Read S'gaw Karen လံာ်စီၤပၤခံဘ့ၣ်တဘ့ၣ် 3 Bible Online

လံာ်စီၤပၤခံဘ့ၣ်တဘ့ၣ် 3 - S'gaw Karen bible

လံာ်စီၤပၤခံဘ့ၣ်တဘ့ၣ် 3

¹လၢကီၢ်ယူဒၤအစီၤပၤစီၤယဟိၡၤဖးပၢတၢ်တဆံဃိးနံၣ်တနံၣ် အပူၤန့ၣ်, စီၤအၤဃာ်အဖိခွါစီၤယဟိရၣ်, ကဲထီၣ်ကီၢ်အံၣ်စရ့လးအစီၤပၤ ဒီးအဝဲပၢတၢ်လၢဝ့ၢ်ၡၤမရံအပူၤတဆံခံနံၣ်န့ၣ်လီၤ.

²အဝဲမၤတ့ၢ်တၢ်ဒဲးဘးထီဒါယွၤဘၣ်ဆၣ်, အဝဲတအၢထဲသိးဒီးအပၢ် မ့ၢ်ဂ့ၤ, အမိၢ်နီၢ်အံၤစ့ဘ့ၤလးမ့ၢ်ဂ့ၤန့ၣ်ဘၣ်. အဝဲထုးလီၤပှီၢ်ကွံာ်တၢ်ဂီၤတၢ်ဖီၣ်လၢအပၢ်ပာ်ထီၣ်တ့ၢ်ဝဲလၢ တၢ်ကဘါထီၣ်ဘဧၤလးအဂီၢ်န့ၣ်လီၤ.

³မ့ၢ်နာ်သက့ဒ်န့ၣ်ဒီး, ဒ်စီၤနဘးအဖိခွါစီၤပၤယၤရၤဘၣ်လၢအ ကဲစီၤပၤလၢအဝဲအမဲာ်ညါတဂၤအသိးန့ၣ်, အဝဲဆှၢဃီၤကီၢ်အံၣ်စရ့ လးဆူတၢ်ဒဲးဘးအပူၤဒီးတဆိကတီၢ်ဘၣ်ဝဲဘၣ်.

⁴ကီၢ်မိၤအးအစီၤပၤမ့ၡၤဘုၣ်ဝဲသိ, ဒီးကိးနံၣ်ဒဲးဟ့ၣ်ဝဲ သိဖိအဒုတကလီၢ်ဒီးသိအဒုတကလီၢ်အဆူၣ်ဆူကီၢ်အံၣ်စရ့လး အစီၤပၤအအိၣ်, ဒ်တၢ်ခိတၢ်သွဲအသိးန့ၣ်လီၤ.

⁵ဘၣ်ဆၣ်တုၤကီၢ်အံၣ်စရ့လးအစီၤပၤစီၤအၤဃာ်သံဝဲန့ၣ်စီၤမ့ ၡၤပူထီၣ်တၢ်ထီဒါကီၢ်အံၣ်စရ့လးလီၤ.

⁶တစုဃီဖဲန့ၣ်, စီၤပၤယဟိရၣ်ဟးထီၣ်လၢဝ့ၢ်ၡၤမရံဒီးပာ် ဖှိၣ်ထီၣ်ကယဲၢ်အသုးဖိသံၣ်ဖိခဲလၢာ်န့ၣ်လီၤ.

⁷အဝဲဆှၢလီၤတၢ်ကစီၣ်ဆူကီၢ်ယူဒၤအစီၤပၤယဟိၡၤဖးအအိၣ်ဒီး စံးဝဲဒၣ်, “ကီၢ်မိၤအးအစီၤပၤပူထီၣ်တၢ်ထီဒါယၤလံ. မ့ၢ်နကလဲၤသကိးတၢ်ဒီးယၤလၢတၢ်ဒုးထီဒါအီၤအဂီၢ်န့ၣ်ဧါ.” စီၤပၤယဟိၡၤဖးစံးဆၢဝဲဒၣ်, “ယကလဲၤလီၤ. ယအိၣ်လၢနတၢ်သုးတၢ်ကျဲၤအပူၤလီၤ. ယပှၤဂီၢ်မုၢ်ဒီးယကသ့ၣ်တဖၣ် မ့ၢ်ဒ်န့ၣ်အသိးစ့ၢ်ကီးလီၤ.

⁸ပကဃုထၢလဲၤကျဲဖဲလဲၣ်တဘိလၢပကလဲၤထီၣ်ဒုးတၢ်အဂီၢ်န့ၣ်လဲၣ်.” စီၤယဟိရၣ်စံးဆၢဝဲ, “ပကလဲၤလၢကျဲအယံၤတဘိ, ခီဖျိကီၢ်အဒိၣ်အပှၢ်မုၢ်ကနၢန့ၣ်လီၤ.”

⁹လၢတၢ်န့ၣ်အဃိစီၤပၤယဟိရၣ်ဒီးကီၢ်ယူဒၤအစီၤပၤဒီးကီၢ် အဒိၣ်အစီၤပၤတဖၣ်ဟးထီၣ်ဝဲဒၣ်လီၤ. ဖဲအဝဲသ့ၣ်လဲၤတၢ်နွံသီဝံၤအလီၢ်ခံန့ၣ်, အဝဲသ့ၣ်အထံလၢာ်ကွံာ်န့ၢ်အီၤ, ဒီးထံတအိၣ်တီၢ်နီတစဲးလၢပှၤ ကညီအဂီၢ်မ့ၢ်ဂ့ၤလၢဆၣ်ဖိကီၢ်ဖိတဖၣ်လၢအလဲၤတၢ်ဒီးအဝဲသ့ၣ် အဂီၢ်မ့ၢ်ဂ့ၤန့ၣ်ဘၣ်.

¹⁰စီၤပၤယဟိရၣ်စံးဝဲဒၣ်, “ဝံၤတၢ်လၢာ်လံ. ယွၤပာ်ဖှိၣ်ပဝဲသၢဂၤအံၤလၢကီၢ်မိၤအးအစီၤပၤအတၢ်သူၣ်ကညီၤ သးကညီၤအပူၤန့ၣ်လီၤ.”

¹¹စီၤပၤယဟိၡၤဖးသံကွၢ်ဝဲဒၣ်, “ဖဲအံၤ, မ့ၢ်ဝံအိၣ်ဝဲတဂၤဂၤလၢပကသံကွၢ်တၢ်ဆူယွၤခီဖျိအီၤန့ၣ် ဧါ.” စီၤပၤယဟိရၣ်အသုးမုၢ်အသုးခိၣ်တဂၤစံးဆၢဝဲဒၣ်, “စီၤၡၤဖးအဖိခွါစီၤအလံၤၡါအိၣ်ဖဲအံၤလီၤ. အဝဲမ့ၢ်စီၤအ့ၤလံယၤအပှၤမၤစၢၤတၢ်န့ၣ်လီၤ.”

¹²စီၤပၤယဟိၡၤဖးစံးဆၢဝဲဒၣ်, “အဝဲမ့ၢ်ဒၣ်ဝံအမ့ၢ်အတီတဂၤ လီၤ.” လၢတၢ်န့ၣ်အဃိ, စီၤပၤသၢဂၤလဲၤဝဲဆူစီၤအလံၤၡါအအိၣ်န့ၣ် လီၤ.

¹³စီၤအလံၤၡါစံးဘၣ်ကီၢ်အံၣ်စရ့လးအစီၤပၤ, “ဘၣ်မနုၤလၢယကဘၣ်မၤစၢၤနၤန့ၣ်လဲၣ်. လဲၤဒီးသံကွၢ်တၢ်လၢ ဝံတဖၣ်လၢနပၢ်မ့ၢ်ဂ့ၤ, နမိၢ်မ့ၢ်ဂ့ၤသံကွၢ်တ့ၢ်အီၤတၢ်တက့ၢ်.” စီၤယဟိရၣ်စံးဆၢအီၤ “တမ့ၢ်ဘၣ်, ပှၤလၢအကိးဖှိၣ်ပဝဲ စီၤပၤသၢဂၤဆူကီၢ်မိၤအးအစီၤပၤအတၢ်သူၣ်ကညီၤသးကညီၤအပူၤ န့ၣ်မ့ၢ်ယွၤလီၤ.”

¹⁴စီၤအလံၤၡါစံးဆၢဝဲဒၣ်, “လၢယွၤလၢအမူဝဲ, လၢယမၤအတၢ်တဂၤအမံၤအပူၤန့ၣ်, ယဆိၣ်လီၤယသးလၢ, မ့တမ့ၢ်ဘၣ်လၢယပာ်ကဲဘၣ်နသိၣ်နမှံၤကီၢ်ယူဒၤအစီၤပၤယဟိၡၤ ဖးအဃိဘၣ်န့ၣ်, ယမၤဘၣ်ဃးယသးဒီးနၤအလီၢ်တအိၣ်နီတမံၤဘၣ်.

¹⁵ခဲကနံၣ်အံၤဟဲကိးန့ၢ်ယၤပှၤဒ့တၢ်ဖိတဂၤတက့ၢ်.” ဖဲပှၤဒ့တၢ်ဖိဒ့ထီၣ်အသီတူၢ်န့ၣ်ယွၤအစိကမီၤလီၤဘၣ်ဝဲဒၣ် လၢစီၤအလံၤၡါအလိၤ,

¹⁶ဒီးအဝဲစံးဝဲဒၣ်, “ယွၤစံးဒ်အံၤ, ခူၣ်လီၤတၢ်ကျိၤတဖၣ်လၢ ကယဲၢ်ထံကျိဖိလၢအဃ့ထီတဖၣ်အဖီခိၣ်တက့ၢ်.

¹⁷နမ့ၢ်တထံၣ်ဘၣ်တၢ်ဟဲစူၤမ့ၢ်ဂ့ၤ, ကလံၤမုၢ်မ့ၢ်ဂ့ၤနီတမံၤဘၣ် ဆၣ်, ထံကျိဖိလၢအဃ့ထီတဖၣ်အံၤကဘၣ်တၢ်မၤပှဲၤအီၤလၢထံ, ဒီးသုဝဲဒၣ်, သုဆၣ်ဖိကီၢ်ဖိလၢသုဘုၣ်အီၤ, သုဆၣ်ဖိကီၢ်ဖိတဖၣ်လၢအဝံတၢ်စိာ်တၢ်န့ၣ်, ကဒိးန့ၢ်ဘၣ်ထံအါအါကလဲာ်န့ၣ်လီၤ.”

¹⁸ဒီးစီၤအလံၤၡါစံးအါထီၣ်ဝဲ, “ဘၣ်ဆၣ်တၢ်အံၤမ့ၢ်တၢ်အညီ ကဒၣ်တမံၤလၢယွၤအဂီၢ်လၢကမၤဝဲန့ၣ်လီၤ. အဝဲကဟ့ၣ်လီၤစ့ၢ်ကီးသုတၢ်မၤနၢၤလၢပှၤမိၤအးဖိအဖီခိၣ်န့ၣ်လီၤ.

¹⁹သုကမၤနၢၤကွံာ်အဝဲသ့ၣ်အဝ့ၢ်အဃံအလၤလၢတၢ်မၤခၢၣ်သနၢၣ်အီၤတ ဖၣ်, ဒီးသုကကူာ်လီၤကွံာ်ကယဲၢ်အသ့ၣ်လၢပှၤအီၣ်အသၣ်အထူၣ်တဖၣ်, ဆွံကတံာ်ကွံာ်အထံထီၣ်ပၢၢ်ခဲလၢာ်, ဒီးမၤဟးဂီၤကွံာ်အစံာ်ဧိၤပှဲၤဧိၤလၢဟီၣ်ခိၣ်ညၣ်ထ့ၣ်ဂ့ၤခီဖျိ တၢ်မၤဘၢကွံာ်အီၤလၢလၢၢ်တဖၣ်န့ၣ်လီၤ.”

²⁰မုၢ်ဆ့ၣ်ထီၣ်တနံၤ, ဖဲတၢ်ဆၢကတီၢ်လၢညီနုၢ်မုၢ်ဂီၤအတၢ်လုၢ် ထီၣ်ပာ်ထီၣ်ဘၣ်တၢ်မၤအီၤန့ၣ်, ထံဟဲယွၤလီၤဝဲဒၣ်လၢကီၢ်အဒိၣ်တခီဒီးလုၣ်ဘၢကွံာ်ဟီၣ်ခိၣ် န့ၣ်လီၤ.

²¹တုၤပှၤမိၤအးဖိတဖၣ်နၢ်ဟူဘၣ်ဝဲလၢစီၤပၤသၢဂၤဟဲဝဲလၢ ကဒုးအဝဲသ့ၣ်အဂီၢ်န့ၣ်, ကယဲၢ်ပှၤပိာ်ခွါလၢအစိာ်အစုကဝဲၤသ့တဖၣ်, စးထီၣ်လၢပှၤအသးပှၢ်ကတၢၢ်ဒီးတုၤလီၤလၢပှၤအသးစၢ်ကတၢၢ်, ဘၣ်တၢ်ကိးထီၣ်အီၤဒီးဘၣ်တၢ်ပာ်အီၤဖဲကီၢ်အဆၢန့ၣ်လီၤ.

²²မုၢ်ဆ့ၣ်ထီၣ်တနံၤ, ဖဲအဝဲသ့ၣ်မံပၢၢ်ထီၣ်ဝဲန့ၣ်, မုၢ်အဧူၢ်အတၢ်ဆဲးကပီၤလီၤဝဲလၢထံအဖီခိၣ်န့ၣ်, ဒုးထံၣ်ပှၤမိၤအးဖိတဖၣ်လၢထံန့ၣ်ဂီၤဝဲဒ်တၢ်သွံၣ်အသိးန့ၣ်လီၤ.

²³အဝဲသ့ၣ်စံးဝဲဒၣ်, “တၢ်အံၤမ့ၢ်တၢ်သွံၣ်လီၤ. ဒုၣ်ဒါသၢဖုအသုးမုၢ်တဖၣ်ကဒုးလိာ်ယၤလိာ်အသးဒီးမၤသံလိာ် အသးလံန့ၣ်လီၤ. မ်ပလဲၤသကိးဒီးဂုာ်န့ၢ်အဝဲသ့ၣ်သူၣ်ဒဲအလီၢ်တဖၣ်န့ၣ် တက့ၢ်.”

²⁴ဘၣ်ဆၣ်ဖဲအဝဲသ့ၣ်လဲၤတုၤဝဲဆူသူၣ်ဒဲအလီၢ်န့ၣ်, ပှၤအံၣ်စရ့လးဖိတဖၣ်ဒုးအဝဲသ့ၣ်ဒီးနီၣ်ကဒါက့ၤအဝဲသ့ၣ်န့ၣ် လီၤ. ပှၤအံၣ်စရ့လးတဖၣ်လူၤထွဲအဝဲသ့ၣ်အခံ, မၤသံပှၤမိၤအးဖိ တဖၣ်,

²⁵ဒီးမၤဟးဂီၤကွံာ်အဝဲသ့ၣ်အဝ့ၢ်တဖၣ်န့ၣ်လီၤ. တုၤအဝဲသ့ၣ်လဲၤခီဂာ်စံာ်ဧိၤပျီဧိၤလၢဟီၣ်ခိၣ်ညၣ်ထ့ၣ်ဂ့ၤ ဝဲန့ၣ်, ပှၤအံၣ်စရ့လးဖိကိးဂၤဒဲးကကွံာ်လီၤလၢၢ်တဂၤတဖျၢၣ်လၢအဖီ ခိၣ်, တုၤလၢ, လၢခံကတၢၢ်န့ၣ်, ကယဲၢ်စံာ်ဧိၤပှဲၤဧိၤခဲလၢာ်ဘၣ်တၢ် ကးဘၢကွံာ်အီၤန့ၣ်လီၤ. အဝဲသ့ၣ်ဆွံကတံာ်စ့ၢ်ကီးထံထီၣ်ပၢၢ်တဖၣ်ဒီးကူာ်လီၤကွံာ်သ့ၣ် အထူၣ်တဖၣ်န့ၣ်လီၤ. လၢခံကတၢၢ်ထဲဒၣ်ဝ့ၢ်ခိၣ်ကံၢ်ဃရၤၡ့းတဖျၢၣ်ဧိၤအိၣ်တီၢ်ဝဲ ဒီးပှၤခးနီၣ်ဘျုးတဖၣ်ကဝီၤဃာ်အီၤဒီးဒုးအီၤန့ၣ်လီၤ.

²⁶တုၤကီၢ်မိၤအးအစီၤပၤသ့ၣ်ညါဝဲဒၣ်လၢအဝဲဃၣ်ကွံာ်လၢတၢ်ဒုး အပူၤလံန့ၣ်, အဝဲကိးထီၣ်ပှၤစိာ်နးအဂၤနွံကယၤဃုာ်ဒီးအီၤ, ဒီးကျဲးစၢးဟးထီၣ်ဆူၣ်လၢဒုၣ်ဒါတဖၣ်အကဆူး, ဒ်သိးကဃ့ၢ်ပူၤဖျဲးထီၣ်ကွံာ်ဆူကီၢ်စူၤရံအစီၤပၤအအိၣ်န့ၣ် လီၤ. ဘၣ်ဆၣ်အဝဲအတၢ်ကျဲးစၢးတကဲထီၣ်ဘၣ်.

²⁷လၢတၢ်န့ၣ်အဃိအဝဲဟံးထီၣ်အဖိခွါအဒိၣ်ကတၢၢ်လၢကထီၣ်က့ၤအလီၢ် ဒ်စီၤပၤအသိးဒီးလုၢ်ထီၣ်အီၤလၢဝ့ၢ်အခိၣ်ဒူအဖီခိၣ်ဒ်တၢ်လုၢ် တမံၤအသိးဆူပှၤမိၤအးဖိအကစၢ်အအိၣ်န့ၣ်လီၤ. ပှၤအံၣ်စရ့လးဖိတဖၣ်ပျံၤတၢ်ဖုးတၢ်ဒိၣ်မးအဃိအဝဲသ့ၣ်ဂုၤ က့ၤဆူအလီၢ်ခံလၢဝ့ၢ်ပူၤ, ဒီးက့ၤကဒါက့ၤဆူအဝဲသ့ၣ်အထံကီၢ်ဒၣ်ဝဲန့ၣ်လီၤ.