ယွၤ, အဝဲသ့ၣ်အကစၢ်ယွၤအတၢ်ဘူၣ်တၢ်ဘါအတၢ်သိၣ်တၢ်သီ တဖၣ်န့ၣ်ဘၣ်. အဝဲသ့ၣ်ကွၢ်လိမၤဒိးလုၢ်လၢ်တဖၣ်လၢကီၢ်အံၣ်စရ့ လးအပှၤဂီၢ်မုၢ်တဖၣ်တူၢ်လိာ်ဝဲန့ၣ်လီၤ.

²⁰ယွၤညိကွံာ်ကယဲၢ်ပှၤအံၣ်စရ့လးဖိခဲလၢာ်စံၣ်ညီၣ်အဝဲသ့ၣ်ဒီး ဟ့ၣ်လီၤကွံာ်အဝဲသ့ၣ်ဆူဒုၣ်အၢဒါသီတဖၣ်အစုပူၤ, တုၤလၢ, လၢခံကတၢၢ်အဝဲနီၣ်ထီၣ်ကွံာ်အဝဲသ့ၣ်လၢအမဲာ်ညါတစု န့ၣ်လီၤ.

²¹တုၤယွၤမၤလီၤဖးကွံာ်ကီၢ်အံၣ်စရ့လးလၢကီၢ်ယူဒၤဝံၤအလီၢ် ခံန့ၣ်, ပှၤအံၣ်စရ့လးဖိတဖၣ်ပာ်ထီၣ်စီၤနဘးအဖိခွါစီၤယၤရၤဘၣ်လၢ အဝဲသ့ၣ်အစီၤပၤန့ၣ်လီၤ. စီၤယၤရၤဘၣ်ဒုးကဲထီၣ်အဝဲသ့ၣ်လၢပှၤစူးကွံာ်ညိကွံာ်ယွၤ, ဒီးဆှၢဃီၤအဝဲသ့ၣ်ဆူတၢ်ဒဲးဘးလီၤပျံၤလီၤဖုးတဖၣ်အပူၤ န့ၣ်လီၤ.

²²အဝဲသ့ၣ်ပိာ်ထွဲစီၤယၤရၤဘၣ်အခံ, ဒီးမၤထွဲကယဲၢ်တၢ်ဒဲးဘး ခဲလၢာ်လၢစီၤယၤရၤဘၣ်မၤတ့ၢ်ဝဲ,

²³တုၤလၢ, လၢခံကတၢၢ်ယွၤနီၣ်ထီၣ်ဟီထီၣ်ကွံာ်အဝဲသ့ၣ်လၢအမဲာ် ညါ, ဒ်အဝဲဟ့ၣ်ပလီၢ်တ့ၢ်ဝဲခီဖျိအခ့အပှၤဝံတဖၣ်လၢကမၤဝဲဒၣ်န့ၣ် လီၤ. လၢတၢ်န့ၣ်အဃိကီၢ်အံၣ်စရ့လးအပှၤဂီၢ်မုၢ်ဘၣ်တၢ်စိာ်မၢကဲကုၢ် ကွံာ်အီၤဆူကီၢ်အၤၡူၢ်အပူၤဖဲအဝဲသ့ၣ်အိၣ်ဆိးဒံးဝဲန့ၣ်လီၤ.

²⁴ကီၢ်အၤၡူၢ်အစီၤပၤဖးဒိၣ်ကိးန့ၢ်ပှၤဂီၢ်မုၢ်လၢကီၢ်ဘၤဘူၤလိၣ်အဝ့ၢ်တဖၣ်, လၢအမ့ၢ်ဝဲကူသး, ဧးဝါ, ဃမါသးဒီးစဖါရဝံၣ်အပူၤဒီးပာ်လီၤ န့ၢ်အတၢ်အိၣ်တၢ်ဆိးအလီၢ်လၢၡၤမရံအဝ့ၢ်တဖၣ်အပူၤ, လၢပှၤအံၣ်စရ့လးဖိလၢတၢ်စိာ်မၢကဲကုၢ်ကွံာ်အီၤတဖၣ်အလီၢ်န့ၣ်လီၤ. အဝဲသ့ၣ်ဟံးန့ၢ်ဝ့ၢ်တဖၣ်အံၤဒီးအိၣ်ဝဲဆိးဝဲဖဲန့ၣ်လီၤ.

²⁵ဖဲအဝဲသ့ၣ်ဘၣ်တၢ်ပာ်လီၤအီၤသီသီန့ၣ်, အဝဲသ့ၣ်တဘူၣ်ထီၣ်ဘါ ထီၣ်ယွၤဘၣ်. ဒီးလၢတၢ်န့ၣ်အဃိ, ယွၤဆှၢလီၤခ့ယုၢ်တဖၣ်လၢအမၤသံပှၤတနီၤ လၢအဝဲသ့ၣ်အကျါန့ၣ်လီၤ.

²⁶ကီၢ်အၤၡူၢ်အစီၤပၤဖးဒိၣ်ဘၣ်တၢ်တဲဘၣ်အီၤလၢ, ပှၤဂီၢ်မုၢ်လၢအဝဲဒုးအိၣ်ဒုးဆိးအီၤဖဲကီၢ်ၡၤမရံအဝ့ၢ်တဖၣ် အပူၤန့ၣ်, တသ့ၣ်ညါကီၢ်န့ၣ်အကစၢ်အတၢ်သိၣ်တၢ်သီအဃိ, ကစၢ်န့ၣ်ဆှၢလီၤခ့ယုၢ်တဖၣ်လၢအမၤသံကွံာ်အဝဲသ့ၣ်န့ၣ်လီၤ.

²⁷လၢတၢ်န့ၣ်အဃိစီၤပၤဖးဒိၣ်ဟ့ၣ်လီၤအကလုၢ်စံးဝဲ, “ဆှၢကဒါက့ၤပှၤလုၢ်အခိၣ်တဖၣ်အကျါတဂၤလၢပဟဲ က့ၤကိးအီၤဒ်ပှၤဘၣ်တၢ်စၢဃာ်အသိးန့ၣ်, မၢအက့ၤကဒါက့ၤဒီးအိၣ်ဆိးလၢကသိၣ်လိန့ၢ်ပှၤဂီၢ်မုၢ်လၢကီၢ် န့ၣ်အကစၢ်အတၢ်သိၣ်တၢ်သီတက့ၢ်.

²⁸လၢတၢ်န့ၣ်အဃိကီၢ်အံၣ်စရ့လးအပှၤလုၢ်တၢ်အခိၣ်တဂၤလၢ, အဘၣ်တၢ်ဟဲကိးအီၤလၢၡၤမရံန့ၣ်, လဲၤဒီးအိၣ်ဆိးဝဲဖဲဝ့ၢ်ဘ့ၤသ့လး, တၢ်လီၢ်ဖဲအဝဲသိၣ်လိပှၤဂီၢ်မုၢ်လၢကဘူၣ်ထီၣ် ဘါထီၣ်ယွၤဒ်လဲၣ်န့ၣ်လီၤ.

²⁹ဘၣ်ဆၣ်ပှၤဂီၢ်မုၢ်လၢအသူၣ်လီၤအတၢ်အိၣ်တၢ်ဆိးအလီၢ်ဖဲ ၡၤမရံအပူၤန့ၣ်, မၤဒံးဒၣ်အတၢ်ဂီၤတၢ်ဖီၣ်ဒၣ်ဝဲတဖၣ်ဒီးအဝဲ သ့ၣ်ပာ်လီၤဝဲဒၣ်လၢတၢ်ဘူၣ်ထီၣ်ဘါထီၣ်အလီၢ်တဖၣ်, လၢပှၤအံၣ်စရ့လးဖိတဖၣ်သူၣ်ထီၣ်တ့ၢ်ဝဲအပူၤန့ၣ်လီၤ. ပှၤတကရူၢ်ဘၣ်တကရူၢ်လၢအလီၤဆီလိာ်အသးန့ၣ်မၤတၢ်ဂီၤတၢ်ဖီၣ် တဖၣ်လၢဝ့ၢ်တဖၣ်လၢအဝဲသ့ၣ်အိၣ်ဆိးဝဲအပူၤန့ၣ်လီၤ.

³⁰ကီၢ်ဘၤဘူၤလိၣ်အပှၤဂီၢ်မုၢ်မၤဝဲတၢ်ဂီၤတၢ်ဖီၣ်တဖၣ်လၢကစၢ် စူးကိၤသးဘနိးအဂီၤ, ကူသးအပှၤဂီၢ်မုၢ်မၤဝဲတၢ်ဂီၤတၢ်ဖီၣ်တဖၣ်လၢန့ရကၤလးအဂီၤ, ဃမါသးအပှၤဂီၢ်မုၢ်မၤဝဲတၢ်ဂီၤတၢ်ဖီၣ်တဖၣ်လၢအၡံမၤအဂီၤ,

³¹ဧးဝါအပှၤဂီၢ်မုၢ်မၤဝဲတၢ်ဂီၤတၢ်ဖီၣ်တဖၣ်လၢနံးဘဃးဒီးတၢ် တးအဂီၤတဖၣ်, ဒီးစဖၤရဝံၣ်အပှၤဂီၢ်မုၢ်လုၢ်ထီၣ်အဖိတဖၣ် ဒ်တၢ်လုၢ်မ့ၣ်အူတဖၣ်အသိးဆူအဝဲသ့ၣ်အကစၢ်တဖၣ်လၢ အမ့ၢ်အဒြၤမ့လ့းဒီးဧၤနမ့လးအအိၣ်န့ၣ်လီၤ.

³²ပှၤဂီၢ်မုၢ်တဖၣ်အံၤဘူၣ်ထီၣ်ဘါထီၣ်စ့ၢ်ကီးယွၤဒီးဃုထၢထီၣ် ပှၤလၢအဝဲသ့ၣ်အကျါပှၤကလုာ်ကလုာ်, လၢကမၤတၢ်ဒ်ပှၤလုၢ်တၢ်အခိၣ်တဖၣ်အသိးလၢပှၤတစူၢ်တနာ်ယွၤတဖၣ် အတၢ်ဘူၣ်ထီၣ်ဘါထီၣ်အလီၢ်တဖၣ်, ဒီးဒ်သိးကလုၢ်ထီၣ်တၢ်လုၢ်တၢ်ပာ်တဖၣ်လၢအဝဲသ့ၣ်အဂီၢ်ဖဲန့ၣ်, န့ၣ်လီၤ.

³³လၢတၢ်န့ၣ်အဃိ, အဝဲသ့ၣ်ဘူၣ်ထီၣ်ဘါထီၣ်ယွၤ, ဘၣ်ဆၣ်အဝဲသ့ၣ်ဘူၣ်ထီၣ်ဘါထီၣ်စ့ၢ်ကီးအဝဲသ့ၣ်အကစၢ်ဒၣ်ဝဲ တဖၣ်ဒ်ထံကီၢ်လၢအဝဲသ့ၣ်ဟဲက့ၤဝဲအတၢ်လုၢ်တၢ်လၢ်တဖၣ်အိၣ်ဝဲ အသိးန့ၣ်လီၤ.

³⁴အဝဲသ့ၣ်မၤထွဲဒံးတၢ်လုၢ်တၢ်လၢ်အလီၢ်လံၤတဖၣ်တုၤလၢမုၢ်မဆါ တနံၤအံၤန့ၣ်လီၤ. အဝဲသ့ၣ်တဘူၣ်ထီၣ်ဘါထီၣ်ယွၤမ့ၢ်ဂ့ၤ, တဒိကနၣ်တၢ်ဘူၣ်တၢ်ဘါအတၢ်သိၣ်တၢ်သီတဖၣ်ဒီးတၢ်မၤလိာ်တဖၣ်မ့ၢ် ဂ့ၤ, လၢအဝဲဟ့ၣ်လီၤတ့ၢ်အီၤဆူစီၤယၤကိာ်လၢအကိးက့ၤဝဲအမံၤလၢ စီၤအံၣ်စရ့လးအစၢၤအသွဲၣ်, တဖၣ်အအိၣ်, န့ၣ်ဘၣ်.

³⁵ယွၤမၤတ့ၢ်တၢ်အၢၣ်လီၤအီလီၤတမံၤဒီးအဝဲသ့ၣ်, ဒီးမၤလိာ်တ့ၢ်အဝဲသ့ၣ်စံးဝဲ, “ဘူၣ်ထီၣ်ဘါထီၣ်ကစၢ်အဂၤတဖၣ် တဂ့ၤ. တီၤလီၤလၢအဝဲသ့ၣ်အမဲာ်ညါမ့ၢ်ဂ့ၤ, မၤအဝဲသ့ၣ်အတၢ်မ့ၢ်ဂ့ၤဒီးလုၢ်ထီၣ်တၢ်လုၢ်တၢ်ပာ်တဖၣ်ဆူအဝဲ သ့ၣ်မ့ၢ်ဂ့ၤတဂ့ၤ.

³⁶သုကဘၣ်စူၢ်ယၤ, ယွၤ, လၢအထုးထီၣ်ကွံာ်သုလၢကီၢ်အဲၤကူ ပတူးအပူၤ, အိၣ်ဒီးတၢ်စိတၢ်ကမီၤဖးဒိၣ်ဒီးတၢ်ဂံၢ်ဆူၣ်ဘါ ဆူၣ်န့ၣ်လီၤ. သုကဘၣ်ချံးခီၣ်တီၤလီၤလၢယမဲာ်ညါဒီးလုၢ်ထီၣ်တၢ်လုၢ်တၢ်ပာ် တဖၣ်ဆူယအိၣ်န့ၣ်လီၤ.

³⁷ထီဘိသုကဘၣ်စူၢ်တၢ်ဘူၣ်တၢ်ဘါအတၢ်သိၣ်တၢ်သီတဖၣ်ဒီးတၢ်မၤ လိာ်တဖၣ်လၢယကွဲးန့ၢ်တ့ၢ်သုန့ၣ်လီၤ. သုတဘၣ်စူၢ်ကစၢ်အဂုၤအဂၤတဖၣ်,

³⁸ဒီးသုတဘၣ်သးပ့ၤနီၣ်တၢ်အၢၣ်လီၤအီလီၤလၢယမၤတ့ၢ်ဒီးသု န့ၣ်ဘၣ်.

³⁹သုကဘၣ်စူၢ်ယၤ, ယွၤ, သုကစၢ်ယွၤ, ဒီးယကမၤပူၤမၤဖျဲးသုလၢ သုဒုၣ်သုဒါတဖၣ်န့ၣ်လီၤ.”

⁴⁰ဘၣ်ဆၣ်ပှၤဂီၢ်မုၢ်သ့ၣ်တဖၣ်န့ၣ်တဒိကနၣ်အီၤဘၣ်. ဒီးအဝဲသ့ၣ်မၤထွဲဒံးဒၣ်အဝဲသ့ၣ်အလုၢ်အလၢ်အလီၢ်လံၤတဖၣ်န့ၣ်လီၤ.

⁴¹လၢတၢ်န့ၣ်အဃိ, ပှၤဂီၢ်မုၢ်သ့ၣ်တဖၣ်န့ၣ်, ဘူၣ်ထီၣ်ဘါထီၣ်ယွၤ, ဘၣ်ဆၣ်အဝဲသ့ၣ်ဘူၣ်ထီၣ်ဘါထီၣ်စ့ၢ်ကီးအတၢ်ဂီၤတၢ်ဖီၣ်တဖၣ်, ဒီးတုၤလီၤလၢမုၢ်မဆါတနံၤအံၤန့ၣ်အဝဲသ့ၣ်အစၢၤအသွဲၣ်တဖၣ် မၤဒံးဒၣ်တၢ်တမံၤဃီဒ်န့ၣ်အသိးလီၤ.