Read S'gaw Karen လံာ်ကွဲးနီၣ်တၢ်အခီၣ်ထံးတဘ့ၣ် 11 Bible Online

လံာ်ကွဲးနီၣ်တၢ်အခီၣ်ထံးတဘ့ၣ် 11 - S'gaw Karen bible

လံာ်ကွဲးနီၣ်တၢ်အခီၣ်ထံးတဘ့ၣ် 11

¹အံၣ်စရ့လးအပှၤဂီၢ်မုၢ်ခဲလၢာ်လဲၤဆူစီၤဒၤဝံးအအိၣ်ဖဲဃ့ဘြိၣ်ဒီးစံးဘၣ်အီၤ, “ပမ့ၢ်နညၣ်ဒီးနသွံၣ်နထံဒၣ်နဲန့ၣ်လီၤ.

²လၢအပူၤကွံာ်, ဖဲစီၤစီလူးမ့ၢ်ဒံးပစီၤပၤအခါဒၣ်လဲာ်န့ၣ် နဆှၢတ့ၢ်အံၣ်စရ့လးအပှၤဂီၢ်မုၢ်လၢတၢ်ဒုးတၢ်ယၤအပူၤ, ဒီးနယွၤ, ကစၢ်ယွၤအၢၣ်လီၤနၤလၢနကမ့ၢ်ပှၤဆှၢအပှၤဂီၢ်မုၢ် ဒီးကဲထီၣ်ပှၤပၢဘၣ်အဝဲသ့ၣ်န့ၣ်လီၤ.”

³လၢတၢ်န့ၣ်အဃိ, အံၣ်စရ့လးအပှၤခိၣ်ပှၤနၢ်ခဲလၢာ်, ဟဲဆူစီၤပၤဒၤဝံးအအိၣ်ဖဲဃ့ဘြိၣ်န့ၣ်လီၤ. အဝဲမၤတၢ်အၢၣ်လီၤစီဆှံဒီးအဝဲသ့ၣ်, ဒီးအဝဲသ့ၣ်ဖှူအီၤလၢ စီၤပၤဒီးအဝဲကဲထီၣ်အံၣ်စရ့လးအစီၤပၤဒ်ယွၤအၢၣ်လီၤတ့ၢ် တၢ်, ခီဖျိစီၤၡမူၤအ့လးအသိးန့ၣ်လီၤ.

⁴စီၤပၤဒၤဝံးဒီးကယဲၢ်ပှၤအံၣ်စရ့လးဖိခဲလၢာ်လဲၤဒီးဒုး ဝ့ၢ်ယရူၤၡလ့ၣ်န့ၣ်လီၤ. ဖဲန့ၣ်အခါဝ့ၢ်ယရူၤၡလ့ၣ်ဘၣ်တၢ်သ့ၣ်ညါအီၤဒ်ဝ့ၢ်ယဘူၣ်ဒီးပှၤ ယဘူၣ်ဖိတဖၣ်လၢအမ့ၢ်ပှၤအိၣ်ဝဲ ဆိးဝဲအဆိကတၢၢ်ဖဲကီၢ်န့ၣ်အပူၤအိၣ်ဆိးဝဲဒံးဖဲန့ၣ်လီၤ.

⁵ပှၤယဘူၣ်ဖိတဖၣ်တဲဘၣ်စီၤဒၤဝံးလၢတမ့ၢ်ကနုာ်လီၤဘၣ်ဆူဝ့ၢ် ယရူၤၡလ့ၣ်အပူၤနီတဘျီဘၣ်န့ၣ်လီၤ. ဘၣ်ဆၣ်စီၤဒၤဝံးမၤန့ၢ်ဝ့ၢ်စံယိၣ်အတိာ်ဒီးဝ့ၢ်န့ၣ်ကဲထီၣ် တၢ်လီၢ်လၢအဘၣ်တၢ်သ့ၣ်ညါအီၤဒ် “စီၤဒၤဝံးအဝ့ၢ်” န့ၣ်လီၤ.

⁶စီၤဒၤဝံးစံးဝဲ, “ပှၤအဆိကတၢၢ်တဂၤလၢအမၤသံဘၣ်ပှၤယဘူၣ် ဖိအဆိကတၢၢ်တဂၤန့ၣ်ကကဲထီၣ်သုးမုၢ်အခိၣ်ဖးဒိၣ်န့ၣ်လီၤ.” နီၢ်စရူၤယၤအဖိခွါစီၤယိၤအာ်မ့ၢ်ပှၤအဆိ ကတၢၢ်တဂၤလၢအတီခိၣ်ရိၣ်မဲလၢတၢ်ဒုးအပူၤ, ဒီးအဝဲကဲထီၣ်သုးခိၣ်ဖးဒိၣ်န့ၣ်လီၤ.

⁷မ့ၢ်လၢစီၤဒၤဝံးလဲၤအိၣ်ဝဲဆိးဝဲဖဲတိာ်န့ၣ်အပူၤအဃိဘၣ် တၢ်ကိးလၢ “စီၤဒၤဝံးအဝ့ၢ်” န့ၣ်လီၤ.

⁸အဝဲသူၣ်ထီၣ်ဝ့ၢ်အခိၣ်ဒူဝးတရံး, စးထီၣ်လၢကစၢၢ်ကလိ အမုၢ်ထီၣ်မံးလိၤ, ဖဲစီၤယိၤအာ်တခီဘှီဂ့ၤက့ၤတၢ်အိၣ်လီၤ တဲာ်လၢဝ့ၢ်ပူၤအဂၤတဖၣ်န့ၣ်လီၤ.

⁹စီၤဒၤဝံးအဂံၢ်အဘါဒံးယံာ်ဒံးဆူၣ်ထီၣ်မ့ၢ်လၢယွၤသ့တၢ်လၢာ် အိၣ်ဒီးအီၤအဃိန့ၣ်လီၤ.

¹⁰အအံၤမ့ၢ်တၢ်ကွဲးနီၣ်ကွဲးဃါဘၣ်ထွဲဒီးစီၤဒၤဝံးအပှၤသုး ဖိအမံၤဟူသၣ်ဖျါတဖၣ်န့ၣ်လီၤ. အဝဲသ့ၣ်တဖၣ်ဃုာ်ဒီးပှၤအံၣ်စရ့လးဖိအိၣ်လီၤတဲာ်တဖၣ်န့ၣ်, မၤစၢၤသကိးစီၤဒၤဝံးဒ်သိးကကဲထီၣ်ဘၣ်စီၤပၤအဂီၢ်ဒ်ယွၤ အၢၣ်လီၤတ့ၢ်အသိးဒီးအဝဲသ့ၣ်ပၢၤဃာ်အဘီအမုၢ်ဒ်သိးကအိၣ်ဂၢၢ် အိၣ်ကျၢၤန့ၣ်လီၤ.

¹¹ပှၤအဆိကတၢၢ်တဂၤန့ၣ်မ့ၢ်ဝဲစီၤယၤၡဘၣ်လၢပှၤဃၤကမိၣ်ဖိ အဒူၣ်ထၢပူၤ, ပှၤအခိၣ်လၢပှၤသၢဂၤအကျါန့ၣ်လီၤ. အဝဲဒုးတၢ်ဒီးအဘီထီဒါပှၤသၢကယၤဂၤဒီးမၤသံကွံာ်အဝဲသ့ၣ် ခဲလၢာ်လၢတၢ်ဒုးတဘျီအပူၤန့ၣ်လီၤ.

¹²ပှၤလၢခံတဂၤလၢပှၤမံၤဟူသၣ်ဖျါသၢဂၤအကျါမ့ၢ်ဝဲ စီၤဒိဒိၤအဖိခွါစီၤအလၤဧစၢ်လၢပှၤအဃိဃးဖိအဒူၣ်ထၢပူၤ န့ၣ်လီၤ.

¹³အဝဲဒုးတၢ်လၢစီၤဒၤဝံးအဂီၢ်ထီဒါပှၤဖလ့ၡသးဖိတဖၣ်ဖဲ တၢ်ဒုးလၢပၤစဒၤမံၣ်န့ၣ်လီၤ. ဖဲပှၤအံၣ်စရ့လးဖိစးထီၣ်ဃ့ၢ်ထီၣ်ကွံာ်ဝဲန့ၣ်အဝဲအိၣ်ဝဲဖဲ ဘုမုယီၤအပျီတဘ့ၣ်အပူၤ,

¹⁴ဒီးအဝဲဒီးအပှၤတဖၣ်ထၢၣ်ဂၢၢ်ဝဲဖဲပျီခၢၣ်သးဒီးဒုးပှၤဖလ့ ၡသးဖိတဖၣ်န့ၣ်လီၤ. ဒီးယွၤဟ့ၣ်လီၤအီၤတၢ်မၤနၢၤဖးဒိၣ်န့ၣ်လီၤ.

¹⁵ဘၣ်တနံၤန့ၣ်ပှၤသၢဂၤလၢပှၤသုးဖိစဲၣ်နီၤသၢဆံအကျါ, လဲၤလီၤဆူစီၤဒၤဝံးအအိၣ်ဖဲလၢၢ်လၢအဝဲအိၣ်ဆိးဝဲဘူးဒီး လၢၢ်ကအိဧၤဒူးလၣ်, ဖဲပှၤဖလ့ၡသးဖိတဖုသူၣ်အဒဲဖဲ ကစၢၢ်ကဆူးရၤဖၤအခါန့ၣ်လီၤ.

¹⁶ဖဲအကတီၢ်အံၤန့ၣ်စီၤဒၤဝံးအိၣ်ဝဲလၢတိာ်ပူၤဒီးဖလ့ၡသးဖိ အသုးဖိတဖုမၤန့ၢ်ဒီးအိၣ်ဆိးဝဲဖဲဝ့ၢ်ဘ့ၤသလ့ဃ့ၣ်န့ၣ်လီၤ.

¹⁷စီၤဒၤဝံးသးသယုၢ်အဟံၣ်ဒီးစံးဝဲ, “ယအဲၣ်ဒိးမးလၢပှၤတဂၤ ဂၤကဟဲစိာ်န့ၢ်ယၤထံအီတခွးလၢထံပူၤလၢအအိၣ်ဖဲ ဝ့ၢ်ဘ့ၤသလ့ဃ့ၣ်အတြဲၤကပၤန့ၣ်လီၤ.”

¹⁸ဒီးပှၤသုးဖိစဲၣ်နီၤသၢဂၤလဲၤခီဂာ်ဆူၣ်ပှၤဖလ့ၡသးဖိသူၣ် ဒဲအလီၢ်ဒီးဒၢၣ်န့ၢ်ထံတနီၤလၢထံပူၤ, ဒီးဟဲက့ၤစိာ်န့ၢ်စီၤ ဒၤဝံးန့ၣ်လီၤ. ဘၣ်ဆၣ်အဝဲတအီဝဲဒၣ်ဘၣ်. မ့မ့ၢ်လူလီၤကွံာ်ဝဲဒ်တၢ်လုၢ်ထီၣ်လၢယွၤအဂီၢ်အသိး,

¹⁹ဒီးစံးဝဲ, “ယအီထံအံၤတလီၤဘၣ်. တၢ်အံၤကလီၤဂာ်ဒီးတၢ်အီပှၤတဖၣ်လၢအညိကွံာ်အသးလၢတၢ်သံခ့ သံပှၤအတၢ်မၤအဂီၢ်အသွံၣ်န့ၣ်လီၤ.” လၢတၢ်န့ၣ်အဃိအဝဲဂ့ၢ်လိာ်လၢကအီထံန့ၣ်လီၤ. အအံၤမ့ၢ်တၢ်မၤအဒူအဃိၤလၢပှၤသုးဖိစဲၣ်နီၤသၢဂၤမၤဝဲန့ၣ်လီၤ.

²⁰စီၤယိၤအာ်အဒီပုၢ်ဝဲခွါစီၤအဘံၡဲၤမ့ၢ်ပှၤအခိၣ်လၢပှၤမံၤ ဟူသၣ်ဖျါသၢဆံအကျါန့ၣ်လီၤ. အဝဲဒုးတၢ်ဒီးအဘီထီဒါပှၤသၢကယၤဂၤဒီးမၤသံကွံာ်ဝဲ, ဒီးကဲထီၣ်ပှၤမံၤဟူသၣ်ဖျါလၢပှၤသၢဆံအကျါန့ၣ်လီၤ.

²¹အဝဲမ့ၢ်ပှၤအမံၤဟူသၣ်ဖျါကတၢၢ်လၢပှၤသၢဆံ အကျါဒီးကဲထီၣ်အဝဲသ့ၣ်အခိၣ်န့ၣ်လီၤ. ဘၣ်ဆၣ်အဝဲအမံၤတဟူထဲသိးပှၤသၢဂၤအံၤန့ၣ်ဘၣ်.

²²ပှၤကၤဘစ့လးဖိစီၤယဟိၤယဒါအဖိခွါစီၤဘနါယၤန့ၣ်မ့ၢ်ပှၤ သုးဖိလၢအမံၤဟူသၣ်ဖျါတဂၤန့ၣ်လီၤ. အဝဲမၤတ့ၢ်တၢ်မၤအဒူအါမံၤ, လၢအအိၣ်ဃုာ်ဝဲဒီးတၢ်မၤသံပှၤမိၤအးသုးဖိဖးဒိၣ်ခံဂၤန့ၣ်လီၤ. တဘျီအဝဲလဲၤလီၤဆူတၢ်ပူၤတပူၤဖဲမူခိၣ်ဖီလီၤဝဲအနံၤတနံၤ ဒီးမၤသံကွံာ်ခ့ယုၢ်တဒုန့ၣ်လီၤ.

²³အဝဲမၤသံကွံာ်စ့ၢ်ကီးပှၤအဲၤကူပတူးဖိတဂၤ, ပှၤဖးဒိၣ်လၢအနီၢ်ထီယဲၢ်ပျၢ်ဒီးဖီၣ်ဃးအဘီဖးဒိၣ်လၢအစု ပူၤန့ၣ်လီၤ. ဘၣ်ဆၣ်စီၤဘနါယၤလဲၤလီၤဆူအအိၣ်ဒီးထီဒါအီၤဒီးနီၣ်တီၢ် တဘိ, ဂုာ်န့ၢ်ဘီလၢပှၤအဲၤကူပတူးဖိအစုပူၤဒီးမၤသံကွံာ်အီၤ လၢဘီအဝဲန့ၣ်လီၤ.

²⁴တၢ်သ့ၣ်တဖၣ်န့ၣ်မ့ၢ်တၢ်မၤအဒူတဖၣ်လၢစီၤဘနါယၤ, ပှၤတဂၤလၢပှၤသၢဆံအကျါမၤဝဲန့ၣ်လီၤ.

²⁵အဝဲမ့ၢ်ပှၤစဲၣ်နီၤလၢပှၤသၢဆံ အကျါ, ဘၣ်ဆၣ်အမံၤတဟူထဲသိးပှၤသၢဂၤန့ၣ်ဘၣ်. ဒီးစီၤဒၤဝံးပာ်အီၤလၢပှၤအခိၣ်လၢပှၤခိးအသးသမူတဖၣ်အကျါ န့ၣ်လီၤ.

²⁶အအံၤမ့ၢ်ပှၤသုးဖိစဲၣ်နီၤသ့ၣ်တဖၣ်န့ၣ်လီၤ. စီၤယိၤအာ်အဒီပုၢ်ဝဲၢ်ခွါစီၤဧစၤအ့လး, စီၤဒိဒိၤအဖိခွါစီၤအ့လဃၤနၤလၢဝ့ၢ်ဘ့ၤသလ့ဃ့ၣ်,

²⁷ပှၤဃရိးဖိစီၤၡးမၤ, ပှၤပလိၣ်ဖိစီၤဃ့လ့း,

²⁸ပှၤတကိၤဖိစီၤဧံးက့ၣ်အဖိခွါစီၤဧံရၤ, ပှၤဧၤနသိးဖိစီၤအဘံၤဧ့စၢ်,

²⁹ပှၤဃူၡသးဖိစီၤစံးဘကဲ, ပှၤအဃိဃးဖိစီၤဧံလဲၤ,

³⁰ပှၤနတိဖၤဖိစီၤမၤဟရဲ, ပှၤနတိဖၤဖိစီၤဘၤနါအဖိခွါစီၤဃ့လ့ာ်,

³¹ပှၤကံဘဧၤဖိစီၤရံဘဲအဖိခွါစီၤအံသဲၤလၢပှၤဘံၣ်ယၤမံၣ်အ ဒူၣ်, ပှၤပံးရသိၣ်ဖိစီၤဘနါယၤ,

³²စီၤဃူရဲၤလၢကစၢၢ်ကဆူးတဖၣ်ဘူးဒီးထံကျိကၤဧၣ်, ပှၤဧၤရဘၤဖိစီၤအဘံၤအ့လး,

³³ပှၤဘၢ်ဃူၣ်ဖိစီၤဧၤစမၤဝ့း, ပှၤၡၤလဘိၣ်ဖိစီၤအ့လံယဘၤ,

³⁴ပှၤကံးစိာ်ဖိစီၤယၤၡ့ၣ်, ပှၤဟရၣ်ဖိစီၤၡၤက့အဖိခွါစီၤယိနၤသၣ်,

³⁵ပှၤဟရၣ်ဖိစီၤစၤကၢ်အဖိခွါစီၤအဃံအၣ်, စီၤအူၢ်အဖိခွါစီၤအလံဖၤလဲး,

³⁶ပှၤမက့ၤသးဖိစီၤဃ့ဖ့ၢ်, ပှၤပလိၣ်ဖိစီၤအဃံယၤ, ပှၤကၢ်မ့ၤလးဖိစီၤဃ့စရိၤ, စီၤအ့စဘၤအဖိခွါစီၤနၤရဲ,

³⁷

³⁸စီၤနၤသၣ်အဒီပုၢ်ဝဲၢ်ခွါစီၤယိၤအ့လး, စီၤအကရံအဖိခွါစီၤမံးဘဃၢ်,

³⁹ပှၤဧၣ်မိၣ်ဖိစီၤစ့လ့း, ပှၤဘအ့ရိးဖိစီၤနၤဃရဲ, စီၤယိၤအာ်အပှၤစိာ်စုကဝဲၤ,

⁴⁰ပှၤယံသၢ်ဖိစီၤဧံရၤဒီးစီၤကၢ်ရ့း, ပှၤဃ့ၤသးဖိစီၤအူၤရံယၤ, စီၤအဃၤလဲအဖိခွါစီၤစၤဘး,

⁴¹

⁴²စီၤၡံစၤအဖိခွါစီၤဧဒံနၤ (ပှၤရူၤဘ့ၣ်အဒူၣ်အခိၣ်တဂၤလၢ အအိၣ်ဒီးအသုးဖိဒၣ်ဝဲအဂၤသၢဆံ),

⁴³စီၤမၤကၤအဖိခွါစီၤဃၤနၣ်, ပှၤမံၤသၣ်ဖိစီၤယဟိၡၤဖး,

⁴⁴ပှၤဧၤၡတြိးဖိစီၤဧူးစံယၤ, ပှၤဧရိၤဧ့ၢ်ဖိစီၤဃိသၣ်အဖိခွါစီၤၡးမၤဒီးစီၤယဧံၤအ့လး,

⁴⁵ပှၤတံစံၤဖိစီၤၡံးမရံၤအဖိခွါစီၤယဒံးဧ့လးဒီးစီၤယိဃၤ, ပှၤမၤဃဝးဖိစီၤအလံၤအ့လးစီၤအ့လနၣ်အဖိခွါစီၤယရံဘဲ ဒီးစီၤယိၡဝယၤ, ပှၤမိၤအးဖိစီၤယံးသမၤ

⁴⁶

⁴⁷ပှၤမစိဘယၤဖိစီၤအလံၤအ့လး, စီၤဧိၤဘ့းဒီးစီၤယၤစံအ့ လးန့ၣ်လီၤ.