Read S'gaw Karen လံာ်ကွဲးနီၣ်တၢ်အခီၣ်ထံးတဘ့ၣ် 9 Bible Online

လံာ်ကွဲးနီၣ်တၢ်အခီၣ်ထံးတဘ့ၣ် 9 - S'gaw Karen bible

လံာ်ကွဲးနီၣ်တၢ်အခီၣ်ထံးတဘ့ၣ် 9

¹ကယဲၢ်ကီၢ်အံၣ်စရ့လးအပှၤဂီၢ်မုၢ်ခဲလၢာ်ဘၣ်တၢ်ကွဲးနီၣ်အမံၤဒ် အဝဲသ့ၣ်အဟံၣ်ဒူၣ်ဃီထၢတဖၣ်အိၣ်ဝဲအသိး, ဒီးတၢ်ဂ့ၢ်ကြၢးသ့ၣ်ညါအံၤဘၣ်တၢ်ကွဲးနီၣ်အီၤလၢကီၢ်အံၣ်စရ့ လးအစီၤပၤတဖၣ်အလံာ်အပူၤန့ၣ်လီၤ. ကီၢ်ယူဒၤအပှၤဂီၢ်မုၢ်တဖၣ်ဘၣ်တၢ်ဆှၢဖျိးကွံာ်အီၤဆူ ကီၢ်ဘၤဘူၤလိၣ်ဒ်တၢ်စံၣ်ညီၣ်လၢအဝဲသ့ၣ်အတၢ်ကမၣ်တဖၣ်အဃိန့ၣ် လီၤ.

²ပှၤအဆိကတၢၢ်တဖုလၢအဟဲက့ၤကဒါက့ၤဆူအဝဲသ့ၣ်အတၢ်စုလီၢ်ခီၣ် ခိၣ်အိၣ်အဝ့ၢ်တဖၣ်အကျါန့ၣ်အိၣ်ဃုာ်ဒီးပှၤအံၣ်စရ့လးဖိပတီၢ်မုၢ်တဖၣ်, ပှၤလုၢ်တၢ်အခိၣ်တဖၣ်, ပှၤလ့ၤဝံဖိတဖၣ်ဒီးတၢ်လုၢ်ဟံၣ်အပှၤမၤတၢ်ဖိသ့ၣ်တဖၣ်န့ၣ်လီၤ.

³ပှၤဂီၢ်မုၢ်လၢပှၤယူဒၤအဒူၣ်, ပှၤဘံၣ်ယၤမံၣ်အဒူၣ်, ပှၤအ့ဖရဲၣ်အဒူၣ်ဒီးပှၤမနၤၡ့ၤအဒူၣ်တဖၣ်လဲၤဝဲဒ်သိးကအိၣ်ဝဲ ဆိးဝဲလၢဝ့ၢ်ယရူၤၡလ့ၣ်အပူၤန့ၣ်လီၤ.

⁴ပှၤယူဒၤဖိအဒူၣ်, အဟံၣ်ဒူၣ်ဃီထၢဃုကယၤခွံဆံဒူၣ်အိၣ်ဝဲ ဆိးဝဲဖဲဝ့ၢ်ယရူၤၡလ့ၣ်အပူၤန့ၣ်လီၤ. စီၤယူဒၤအဖိခွါစီၤဖ့ၤရ့းအစၢၤအသွဲၣ်တဖၣ်န့ၣ်အိၣ်ဒီးစီၤ ဧူသဲၤလၢအမ့ၢ်စီၤဧးမံၤဟူးအဖိခွါဒီးစီၤဧိၣ်ရံၤအလံၤဒ် အဝဲသ့ၣ်အပှၤအခိၣ်အသိးန့ၣ်လီၤ.

⁵အဝဲအပၢ်ဖးဒိၣ်လၢပျၢၤအဂၤတဖၣ်အကျါန့ၣ်အိၣ်ဃုာ်ဒီးစီၤအံၤမရံ ဒီးစီၤဘၤနံန့ၣ်လီၤ. စီၤယူဒၤအဖိခွါစီၤၡ့လၤအစၢၤ အသွဲၣ်တဖၣ်အိၣ်ဒီးစီၤဧစံယၤလၢအမ့ၢ်အဝဲအခိၣ်, ဒီးအဝဲမ့ၢ်အဟံၣ်ဒူၣ်ဃီထၢဒၣ်ဝဲအခိၣ်န့ၣ်လီၤ.

⁶စီၤယူဒၤအဖိခွါစီၤစ့ရၤအစၢၤအသွဲၣ်တဖၣ်အိၣ်ဒီးစီၤယူၤ အ့လးဒ်အဝဲသ့ၣ်အခိၣ်န့ၣ်လီၤ.

⁷ပှၤဘံၣ်ယၤမံၣ်အဒူၣ်, အဟံၣ်ဖိဃီဖိလၢလာ်တဖၣ်အံၤအိၣ်ဝဲ ဆိးဝဲလၢဝ့ၢ်ယရူၤၡလ့ၣ်အပူၤန့ၣ်လီၤ. စီၤစၤလူလၢအမ့ၢ်စီၤမၡူလၣ်အဖိခွါ, စီၤမၡူလၣ်မ့ၢ်စီၤဟိဒၤဝယၤအဖိခွါ, ဒီးစီၤဟိဒၤဝယၤမ့ၢ်စီၤဟးစနူအၤအဖိခွါ,

⁸စီၤယံးဘနံယၤလၢအမ့ၢ်စီၤယရိဃၣ်အဖိခွါ. စီၤအ့လၤလၢအမ့ၢ်စီၤဧူးစံအဖိခွါဒီးစီၤမံးကြံၤအလံၤခွါ. စီၤမၡူလၣ်လၢအမ့ၢ်စီၤၡဖးတယၤအဖိခွါ, စီၤၡဖးတယၤမ့ၢ်စီၤ ရဧူၤအ့လးအဖိခွါဒီးစီၤရဧူၤအ့လးမ့ၢ်စီၤယံးဘနံယၤအဖိ ခွါန့ၣ်လီၤ.

⁹ပှၤအဒူၣ်အံၤအဟံၣ်ဒူၣ်ဃီထၢခွံကယၤယဲၢ်ဆံဃုဒူၣ်အိၣ်ဝဲဆိး ဝဲဖဲန့ၣ်လီၤ. ပှၤပိာ်ခွါလၢအမံၤဘၣ်တၢ်ယၢၤထီၣ်လၢထးတဖၣ်ခဲ လၢာ်, မ့ၢ်ဟံၣ်ဒူၣ်ဃီထၢတဖၣ်အခိၣ်န့ၣ်လီၤ.

¹⁰ပှၤလုၢ်တၢ်အခိၣ်လၢလာ်သ့ၣ်တဖၣ်အံၤအိၣ်ဝဲဆိးဝဲလၢဝ့ၢ်ယရူၤ ၡလ့ၣ်အပူၤန့ၣ်လီၤ. စီၤယဒါယၤ, စီၤယဟိယၤရံာ်ဒီးစီၤယၤကံၣ်.

¹¹စီၤဧစၤရယၤလၢအမ့ၢ်စီၤဃံးလကံယၤအဖိခွါ (ပဒိၣ်အဒိၣ်ကတၢၢ်လၢ တၢ်လုၢ်ဟံၣ်အပူၤ), လၢအပၢ်ဖးဒိၣ်လၢပျၢၤတဖၣ်အကျါအိၣ်ဃုာ်ဒီးစီၤမၡူလၣ်, စီၤမရၤယိးဒီးစီၤအဃံးတူာ်န့ၣ်လီၤ.

¹²စီၤဧဒါယၤလၢအမ့ၢ်စီၤယရိဃၣ်အဖိခွါ, လၢအပၢ်ဖးဒိၣ်လၢပျၢၤ တဖၣ်အကျါအိၣ်ဃုာ်ဒီးစီၤပၤၡဃူၢ်ဒီးစီၤမၤလကံယၤ, စီၤမၤစဲလၢအမ့ၢ်စီၤဧၤဒံၤအ့လးအဖိခွါ, လၢအပၢ်ဖးဒိၣ်လၢပျၢၤတဖၣ်အကျါအိၣ်ဃုာ်ဒီးစီၤယၤကစ့ရၤ, စီၤမၡူလၣ်, စီၤမၡံးလ့မံးဒီးစီၤအံးမ့ၢ်န့ၣ်လီၤ.

¹³ပှၤလုၢ်တၢ်အခိၣ်တဖၣ်လၢအမ့ၢ်ဟံၣ်ဒူၣ်ဃီထၢတဖၣ်အခိၣ်ခဲလၢာ်အိၣ် ဝဲတကထိနွံကယၤဃုဆံဂၤန့ၣ်လီၤ. အဝဲသ့ၣ်မ့ၢ်ပှၤသ့ဂ့ၤဂ့ၤဘၣ်ဘၣ်တဖၣ်လၢတၢ်ဖံးတၢ်မၤခဲလၢာ် လၢအဘၣ်တၢ်မၤအီၤလၢတၢ်လုၢ်ဟံၣ်အပူၤန့ၣ်လီၤ.

¹⁴ပှၤလ့ၤဝံဖိလၢလာ်သ့ၣ်တဖၣ်အံၤအိၣ်ဝဲဆိးဝဲလၢဝ့ၢ်ယရူၤ ၡလ့ၣ်အပူၤန့ၣ်လီၤ. စီၤၡမါယၤလၢအမ့ၢ်စီၤဃၤၡူာ်အဖိခွါ, လၢအပၢ်ဖးဒိၣ်လၢပျၢၤတဖၣ်အကျါအိၣ်ဃုာ်ဒီး စီၤဧးစရံကၣ်ဒီးစီၤဃၡၤဘယၤလၢအဘၣ်ဃး ဒီးပှၤမရၤရံၤအဒူၣ်န့ၣ်လီၤ.

¹⁵စီၤဘးကဘးကၢ်, စီၤဃ့ရ့ၣ်ဒီးစီၤကၤလလး, စီၤမးတၤနယၤလၢအမ့ၢ်စီၤမံၤကါအဖိခွါ, လၢအပၢ်ဖးဒိၣ်လၢပျၢၤတဖၣ်အကျါအိၣ်ဃုာ်ဒီးစီၤစံးကရံဒီး စီၤအၤစာ်န့ၣ်လီၤ.

¹⁶စီၤဧိၤဘါဒယၤလၢအမ့ၢ်စီၤၡမါယၤအဖိခွါ, လၢအပၢ်ဖးဒိၣ်လၢပျၢၤအကျါအိၣ်ဃုာ်ဒီးစီၤကၤလလးဒီးစီၤယဒူ သူၣ်. စီၤဘ့ရ့ကံယၤလၢအမ့ၢ်စီၤအၤစါအဖိခွါဒီးစီၤအ့လကါနၤ အလံၤခွါလၢအအိၣ်ဝဲဆိးဝဲလၢတၢ်လီၢ်ကဝီၤဘၣ်ထွဲဒီးပှၤနတိ ဖၤဖိအဝ့ၢ်န့ၣ်လီၤ.

¹⁷တၢ်လုၢ်ဟံၣ်အပှၤပၢၤတၢ်ဖိလၢလာ်တဖၣ်အံၤအိၣ်ဝဲဆိးဝဲ လၢဝ့ၢ်ယရူၤၡလ့ၣ်အပူၤန့ၣ်လီၤ. စီၤၡၤလူၣ်, စီၤဧးကူာ်, စီၤတၤလမိၣ်ဒီးစီၤဃံမ့ၣ်န့ၣ်လီၤ. စီၤၡၤလူၣ်မ့ၢ်အဝဲသ့ၣ်အပှၤအခိၣ်န့ၣ်လီၤ.

¹⁸တုၤဃီၤလၢအဆၢကတီၢ်အဝဲန့ၣ်, အဝဲသ့ၣ်အဒူၣ်ထၢတဖၣ်, အဟံၣ်ဖိဃီဖိဘၣ်တၢ်ပာ်လီၤအီၤဖဲတၢ်လုၢ်ဟံၣ်အတြဲၤမုၢ်ထီၣ်, ဖဲစီၤပၤတဖၣ်လဲၤနုာ်ဝဲ, အကျဲစၢၤန့ၣ်လီၤ. လၢညါန့ၣ်အဝဲသ့ၣ်ဆၢထၢၣ်ပၢၤတၢ်ဖဲတြဲၤတဖၣ်လၢပှၤလဲၤနုာ်ဆူ ပှၤလ့ၤဝံဖိတဖၣ်အသူၣ်ဒဲအလီၢ်န့ၣ်လီၤ.

¹⁹စီၤၡၤလူၣ်လၢအမ့ၢ်စီၤကိၤရ့အဖိခွါဒီးစီၤအဘံယၤစာ်အလံၤခွါ, ဃုာ်ဒီးအဝဲအဒူၣ်ထၢအဟံၣ်ဖိဃီဖိကဒဲကဒဲလၢပှၤကိၤရးအဒူၣ် ထၢပူၤတဖၣ်, အိၣ်မူဒါလၢတၢ်ပၢၤကျဲစၢၤလဲၤနုာ်ဆူ ယွၤအိၣ်ဝဲဆိးဝဲအလီၢ်အဒဲ, ဒ်အဝဲသ့ၣ်အပၢ်ဖးဒိၣ်လၢပျၢၤ တဖၣ်မၤတ့ၢ်ဝဲ, ဖဲအဝဲသ့ၣ်မ့ၢ်ပှၤအခိၣ်တဖၣ်လၢယွၤသူၣ်ဒဲအလီၢ်အဂီၢ်အသိးန့ၣ်လီၤ.

²⁰စီၤအလၤဧစၢ်အဖိခွါစီၤဖံနဃၣ်မ့ၢ်ပှၤပၢဆှၢကွၢ်ထွဲတ့ၢ်အဝဲ သ့ၣ်တဘျီ, ဒီးအဝဲမ့ၢ်ပှၤလၢယွၤအိၣ်ဒီးအီၤန့ၣ်လီၤ.

²¹စီၤမၡ့လ့းမယၤအဖိခွါစီၤစကၤရယၤမ့ၢ်စ့ၢ်ကီးပှၤပၢၤတၢ်ဖိ တဂၤဖဲကျဲစၢၤလၢအလဲၤနုာ်ဆူယွၤအိၣ်ဝဲဆိးဝဲသူၣ်ဒဲ အလီၢ်န့ၣ်လီၤ.

²²ပှၤပိာ်ခွါခဲလၢာ်အိၣ်ဝဲခံကယၤတဆံခံဂၤလၢအဘၣ်တၢ်ဃုထၢ ထီၣ်အီၤဒ်ပှၤပၢၤတၢ်ဖိတဖၣ်အသိးလၢကျဲစၢၤတဖၣ်ဒီးတြဲၤတဖၣ် အဂီၢ်န့ၣ်လီၤ. တၢ်ကွဲးနီၣ်အဝဲသ့ၣ်အမံၤအသၣ်ဒ်သဝီတဖၣ်လၢအဝဲသ့ၣ်အိၣ်ဆိးဝဲ အသိးန့ၣ်လီၤ. ပှၤလၢအပာ်လီၤအဝဲသ့ၣ်အပၢ်ဖးဒိၣ်လၢပျၢၤတဖၣ်လၢမူဒါလီၢ်လၤ တဖၣ်အံၤအဂီၢ်မ့ၢ်စီၤပၤစီၤဒၤဝံးဒီးဝံစီၤၡမူၤအ့လးန့ၣ်လီၤ.

²³အဝဲသ့ၣ်ဒီးအစၢၤအသွဲၣ်တဖၣ်ပၢၤဒံးဒၣ်တြဲၤတဖၣ်လၢပှၤလဲၤနုာ် ဆူတၢ်လုၢ်ဟံၣ်ပူၤန့ၣ်လီၤ.

²⁴တြဲၤလၢအမဲာ်ကွၢ်ဃီၤဆူမူပၤလွံၢ်ကျိၤ, ကလံၤစိး, ကလံၤထံး, မုၢ်ထီၣ်ဒီးမုၢ်နုာ်အိၣ်တဘ့ၣ်စုာ်စုာ်, ဒီးအပှၤပၢၤတၢ်အဒိၣ်အိၣ်တဂၤစုာ်စုာ်လီၤ.

²⁵ပှၤပၢၤတၢ်ဖိတဖၣ်အံၤဘၣ်တၢ်မၤစၢၤအီၤလၢအဘူးအတံၢ်တဖၣ်လၢ အအိၣ်ဝဲဆိးဝဲလၢဒူသဝီတဖၣ်အပူၤ, လၢအဟံးန့ၢ်တၢ်ပၢၤတၢ်အမူအဒါတဘျီနွံသီတကတီၢ်ဘၣ်တကတီၢ်စုာ် စုာ်န့ၣ်လီၤ.

²⁶ပှၤပၢၤတၢ်ဖိအခိၣ်အဒိၣ်ကတၢၢ်လွံၢ်ဂၤ, မ့ၢ်ပှၤလ့ၤဝံဖိတဖၣ် ဒီးမ့ၢ်ပှၤအိၣ်ဒီးမူဒါအဒိၣ်လၢခံကတၢၢ်န့ၣ်လီၤ. အဝဲသ့ၣ်အိၣ်မူအိၣ်ဒါစ့ၢ်ကီးလၢဒၢးတဖၣ်လၢတၢ်လုၢ်ဟံၣ်အပူၤ ဒီးလၢတၢ်လုၢ်ဟံၣ်အတၢ်ပာ်ဖှိၣ်လၢတၢ်ပာ်အီၤဖဲန့ၣ်တဖၣ်အဂီၢ်လီၤ.

²⁷အဝဲသ့ၣ်အိၣ်ဝဲဆိးဝဲဘူးဒီးတၢ်လုၢ်ဟံၣ်မ့ၢ်လၢအဝဲသ့ၣ်အိၣ်မူ အိၣ်ဒါလၢကပၢၤအီၤဒီးအိးထီၣ်တြဲၤတဖၣ်ကိးမုၢ်ဂီၤဒဲးအဃိန့ၣ်လီၤ.

²⁸ပှၤလ့ၤဝံဖိအဂၤတဖၣ်အိၣ်မူအိၣ်ဒါလၢတၢ်အဃၢၤအဃိၢ်တဖၣ်လၢ အဘၣ်တၢ်သူအီၤလၢတၢ်ဘူၣ်ထီၣ်ဘါထီၣ်ယွၤအဂီၢ်န့ၣ်လီၤ. အဝဲသ့ၣ်ဘၣ်သမံသမိးတၢ်အဃၢၤအဃိၢ်တဖၣ်အံၤဖဲ တၢ်ထုးထီၣ်သူအီၤအခါမ့ၢ်ဂ့ၤ, တၢ်ဟဲက့ၤပာ်ကဒါက့ၤအီၤအခါ မ့ၢ်ဂ့ၤန့ၣ်လီၤ.

²⁹ပှၤအဂၤတဖၣ်ဘၣ်ကွၢ်ထွဲတၢ်စီဆှံအပီးအလီတဖၣ်, ဒီးကိၣ်ကမူၣ်, စပံးထံ, သ့ၣ်စၤယံးအသိ, သိနၢမူဒီးတၢ်နၢမူ အဂၤတဖၣ်န့ၣ်လီၤ.

³⁰ဘၣ်ဆၣ်တၢ်ဃါဃုာ်တၢ်နၢမူတဖၣ်အမူအဒါန့ၣ်ဘၣ်ဃးဒၣ်ဆူ ပှၤလုၢ်တၢ်အခိၣ်တဖၣ်န့ၣ်လီၤ.

³¹ပှၤလ့ၤဝံဖိတဂၤလၢအမံၤမ့ၢ်စီၤမးတံးသယၤ, စီၤၡၤလူၣ်အဖိခွါဝဲၢ်ကိ, လၢပှၤကိၤရးဖိအဒူၣ်ထၢပူၤန့ၣ် အိၣ်မူအိၣ်ဒါလၢတၢ်ကတဲာ်ကတီၤတၢ်လုၢ်တၢ်ပာ်လၢတၢ်ကကုၢ်ဃိအီၤ တဖၣ်အဂီၢ်န့ၣ်လီၤ.

³²ပှၤကိၤရးအဒူၣ်ထၢ, အဟံၣ်ဖိဃီဖိတဖၣ်အိၣ်မူအိၣ်ဒါလၢတၢ် ကတဲာ်ကတီၤကိၣ်စီဆှံလၢတၢ်လုၢ်ဟံၣ်အဂီၢ်ကိးမုၢ်အိၣ်ဘှံး အနံၤဒဲးန့ၣ်လီၤ.

³³လ့ၤဝံအဟံၣ်ဒူၣ်ဃီထၢတနီၤအိၣ်မူအိၣ်ဒါလၢတၢ်လုၢ်ဟံၣ်အတၢ် သူၣ်ဝံၣ်သးဆၢအဂီၢ်န့ၣ်လီၤ. ဟံၣ်ဒူၣ်ဃီထၢတဖၣ်အံၤအခိၣ်အိၣ်ဆိးဝဲလၢတၢ်လုၢ်ဟံၣ်အတၢ်သူၣ် ထီၣ်တနီၤအပူၤ, ဒီးအိၣ်ပူၤအိၣ်ဖျဲးဝဲဒီးမူဒါအဂၤတဖၣ်မ့ၢ်လၢ, အဝဲသ့ၣ်ဘၣ်တၢ်ကိးထီၣ်အီၤလၢမုၢ်ဆါဒီးမုၢ်နၤအဃိန့ၣ်လီၤ.

³⁴ပှၤပိာ်ခွါလၢတၢ်ယၢၤထီၣ်အမံၤလၢထးတဖၣ်အံၤ, မ့ၢ်ပှၤလ့ၤဝံဖိအဟံၣ်ဒူၣ်ဃီထၢတဖၣ်အခိၣ်, ဒ်အပၢ်ဖးဒိၣ်လၢပျၢၤအတၢ်ဟဲလီၤစၢၤအသိးန့ၣ်လီၤ. အဝဲသ့ၣ်မ့ၢ်ခိၣ်နၢ်တဖၣ်လၢအအိၣ်ဆိးဝဲဖဲဝ့ၢ်ယရူၤၡလ့ၣ်အပူၤ န့ၣ်လီၤ.

³⁵စီၤယဧူၤအ့လးသူၣ်ထီၣ်ဝ့ၢ်ကံးဘိၣ်ဒီးအိၣ်ဝဲဆိးဝဲဖဲန့ၣ် လီၤ. ဒီးအမါန့ၣ်မ့ၢ်ဝဲနီၢ်မၤကၤလီၤ.

³⁶အဖိခွါဝဲၢ်ကိန့ၣ်မ့ၢ်ဝဲစီၤဧၤဘဒိၣ်ဒီးအဖိခွါအဂၤတဖၣ် န့ၣ်မ့ၢ်ဝဲစီၤစူၢ်, စီၤကံၣ်, စီၤဘဧၤလး, စီၤန့ၢ်, စီၤနၤဒး,

³⁷စီၤကဒိၢ်, စီၤအဃံယိၤ, စီၤစကၤရယၤဒီးစီၤမံးကလိးလၢအမ့ၢ် စီၤၡံမၣ်အပၢ်န့ၣ်လီၤ.

³⁸အဝဲသ့ၣ်အစၢၤအသွဲၣ်တဖၣ်အိၣ်ဝဲဆိးဝဲဖဲဝ့ၢ်ယရူၤၡလ့ၣ်အပူၤ ဘူးဒီးအဟံၣ်ဒူၣ်အဂၤတဖၣ်လၢအဒူၣ်ထၢဒၣ်ဝဲန့ၣ်လီၤ.

³⁹စီၤန့ၢ်ထီၣ်ဖိစီၤကံၣ်, ဒီးစီၤကံၣ်ထီၣ်ဖိစီၤစီလူးန့ၣ်လီၤ. စီၤစီလူးအိၣ်ဒီးအဖိခွါလွံၢ်ဂၤလၢအမ့ၢ်ဝဲ, စီၤယိနၤသၣ်, စီၤမၤလကံၡူၤ, စီၤအဘံနဒာ်ဒီးစီၤအ့ၡလဧၤလး န့ၣ်လီၤ.

⁴⁰စီၤယိနၤသၣ်အဖိခွါန့ၣ်မ့ၢ်စီၤမရံးဘဧၤလး, ဒီးစီၤမရံးဘဧၤလးထီၣ်ဖိစီၤမံၤကါန့ၣ်လီၤ.

⁴¹စီၤမံၤကါအိၣ်ဒီးအဖိခွါလွံၢ်ဂၤလၢအမ့ၢ်ဝဲစီၤပံၤသိၣ်, စီၤမ့လ့း, စီၤတၤဃရ့ဒီးစီၤအၤဃးန့ၣ်လီၤ.

⁴²စီၤအၤဃးထီၣ်ဖိစီၤယၤရ့ၤဒီးစီၤယၤရ့ၤအိၣ်ဒီးအဖိခွါ သၢဂၤလၢအမ့ၢ်ဝဲ, စီၤဧၤလ့မ့း, စီၤဧၤစမၤဝ့းဒီးစီၤစံၣ်ရံၤန့ၣ်လီၤ. ဒီးစီၤစံၣ်ရံၤမ့ၢ်စီၤမိစၤအပၢ်,

⁴³ဒီးစီၤမိစၤထီၣ်ဖိစီၤဘံးနၤ, ဒီးစီၤဘံးနၤထီၣ်ဖိစီၤရၤဖယၤ, ဒီးစီၤရၤဖယၤထီၣ်ဖိစီၤအ့လၤဧစၤဒီးစီၤအ့လၤဧစၤထီၣ်ဖိ စီၤအၤစ့လးန့ၣ်လီၤ.

⁴⁴စီၤအၤစ့လးအိၣ်ဒီးအဖိခွါဃုဂၤလၢအမ့ၢ်ဝဲ, စီၤဧးစရံကၣ်, စီၤဘိကရူၤ, စီၤယံးၡမၤဧ့လး, စီၤၡၤရံယၤ, စီၤဧိၤဘါဒယၤ, ဒီးစီၤဃၤနၣ်န့ၣ်လီၤ.