Read S'gaw Karen လံာ်ကွဲးနီၣ်တၢ်အခီၣ်ထံးတဘ့ၣ် 19 Bible Online

လံာ်ကွဲးနီၣ်တၢ်အခီၣ်ထံးတဘ့ၣ် 19 - S'gaw Karen bible

လံာ်ကွဲးနီၣ်တၢ်အခီၣ်ထံးတဘ့ၣ် 19

¹တယံာ်အါအါဘၣ်အလီၢ်ခံန့ၣ်ပှၤဧၣ်မိၣ်ဖိအစီၤပၤနၤဃၣ်သံဝဲ ဒီးအဖိခွါစီၤဃၤနူၣ်ကဲထီၣ်စီၤပၤန့ၣ်လီၤ.

²စီၤပၤစီၤဒၤဝံးစံးဝဲဒၣ်, “ယကဘၣ်ပာ်ဖျါထီၣ်ယတၢ်ဒီသိၣ် ဒီမှံၤအတီဒီးစီၤဃၤနူၣ်ဒ်အဝဲအပၢ်စီၤနၤဃၣ်ဒီးယၤအသိး န့ၣ်လီၤ.” လၢတၢ်န့ၣ်အဃိစီၤဒၤဝံးဆှၢလီၤအပှၤစိာ်တၢ်ကစီၣ်တဖၣ်ဒ်သိး အကပာ်ဖျါထီၣ်အတၢ်သးအုးဃုာ်ဒီးအီၤန့ၣ်လီၤ. ဖဲအဝဲသ့ၣ်လဲၤတုၤဆူပှၤဧၣ်မိၣ်အကီၢ်ပူၤန့ၣ်, ဒီးလဲၤထံၣ်လိာ်အသးဒီးစီၤပၤစီၤဃၤနူၣ်န့ၣ်,

³ပှၤဧၣ်မိၣ်ဖိအခိၣ်အနၢ်တဖၣ်စံးဘၣ်စီၤပၤ, “မ့ၢ်နဆိကမိၣ်လၢစီၤဒၤဝံးဆှၢလီၤပှၤတဖၣ်အံၤဒ်သိးကပာ် ဖျါထီၣ်အတၢ်သးအုးဃုာ်ဒီးနၤလၢအကမၤလၤကပီၤနပၢ်အဂီၢ်န့ၣ် ဧါ. တမ့ၢ်ဘၣ်, အဝဲဆှၢလီၤအဝဲသ့ၣ်ဖဲအံၤ, ဒ်ပှၤကွၢ်ဟုၣ်ကွၢ်စုးတၢ်တဖၣ်အသိးလၢကဃုသ့ၣ်ညါထံကီၢ်ဒ်သိး ကမၤနၢၤဝဲအဂီၢ်န့ၣ်လီၤ.”

⁴စီၤဃၤနူၣ်ဖီၣ်န့ၢ်စီၤဒၤဝံးအပှၤစိာ်တၢ်ကစီၣ်တဖၣ်, ဒီးလူၤကွံာ်အဝဲသ့ၣ်အခၣ်ဆူၣ်, ဒီးကူးတဲာ်အဝဲသ့ၣ်အဆ့လၢအဖး ဖီဖဲအခံကိၢ်ဒီးပျၢ်ကွံာ်ဝဲဒၣ်လီၤ.

⁵အဝဲသ့ၣ်အမဲာ်ဆှးကဲာ်ဆိးလၢကက့ၤကဒါက့ၤဆူအဟံၣ်န့ၣ်လီၤ. တုၤစီၤဒၤဝံးနၢ်ဟူတၢ်လၢအမၤတ့ၢ်အသးန့ၣ်ဒီး, စီၤဒၤဝံးမၢပှၤလဲၤတဲဘၣ်အဝဲသ့ၣ်လၢ, ကအိၣ်ဝဲဖဲဝ့ၢ်ယရံၤ ဃိအပူၤဒီးသုတဟဲက့ၤတချုးလၢအခၣ်ဆူၣ်ထီၣ်ကဒါက့ၤဒံးတဂ့ၤ န့ၣ်လီၤ.

⁶စီၤပၤဃၤနူၣ်ဒီးပှၤဧၣ်မိၣ်ဖိသ့ၣ်တဖၣ်သ့ၣ်ညါဝဲဒၣ်လၢအဒုး ကဲထီၣ်ဘၣ်တ့ၢ်စီၤဒၤဝံးလၢအဝဲသ့ၣ်အဒုၣ်အဒါ, အဃိအဝဲသ့ၣ်ဟ့ၣ်လီၤစ့အကံကၢ်တကထိလၢကဒိလဲပာ်, လ့ၣ်ကဟၣ်ဒီးပှၤဒိးကသ့ၣ်သုးဖိတဖၣ်လၢကီၢ်မ့းစပတၤမံအထးခီ ဒီးလၢကီၢ်စူၤရံအကီၢ်ဆၣ်တဖၣ်လၢအမ့ၢ်ဝဲမၤကၤဒီးစိဘၤန့ၣ်လီၤ.

⁷လ့ၣ်ကဟၣ်လၢအဝဲသ့ၣ်ဒိးလဲဝဲအဆိ သၢကလးခံကထိ ဒီးကီၢ်ဆၣ်မၤကၤအစီၤပၤအသုးမုၢ်ဟဲဒီးသူၣ်ထီၣ်ဒဲဘူးဒီး ဝ့ၢ်မ့ဒဘၤန့ၣ်လီၤ. ပှၤဧၣ်မိၣ်ဖိတဖၣ်စ့ၢ်ကီးဟဲထီၣ်ဝဲလၢကယဲၢ်အဝ့ၢ်ခဲလၢာ်အပူၤ ဒီးအိၣ်ကတဲာ်ကတီၤအသးလၢတၢ်ဒုးအဂီၢ်န့ၣ်လီၤ.

⁸တုၤစီၤဒၤဝံးနၢ်ဟူတ့ၢ်တၢ်မၤအသးန့ၣ်ဒီးဆှၢလီၤစီၤယိၤ အာ်ဒီးအပှၤသုးမုၢ်ဒီတဖုန့ၣ်လီၤ.

⁹ပှၤဧၣ်မိၣ်ဖိသ့ၣ်တဖၣ်လဲၤထီၣ်ဒီးဟံးန့ၢ်အလီၢ်ဖဲအဝဲသ့ၣ် အဝ့ၢ်ခိၣ်ဝ့ၢ်ရးဘးအကျဲစၢၤ, ဒီးစီၤပၤတဖၣ်လၢအဟဲဒ်သိးကမၤစၢၤတၢ်န့ၣ်, ဟံးန့ၢ်အလီၢ်လၢတၢ်ပျီပူၤန့ၣ်လီၤ.

¹⁰စီၤယိၤအာ်ထံၣ်တ့ၢ်ဝဲလၢဒုၣ်ဒါအသုးဖိတဖၣ်ကဟဲထီၣ်ဒုးအီၤ လၢအမဲာ်ညါဒီးလၢအလီၢ်ခံအဃိအဝဲဃုထၢထီၣ်ပှၤအဂ့ၤကတၢၢ်တဖၣ် လၢအံၣ်စရ့လးအသုးဖိတဖၣ်အကျါဒီးပာ်အဝဲသ့ၣ်လၢတၢ်လီၢ်ဖဲ ပှၤစူၤရံဖိတဖၣ်အမဲာ်ညါန့ၣ်လီၤ.

¹¹အဝဲပာ်လီၤအပှၤသုးဖိအိၣ်လီၤတဲာ်တ့ၢ်အဂၤတဖၣ်လၢအဒီပုၢ်ဝဲၢ် ခွါစီၤအဘံၡဲၤအတၢ်ပၢတၢ်ဆှၢအဖီလာ်, ဒီးအဝဲပာ်အဝဲသ့ၣ်လၢတၢ်လီၢ်ဖဲပှၤဧၣ်မိၣ်ဖိတဖၣ်အမဲာ်ညါန့ၣ် လီၤ.

¹²စီၤယိၤအာ်စံးဘၣ်အီၤ, “နမ့ၢ်ထံၣ်လၢပှၤစူၤရံဖိတဖၣ်မၤ နၢၤယၤဒီးဟဲမၤစၢၤယၤ, ဒီးပှၤဧၣ်မိၣ်ဖိတဖၣ်မ့ၢ်နၢၤနၤဒီးယက လဲၤဒီးမၤစၢၤနၤလီၤ.

¹³ပာ်ဆူၣ်နသးဒီးအိၣ်ဒီးတၢ်သူၣ်ဒူသးဒူတက့ၢ်. မ်ပကဒုးသကိးတၢ်ဆူၣ်ဆူၣ်လၢပပှၤဂီၢ်မုၢ်အဂီၢ်ဒီးလၢပကစၢ်ယွၤ အဝ့ၢ်တဖၣ်အဂီၢ်န့ၣ်တက့ၢ်. ဒီးမ်တၢ်ကမၤအသးဒ်ယွၤအတၢ်ဘၣ်အသးတက့ၢ်.”

¹⁴စီၤယိၤအာ်ဒီးအပှၤကညီတဖၣ်လဲၤထီၣ်လၢကဒုးတၢ်အဂီၢ်ဒီးပှၤ စူၤရံဖိတဖၣ်ထွးထီၣ်ဃ့ၢ်ကွံာ်ဝဲန့ၣ်လီၤ.

¹⁵တုၤပှၤဧၣ်မိၣ်ဖိတဖၣ်ထံၣ်ဘၣ်ဝဲလၢပှၤစူၤရံဖိတဖၣ်ထွးထီၣ် ဃ့ကွံာ်န့ၣ်, အဝဲသ့ၣ်စ့ၢ်ကီးထွးထီၣ်ဃ့ၢ်ကွံာ်လၢစီၤအဘံၡဲၤအအိၣ်ဒီးဂုၤ က့ၤအခံဆူဝ့ၢ်ပူၤန့ၣ်လီၤ. အန့ၣ်ဒီးစီၤယိၤအာ်က့ၤကဒါက့ၤဆူ ဝ့ၢ်ယရူၤၡလ့ၣ်န့ၣ်လီၤ.

¹⁶ပှၤစူၤရံဖိတဖၣ်သ့ၣ်ညါဝဲဒၣ်လၢအဝဲသ့ၣ်ဘၣ်တၢ်မၤနၢၤကွံာ် အီၤလၢပှၤအံၣ်စရ့လးဖိတဖၣ်လံအဃိ, အဝဲသ့ၣ်ဟဲကိးပှၤသုးဖိ တဖၣ်လၢကီၢ်စူၤရံအကီၢ်ဆၣ်တဖၣ်လၢအအိၣ်လၢထံကျိဖရၤသးအမုၢ် ထီၣ်, ဒီးပာ်လီၤအဝဲသ့ၣ်လၢကီၢ်ဆၣ်စိဘၤအစီၤပၤစီၤဟးဒၢ်ဧ့စ့ၢ် အပှၤသုးဖိအခိၣ်စီၤၡိဖးအတၢ်ပၢတၢ်ဆှၢအဖီလာ်န့ၣ်လီၤ.

¹⁷တုၤစီၤဒၤဝံးနၢ်ဟူတၢ်ဂ့ၢ်န့ၣ်အဝဲပာ်ဖှိၣ်ထီၣ်အံၣ်စရ့လးအသုးဖိ တဖၣ်ဒီးခီထံကျိယၢ်ဒ့ၢ်ဒီးပာ်လီၤအဝဲသ့ၣ်လၢတၢ်လီၢ်ဖဲ ပှၤစူၤရံဖိတဖၣ်အမဲာ်ညါန့ၣ်လီၤ.

¹⁸တၢ်ဒုးတၢ်ယၤစးထီၣ်, ဒီးအံၣ်စရ့လးသုးဖိတဖၣ်နီၣ်က့ၤပှၤ စူၤရံအသုးမုၢ်တုၤအဃၣ်ကွံာ်အသးန့ၣ်လီၤ. စီၤဒၤဝံးဒီးအပှၤကညီတဖၣ်မၤသံကွံာ်စူၤရံအပှၤနီၣ်လ့ၣ်ကဟၣ် နွံကထိဂၤပှၤသုးဖိလၢအဟးလၢအခီၣ် လွံၢ်ကလး ဂၤန့ၣ်လီၤ.

¹⁹တုၤစီၤပၤတဖၣ်လၢစီၤဟးဒၢ်ဧ့စ့ၢ်ပၢဘၣ်အီၤသ့ၣ်ညါဝဲဒၣ်, လၢအဘၣ်တၢ်မၤနၢၤအီၤလၢပှၤအံၣ်စရ့လးဖိတဖၣ်လံန့ၣ်, အဝဲသ့ၣ်မၤတၢ်ဃူတၢ်ဖိးဒီးစီၤဒၤဝံးဒီးကဲထီၣ်ပှၤလၢစီၤ ဒၤဝံးပၢဘၣ်အီၤန့ၣ်လီၤ. ပှၤစူၤရံဖိတဖၣ်အသးတအိၣ်လၢၤလၢကမၤစၢၤပှၤဧၣ်မိၣ်ဖိတဖၣ်နီ တစုလၢၤဘၣ်.