Read S'gaw Karen လံာ်စီၤပၤခံဘ့ၣ်တဘ့ၣ် 4 Bible Online

လံာ်စီၤပၤခံဘ့ၣ်တဘ့ၣ် 4 - S'gaw Karen bible

လံာ်စီၤပၤခံဘ့ၣ်တဘ့ၣ် 4

¹ကရၢဖိတဂၤလၢဝံတဖၣ်အကရူၢ်တကရူၢ်အကျါ, အမါမုၣ်ကမဲတဂၤလဲၤဝဲဆူစီၤအလံၤၡါအအိၣ်ဒီးစံးဝဲဒၣ်, “တၢ်ဒိၣ်ဧၢ, ယဝၤသံလံဝဲလံ. ဒ်နသ့ၣ်ညါနဲအသိးအဝဲမ့ၢ်ပှၤ တဂၤလၢအပျံၤကစၢ်ယွၤန့ၣ်လီၤ. ဘၣ်ဆၣ်ခဲကနံၣ်အံၤပှၤတဂၤလၢအလဲၤဟံးန့ၢ်လိၢ်ဝဲအစ့န့ၣ်, ဟဲဝဲဒ်သိးကဟံးထီၣ်ကွံာ်ယဖိခွါခံဂၤ, ဒ်ကုၢ်တဖၣ်အသိးလၢတၢ် လိးက့ၤယဝၤအဒ့ၣ်ကမၢ်အဂီၢ်န့ၣ်လီၤ.”

²စီၤအလံၤၡါသံကွၢ်ဝဲဒၣ်, “ယကဘၣ်မၤန့ၢ်နၤတၢ်မနုၤလဲၣ်. တဲဘၣ်ယၤတက့ၢ်. လၢနဟံၣ်န့ၣ်တၢ်မနုၤအိၣ်လဲၣ်.” ပိာ်မုၣ်စံးဆၢအီၤ, “တၢ်အဂၤတအိၣ်နီတမံၤဘၣ်. အိၣ်ဒၣ်ထဲသ့ၣ်စၤယံးအသိ, အကိဆံးဖိတဖျၢၣ်ဧိၤန့ၣ်လီၤ.”

³စီၤအလံၤၡါတဲဘၣ်အီၤ, “လဲၤဆူပှၤလၢနဃၢၤတဖၣ်အအိၣ်ဒီးဃ့ လိၢ်န့ၢ်ကိအိၣ်ကလီတဖၣ်အါဝဲ, တသ့ဖဲအသ့တက့ၢ်.

⁴ဝံၤဒီး, နၤဒီးနဖိခွါတဖၣ်လဲၤနုာ်ဆူဟံၣ်ပူၤ, ကးတံာ်ဃာ်ပဲတြီဒီးစးထီၣ်လူလီၤသိဆူကိတဖၣ်အပူၤတက့ၢ်. တုၤအပှဲၤတဖျၢၣ်ဒီးပာ်ကွံာ်အီၤဆူတၢ်ကပၤပှီၢ်ပှီၢ်တက့ၢ်.”

⁵လၢတၢ်န့ၣ်အဃိ, ပိာ်မုၣ်န့ၣ်လဲၤနုာ်ဆူအဟံၣ်ပူၤဃုာ်ဒီးအဖိ ခွါတဖၣ်, ဒီးကးတံာ်ပဲတြီဒီးဟံးထီၣ်သ့ၣ်စၤယံးအသိကိအဆံးတဖျၢၣ် န့ၣ်ဒီးလူလီၤသိဆူကိတဖၣ်အပူၤ, ဒ်အဖိခွါဟဲက့ၤစိာ်န့ၢ်အီၤအသိးန့ၣ်လီၤ.

⁶တုၤအဝဲသ့ၣ်မၤပှဲၤကိခဲလၢာ်ဝံၤန့ၣ်, ပိာ်မုၣ်န့ၣ်သံကွၢ်ဝဲ မ့ၢ်ကိအဂၤအိၣ်ဒံးဧါ. အဖိခွါအကျါတဂၤစံးဆၢဝဲ, ကိအဝဲန့ၣ်မ့ၢ်ကိလၢခံကတၢၢ်တဖျၢၣ်န့ၣ်လီၤ. ဒီးသ့ၣ်စၤယံးအသိဆိကတီၢ်ယွၤလီၤဝဲဒၣ်န့ၣ်လီၤ.

⁷အဝဲလဲၤကဒါက့ၤဝဲဆူဝံအလံၤၡါအအိၣ်ဒီးဝံအလံၤၡါစံးဘၣ် အီၤ, “ဆါကွံာ်သ့ၣ်စၤယံးအသိန့ၣ်, ဒီးလိးတူာ်ကွံာ်နကမၢ်ခဲလၢာ်, ဒီးစ့ကအိၣ်တ့ၢ်ဒံးလၢကလၢဝဲလၢနၤဒီးနဖိခွါတဖၣ်, ကသူဝဲဆူညါအဂီၢ်န့ၣ်လီၤ.”

⁸ဘၣ်မုၢ်တနံၤ, စီၤအလံၤၡါလဲၤဝဲဒၣ်ဆူဝ့ၢ်ၡူန့ၣ်, ဖဲပိာ်မုၣ်ထူးတီၤတဂၤအိၣ်ဆိးဝဲန့ၣ်လီၤ. ပိာ်မုၣ်န့ၣ်ကွဲဃီၤအီၤဆူတၢ်အီၣ်တဘျီ, ဒီးစးထီၣ်ဖဲန့ၣ်, ဖဲအလဲၤဝဲဆူဝ့ၢ်ၡူန့ၣ်ကိးဘျီဒဲးန့ၣ်, အဝဲကအီၣ်တၢ်ဖဲပိာ်မုၣ်န့ၣ်အဟံၣ်လီၤ.

⁹ပိာ်မုၣ်န့ၣ်စံးဘၣ်အဝၤ, “ယသ့ၣ်ညါသပှၢ်တၢၢ်လၢ, ပှၤလၢအဟဲညီနုၢ်ဖဲအံၤတဂၤန့ၣ်, မ့ၢ်ပှၤစီဆှံတဂၤန့ၣ်လီၤ.

¹⁰မ်ပဘှီထီၣ်ဒၢးအဆံးဖိတဖျၢၣ်လၢဟံၣ်ခိၣ်ဒုးအဖီခိၣ်, ပာ်လီၤလီၢ်မံခးတဖျၢၣ်, စီၢ်နီၤခိၣ်တဖျၢၣ်ဒီးမ့ၣ်အူဒၢ တဖျၢၣ်လၢအပူၤ, ဒ်သိးဖဲအဝဲဟဲအိၣ်သကိးပှၤတဘျီ လၢ်လၢ်န့ၣ်အိၣ်ဆိးဝဲကသ့အဂီၢ်တက့ၢ်.”

¹¹ဘၣ်မုၢ်တနံၤန့ၣ်, စီၤအလံၤၡါဟဲက့ၤကဒါက့ၤဆူဝ့ၢ်ၡူန့ၣ် ဒီးလဲၤထီၣ်ဆူအဒၢးပူၤ, လၢကအိၣ်ဘှံးအိၣ်သါအဂီၢ်န့ၣ်လီၤ.

¹²အဝဲမၢအခ့အပှၤစီၤက့ၤဃစံလၢကလဲၤကိးန့ၢ်အီၤပိာ်မုၣ်အံၤ န့ၣ်လီၤ. ဖဲပိာ်မုၣ်န့ၣ်ဟဲဝဲဒီး,

¹³စီၤအလံၤၡါစံးဘၣ်စီၤက့ၤဃစံ, “သံကွၢ်ပိာ်မုၣ်အံၤလၢ, လၢတၢ်မၤဆၢက့ၤကယဲၢ်တၢ်လၢအဝဲမၤပှဲၤန့ၢ်ပတၢ်လိၣ်တဖၣ်အဂီၢ်, မ့ၢ်ယမၤတၢ်မနုၤသ့လၢအဝဲအဂီၢ်န့ၣ်လဲၣ်. ဘၣ်သ့ၣ်သ့ၣ်အဝဲကအဲၣ်ဒိးဝဲလၢယကလဲၤန့ၢ်အီၤဆူစီၤပၤအအိၣ် မ့ၢ်ဂ့ၤ, ဆူသုးခိၣ်ခိၣ်ကျၢၢ်အအိၣ်မ့ၢ်ဂ့ၤ, လၢတၢ်ကတိၤဂ့ၤအီၤအဂီၢ်န့ၣ်လီၤ.” ပိာ်မုၣ်န့ၣ်စံးဆၢဝဲ, “လၢယပှၤဂီၢ်မုၢ်ဒၣ်ယဲအကျါန့ၣ်, တၢ်လၢပှဲၤလၢယဂီၢ်ခဲလၢာ်လီၤ.”

¹⁴စီၤအလံၤၡါသံကွၢ်စီၤက့ၤဃစံ, “မ့မ့ၢ်ဒ်န့ၣ်ဒီး, ယမၤတၢ်မနုၤလၢအဝဲအဂီၢ်သ့လဲၣ်.” အဝဲစံးဆၢဝဲဒၣ်, “ဂ့ၤလံ. အဝဲတအိၣ်ဒီးအဖိခွါနီတဂၤဘၣ်. ဒီးအဝၤမ့ၢ်ပှၤတဂၤလၢအသးပှၢ်လံန့ၣ်လီၤ.”

¹⁵စီၤအလံၤၡါမၤလိာ်ဝဲ, “တဲဘၣ်အီၤလၢအကဟဲဖဲအံၤတက့ၢ်.” ပိာ်မုၣ်န့ၣ်ဟဲဒီးဆၢထၢၣ်လၢကျဲစၢၤအခီၣ်ထံး,

¹⁶ဒီးစီၤအလံၤၡါစံးဘၣ်အီၤ, “ဆူညါတနံၣ်တုၤအကတီၢ်ဒ်အံၤ န့ၣ်, နကစိာ်ဘၣ်နဖိခွါတဂၤလၢနစုတီၤလိၤန့ၣ်လီၤ.” ပိာ်မုၣ်န့ၣ်စံးဆၢအီၤ, “တၢ်ဒိၣ်ဧၢ, နမ့ၢ်ကစၢ်ယွၤအပှၤကညီ တဂၤလီၤ. ဝံသးစူၤလီယၤတဂ့ၤ.”

¹⁷ဘၣ်ဆၣ်ဒီးဒ်စီၤအလံၤၡါစံးတ့ၢ်ဝဲအသိးန့ၣ်, ဆူညါတနံၣ်, အကတီၢ်ဒ်သိးအံၤန့ၣ်ပိာ်မုၣ်အံၤဆံးစၢ်န့ၢ်အဖိခွါတဂၤန့ၣ် လီၤ.

¹⁸စှၤနံၣ်ပူၤကွံာ်ဝံၤအလီၢ်ခံ, ဖဲတၢ်ကူးဘုအခါ, ဘၣ်မုၢ်တဂီၤဖိသၣ်ပိာ်ခွါအံၤဟးထီၣ်ဝဲဒ်သိးကလဲၤဆူအပၢ်အ အိၣ်, ဖဲလၢအအိၣ်ဖဲစံာ်ပျီပူၤဃုာ်ဒီးပှၤကူးဘုဖိတဖၣ်န့ၣ်လီၤ.

¹⁹သတူၢ်ကလာ်အဝဲကိးထီၣ်ဆူအပၢ်အအိၣ် “ယခိၣ်ဆါ” န့ၣ်လီၤ. အပၢ်စံးဘၣ်အခ့အပှၤတဂၤ, “က့ၤစိာ်ဖိသၣ်ပိာ်ခွါအံၤဆူ အမိၢ်အအိၣ်န့ၣ်တက့ၢ်.”

²⁰တၢ်ခ့တၢ်ပှၤန့ၣ်က့ၤစိာ်ဖိသၣ်ပိာ်ခွါအံၤဆူအမိၢ်အအိၣ်, ဒီးအမိၢ်စိာ်အီၤဆူအကံၣ်ဖျၢၣ်ခိၣ်တုၤလီၤလၢမုၢ်ထူၣ်အကတီၢ် ဖဲအဝဲသံဝဲဒၣ်န့ၣ်လီၤ.

²¹ပိာ်မုၣ်အံၤလဲၤစိာ်ထီၣ်ဖိသၣ်ဆူစီၤအလံၤၡါအဒၢးပူၤ, ပာ်လီၤအီၤလၢစီၤအလံၤၡါအလီၢ်မံအဖီခိၣ်, ဒီးဟးထီၣ်ကွံာ်ဝဲကးတံာ်ပဲတြီလၢအလီၢ်ခံန့ၣ်လီၤ.

²²ဝံၤဒီးအဝဲကိးအဝၤဒီးစံးဘၣ်အီၤ, “ပျဲလီၤန့ၢ်ယၤတၢ်ခ့ တၢ်ပှၤတဂၤဃုာ်ဒီးကသ့ၣ်ယီၤတဒုတက့ၢ်. ယကဘၣ်လဲၤဆူဝံအလံၤၡါအအိၣ်လီၤ. ဒီးယကဟဲက့ၤတချ့ဖဲအချ့ ဖဲယသ့န့ၣ်လီၤ.”

²³အဝၤသံကွၢ်အီၤ, “ဘၣ်မနုၤလၢနကဘၣ်လဲၤတၢ်တနံၤအံၤန့ၣ်လဲၣ်. တနံၤအံၤတမ့ၢ်မုၢ်အိၣ်ဘှံးနံၤမ့ၢ်ဂ့ၤ, လါထီၣ်သီအနံၤအမူး မ့ၢ်ဂ့ၤန့ၣ်ဘၣ်.” ပိာ်မုၣ်န့ၣ်စံးဆၢအီၤ, “အတွးတအိၣ်ဘၣ်.”

²⁴တုၤနုၤတစု, အဝဲမၢတၢ်ဂီၤကၢ်ထီၣ်ကသ့ၣ်ယီၤဝံၤဒီးမၤလိာ် တၢ်ခ့တၢ်ပှၤန့ၣ်, “ဒုးလဲၤကသ့ၣ်ယီၤအတၢ်တချ့ဖဲအချ့တက့ၢ်. ဒီးမ့တမ့ၢ်လၢယတဲနၤတၢ်နီတမံၤဘၣ်အဃိန့ၣ်, မၤဃၢလီၤအီၤတဂ့ၤ.”

²⁵လၢတၢ်န့ၣ်အဃိအဝဲဟးထီၣ်ဒီးလဲၤဝဲဆူကစၢၢ်ကၢ်မ့ၤလးဖဲစီၤ အလံၤၡါအိၣ်ဝဲအလီၢ်န့ၣ်လီၤ. စီၤအလံၤၡါထံၣ်အီၤဖဲအဝဲအိၣ်ယံၤဒံးအခါ, ဒီးအဝဲစံးဘၣ်အခ့အပှၤစီၤက့ၤဃစံ, “ကွၢ်တက့ၢ်. ပိာ်မုၣ်လၢဝ့ၢ်ၡူန့ၣ်တဂၤဟဲဝဲလၢန့ၣ်လီၤ.”

²⁶လဲၤချ့ချ့ဆူအအိၣ်ဒီးဃုသ့ၣ်ညါလၢ, မ့ၢ်တၢ်ခဲလၢာ်ဘၣ်လီၢ် ဘၣ်စးလၢအဝဲအဂီၢ်မ့ၢ်ဂ့ၤ, အဝဲအဝၤအဂီၢ်မ့ၢ်ဂ့ၤဒီးအဝဲ အဖိခွါအဂီၢ်မ့ၢ်ဂ့ၤကစီဒီဧါ. ဒီးပိာ်မုၣ်န့ၣ်တဲဘၣ်စီၤက့ၤဃစံလၢတၢ်ခဲလၢာ်ဘၣ်လီၢ်ဘၣ်စး ကစီဒီန့ၣ်လီၤ.

²⁷ဘၣ်ဆၣ်ဒီးဖဲအဝဲဟဲတုၤဆူစီၤအလံၤၡါအအိၣ်န့ၣ်, အဝဲတီၤလီၤကဒွံကျိာ်လၢအမဲာ်ညါဒီးဖီၣ်ဃးဝဲအခီၣ်န့ၣ်လီၤ. စီၤက့ၤဃစံသါကဆီၣ်ကွံာ်အီၤ, ဘၣ်ဆၣ်စီၤအလံၤၡါစံးဝဲဒၣ်, “မၤတံာ်တာ်အီၤတဂ့ၤ. မ့ၢ်နတထံၣ်လၢအဝဲအိၣ်လၢတၢ်ကိၢ်တၢ် ဂီၤယိာ်မးအပူၤဘၣ်ဧါ. ယွၤတတဲယၤတၢ်မၤအသးဒ်လဲၣ်အဂ့ၢ်နီတမံၤဒံးဘၣ်.”

²⁸ပိာ်မုၣ်န့ၣ်စံးဘၣ်အီၤ, “တၢ်ဒိၣ်ဧၢ, မ့ၢ်ယဃ့တ့ၢ်နၤလၢ နကဟ့ၣ်ယၤလၢဖိခွါတဂၤန့ၣ်ဧါ. မ့ၢ်ယတတဲတ့ၢ်နၤလၢတဘၣ်ထိၣ်ဂဲၤယတၢ်မုၢ်လၢ်တဂ့ၤန့ၣ်ဘၣ်ဧါ.”

²⁹စီၤအလံၤၡါဃၣ်ဃီၤအသးဆူစီၤက့ၤဃစံအအိၣ်ဒီးစံးဝဲဒၣ်, “မၤချ့ချ့, ဟံးထီၣ်ယနီၣ်ထိးဘိဒီးလဲၤတၢ်တက့ၢ်. အိၣ်ကတီၢ်ဒ်သိးနကဆၢဂ့ၤဆၢဝါပှၤလၢနဘၣ်သဂၢၢ်အီၤနီ တဂၤတဂ့ၤ. ဒီးပှၤတဂၤဂၤမ့ၢ်ဆၢဂ့ၤဆၢဝါနၤန့ၣ်ဟံးန့ၢ်တၢ် ဆၢကတီၢ်လၢနကစံးဆၢအီၤအဂီၢ်တဂ့ၤ. လဲၤလိၤလိၤဆူဟံၣ်န့ၣ်ဒီးယနီၣ်ထိးဘိအံၤပာ်လီၤအီၤလၢဖိ သၣ်ပိာ်ခွါအလိၤတက့ၢ်.”

³⁰ပိာ်မုၣ်န့ၣ်စံးဘၣ်စီၤအလံၤၡါ, “လၢယတၢ်သူၣ်တီသးလိၤအပူၤ န့ၣ်ယဆိၣ်တၢ်ဒီးယွၤလၢအမူဝဲ, ဒီးနၤလၢယတဟးဖးဒီးနၤဘၣ်.” လၢတၢ်န့ၣ်အဃိ, အဝဲသ့ၣ်ခံဂၤလိာ်စးထီၣ်က့ၤကဒါက့ၤသကိးဝဲ ဒၣ်န့ၣ်လီၤ.

³¹စီၤက့ၤဃစံလဲၤဆိတၢ်လၢညါဒီးပာ်လီၤဝဲစီၤအလံၤၡါအနီၣ် ထိးဘိလၢဖိသၣ်အလိၤ, ဘၣ်ဆၣ်ဒီးတၢ်ကလုၢ် အသီၣ်တမံၤမ့ၢ်ဂ့ၤ, တၢ်မူအပနီၣ်အဂၤတမံၤမံၤမ့ၢ်ဂ့ၤ, တဖျါဝဲဘၣ်. လၢတၢ်န့ၣ်အဃိအဝဲက့ၤကဒါက့ၤဒ်သိးကလဲၤသဂၢၢ်စီၤအလံၤၡါ ဒီးစံးဘၣ်အီၤလၢ, ဖိသၣ်ပိာ်ခွါတပၢၢ်ထီၣ်ဘၣ်န့ၣ်လီၤ.

³²တုၤစီၤအလံၤၡါလဲၤတုၤဝဲန့ၣ်, အဝဲလဲၤနုာ်ထဲတဂၤဧိၤဆူ ဒၢးပူၤဒီးထံၣ်ဘၣ်ဖိသၣ်ပိာ်ခွါအိၣ်သံဝဲဒၣ်အိၣ်မံလီၤလၢ လီၢ်မံခးအဖီခိၣ်န့ၣ်လီၤ.

³³စီၤအလံၤၡါကးတံာ်ပဲတြီဝံၤဘါထုကဖၣ်တၢ်ဆူယွၤအအိၣ်န့ၣ်လီၤ.

³⁴အန့ၣ်ဝံၤဒီးအဝဲမံလီၤလၢဖိသၣ်ပိာ်ခွါအလိၤဒီးပာ်လီၤအထး ခိၣ်, အမဲာ်ချံတဖၣ်ဒီးအစုတဖၣ်လၢဖိသၣ်ပိာ်ခွါအထးခိၣ်, အမဲာ်ချံတဖၣ်ဒီးအစုတဖၣ်အလိၤန့ၣ်လီၤ. ဖဲအဝဲမံလီၤစူၣ်ထီၣ်အသးလၢဖိသၣ်ပိာ်ခွါအလိၤန့ၣ်, ဖိသၣ်ပိာ်ခွါအနီၢ်ခိစးထီၣ်လၢၤထီၣ်ဝဲန့ၣ်လီၤ.

³⁵စီၤအလံၤၡါဂဲၤဆၢထၢၣ်, ဟးတရံးလၢဒၢးပူၤ, ဝံၤဒီးက့ၤကဒါက့ၤ, ဒီးစူၣ်ထီၣ်ကဒီးအသးလၢဖိသၣ်ပိာ်ခွါအလိၤန့ၣ်လီၤ. ဖိသၣ်ပိာ်ခွါဆဲထီၣ်ဝဲနွံဘျီဝံၤဒီးအိးထီၣ်အမဲာ်ချံတဖၣ် န့ၣ်လီၤ.

³⁶စီၤအလံၤၡါကိးဃီၤစီၤက့ၤဃစံဒီးတဲဘၣ်အီၤလၢကကိးန့ၢ်ဖိ သၣ်ပိာ်ခွါအမိၢ်န့ၣ်လီၤ. ဖဲပိာ်မုၣ်န့ၣ်ဟဲနုာ်ဝဲဒီးစီၤအလံၤၡါစံးဘၣ်အီၤ, “နဖိခွါအိၣ်ဖဲအံၤလီၤ.”

³⁷ပိာ်မုၣ်န့ၣ်ထိၣ်လီၤပှီၤအသးလၢစီၤအလံၤၡါအခီၣ်ထံးအိၣ်ဒီး အမဲာ်သၣ်ကျးလီၤအသးလၢဟီၣ်ခိၣ်လိၤန့ၣ်လီၤ. အန့ၣ်ဝံၤဒီးအဝဲကိးထီၣ်အဖိခွါဒီးဟးထီၣ်ကွံာ်ဝဲလီၤ.

³⁸ဘၣ်တဘျီ, ဖဲတၢ်သၣ်ဝံၤလီၤဒိတမံၤမၤအသးလၢထံကီၢ်ဒီဘ့ၣ် ညါအခါန့ၣ်, စီၤအလံၤၡါဟဲက့ၤကဒါက့ၤဆူဝ့ၢ်ကံးလကၤလးန့ၣ်လီၤ. ဖဲအဝဲသိၣ်လိဝံတဖၣ်အခါန့ၣ်အဝဲတဲဘၣ်အခ့အပှၤလၢကဒိထီၣ် သပၢၤဖးဒိၣ်တဖျၢၣ်လၢမ့ၣ်အူအဖီခိၣ်ဒီးဖီန့ၢ်အဝဲသ့ၣ်ကသူ ထံတကပၢၤန့ၣ်လီၤ.

³⁹အဝဲသ့ၣ်အကျါတဂၤ, ဟးထီၣ်ဝဲဆူပျီပူၤလၢကမၤန့ၢ်တၢ်ဒိးတၢ် လၣ်အဂီၢ်န့ၣ်လီၤ. အဝဲထံၣ်န့ၢ်ထံလူၤမံၤအမုၢ်တမုၢ်, ထဲးန့ၢ်ဝဲအသၣ်တဖၣ်အါထဲ သိးအစိာ်ဝဲန့ၢ်, န့ၣ်လီၤ. အဝဲဟဲက့ၤစိာ်ဒီးသွဲၣ်နုာ်လီၤဝဲဆူကသူ သပၢၤပူၤ, ဘၣ်ဆၣ်တၢ်သ့ၣ်တဖၣ်န့ၣ်မ့ၢ်တၢ်မနုၤလဲၣ်န့ၣ်, တသ့ၣ်ညါဝဲဘၣ်.

⁴⁰ကသူန့ၣ်ဘၣ်တၢ်ဂၢ်လီၤအီၤလၢပှၤတဖၣ်န့ၣ်ကအီၣ်ဝဲအဂီၢ်, ဘၣ်ဆၣ်တဘျီဃီဖဲအဝဲသ့ၣ်အီၣ်ကွၢ်ဝဲန့ၣ်, အဝဲသ့ၣ်ကိးထီၣ်ဆူ စီၤအလံၤၡါအအိၣ်စံးဝဲ, “တၢ်အံၤ, မ့ၢ်စုၣ်လီၤ.” ဒီးအဝဲသ့ၣ်တအီၣ်ဝဲဘၣ်.

⁴¹စီၤအလံၤၡါဃ့တၢ်အီၣ်တနီၤ, တ့ၢ်နုာ်လီၤဝဲဆူသပၢၤပူၤဒီး စံးဝဲဒၣ်, “ဂၢ်လီၤအါထီၣ်ကသူထံတနီၤလၢအဝဲသ့ၣ်အဂီၢ်တက့ၢ်.” အန့ၣ်တစု, ကသူထံန့ၣ်, ဂ့ၤထီၣ်က့ၤဒၣ်တၢ်န့ၣ်လီၤ.

⁴²မၤကဒီးအဂၤတဘျီန့ၣ်, ပှၤတဂၤဟဲဝဲလၢဘဧၤလးၡလံၡၤ, ဟဲစိာ်န့ၢ်စီၤအလံၤၡါလၢကိၣ်အလိၣ်ခံဆံ, လၢအဘၣ်တၢ်မၤအီၤလၢဘုမုယီၤလၢတၢ်ကူးအီၤအဆိကတၢၢ်ဖဲနံၣ် အဝဲန့ၣ်ဒီးဘုစဲၤလၢတၢ်ကူးအီၤသီသီတနီၤန့ၣ်လီၤ. စီၤအလံၤၡါတဲဘၣ်အခ့အပှၤလၢကဒုးအီၣ်ဝံတဖုအံၤလၢတၢ်သ့ၣ် တဖၣ်န့ၣ်လီၤ.

⁴³ဘၣ်ဆၣ်အခ့အပှၤစံးဆၢအီၤ, “မ့ၢ်နဆိကမိၣ်လၢတၢ်အံၤကလၢဝဲ လၢပှၤအဂၤတကယၤအဂီၢ်န့ၣ်ဧါ.” စီၤအလံၤၡါစံးဆၢဝဲဒၣ်, “ဟ့ၣ်လီၤအဝဲသ့ၣ်လၢကအီၣ်ဝဲအဂီၢ် တက့ၢ်. အဂ့ၢ်ဒ်အံၤ, ယွၤစံးဝဲဒၣ်လၢအဝဲသ့ၣ်ကအီၣ်တၢ်ဒီးတၢ်အိၣ်လီၤ တဲာ်ကအိၣ်ဒံးတနီၤဒၣ်လဲာ်န့ၣ်လီၤ.”

⁴⁴လၢတၢ်န့ၣ်အဃိအခ့အပှၤပာ်လီၤတၢ်အီၣ်လၢအဝဲသ့ၣ်အမဲာ်ညါ, ဒီးဒ်ယွၤစံးတ့ၢ်ဝဲအသိးန့ၣ်, အဝဲသ့ၣ်ခဲလၢာ်အီၣ်တၢ်, ဒီးတၢ်အိၣ်လီၤတဲာ်အိၣ်ဒံးဝဲတနီၤန့ၣ်လီၤ.