Read S'gaw Karen လံာ်စီၤပၤခံဘ့ၣ်တဘ့ၣ် 9 Bible Online

လံာ်စီၤပၤခံဘ့ၣ်တဘ့ၣ် 9 - S'gaw Karen bible

လံာ်စီၤပၤခံဘ့ၣ်တဘ့ၣ် 9

¹ဖဲဆၢကတီၢ်အဝဲန့ၣ်အပူၤအတ့ၤ, ဝံအလံၤၡါကိးဃီၤဝံသးစၢ် အကျါတဂၤဒီးစံးဘၣ်အီၤ, “ကတဲာ်ကတီၤထီၣ်နသးဒီးလဲၤဆူဝ့ၢ်ရၤမိးလၢကီၢ်ကံးလဧး အပူၤန့ၣ်တက့ၢ်. လဲၤစိာ်သ့ၣ်စၤယံးအသိတကိအံၤဃုာ်ဒီးနၤ,

²ဒီးဖဲနလဲၤတုၤဖဲန့ၣ်န့ၣ်, ဃုထံၣ်စီၤနံၣ်ၡံအလံၤခွါ, စီၤယဟိၡၤဖးအဖိခွါစီၤယ့ၤဟူတက့ၢ်. လဲၤကိးအီၤဆူဒၢးတဖျၢၣ်လၢတၢ်ခူသူၣ်အပူၤ, ယံၤဒီးအသကိးတဖၣ်,

³ဒီးလူလီၤသ့ၣ်စၤယံးအသိအံၤလၢအဝဲအခိၣ်လိၤဒီးစံး, ယွၤစံးဝဲဒၣ်လၢအဝဲဖှူနၤဒ်ကီၢ်အံၣ်စရ့လးအစီၤပၤအသိးန့ၣ် လီၤ. အန့ၣ်ဝံၤဒီး, ဟးထီၣ်ကွံာ်ဖဲန့ၣ်တချ့ဖဲအချ့န့ၣ်တက့ၢ်.”

⁴လၢတၢ်န့ၣ်အဃိဝံသးစၢ်တဂၤန့ၣ်လဲၤဝဲဆူဝ့ၢ်ရၤမိး,

⁵ဒီးဖဲန့ၣ်, အဝဲထံၣ်ဘၣ်ပှၤသုးမုၢ်အခိၣ်တဖၣ်, အိၣ်လၢတၢ်အိၣ်ဖှိၣ်အပူၤန့ၣ်လီၤ. အဝဲစံးဝဲဒၣ်, “တၢ်ဒိၣ်ဧၢ, ယအိၣ်ဒီးတၢ်ကစီၣ်တမံၤလၢနဂီၢ်လီၤ.” ဒီးစီၤယ့ၤဟူသံကွၢ်ဝဲ, “မ့ၢ်နကတိၤတၢ်ဒီးမတၤတဂၤလၢပကျါန့ၣ်လဲၣ်.” အဝဲဒၣ်စံးဆၢဝဲ, “နၤလီၤ. တၢ်ဒိၣ်ဧၢ.”

⁶အန့ၣ်ဒီးအဝဲသ့ၣ်ခံဂၤလဲၤနုာ်ဆူတၢ်အိပူၤ, ဒီးဝံသးစၢ်တဂၤန့ၣ်, လူလီၤသ့ၣ်စၤယံးအသိလၢစီၤယ့ၤဟူအခိၣ်လိၤဒီးစံးဘၣ်အီၤ, “ယွၤ, ကီၢ်အံၣ်စရ့လးအကစၢ်ယွၤစံးဝဲ, ယဖှူနၤဒ်စီၤပၤလၢယပှၤဂီၢ်မုၢ်အံၣ်စရ့လးအဂီၢ်န့ၣ်လီၤ.

⁷နကဘၣ်မၤသံကွံာ်နကစၢ်စီၤပၤ, စီၤအၤဃာ်အဖိခွါတဂၤန့ၣ်ဒ်သိး ယကစံၣ်ညီၣ်နီၢ်အံၤစ့ဘ့ၤလးအဂီၢ်, မ့ၢ်လၢအဝဲမၤသံယဝံတဖၣ်, ဒီးယခ့ယပှၤအဂၤတဖၣ်အဃိန့ၣ်လီၤ.

⁸ကယဲၢ်စီၤအၤဃာ်အဟံၣ်ဖိဃီဖိဒီးအစၢၤအသွဲၣ်ခဲလၢာ်ကဘၣ်သံဝဲ လီၤ. ယကမၤလၢာ်ကယဲၢ်ပိာ်ခွါခဲလၢာ်လၢအဟံၣ်ဖိဃီဖိ အကျါ, ပှၤသးစၢ်မ့ၢ်ဂ့ၤ, ပှၤသးပှၢ်မ့ၢ်ဂ့ၤန့ၣ်လီၤ.

⁹ယကမၤဘၣ်အဝဲအဟံၣ်ဖိဃီဖိဒ်အဝဲမၤဘၣ်တ့ၢ်ကီၢ်အံၣ်စရ့လးအစီၤ ပၤစီၤယၤရၤဘၣ်အဟံၣ်ဖိဃီဖိဒီးကီၢ်အံၣ်စရ့လးအစီၤပၤဘါ ၡၤအဟံၣ်ဖိဃီဖိအသိးန့ၣ်လီၤ.

¹⁰နီၢ်အံၤစ့ဘ့ၤလးတဘၣ်တၢ်ခူၣ်လီၤကွံာ်ဘၣ်အီၤဘၣ်. အစိၣ်ကဘၣ်တၢ်အီၣ်ကွံာ်အီၤလၢထွံၣ်လၢယံးစရ့လးအလီၢ်ကဝီၤပူၤ န့ၣ်လီၤ.”

¹¹စီၤယ့ၤဟူက့ၤကဒါက့ၤဆူအသကိးသုးခိၣ်ကဒဲကဒဲသ့ၣ်တဖၣ်အ အိၣ်, ဒီးအဝဲသ့ၣ်သံကွၢ်အီၤ, “တၢ်ခဲလၢာ်ဘၣ်လီၢ်ဘၣ်စးကစီဒီဧါ. တၢ်ပျုၢ်တဂၤန့ၣ်သးလီတၢ်မနုၤလၢနအိၣ်လဲၣ်.” စီၤယ့ၤဟူစံးဆၢဝဲ, “တၢ်လၢအဝဲသးလီဝဲန့ၣ်သုသ့ၣ်ညါ လီၤ.”

¹²အဝဲသ့ၣ်စံးဆၢဝဲ, “ပတသ့ၣ်ညါဘၣ်. တဲဘၣ်ပှၤတၢ်လၢအစံးတ့ၢ်နၤန့ၣ်တက့ၢ်.” စီၤယ့ၤဟူစံးဆၢဝဲ, “အဝဲတဲဘၣ်ယၤလၢယွၤစံးဝဲ, ယဖှူနၤဒ်ကီၢ်အံၣ်စရ့လးအစီၤပၤအသိးန့ၣ်လီၤ.”

¹³တဘျီဃီန့ၣ်, စီၤယ့ၤဟူအသုးခိၣ်ကဒဲကဒဲတဖၣ်, ဒါလီၤအဆ့ကၤဖးဒိၣ်တဖၣ်လၢဃီသွါတဖၣ်အဖီခိၣ်လၢစီၤယ့ၤဟူ ကဆၢထၢၣ်ဝဲအဂီၢ်, အူထီၣ်ကွဲၤတဖၣ်ဒီးကိးထီၣ်ဝဲ, “စီၤယ့ၤဟူမ့ၢ်စီၤပၤလီၤ.”

¹⁴အန့ၣ်ဝံၤဒီး, စီၤယ့ၤဟူကူၣ်တၢ်အၢထီဒါစီၤပၤယဟိရၣ်, လၢအအိၣ်ဝဲလၢဝ့ၢ်ယံးစရ့လးအပူၤ, တၢ်လီၢ်ဖဲအဝဲလဲၤတ့ၢ်ဒ်သိးကမၤဘျါက့ၤအတၢ်ပူၤလီၢ်ပူၤကျဲ လၢမၤန့ၢ်တ့ၢ်ဝဲလၢတၢ်ဒုးအပူၤဖဲဝ့ၢ်ရၤမိးဖဲတၢ်ဒုးထီ ဒါကီၢ်စူၤရံအစီၤပၤဃစ့လးအခါန့ၣ်လီၤ.

¹⁵လၢတၢ်န့ၣ်အဃိ, စီၤယ့ၤဟူစံးဘၣ်အသုးခိၣ်ကဒဲကဒဲတဖၣ်, “သုမ့ၢ်အိၣ်လၢယအိၣ်တခီန့ၣ်, မၤလီၤတံၢ်လၢပှၤတဟးထီၣ်ခူ သူၣ်ဘၣ်နီတဂၤလၢဝ့ၢ်ရၤမိးဒ်သိးကလဲၤဒီးဟ့ၣ်ပလီၢ်ပှၤဂီၢ် မုၢ်လၢအအိၣ်ဖဲဝ့ၢ်ယံးစရ့လးအပူၤဘၣ်န့ၣ်တက့ၢ်.”

¹⁶ဝံၤဒီးအဝဲဒိးထီၣ်အလ့ၣ်ကဟၣ်ဒီးဟးထီၣ်လဲၤဆူဝ့ၢ်ယံးစရ့ လးန့ၣ်လီၤ. စီၤယဟိရၣ်တဘျါက့ၤဒံးဘၣ်. ဒီးကီၢ်ယူဒၤအစီၤပၤစီၤအဃၤစယၤလဲၤအိၣ်သကိးအီၤဖဲန့ၣ်လီၤ.

¹⁷ပှၤခိးတၢ်အိၣ်မူအိၣ်ဒါတဂၤလၢပှၤခိးကွၢ်တၢ်အလီၢ်အပူၤလၢ ဝ့ၢ်ယံးစရ့လးထံၣ်ဘၣ်စီၤယ့ၤဟူဒီးအပှၤတဖၣ်ဟဲသုးဘူးအသး န့ၣ်လီၤ. ကိးထီၣ်ဝဲ, “ယထံၣ်ပှၤတနီၤ, ဟဲဒိးဝဲကသ့ၣ်န့ၣ်လီၤ.” စီၤယဟိရၣ်စံးဆၢဝဲ, “ဆှၢလီၤပှၤဒိးကသ့ၣ်တဂၤလၢကလဲၤဃု သ့ၣ်ညါဝဲမ့ၢ်အဝဲသ့ၣ်မ့ၢ်တံၤသကိးတဖၣ်ဧါ, မ့တမ့ၢ်ဒုၣ်ဒါတဖၣ်ဧါ.”

¹⁸ပှၤစိာ်တၢ်ကစီၣ်န့ၣ်ဒိးထီၣ်ကသ့ၣ်ဒီးလဲၤဆူစီၤယ့ၤဟူအအိၣ် ဒီးစံးဘၣ်အီၤ, “စီၤပၤအဲၣ်ဒိးသ့ၣ်ညါဝဲလၢမ့ၢ်နဟဲဒ်တံၤသကိးတဂၤအသိးန့ၣ်ဧါ.” စီၤယ့ၤဟူစံးဆၢအီၤ, “တၢ်န့ၣ်တဘၣ်ဃးဒီးနၤနီတမံၤဘၣ်. လဲၤဆူတၢ်လီၢ်ခံဒီးပိာ်ထီၣ်ယခံတက့ၢ်.” ပှၤခိးကွၢ်တၢ်တဂၤလၢပှၤခိးတၢ်အလီၢ်န့ၣ်, တဲဖျါထီၣ်က့ၤတၢ်လၢပှၤစိာ်တၢ်ကစီၣ်န့ၣ်လဲၤတုၤဝဲဆူပှၤတဖု န့ၣ်အအိၣ်, ဘၣ်ဆၣ်တဟဲက့ၤကဒါက့ၤဘၣ်.

¹⁹ပှၤစိာ်တၢ်ကစီၣ်အဂၤတဂၤဘၣ်တၢ်ဆှၢလီၤအီၤ, ဒီးအဝဲသံကွၢ်စီၤယ့ၤဟူလၢတၢ်သံကွၢ်တမံၤဃီန့ၣ်လီၤ. စီၤယ့ၤဟူစံးဆၢကဒီးဝဲ, “တၢ်န့ၣ်တဘၣ်ဃးဒီးနၤနီတမံၤ ဘၣ်. လဲၤဆူတၢ်လီၢ်ခံဒီးပိာ်ယခံတက့ၢ်.”

²⁰မၤကဒီးတဘျီပှၤခိးကွၢ်တၢ်တဂၤန့ၣ်တဲဖျါထီၣ်ကဒီးဝဲလၢပှၤ စိာ်တၢ်ကစီၣ်န့ၣ်လဲၤတုၤဆူပှၤတဖုန့ၣ်အအိၣ်ဘၣ်ဆၣ်တဟဲက့ၤကဒါ က့ၤဘၣ်. ဒီးစံးအါထီၣ်ဝဲ, “ပှၤတဖုန့ၣ်အခိၣ်တဂၤနီၣ်အလ့ၣ်ကဟၣ်လီၤဂာ်ဒ်ပှၤအပျုၢ်တဂၤ အသိး, ဒ်သိးဒၣ်စီၤယ့ၤဟူန့ၣ်လီၤ.”

²¹စီၤပၤယဟိရၣ်ဟ့ၣ်လီၤအကလုၢ်စံးဝဲ, “ကတဲာ်ကတီၤထီၣ်ယလ့ၣ် ကဟၣ်တက့ၢ်.” အတၢ်ဟ့ၣ်လီၤအကလုၢ်ဘၣ်တၢ်မၤထွဲအီၤ, ဒီးအဝဲဒီးစီၤပၤအဃၤစယၤဟးထီၣ်ဒိးထီၣ်အလ့ၣ်ကဟၣ်ဒၣ်ဝဲ စုာ်စုာ်လၢကလဲၤသဂၢၢ်စီၤယ့ၤဟူအဂီၢ်န့ၣ်လီၤ. အဝဲသ့ၣ်ထံၣ်လိာ်အသးဒီးစီၤယ့ၤဟူဖဲပှၤယံးစရ့လးဖိစီၤ နၤဘိးအပျီန့ၣ်လီၤ.

²²စီၤယဟိရၣ်သံကွၢ်အီၤ, “နဟဲလၢတၢ်ဃူတၢ်ဖိးအပူၤဧါ.” စီၤယ့ၤဟူစံးဆၢဝဲ “ဖဲပအိၣ်ဒံးဒၣ်ဒီးတၢ်သမူပယၢ်အတၢ်မၤ ဒီးတၢ်မၤကမၣ်မုၣ်ကမၣ်ခွါလၢနမိၢ်နီၢ်အံၤစ့ဘ့ၤလးစးထီၣ် ဝဲအံၤန့ၣ်တၢ်ဃူတၢ်ဖိးအိၣ်ကသ့ဒ်လဲၣ်.”

²³ဖဲစီၤယဟိရၣ်ဃၣ်တရံးက့ၤအလ့ၣ်ကဟၣ်အခိၣ်ဒီးဃ့ၢ်ပူၤဖျဲးအသး အခါန့ၣ်, ကိးထီၣ်ဝဲ, “စီၤအဃၤစယၤဧၢ, တၢ်အံၤမ့ၢ်တၢ်ပူထီၣ်လီၤ.”

²⁴စီၤယ့ၤဟူထုးထီၣ်အချံၣ်ဒီးလၢအဂံၢ်အဘါခဲလၢာ်အပူၤန့ၣ်အဝဲ ခးပျၢ်တဘ့ၣ်လၢအဆဲးဖျိဘၣ်စီၤယဟိရၣ်အချၢဃံဒီးဆဲးဖျိဆူ အသးန့ၣ်လီၤ. စီၤယဟိရၣ်လီၤဃံၤသံဝဲလၢအလ့ၣ်ကဟၣ်ပူၤ,

²⁵ဒီးစီၤယ့ၤဟူစံးဘၣ်အပှၤကွၢ်ထွဲမၤစၢၤအီၤစီၤဘံးဒကၢ်, “ဟံးထီၣ်အစိၣ်န့ၣ်ဒီးတ့ၢ်လီၤကွံာ်အီၤလၢစီၤနၤဘိးအပျီ ပူၤတက့ၢ်. သ့ၣ်နီၣ်ထီၣ်က့ၤလၢဖဲနၤဒီးယၤပဒိးကသ့ၣ်လၢ စီၤပၤယဟိရၣ်အပၢ်စီၤအၤဃာ်အလီၢ်ခံအခါန့ၣ်, ယွၤကတိၤတၢ်ကတိၤတဖၣ်အံၤထီဒါစီၤအၤဃာ်န့ၣ်တက့ၢ်.

²⁶“ယထံၣ်တ့ၢ်တၢ်မၤသံစီၤနၤဘိးဒီးအဖိခွါတဖၣ်မဟါတနံၤန့ၣ် လီၤ. ဒီးယအၢၣ်လီၤယသးလၢယကစံၣ်ညီၣ်နၤဖဲအံၤ, လၢပျီတဘ့ၣ်ဃီအံၤအပူၤန့ၣ်လီၤ.” စီၤယ့ၤဟူမၤလိာ်အပှၤကွၢ်ထွဲမၤစၢၤအီၤ, “လၢတၢ်န့ၣ်အဃိ, ဟံးထီၣ်စီၤယဟိရၣ်အစိၣ်ဒီးတ့ၢ်လီၤကွံာ်အီၤဆူစီၤနၤဘိး အပျီပူၤလၢတၢ်မၤလၢထီၣ်ပှဲၤထီၣ်ယွၤအတၢ်အၢၣ်လီၤအဂီၢ်န့ၣ် တက့ၢ်.

²⁷စီၤပၤအဃၤစယၤထံၣ်ဘၣ်တၢ်မၤအသး, အဃိဒီး, အဝဲဃ့ၢ်ပူၤဖျဲးကွံာ်အသးလၢအလ့ၣ်ကဟၣ်ဒၣ်ဝဲအပူၤဆူ တၤသၣ်လီၢ်အဟံၣ်အကျဲ, ဒီးစီၤယ့ၤဟူလူၤထွဲအီၤန့ၣ်လီၤ. စီၤယ့ၤဟူမၤလိာ်အခ့အပှၤတဖၣ်, “မၤသံကွံာ်အီၤစ့ၢ်ကီးတ က့ၢ်.” ဒီးအဝဲသ့ၣ်မၤဘၣ်ဒိဘၣ်ထံးအီၤဖဲအဝဲနီၣ်အလ့ၣ်ကဟၣ်ဆူ ကျဲလဲၤထီၣ်ဆူကူၢ်ဖဲဝ့ၢ်ယံးဘျၣ်အကပၤန့ၣ်လီၤ. ဘၣ်ဆၣ်အဝဲဃ့ၢ်ဝဲဆူညါကဲဒံးတုၤအလဲၤတုၤဆူဝ့ၢ်မကံးဒိၤ ဒီးသံဝဲဖဲန့ၣ်လီၤ.

²⁸အဝဲအသုးခိၣ်သုးနၢ်တဖၣ်ဟဲက့ၤစိၣ်က့ၤအစိာ်ဆူဝ့ၢ်ယရူၤၡလ့ၣ် လၢလ့ၣ်ကဟၣ်တဆိအပူၤဒီးခူၣ်လီၤအီၤလၢစီၤပၤအတၢ်သွၣ်ခိၣ် အလီၢ်တဖၣ်လၢစီၤဒၤဝံးအဝ့ၢ်ပူၤန့ၣ်လီၤ.

²⁹စီၤအဃၤစယၤကဲထီၣ်ကီၢ်ယူၤဒၤအစီၤပၤဖဲစီၤအၤဃာ်အဖိခွါ စီၤယဟိရၣ်မ့ၢ်ကီၢ်အံၣ်စရ့လးအစီၤပၤ, တဆံတနံၣ်အပူၤန့ၣ်လီၤ.

³⁰စီၤယ့ၤဟူလဲၤတုၤဝဲဆူဝ့ၢ်ယံးစရ့လးန့ၣ်လီၤ. နီၢ်အံၤစ့ဘ့ၤလးနၢ်ဟူဘၣ်တၢ်မၤတ့ၢ်လံအသးန့ၣ်အဃိ, တိၤဃံလၤထီၣ်အမဲာ်ဖံး, ကတဲာ်ကတီၤအခိၣ်သူဒီးဆၢထၢၣ်ကွၢ်လီၤ တၢ်လၢနူၢ်ဧိၤစီၤဧိၤအပဲတြီဖိတဘ့ၣ်အပူၤဆူကျဲမုၢ်ခိၣ်န့ၣ်လီၤ.

³¹တုၤစီၤယ့ၤဟူဟဲနုာ်ဝဲခီဖျိတြဲၤဖးဒိၣ်န့ၣ်, နီၢ်အံၤစ့ၤဘ့ၤလးကိးထီၣ်ဝဲ, “ပှၤလၢအမၤသံအကစၢ်ဒ်စီၤစံၣ်ရံၤဧၢ, နဟဲလၢတၢ်ဃူတၢ်ဖိးအပူၤစ့ၢ်ကီးဧါ.”

³²စီၤယ့ၤဟူကွၢ်ထီၣ်တၢ်ဒီးကိးထီၣ်ဝဲ, “မ့ၢ်မတၤအိၣ်လၢယအိၣ် တခီလဲၣ်.” ပှၤဒ့ဒံၣ်ဖိခံဂၤမ့တမ့ၢ်သၢဂၤကွၢ်လီၤအီၤလၢပဲတြီဖိ တဘ့ၣ်အပူၤ,

³³ဒီးစီၤယ့ၤဟူစံးဘၣ်အဝဲသ့ၣ်, “ကွံာ်လီၤအီၤတက့ၢ်.” အဝဲသ့ၣ်ကွံာ်လီၤနီၢ်အံၤစ့ၤဘ့ၤလးဒီးအဝဲအသွံၣ်ဖျိးဘၣ်အၢ လၢတၢ်ဒူၣ်အလိၤဒီးလၢကသ့ၣ်တဖၣ်အလိၤန့ၣ်လီၤ. စီၤယ့ၤဟူနီၣ်ထီၣ်အလ့ၣ်ကဟၣ်တဖၣ်ဒီးယီၢ်တံၢ်နီၢ်အံၤစ့ဘ့ၤ လးအစိၣ်ဒီးအလ့ၣ်ကဟၣ်,

³⁴ဒီးလဲၤနုာ်ဆူနူၢ်ဧိၤစီၤဧိၤအပူၤ, ဒီးအီၣ်တၢ်န့ၣ်လီၤ. အန့ၣ်ဝံၤဒီးအဝဲစံးထီၣ်ဝဲ, “ဟံးထီၣ်ပိာ်မုၣ်ဘၣ်ဆိၣ်အၢ န့ၣ်ဒီးခူၣ်လီၤကွံာ်အီၤတက့ၢ်. ဒ်လဲၣ်ဂ့ၤ, ဒ်လဲၣ်ဂ့ၤန့ၣ်, အဝဲမ့ၢ်စီၤပၤတဂၤအဖိမုၣ်န့ၣ်လီၤ.”

³⁵ဘၣ်ဆၣ်ပှၤတဖၣ်လၢအဟးထီၣ်ဒ်သိးကလဲၤခူၣ်လီၤကွံာ်အီၤန့ၣ်, တထံၣ်တၢ်နီတမံၤဘၣ်. ထံၣ်ဒၣ်ထဲအခိၣ်ကုဒီးအစုဃံဒီးအခီၣ် ဃံန့ၣ်လီၤ.

³⁶ဖဲအဝဲသ့ၣ်က့ၤပာ်ဖျါထီၣ်တၢ်ဂ့ၢ်အံၤဆူစီၤယ့ၤဟူအအိၣ်န့ၣ်, အဝဲစံးဝဲ, “တၢ်အံၤမ့ၢ်တၢ်လၢယွၤစံးတ့ၢ်လၢကမၤအသးဖဲ အဝဲကတိၤတ့ၢ်တၢ်ခီဖျိအခ့အပှၤစီၤအ့ၤလံယၤ, လၢထွံၣ်တဖၣ်ကအီၣ်နီၢ်အံၤစ့ဘ့ၤလးအညၣ်လၢယံးစရ့လးအလီၢ် ကဝီၤပူၤန့ၣ်လီၤ.

³⁷အဝဲအဃံအကွဲလၢအအိၣ်လီၤတဲာ်တဖၣ်ကဘၣ်တၢ်မၤလီၤပြံလီၤပြါအီၤဖဲန့ၣ်ဒ်တၢ်အ့ၣ်အသိးဒ်သိးပှၤကွၢ်နီၣ်အီၤသုတဘၣ် နီတဂၤတဂ့ၤအဂီၢ်န့ၣ်လီၤ.