Read S'gaw Karen လံာ်စီၤပၤခံဘ့ၣ်တဘ့ၣ် 6 Bible Online

လံာ်စီၤပၤခံဘ့ၣ်တဘ့ၣ် 6 - S'gaw Karen bible

လံာ်စီၤပၤခံဘ့ၣ်တဘ့ၣ် 6

¹ဘၣ်မုၢ်တနံၤ, ဝံတဖၣ်လၢအဘၣ်တၢ်ကွၢ်ထွဲပၢဆှၢအီၤလၢစီၤ အလံၤၡါန့ၣ်ကဒူးကဒ့ၣ်တၢ်ဆူအအိၣ်စံးဝဲ, “တၢ်လီၢ်လၢပအိၣ်ဆိးန့ၣ်အံၣ်ကဲာ်ဆိးလီၤ.”

²ဟ့ၣ်ပှၤအခွဲးလၢပကလဲၤဆူထံကျိယၢ်ဒ့ၣ်ဒီးကူာ်လီၤသ့ၣ်တနီၤ ဒ်သိးပသူၣ်ထီၣ်တၢ်လီၢ်လၢပကအိၣ်ဆိးအဂီၢ်ကသ့န့ၣ်တက့ၢ်. စီၤအလံၤၡါစံးဆၢဝဲဒၣ်, “ဂ့ၤလံ. လဲၤတက့ၢ်.”

³ပှၤလၢအဝဲသ့ၣ်အကျါတဂၤဃ့ကညးဆူၣ်စီၤအလံၤၡါလၢကလဲၤဃုာ်တၢ် ဒီးအဝဲသ့ၣ်, ဒီးအဝဲအၢၣ်လီၤဝဲဒၣ်,

⁴ဒီးအဝဲသ့ၣ်လဲၤသကိးတၢ်န့ၣ်လီၤ. တုၤအဝဲသ့ၣ်လဲၤတုၤဝဲဆူ ထံကျိယၢ်ဒ့ၣ်န့ၣ်အဝဲသ့ၣ်စးထီၣ်မၤတၢ်န့ၣ်လီၤ.

⁵ဖဲပှၤလၢအဝဲသ့ၣ်အကျါတဂၤကူာ်လီၤသ့ၣ်တထူၣ်အခါန့ၣ်, သတူၢ်ကလာ်အဝဲအကွါကနၣ်လီၤတဲာ်ကွံာ်ဆူထံကျါန့ၣ်လီၤ. အဝဲကိးထီၣ်ဆူစီၤအလံၤၡါ, “တၢ်ဒိၣ်ဧၢ, မ့ၢ်ယကဘၣ်မၤဒ်လဲၣ်. ကွါအံၤမ့ၢ်ယဃ့လိၢ်ပာ်အီၤန့ၣ်လီၤ.”

⁶စီၤအလံၤၡါသံကွၢ်အီၤ, “လီၤတဲာ်ဝဲဖဲလဲၣ်.” ပှၤတဂၤန့ၣ်ဒုးနဲၣ်အီၤတၢ်လီၢ်န့ၣ်ဒီးစီၤအလံၤၡါကျီတဲာ် သ့ၣ်တဘိ, တ့ၢ်လီၤဝဲဆူထံကျါဒီးမၤထီၣ်ဖီက့ၤ, ကွါကနၣ်န့ၣ်လီၤ.

⁷စီၤအလံၤၡါမၤလိာ်အီၤ, “ဟံးထီၣ်က့ၤအီၤတက့ၢ်.” ပှၤတဂၤန့ၣ်ယူာ်ဃီၤအစုဒီးဟံးထီၣ်က့ၤအီၤန့ၣ်လီၤ.

⁸ကီၢ်စူၤရံအစီၤပၤဒုးတၢ်ဒီးကီၢ်အံၣ်စရ့လးန့ၣ်လီၤ. အဝဲကူၣ်လိာ်သကိးတၢ်ဒီးအသုးခိၣ်သုးနၢ်တဖၣ်ဒီးဃုထၢဝဲ တၢ်လီၢ်တတီၤလၢကသူၣ်ထီၣ်အဒဲအဂီၢ်န့ၣ်လီၤ.

⁹ဘၣ်ဆၣ်စီၤအလံၤၡါဆှၢလီၤတၢ်ကစီၣ်ဆူကီၢ်အံၣ်စရ့လးအစီၤပၤ အအိၣ်, ဒီးဟ့ၣ်ပလီၢ်အီၤဒ်သိးအသုတလဲၤဘူးဒီးတၢ်လီၢ်န့ၣ်တဂ့ၤ, မ့ၢ်လၢ, ပှၤစူၤရံဖိတဖၣ်အိၣ်ခိးခူသူၣ်လၢကဒုးတၢ်ဖဲန့ၣ် အဃိလီၤ.

¹⁰လၢတၢ်န့ၣ်အဃိကီၢ်အံၣ်စရ့လးအစီၤပၤဟ့ၣ်ပလီၢ်ပှၤတဖၣ်လၢအအိၣ် ဆိးဖဲတၢ်လီၢ်န့ၣ်ဒီးအဝဲသ့ၣ်စီၣ်မဲာ်စီၣ်နါ, ပာ်သူၣ်ပာ်သးန့ၣ်လီၤ. တၢ်အံၤမၤအသးတဘျုးဘျီန့ၣ်လီၤ.

¹¹ပှၤစူၤရံဖိအစီၤပၤအသးဘၣ်တံာ်တာ်ဖးဒိၣ်လၢတၢ်ဂ့ၢ်အံၤအဃိ လီၤ. အဝဲကိးနုာ်ဃီၤအသုးခိၣ်သုးနၢ်တဖၣ်, ဒီးသံကွၢ်အဝဲသ့ၣ်, “မ့ၢ်မတၤလၢသုကျါတဂၤအိၣ်လၢကီၢ်အံၣ်စရ့လးအစီၤပၤအ အိၣ်တကပၤန့ၣ်လဲၣ်.”

¹²ပှၤလၢအဝဲသ့ၣ်အကျါတဂၤစံးဆၢဝဲဒၣ်, “တၢ်ဒိၣ်ကစၢ်စီၤပၤ ဧၢ, ပှၤတအိၣ်လၢကီၢ်အံၣ်စရ့လးအစီၤပၤအအိၣ်တကပၤနီတဂၤဘၣ်. တၢ်လၢနစံးအီၤလၢဒၢးပူၤလၢတၢ်ခူသူၣ်ဒၣ်လဲာ်န့ၣ်ဝံအလံၤၡါ တဲဘၣ်ကီၢ်အံၣ်စရ့လးအစီၤပၤန့ၣ်လီၤ.”

¹³စီၤပၤဟ့ၣ်လီၤအကလုၢ်စံးဝဲ, “အဝဲအိၣ်ဖဲတၢ်လီၢ်မတၤလဲၣ် န့ၣ်ဃုထံၣ်အီၤတက့ၢ်ဒီးယကလဲၤဖီၣ်န့ၢ်အီၤလီၤ.” တုၤစီၤပၤဘၣ်တၢ်တဲဘၣ်အီၤလၢစီၤအလံၤၡါအိၣ်ဝဲဖဲဝ့ၢ်ဒိၤ သၣ်န့ၣ်,

¹⁴အဝဲဆှၢလီၤသုးဖိဂံၢ်ဆူၣ်ဘါဆူၣ်တဖုဖဲန့ၣ်အိၣ်ဃုာ်ဒီး ကသ့ၣ်တဖၣ်ဒီးလ့ၣ်ကဟၣ်တဖၣ်န့ၣ်လီၤ. အဝဲသ့ၣ်လဲၤတုၤဝဲဖဲဝ့ၢ်ဒိၤသၣ်န့ၣ်လၢမုၢ်နၤအကတီၢ်ဒီး ကဝီၤဃာ်အီၤန့ၣ်လီၤ.

¹⁵မုၢ်ဆ့ၣ်တနံၤလၢဂီၤဂီၤန့ၣ်, စီၤအလံၤၡါအခ့အပှၤဂဲၤဆၢထၢၣ် ဒီးဟးထီၣ်ဆူဟံၣ်အချၢဒီးထံၣ်ဘၣ်ပှၤစူၤရံဖိတဖၣ်ဃုာ်ဒီး အဝဲသ့ၣ်အကသ့ၣ်တဖၣ်ဒီးလ့ၣ်ကဟၣ်တဖၣ်ကဝီၤဃာ်ဝ့ၢ်န့ၣ်လီၤ. အဝဲက့ၤကဒါက့ၤဆူစီၤအလံၤၡါအအိၣ်ဒီးကိးထီၣ်ဆူအအိၣ်စံး ဝဲဒၣ်, “တၢ်ဒိၣ်ဧၢ, ပဘၣ်တၢ်စံၣ်ညီၣ်ဃါမနၤလံ. ပကမၤဒ်လဲၣ်.”

¹⁶စီၤအလံၤၡါစံးဆၢဝဲဒၣ်, “ပျံၤတၢ်တဂ့ၤ. ပအိၣ်ဒီးပှၤလၢပအိၣ်တကပၤအါန့ၢ်ဒံးပှၤအိၣ်လၢအဝဲသ့ၣ်အအိၣ် တကပၤတက့ၢ်လီၤ.”

¹⁷အန့ၣ်ဝံၤဒီးအဝဲဘါထုကဖၣ်တၢ်စံးဝဲ, “အိယွၤဧၢ, အိးထီၣ်အမဲာ်ချံတဖၣ်ဒီးဒုးထံၣ်အီၤတၢ်တက့ၢ်.” ယွၤစံးဆၢအဝဲအတၢ်ထုကဖၣ်, ဒီးစီၤအလံၤၡါအခ့အပှၤကွၢ်ထီၣ် တၢ်, ဒီးထံၣ်ဘၣ်တၢ်လူၢ်အကပၤပှဲၤဝဲဒီးကသ့ၣ်မ့ၣ်အူ တဖၣ်လ့ၣ်ကဟၣ်မ့ၣ်အူတဖၣ်အိၣ်ဝးတရံးစီၤအလံၤၡါန့ၣ်လီၤ.

¹⁸တုၤပှၤစူၤရံဖိတဖၣ်ဒုးတၢ်န့ၣ်, စီၤအလံၤၡါဘါထုကဖၣ်တၢ် စံးဝဲ, “အိယွၤဧၢ, မၤဘျီၣ်ပှၤတဖၣ်အံၤအမဲာ်ချံတက့ၢ်.” ယွၤစံးဆၢအဝဲအတၢ်ထုကဖၣ်ဒီးမၤဘျီၣ်ပှၤတဖၣ်န့ၣ်အမဲာ်ချံ လီၤ.

¹⁹အန့ၣ်ဝံၤစီၤအလံၤၡါလဲၤဆူအဝဲသ့ၣ်အအိၣ်စံးဝဲဒၣ်, “သုကျဲကမၣ်လံ. တၢ်အံၤတမ့ၢ်ဘၣ်ဝ့ၢ်တဖျၢၣ်လၢသုကွၢ်ဃုန့ၣ် ဘၣ်. ပိာ်ယခံဒီးယကဆှၢသုဆူပှၤတဂၤလၢသုဃုအီၤအအိၣ်န့ၣ်လီၤ.” ဒီးအဝဲဆှၢအဝဲသ့ၣ်ဆူဝ့ၢ်ၡၤမရံန့ၣ်လီၤ.

²⁰တစုဃီဖဲအဝဲသ့ၣ်လဲၤနုာ်လီၤဆူဝ့ၢ်အပူၤန့ၣ်, စီၤအလံၤၡါဘါထုကဖၣ်တၢ်အံၤ, “ယွၤဧၢ, အိးထီၣ်အဝဲသ့ၣ်အမဲာ်ချံတဖၣ်ဒီးပျဲအထံၣ်ထီၣ်တၢ်တက့ၢ်.” ယွၤစံးဆၢအဝဲအတၢ်ထုကဖၣ်ဒီးဒုးထံၣ်ထီၣ်က့ၤအဝဲသ့ၣ်အတၢ် ဒီးအဝဲသ့ၣ်ထံၣ်ဝဲဒၣ်လၢအအိၣ်လၢဝ့ၢ်ၡၤမရံအပူၤန့ၣ်လီၤ.

²¹တုၤကီၢ်အံၣ်စရ့လးအစီၤပၤထံၣ်ဘၣ်ပှၤစူၤရံဖိတဖၣ်န့ၣ်အဝဲ သံကွၢ်စီၤအလံၤၡါဒ်အံၤ, “ယကဘၣ်မၤသံအဝဲသ့ၣ်ဧါတၢ်ဒိၣ်ဧၢ, ယကဘၣ်မၤသံအဝဲသ့ၣ်ဧါ.”

²²စီၤအလံၤၡါစံးဆၢဝဲ, “မၤသံတဂ့ၤ. ပှၤသုးဖိတဖၣ်လၢ နဖီၣ်န့ၢ်အီၤလၢတၢ်ဒုးအပူၤလၢနကမၤသံအီၤဒၣ်လဲာ်န့ၣ်, မၤသံအီၤတဂ့ၤ. ဟ့ၣ်အဝဲသ့ၣ်တၢ်တနီၤနီၤလၢကအီၣ်ဒီးကအီဝဲ အဂီၢ်ဒီးပျဲအဝဲသ့ၣ်က့ၤကဒါက့ၤဆူအစီၤပၤအအိၣ်န့ၣ်တက့ၢ်.”

²³လၢတၢ်န့ၣ်အဃိကီၢ်အံၣ်စရ့လးအစီၤပၤမၤန့ၢ်အဝဲသ့ၣ်လၢတၢ် အီၣ်အမူးဖးဒိၣ်တမူးန့ၣ်လီၤ. တုၤအဝဲသ့ၣ်အီၣ်တၢ်ဒီးအီမူၤအသးဝံၤန့ၣ်, အဝဲဆှၢလီၤကဒါက့ၤအဝဲသ့ၣ်ဆူကီၢ်စူၤရံအစီၤပၤအအိၣ်န့ၣ်လီၤ. စးထီၣ်ဖဲန့ၣ်ဒီးဆူညါပှၤစူၤရံဖိတဖၣ်ဆိကတီၢ်ဒုးကီၢ်အံၣ် စရ့လးန့ၣ်လီၤ.

²⁴လၢခံတယံာ်ဘၣ်န့ၣ်, ကီၢ်စူၤရံအစီၤပၤဘ့ၣ်ဟဒးဆှၢအသုးမုၢ် ဒီဖုညါထီဒါကီၢ်အံၣ်စရ့လးဒီးကဝီၤဃးဝ့ၢ်ၡၤမရံန့ၣ်လီၤ.

²⁵လၢတၢ်ကဝီၤဃာ်အံၤအဃိ, တၢ်အီၣ်ကၤဝဲလၢဝ့ၢ်ပူၤနးမးတုၤဒၣ် လဲာ်ကသ့ၣ်ယီၤအခိၣ်တဖျၢၣ်အပှ့ၤမ့ၢ်ဝဲစ့အဘ့ၣ်ဃိးဆံဒီးထိၣ် လွံၢ်အအ့ၣ်လီၤတယၢၢ်တကာ်လွံၢ်ပူတပူန့ၣ်အပှ့ၤမ့ၢ်ဝဲစ့ယဲၢ်ဘ့ၣ် န့ၣ်လီၤ.

²⁶ကီၢ်အံၣ်စရ့လးအစီၤပၤလဲၤတြူာ်တၢ်လၢဝ့ၢ်ခိၣ်ဒူအဖီခိၣ်, ဖဲပိာ်မုၣ်တဂၤကိးထီၣ်ဝဲ, “တၢ်ဒိၣ်ကစၢ်စီၤပၤဧၢ, မၤစၢၤယၤတက့ၢ်,” အခါန့ၣ်လီၤ.

²⁷ကီၢ်အံၣ်စရ့လးအစီၤပၤစံးဆၢဝဲဒၣ်, “ယွၤမ့ၢ်, တမၤစၢၤနၤဘၣ်ဒီးယဟ့ၣ်မၤစၢၤနၤမနုၤကသ့န့ၣ်လဲၣ်. မ့ၢ်ယအိၣ်ဒီးဘုကၠူၣ်မ့ၢ်ဂ့ၤစပံးထံမ့ၢ်ဂ့ၤတမံၤမံၤန့ၣ် ဧါ.

²⁸နတၢ်ကီတၢ်ခဲမ့ၢ်မနုၤလဲၣ်.” ပိာ်မုၣ်န့ၣ်စံးဆၢဝဲ, “ဘၣ်တနံၤန့ၣ်, ပိာ်မုၣ်အံၤဟ့ၣ်ကူၣ်ဝဲလၢပကအီၣ်ယဖိ, ဝံၤဒီးလၢခံတနံၤပကအီၣ်အဖိန့ၣ်လီၤ.

²⁹လၢတၢ်န့ၣ်အဃိ, ပဖီထီၣ်ယဖိခွါဒီးအီၣ်အီၤန့ၣ်လီၤ. လၢခံတနံၤ, ယတဲဘၣ်အီၤလၢပကအီၣ်အဖိခွါ, ဘၣ်ဆၣ်အဝဲပာ်ခူသူၣ်ကွံာ်အီၤန့ၣ်လီၤ. ”

³⁰တုၤစီၤပၤနၢ်ဟူဘၣ်တၢ်အံၤန့ၣ်, အဝဲဖှီအကူအသိးတဖၣ်လၢတၢ် ကမၢကမၣ်အပူၤ, ဒီးပှၤဂီၢ်မုၢ်လၢအအိၣ်ဘူးဒီးဝ့ၢ်ခိၣ်ဒူန့ၣ်ထံၣ်ဘၣ်ဝဲသ့ လၢအဝဲကူကၤထၢၣ်တၢ်ကံးယၣ်လၢအဆ့ကၤလၢအဖီလာ်န့ၣ်လီၤ.

³¹အဝဲကိးထီၣ်ဝဲဒၣ်, “စီၤအလံၤၡါအခိၣ်, မ့ၢ်တဘၣ်တၢ်ဒီၣ်တဲာ် အီၤတချုးမုၢ်တနံၤအံၤလၢာ်ဘၣ်န့ၣ်, မ်ယွၤမၤသံယၤန့ၣ်တ က့ၢ်.”

³²ဒီးအဝဲဆှၢလီၤပှၤစိာ်တၢ်ကစီၣ်တဂၤလၢကလဲၤမၤန့ၢ်စီၤအလံၤ ၡါအဂီၢ်န့ၣ်လီၤ. အခါဖဲန့ၣ်, စီၤအလံၤၡါအိၣ်ဝဲဖဲအဟံၣ်ပူၤဃုာ်ဒီးပှၤသးပှၢ် တနီၤလၢအဟဲအိၣ်သကိးအီၤန့ၣ်လီၤ. တချုးလၢစီၤပၤအပှၤစိာ်တၢ်ကစီၣ်ဟဲတုၤဒံးဘၣ်န့ၣ်, စီၤအလံၤၡါစံးဘၣ်ပှၤသးပှၢ်တဖၣ်န့ၣ် “ပှၤမၤသံတၢ်တဂၤန့ၣ်ဆှၢ လီၤပှၤတဂၤလၢကဟဲမၤသံယၤလီၤ. ခဲကနံၣ်အံၤတုၤအဝဲဟဲတုၤဖဲအံၤန့ၣ်, ကးတံာ်ပဲတြီ, ဒီးပျဲအဟဲနုာ်တဂ့ၤ. စီၤပၤအကစၢ်ဒၣ်ဝဲကအိၣ်ဒၣ်ဖဲအဝဲ အလီၢ်ခံဖိန့ၣ်လီၤ.”

³³တချုးလၢအဝဲစံးတၢ်အံၤဝံၤဒၣ်လဲာ်န့ၣ်, စီၤပၤအပှၤစိာ်တၢ် ကစီၣ်ဟဲတုၤဝဲလီၤ. စီၤပၤဟဲတုၤစ့ၢ်ကီးဒီးစံးဝဲ, “တၢ်ကီတၢ်ခဲလၢအလီၤဘၣ်လၢပလိၤအံၤမ့ၢ်ယွၤဟဲစိာ်အီၤန့ၣ်လီၤ. ဘၣ်မနုၤအဃိယကြၢးခိးဒံးအီၤလၢအဝဲကမၤတၢ်တမံၤမံၤအဂီၢ်လဲၣ်.”