Read S'gaw Karen လံာ်ကွဲးနီၣ်တၢ်ခံဘ့ၣ်တဘ့ၣ် 18 Bible Online

လံာ်ကွဲးနီၣ်တၢ်ခံဘ့ၣ်တဘ့ၣ် 18 - S'gaw Karen bible

လံာ်ကွဲးနီၣ်တၢ်ခံဘ့ၣ်တဘ့ၣ် 18

¹တုၤကီၢ်ယူဒၤအစီၤပၤစီၤယဟိၡၤဖးထူးထီၣ်တီၤထီၣ်ဝဲဒီး အမံၤဟူသၣ်ဖျါထီၣ်ဝဲန့ၣ်, အဝဲသုးကျဲၤတၢ်တ့တၢ်ဖျီတခါလၢအဝဲအဒူၣ်ဖိထၢဖိတဂၤဒီး ကီၢ်အံၣ်စရ့လးအစီၤပၤအၤဃာ်အဒူၣ်ဖိထၢဖိတဂၤအဘၢၣ်စၢၤန့ၣ်လီၤ.

²တဘျုးနံၣ်ဝံၤအလီၢ်ခံန့ၣ်, စီၤယဟိၡၤဖးလဲၤဆူဝ့ၢ်ၡၤမရံ လၢကလဲၤအိၣ်သကိးစီၤအၤဃာ်အဂီၢ်န့ၣ်လီၤ. လၢတၢ်မၤလၤကပီၤစီၤယဟိၡၤဖး, ဒီးပှၤလဲၤဃုာ်တၢ်ဒီးအီၤ တဖၣ်အဂီၢ်, စီၤအၤဃာ်မၤသံသိဒီးဂီၤဖံးအါအါဂီၢ်ဂီၢ်လၢတၢ်အီၣ်အမူး ဖးဒိၣ်တဘျီအဂီၢ်န့ၣ်လီၤ. အဝဲဂုာ်ကျဲးစၢးကွဲန့ၢ်လွဲန့ၢ်စီၤယဟိၡၤဖးအသးဒ်သိးကပာ် ဖှိၣ်အသးဒီးအီၤလၢအတၢ်လဲၤထီၣ်ဒုးဝ့ၢ်ရၤမိး, လၢကီၢ်ကံးလဧးအပူၤအဂီၢ်န့ၣ်လီၤ.

³အဝဲသံကွၢ်ဝဲ, “မ့ၢ်နကလဲၤသကိးတၢ်ဒီးယၤလၢတၢ်ကလဲၤထီၣ်ဒုးဝ့ၢ်ရၤမိးအဂီၢ်န့ၣ်ဧါ.” စီၤယဟိၡၤဖးစံးဆၢဝဲ, “နမ့ၢ်အိၣ်ကတဲာ်ကတီၤနသးဒီးယအိၣ် ကတဲာ်ကတီၤယသးန့ၣ်လီၤ. ဒ်န့ၣ်အသိးပှၤသုးမုၢ်စ့ၢ်ကီးအိၣ်ကတဲာ်ကတီၤအသးန့ၣ်လီၤ. ပကလဲၤဃုာ်သကိးဒီးနၤလီၤ.”

⁴အန့ၣ်ဝံၤဒီးအဝဲစံးအါထီၣ်ဝဲ, “ဘၣ်ဆၣ်အဆိကတၢၢ်န့ၣ်, မ်ပကသံကွၢ်တၢ်လၢယွၤတက့ၢ်.”

⁵လၢတၢ်န့ၣ်အဃိစီၤအၤဃာ်ကိးနုာ်ဝံတဖၣ်လၢကအိၣ်ဝဲ အဂၤလွံၢ်ကယၤဃၣ်ဃၣ်ဒီးသံကွၢ်အဝဲသ့ၣ်, “မ့ၢ်ယကဘၣ်လဲၤထီၣ်ဒုးဝ့ၢ်ရၤမိးန့ၣ်ဧါ. မ့တမ့ၢ်ယတဘၣ်လဲၤဘၣ်န့ၣ်ဧါ.” အဝဲသ့ၣ်စံးဆၢဝဲ, “လဲၤထီၣ်ဒုးအီၤတက့ၢ်. ကစၢ်ယွၤကဟ့ၣ်နၤတၢ်မၤနၢၤန့ၣ် လီၤ.”

⁶ဘၣ်ဆၣ်စီၤယဟိၡၤဖးသံကွၢ်ဝဲ, “ယွၤအဝံတအိၣ်ဘၣ်ဖဲအံၤနီ တဂၤလၢပသံကွၢ်အီၤတၢ်ကသ့န့ၣ်ဘၣ်ဧါ.”

⁷စီၤအၤဃာ်စံးဆၢဝဲ, “အိၣ်ဒံးဝဲတဂၤန့ၣ်လီၤ. မ့ၢ်စီၤယံးမလၤအဖိခွါစီၤမံၤကါယၤန့ၣ်လီၤ. ဘၣ်ဆၣ်ယသးဟ့အီၤမ့ၢ်လၢအဝဲတကတိၤတၢ်လၢဝံအကျိာ်အဂ့ၤနီ တမံၤလၢယဂီၢ်နီတစုဘၣ်အဃိလီၤ. ထီဘိမ့ၢ်ထဲတၢ်တမံၤမံၤလၢအအၢန့ၣ်လီၤ.” စီၤယဟိၡၤဖးစံးဝဲ, “နတကြၢးစံးတၢ်ဒ်သိးန့ၣ်ဘၣ်.”

⁸လၢတၢ်န့ၣ်အဃိ, စီၤပၤအၤဃာ်ကိးနုာ်ကွီၢ်ဘျီၣ်အပဒိၣ်တဂၤ, ဒီးတဲဘၣ်အီၤလၢကလဲၤကိးန့ၢ်စီၤမံၤကါယၤတဘျီဃီန့ၣ်လီၤ.

⁹စီၤပၤခံဂၤန့ၣ်, ကူသိးဝဲစီၤပၤအဆ့ကၤဒိၣ်တဖၣ်ဒီးဆ့ၣ် နီၤဝဲလၢအဝဲသ့ၣ်အလီၢ်ပစိာ်တဖၣ်အဖီခိၣ်ဖဲပှၤကြဲၢ်တၢ်အလီၢ်, လၢအအိၣ်ဖဲဝ့ၢ်ၡၤမရံအတြဲၤဖးဒိၣ်အချၢ, ဒီးကယဲၢ်ဝံတဖၣ်ကတိၤတၢ်လၢဝံအကျိာ်လၢအဝဲသ့ၣ်အမဲာ်ညါန့ၣ်လီၤ.

¹⁰လၢအဝဲသ့ၣ်အကျါတဂၤလၢအမ့ၢ်စီၤကနၤနါအဖိခွါစီၤစံးဒကံ ယၤပိာ်န့ၢ်နၢၤထးတဖၣ်ဒီးစံးဘၣ်စီၤအၤဃာ်, “အအံၤမ့ၢ်တၢ်လၢယွၤစံးဝဲဒၣ်န့ၣ်လီၤ. နကဒုးပှၤစူၤရံဖိ တဖၣ်လၢတၢ်တဖၣ်အံၤဒီးနကမၤနၢၤအဝဲသ့ၣ်လၢာ်လၢာ်ဆ့ဆ့န့ၣ် လီၤ.”

¹¹ကယဲၢ်ဝံအဂၤခဲလၢာ်စံးတၢ်တမံၤဃီဒ်န့ၣ်လီၤ. အဝဲသ့ၣ်စံးဝဲ, “လဲၤထီၣ်ဒုးတၢ်ထီဒါဝ့ၢ်ရၤမိးဒီးနကမၤ နၢၤတၢ်လီၤ. ယွၤကဟ့ၣ်နၤတၢ်မၤနၢၤန့ၣ်လီၤ.”

¹²ဖဲန့ၣ်အခါ, ပဒိၣ်လၢအလဲၤကိးစီၤမံၤကါယၤန့ၣ်စံးဘၣ်စီၤ မံၤကါယၤ, “ကယဲၢ်ဝံအဂၤခဲလၢာ်ကတိၤတ့ၢ်တၢ်လၢဝံအကျိာ်ဘၣ်ထွဲဒီးတၢ် မၤနၢၤလၢစီၤပၤအဂီၢ်, သတးဒီးနကြၢးမၤစ့ၢ်ကီးတၢ်တမံၤဃီန့ၣ်လီၤ.”

¹³ဘၣ်ဆၣ်စီၤမံၤကါယၤစံးဆၢဝဲ, “လၢယွၤလၢအမူဝဲတဂၤအမံၤ အပူၤန့ၣ်, ယကစံးတၢ်လၢယကစၢ်ယွၤမၢယတဲန့ၣ်လီၤ.”

¹⁴တုၤအဝဲလဲၤအိၣ်ဖျါထီၣ်လၢစီၤပၤအၤဃာ်အမဲာ်ညါန့ၣ်, စီၤပၤသံကွၢ်အီၤ, “စီၤမံၤကါယၤဧၢ, မ့ၢ်စီၤပၤယဟိၡၤဖး ဒီးယၤပကြၢးလဲၤထီၣ်ဒုးဝ့ၢ်ရၤမိးဧါ. မ့တမ့ၢ်ပတကြၢးလဲၤဒုးဘၣ်န့ၣ်ဧါ.” စီၤမံၤကါယၤစံးဆၢဝဲ, “လဲၤထီၣ်ဒုးတက့ၢ်. သပှၢ်ကတၢၢ်နကမၤနၢၤတၢ်လီၤ. ယွၤကဟ့ၣ်နၤတၢ်မၤနၢၤန့ၣ်လီၤ.”

¹⁵ဘၣ်ဆၣ်စီၤအၤဃာ်စံးဆၢဝဲ, “ဖဲနကတိၤတၢ်ဒီးယၤဖဲ ယွၤအမံၤအပူၤန့ၣ်, တဲတၢ်မ့ၢ်တၢ်တီတက့ၢ်. မ့ၢ်ယကဘၣ်တဲနၤတၢ်န့ၣ်ပှဲၤဘျီလဲၣ်.”

¹⁶စီၤမံၤကါယၤစံးဆၢဝဲ, “ယထံၣ်ဘၣ်ကီၢ်အံၣ်စရ့လးအသုးမုၢ်လီၤပြံလီၤပြါဝဲလၢတၢ်လူၢ် တဖၣ်အလိၤဒ်သိလၢအတအိၣ်ဒီးပှၤကွၢ်သိအသိးန့ၣ်လီၤ. ဒီးယွၤစံးဝဲဒၣ်, ပှၤတဖၣ်အံၤတအိၣ်ဒီးအခိၣ်အနၢ်ဘၣ်. မ်အဝဲသ့ၣ်က့ၤဆူ အဟံၣ်မုာ်မုာ်တက့ၢ်.”

¹⁷စီၤအၤဃာ်စံးဘၣ်စီၤယဟိၡၤဖး, “ယတဲတ့ၢ်နၤလၢအဝဲတကတိၤ တၢ်အဂ့ၤနီတမံၤလၢဝံအကျိာ်လၢယဂီၢ်နီတစုဘၣ်. ထီဘိမ့ၢ်တၢ်တမံၤမံၤလၢအအၢန့ၣ်လီၤ.”

¹⁸စီၤမံၤကါယၤစံးအါထီၣ်ဝဲ, “ခဲကနံၣ်အံၤဒိကနၣ်တၢ်လၢယွၤ စံးဝဲန့ၣ်တက့ၢ်. ယထံၣ်ဘၣ်ယွၤဆ့ၣ်နီၤလၢအလီၢ်ပစိာ်အဖီခိၣ်လၢမူ ခိၣ်, အိၣ်ဒီးအကလူးတဖၣ်ဆၢထၢၣ်လၢအကပၤန့ၣ်လီၤ.

¹⁹ယွၤသံကွၢ်ဝဲ, မ့ၢ်မတၤကလီန့ၢ်စီၤအၤဃာ်ဒ်သိးအဝဲကလဲၤဝဲ ဒီးဘၣ်တၢ်မၤသံအီၤလၢဝ့ၢ်ရၤမိးန့ၣ်လဲၣ်. ကလူးတနီၤ, စံးတၢ်တမံၤဒီးအဂၤတနီၤ, စံးတၢ်အဂၤတမံၤဒၣ်,

²⁰တုၤလၢသးတဂၤဟဲထီၣ်ဆၢထၢၣ်, သုးဘူးအသးဆူယွၤအအိၣ်ဒီးစံး ဝဲ, ယကလီန့ၢ်အီၤလီၤ. ယွၤသံကွၢ်ဝဲ, နကလီအီၤဒ်လဲၣ်.

²¹သးန့ၣ်စံးဆၢက့ၤဝဲ, ယကလဲၤဒီးမၤဒ်သိးကယဲၢ်စီၤအၤဃာ်အဝံ ခဲလၢာ်ကတဲတၢ်လီတၢ်ဝ့ၤတဖၣ်န့ၣ်လီၤ. ယွၤစံးဝဲဒၣ်, လဲၤဒီးလီန့ၢ်အီၤတက့ၢ်. နကမၤနၢၤတၢ်န့ၣ်လီၤ.”

²²ဒီးစီၤမံၤကါယၤမၤကတၢၢ်အတၢ်ကတိၤ, “တၢ်အံၤမ့ၢ်တၢ်လၢအမၤ တ့ၢ်အသးန့ၣ်လီၤ. ယွၤမၤတ့ၢ်ဒ်သိးနဝံတဖၣ်အံၤကလီန့ၢ်နၤလီၤ. ဘၣ်ဆၣ်အဝဲအနီၢ်ကစၢ်ဒၣ်ဝဲခါလီၤတ့ၢ်အကလုၢ်လၢနကထံၣ်ဘၣ်ဒီးတၢ် တတၢးတနါန့ၣ်လီၤ.”

²³အန့ၣ်ဒီးဝံစံးဒကံယၤလဲၤဃီၤဆူစီၤမံၤကါယၤအအိၣ်, ဒဲဝဲအမဲာ်, ဒီးသံကွၢ်ဝဲ, “ယွၤအသးဟးဖးဒီးယၤဒီးကတိၤတၢ်ဒီးနၤ, စးထီၣ်အခါဖဲလဲၣ်.”

²⁴စီၤမံၤကါယၤစံးဆၢဝဲ, “နကထံၣ်သ့ၣ်ညါအီၤဖဲနလဲၤနုာ်ဆူ ဒၢးလၢတၢ်လီၢ်ခံန့ၣ်လီၤ.”

²⁵အန့ၣ်ဒီး, စီၤပၤအၤဃာ်ဟ့ၣ်လီၤအကလုၢ်ဆူအပဒိၣ်ဖးဒိၣ်အကျါ တဂၤစံးဝဲ, “ဖီၣ်စီၤမံၤကါယၤဒီးလဲၤကိးအီၤဆူဝ့ၢ်အပဒိၣ်ဖးဒိၣ်စီၤ အၤမိၣ်အအိၣ်ဒီးဆူစီၤပၤဖိခွါစီၤယိၤအၣ်အအိၣ်န့ၣ်တက့ၢ်.

²⁶တဲဘၣ်အဝဲသ့ၣ်လၢကဒၢနုာ်အီၤဆူဃိာ်ပူၤဒီးဟ့ၣ်အီၣ်အီၤထဲ လၢကိၣ်ဒီးထံဧိၤတုၤလီၤလၢယဟဲက့ၤကဒါက့ၤပူၤပူၤဖျဲး ဖျဲးတက့ၢ်.”

²⁷စီၤမံၤကါယၤစံးဝဲ, “နမ့ၢ်ဟဲက့ၤပူၤပူၤဖျဲးဖျဲးန့ၣ် ဒီး, ယွၤတကတိၤတၢ်ခီဖျိယၤဘၣ်.” ဒီးအဝဲစံးအါထီၣ်ဝဲ, “ပှၤခဲလၢာ်သ့ၣ်ဧၢ, ဒိကနၣ်တၢ်လၢယစံးတ့ၢ်န့ၣ်တက့ၢ်.”

²⁸အန့ၣ်ဝံၤဒီးကီၢ်အံၣ်စရ့လးအစီၤပၤအၤဃာ်ဒီးကီၢ်ယူဒၤအစီၤ ပၤစီၤယဟိၡၤဖးလဲၤထီၣ်ဝဲဒ်သိးကဒုးဝ့ၢ်ရၤမိးလၢကီၢ်ကံး လဧးအပူၤန့ၣ်လီၤ.

²⁹စီၤအၤဃာ်စံးဘၣ်စီၤယဟိၡၤဖး, “တုၤပလဲၤထီၣ်ဒုးတၢ်န့ၣ်, ယကပျိာ်လီၤဆီယသး, မ့မ့ၢ်နဲ, ကူသိးဒၣ်နစီၤပၤအတၢ်ကူတၢ် သိးန့ၣ်တက့ၢ်.” လၢတၢ်န့ၣ်အဃိကီၢ်အံၣ်စရ့လးအစီၤပၤလဲၤထီၣ်ဆူတၢ်ဒုးအပူၤ အိၣ်ဒီးတၢ်ပျိာ်လီၤဆီအသးန့ၣ်လီၤ.

³⁰ကီၢ်စူၤရံအစီၤပၤဟ့ၣ်လီၤတ့ၢ်အကလုၢ်ဆူအလ့ၣ်ကဟၣ်သုးအခိၣ် တဖၣ်လၢအသုတလဲၤထီၣ်ဒုးပှၤအဂၤတဂ့ၤ. မ့မ့ၢ်ကဒုးဒၣ်ထဲကီၢ်အံၣ်စရ့လးအစီၤပၤဧိၤန့ၣ်လီၤ.

³¹လၢတၢ်န့ၣ်အဃိ, တုၤအဝဲသ့ၣ်ထံၣ်ဃီၤစီၤယဟိၡၤဖးန့ၣ်, အဝဲသ့ၣ်ခဲလၢာ်ဆိကမိၣ်လၢအဝဲမ့ၢ်ကီၢ်အံၣ်စရ့လးအစီၤပၤဒီး အဝဲသ့ၣ်ဃၣ်အသးလၢကဒုးအီၤအဂီၢ်န့ၣ်လီၤ. ဘၣ်ဆၣ်စီၤယဟိၡၤဖးကိးထီၣ်ဝဲဒီးယွၤ, ကစၢ်ယွၤမၤပူၤဖျဲး အီၤဒီးဃၣ်ကွံာ်တၢ်ဒုးယံၤဒီးအီၤန့ၣ်လီၤ.

³²လ့ၣ်ကဟၣ်အခိၣ်တဖၣ်ထံၣ်ဘၣ်ဝဲလၢအဝဲတမ့ၢ်ကီၢ်အံၣ်စရ့လးအစီၤ ပၤဘၣ်, အဃိအဝဲသ့ၣ်ဆိကတီၢ်အတၢ်လူၤထွဲအီၤန့ၣ်လီၤ.

³³ဘၣ်ဆၣ်ဒီး, လၢတၢ်ဘၣ်ဆၢၣ်ဘၣ်တီၤအဃိ, ကီၢ်စူၤရံၤအသုးဖိတဂၤခးချံၣ်တဘ့ၣ်လၢအဘၣ်စီၤအၤဃာ်ဖဲ အသဃိးအဆၢန့ၣ်လီၤ. အဝဲကိးထီၣ်ဆူအပှၤနီၣ်လ့ၣ်ကဟၣ်သုးအ အိၣ်, “ယဘၣ်ဒိလံ. ဃၣ်တရံးက့ၤဒီးဟးထီၣ်ကွံာ်လၢတၢ်ဒုးပျီန့ၣ် တက့ၢ်.”

³⁴ဖဲတၢ်ဒုးတၢ်ယၤဆူၣ်ဝဲအခါန့ၣ်, စီၤပၤအၤဃာ်ဘၣ်တၢ်ပိာ်ဆၢ ထၢၣ်ဒံးဒၣ်အီၤလၢအဝဲအလ့ၣ်ကဟၣ်သုးအပူၤကွၢ်ဆၢညါပှၤစူၤရံ ဖိတဖၣ်န့ၣ်လီၤ. တုၤမုၢ်လီၤနုာ်န့ၣ်အဝဲသံဝဲဒၣ်လီၤ.