Read S'gaw Karen လံာ်စီၤပၤခံဘ့ၣ်တဘ့ၣ် 24 Bible Online

လံာ်စီၤပၤခံဘ့ၣ်တဘ့ၣ် 24 - S'gaw Karen bible

လံာ်စီၤပၤခံဘ့ၣ်တဘ့ၣ် 24

¹ဖဲစီၤယဟိၤယါကံၣ်မ့ၢ်စီၤပၤအခါန့ၣ်ကီၢ်ဘၤဘူၤလိၣ်အစီၤပၤ နဘူၤကးန့စၢ်ဟဲနုာ်လီၤဒုးကီၢ်ယူဒၤ, ဒီးလၢသၢနံၣ်အတီၢ်ပူၤန့ၣ်စီၤယဟိၤယါကံၣ်ဘၣ်တၢ်မၢဆူၣ်အီၤ လၢကအိၣ်လၢအဝဲအတၢ်ပၢအဖီလာ်န့ၣ်လီၤ. အန့ၣ်ဝံၤဒီးအဝဲပူထီၣ်တၢ်န့ၣ်လီၤ.

²ယွၤမၢလီၤသုးဖိအဖုတဖၣ်လၢအမ့ၢ်, ပှၤဘၤဘူၤလိၣ်ဖိ, ပှၤစူၤရံဖိ, ပှၤမိၤအးဖိဒီးပှၤဧၣ်မိၣ်ဖိထီဒါစီၤယဟိၤယါ ကံၣ်လၢတၢ်ကမၤဟးဂီၤကွံာ်ကီၢ်ယူဒၤအဂီၢ်, ဒ်ယွၤစံးတ့ၢ်ခီဖျိအခ့အပှၤဝံတဖၣ်, လၢကမၤဝဲအသိးန့ၣ်လီၤ.

³တုၤယွၤဟ့ၣ်လီၤအကလုၢ်တဘျီဃီန့ၣ်, တၢ်အံၤမၤအသးဒ်သိးကနီၣ် ထီၣ်ကွံာ်ကီၢ်ယူဒၤအပှၤဂီၢ်မုၢ်လၢအမဲာ်ညါမ့ၢ်လၢတၢ်ဒဲးဘး တဖၣ်လၢစီၤပၤမနၤၡ့ၤမၤတ့ၢ်ဝဲအဃိ,

⁴ဒီးလီၤဆီဒၣ်တၢ်မ့ၢ်လၢအဝဲမၤသံကွံာ်ပှၤတဖၣ်လၢအတၢ်ကမၣ် တအိၣ်ဘၣ်အဃိန့ၣ်လီၤ. ယွၤပျၢ်ကွံာ်စီၤမနၤၡ့ၤအတၢ်ကမၣ်တကဲဘၣ်, လၢတၢ်ဂ့ၢ်န့ၣ်အဃိလီၤ.

⁵ကယဲၢ်တၢ်အဂၤလၢစီၤယဟိၤယါကံၣ်မၤတ့ၢ်ဝဲန့ၣ်ဘၣ်တၢ်ကွဲးနီၣ် အီၤလၢကီၢ်ယူဒၤအစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.

⁶စီၤယဟိၤယါကံၣ်သံဝဲ, ဒီးအဖိခွါစီၤယဟိၤယါခံၣ်ကဲထီၣ်စီၤ ပၤလၢအလီၢ်န့ၣ်လီၤ.

⁷ကီၢ်အဲၤကူပတူးအစီၤပၤဒီးအဝဲအသုးမုၢ်တဟးထီၣ်ကဒီးလၢၤလၢ ကီၢ်အဲၤကူပတူးအပူၤနီတစုလၢၤဘၣ်. မ့ၢ်လၢခဲအံၤကီၢ်ဘၤဘူၤလိၣ်အစီၤပၤပၢကယဲၢ်လီၢ်ကဝီၤလၢအဘၣ် ဃးဒီးကီၢ်အဲၤကူပတူး, စးထီၣ်လၢထံကျိဖရၤသး, တုၤလီၤလၢကီၢ်အဲၤကူပတူးအကလံၤစိးကီၢ်ဆၢဒၣ်လဲာ်အ ဃိန့ၣ်လီၤ.

⁸ဖဲစီၤယဟိၤယါခံၣ်ကဲထီၣ်ကီၢ်ယူဒၤအစီၤပၤန့ၣ်အသးအိၣ်ဝဲ တဆံဃိးနံၣ်ဒီးအဝဲပၢတၢ်လၢဝ့ၢ်ယရူၤၡလ့ၣ်အပူၤသၢလါန့ၣ် လီၤ. ဒီးအဝဲအမိၢ်မ့ၢ်ဝဲနီၢ်နဃူၡတၤ, စီၤအ့လနၤသၣ်လၢဝ့ၢ်ယရူၤ ၡလ့ၣ်အဖိမုၣ်န့ၣ်လီၤ.

⁹ပိာ်ထွဲထီၣ်အဝဲအပၢ်အခံန့ၣ်, စီၤယဟိၤယါခံၣ်မၤတ့ၢ်တၢ်ဒဲးဘး ထီဒါယွၤန့ၣ်လီၤ.

¹⁰ဖဲအဝဲပၢတၢ်အခါန့ၣ်, ပှၤဘၤဘူၤလိၣ်ဖိအသုးမုၢ်လၢအဘၣ်တၢ်ပၢ ဆှၢအီၤလၢစီၤပၤနဘူးကးန့စ့ၢ်အသုးခိၣ်သုးနၢ်တဖၣ်ဟဲထီၣ် ဒုးတၢ်ထီဒါဝ့ၢ်ယရူၤၡလ့ၣ်ဒီးကဝီၤဃာ်အီၤန့ၣ်လီၤ.

¹¹ဖဲတၢ်ကဝီၤဃာ်အီၤအခါန့ၣ်, စီၤပၤနဘူၤကးန့စၢ်အနီၢ်ကစၢ်ဒၣ် ဝဲဟဲဆူဝ့ၢ်ယရူၤၡလ့ၣ်,

¹²ဒီးစီၤပၤယဟိၤယါခံၣ်ဃုာ်ဒီးအဝဲအမိၢ်, အဝဲအဖိခွါတဖၣ်, သုးခိၣ်သုးနၢ်တဖၣ်, ဒီးပဒိၣ်ပပှၢ်လၢနူၢ်ပူၤစီၤပူၤတဖၣ်ဟ့ၣ် လီၤအသးဆူပှၤဘၤဘူၤလိၣ်ဖိတဖၣ်အစုပူၤန့ၣ်လီၤ. ဖဲစီၤပၤနဘူၤကးန့စၢ်ပၢတၢ်ဃိးနံၣ်တနံၣ်အပူၤန့ၣ်အဝဲစိာ် ထီၣ်ကွံာ်ဝဲစီၤယဟိၤယါခံၣ်ဒ်ပှၤဘၣ်စၢဃာ်အသိး,

¹³ဒီးစိာ်ထီၣ်ကွံာ်ကယဲၢ်တၢ်လုၢ်ဒိၣ်ပှ့ၤဒိၣ်လၢယွၤအတၢ်လုၢ်ဟံၣ် အပူၤဒီးလၢနူၢ်ဧိၤစီၤဧိၤအပူၤတဖၣ်ဆူဝ့ၢ်ဘၤဘူၤလိၣ်န့ၣ်လီၤ. ဒ်ယွၤတဲဆိပာ်စၢၤတ့ၢ်ဝဲအသိးန့ၣ်, စီၤနဘူၤကးန့စၢ်မၤကၢ် ကွံာ်ကယဲၢ်တၢ်အဃၢၤအဃိၢ်ထူတဖၣ်လၢအဘၣ်တၢ်မၤအီၤလၢစီၤပၤ ၡလိၤမိၤဒ်သိးတၢ်ကသူအီၤလၢယွၤအတၢ်လုၢ်ဟံၣ်ပူၤအဂီၢ်န့ၣ်လီၤ.

¹⁴စီၤနဘူၤကးန့စၢ်စိာ်ထီၣ်ကွံာ်ဝ့ၢ်ယရူၤၡလ့ၣ်အပှၤဂီၢ်မုၢ်ဒ် ပှၤဘၣ်တၢ်စၢဃာ်တဖၣ်အသိး, ကယဲၢ်စီၤပၤအဖိခွါခဲလၢာ်, ဒီးကယဲၢ်ပှၤတူၢ်ဒိၣ်ကီၤဒိၣ်တဖၣ်, ခဲလၢာ်ပှၤအဂၤတကလးန့ၣ် လီၤ. အဝဲက့ၤကိးဃုာ်စ့ၢ်ကီးဝဲပှၤမၤတၢ်သ့ဂ့ၤဂ့ၤတဖၣ်, အိၣ်ဃုာ်ဒီးပှၤပိာ်ထးဖိတဖၣ်, ပာ်တ့ၢ်ဝဲထဲပှၤဂီၢ်မုၢ်လၢ အဖှီၣ်ကတၢၢ်တဖၣ်လၢကီၢ်ယူဒၤအပူၤန့ၣ်လီၤ.

¹⁵စီၤနဘူၤကးန့စၢ်က့ၤကိးကွံာ်စီၤယဟိယါခံၣ်ဆူဝ့ၢ်ဘၤဘူၤ လိၣ်ဒ်ပှၤဘၣ်တၢ်စၢဃာ်တဂၤအသိး, ဃုာ်ဒီးစီၤယဟိၤယါခံၣ်အမိၢ်, အမါတဖၣ်, အပဒိၣ်ပပှၢ်တဖၣ်ဒီးပှၤတူၢ်ဒိၣ်ကီၤဒိၣ်တဖၣ်လၢကီၢ်ယူ ဒၤအပူၤန့ၣ်လီၤ.

¹⁶စီၤနဘူၤကးန့စၢ်စိာ်ဖျိးကွံာ်ကယဲၢ်ပှၤအကါဒိၣ်ခဲလၢာ်ဆူ ကီၢ်ဘၤဘူၤလိၣ်ဒီးပှၤခဲလၢာ်ပှၤအဂၤနွံကထိ, ဒီးပှၤမၤတၢ်သ့ ဂ့ၤဂ့ၤအဂၤတကထိအိၣ်ဃုာ်ဒီးပှၤပိာ်ထးဖိတဖၣ်, အဝဲသ့ၣ်ခဲလၢာ်မ့ၢ်ပှၤအဂံၢ်ဆူၣ်ဘါဆူၣ်တဖၣ်လၢအကြၢးဝဲဘၣ်ဝဲ ဒီးတၢ်ဒုးသုးဒုးသံၣ်အတၢ်မၤန့ၣ်လီၤ.

¹⁷စီၤနဘူၤကးန့စၢ်ဒုးကဲထီၣ်စီၤယဟိၤယါခံၣ်အဖါတံၢ်စီၤမး တးနယၤလၢကီၢ်ယူဒၤအစီၤပၤဒီးလဲလိာ်ကွံာ်ဝဲအမံၤဆူစီၤ စံးဒကံယၤန့ၣ်လီၤ.

¹⁸ဖဲစီၤစံးဒကံယၤကဲထီၣ်ကီၢ်ယူဒၤအစီၤပၤန့ၣ်အသးအိၣ်ခံဆံ တနံၣ်ဒီးအဝဲပၢတၢ်ဖဲဝ့ၢ်ယရူၤၡလ့ၣ်အပူၤတဆံတနံၣ်န့ၣ်လီၤ. အဝဲအမိၢ်မ့ၢ်ဝဲ, နီၢ်ဃမူတလး, စီၤယံးရမံယၤလၢဝ့ၢ်လံးဘနၤ အဖိမုၣ်န့ၣ်လီၤ.

¹⁹စီၤပၤစံးဒကံယၤမၤတၢ်ဒဲးဘးထီဒါယွၤဒ်သိးဒၣ်စီၤပၤယဟိၤ ယါကံၣ်မၤဝဲအသိးန့ၣ်လီၤ.

²⁰ယွၤအသးဒိၣ်ထီၣ်ဘၣ်ဝ့ၢ်ယရူၤၡလ့ၣ်ဒီးကီၢ်ယူဒၤအပှၤဂီၢ်မုၢ် တုၤဒၣ်လဲာ်အဝဲနီၣ်ထီၣ်ဟီထီၣ်ကွံာ်အဝဲသ့ၣ်လၢအမဲာ်ညါန့ၣ် လီၤ.