Read S'gaw Karen လံာ်ကွဲးနီၣ်တၢ်ခံဘ့ၣ်တဘ့ၣ် 20 Bible Online

လံာ်ကွဲးနီၣ်တၢ်ခံဘ့ၣ်တဘ့ၣ် 20 - S'gaw Karen bible

လံာ်ကွဲးနီၣ်တၢ်ခံဘ့ၣ်တဘ့ၣ် 20

¹တၢ်န့ၣ်တဖၣ်အလီၢ်ခံတယံာ်ဘၣ်န့ၣ်, ကီၢ်မိၤအးဒီးကီၢ်ဧၤမိၣ် အသုးမုၢ်တဖၣ်ပာ်ဖှိၣ်ဃုာ်သကိးအသးဒီးအဝဲသ့ၣ်အသိၣ်အမှံၤတဖၣ် လၢအမ့ၢ်ပှၤမူနးဖိတဖၣ်ဒီးဟဲထီၣ်ဒုးကီၢ်ယူဒၤန့ၣ်လီၤ.

²ပှၤဟဲစိာ်တၢ်ကစီၣ်တနီၤဟဲဝဲဒီးဒုးသ့ၣ်ညါဘၣ်စီၤပၤယဟိၡၤ ဖးစံးဝဲ, “သုးမုၢ်ဖးဒိၣ်တဖုလၢကီၢ်အဒိၣ်တခီဟဲဝဲလၢပီၣ်လဲၣ်သံ အဝၢ်ဘးခီလၢကဟဲထီၣ်ဒုးနၤအဂီၢ်န့ၣ်လီၤ. အဝဲသ့ၣ်မၤန့ၢ်ကွံာ်လံဝ့ၢ်ဃၤဃစိၣ်တါမၢ်န့ၣ်လီၤ. (အအံၤမ့ၢ်ဝ့ၢ်ဧ့ၣ်က့ဒၤအမံၤအဂၤတဖျၢၣ်န့ၣ်လီၤ.)

³စီၤယဟိၡၤဖးပျံၤတၢ်ဖုးတၢ်ဒီးဘါထုကဖၣ်တၢ်ဆူယွၤအအိၣ်လၢ တၢ်နဲၣ်ကျဲအဂီၢ်န့ၣ်လီၤ. အန့ၣ်ဝံၤဒီး, အဝဲဟ့ၣ်လီၤအကလုၢ်လၢတၢ်ဒုၣ်တၢ်အီၣ်တမံၤကဘၣ်တၢ် မၤအီၤလၢထံကီၢ်ဒီဘ့ၣ်အပူၤအဂီၢ်န့ၣ်လီၤ.

⁴ပှၤဂီၢ်မုၢ်လၢကယဲၢ်ကီၢ်ယူဒၤအဝ့ၢ်တဖၣ်ဟဲချ့ချ့ဆူဝ့ၢ်ယရူၤ ၡလ့ၣ်လၢကဃ့ယွၤအတၢ်နဲၣ်ကျဲအဂီၢ်,

⁵ဒီးအဝဲသ့ၣ်ဒီးပှၤဂီၢ်မုၢ်လၢဝ့ၢ်ယရူၤၡလ့ၣ်တဖၣ်, ပာ်ဖှိၣ်ထီၣ်အသးလၢယွၤအတၢ်လုၢ်ဟံၣ်အဂၢၤအသီအပူၤန့ၣ်လီၤ. စီၤပၤစီၤယဟိၡၤဖးလဲၤထီၣ်ဒီးဆၢထၢၣ်လၢအဝဲသ့ၣ်အမဲာ်ညါ,

⁶ဒီးဘါထုကဖၣ်လၢအကလုၢ်ဖးဒိၣ်စံးဝဲ, “အိယွၤ, ပမိၢ်ပၢ်ဖံဖုလၢပျၢၤတဖၣ်အကစၢ်ယွၤဧၢ, နပၢတၢ်လၢမူခိၣ်, လၢကယဲၢ်ပှၤကလုာ်တဖၣ်လၢဟီၣ်ခိၣ်အံၤအဖီခိၣ်န့ၣ်လီၤ. နအိၣ်ဒီးတၢ်စိတၢ်ကမီၤဒီးနဂံၢ်ဆူၣ်ဘါဆူၣ်, ဒီးပှၤထီဒါနၤတသ့ဘၣ်နီတဂၤဘၣ်.

⁷နမ့ၢ်ပကစၢ်ယွၤလီၤ. ဖဲနပှၤဂီၢ်မုၢ်အံၣ်စရ့လးဟဲနုာ်ဆူကီၢ် အံၤအပူၤန့ၣ်, နဟီထီၣ်ကွံာ်ပှၤဂီၢ်မုၢ်လၢအအိၣ်ဆိးဖဲအံၤဒီးဟ့ၣ်လီၤထံ ဧိၤကီၢ်ဧိၤဆူနတံၤသကိးအစၢၤအသွဲၣ်တဖၣ်ဒ်သိးကမ့ၢ်အဝဲသ့ၣ် အတၢ်လီၤစိၤလီၤထီန့ၣ်လီၤ.

⁸အဝဲသ့ၣ်အိၣ်ဝဲဆိးဝဲဖဲအံၤ, ဒီးသူၣ်ထီၣ်ဘှီထီၣ်တ့ၢ်တၢ်လုၢ် ဟံၣ်တဖျၢၣ်လၢတၢ်မၤလၤကပီၤနၤအဂီၢ်, ဒီးသ့ၣ်ညါဝဲလၢ,

⁹တၢ်တတၢးတနါတမံၤမံၤလၢအမ့ၢ်, တၢ်ဒုးတၢ်ယၤ, တၢ်ဆါသံသတြိာ်, မ့တမ့ၢ်တၢ်သၣ်ဝံၤလီၤဒိ, မ့ၢ်ဟဲဘၣ်အဝဲ သ့ၣ်လၢကစံၣ်ညီၣ်အီၤအဂီၢ်န့ၣ်ဒီး, အဝဲသ့ၣ်ဟဲဒီးဆၢထၢၣ်လၢ ယွၤအတၢ်လုၢ်ဟံၣ်အံၤအမဲာ်ညါ, ဖဲနဘၣ်တၢ်ဘူၣ်ထီၣ်ဘါထီၣ်နၤအလီၢ်န့ၣ်သ့ဝဲလီၤ. လၢတၢ်ကိၢ်တၢ်ဂီၤအကတီၢ်န့ၣ်အဝဲသ့ၣ်ဘါထုကဖၣ်တၢ်ဆူနအိၣ်သ့ ဝဲဒီးနကဒိကနၣ်အဝဲသ့ၣ်ဒီးအုၣ်က့ၤခီၣ်က့ၤအီၤန့ၣ်လီၤ.

¹⁰ခဲကနံၣ်အံၤပှၤဂီၢ်မုၢ်လၢကီၢ်ဧၣ်မိၣ်, ကီၢ်မိၤအးဒီးကီၢ်အဒိၣ်တဖၣ်ဟဲထီၣ်ဒုးပှၤလံ. ဖဲပမိၢ်ပၢ်ဖံဖုလၢပျၢၤတဖၣ်ဟးထီၣ်လၢကီၢ်အဲၤကူပတူးအပူၤ န့ၣ်, နတပျဲအဝဲသ့ၣ်လဲၤနုာ်ဆူထံကီၢ်သ့ၣ်တဖၣ်န့ၣ်အပူၤဘၣ်. လၢတၢ်န့ၣ်, အဃိပမိၢ်ပၢ်ဖံဖုလၢပျၢၤတဖၣ်လဲၤပူၤကွံာ်လၢ အဝဲသ့ၣ်အကီၢ်အဃၢၤဒီးတမၤဟးဂီၤကွံာ်ဘၣ်အဝဲသ့ၣ်ဘၣ်.

¹¹အအံၤမ့ၢ်တၢ်လၢအဝဲသ့ၣ်မၤဆၢက့ၤပှၤန့ၣ်လီၤ. အဝဲသ့ၣ်ဟဲထီၣ်ဒ်သိးကဟီထီၣ်ကွံာ်ပှၤလၢထံကီၢ်လၢနဟ့ၣ်ပှၤ အပူၤန့ၣ်လီၤ.

¹²နမ့ၢ်ပကစၢ်ယွၤလီၤ. စံၣ်ညီၣ်အဝဲသ့ၣ်တက့ၢ်. အဂ့ၢ်ဒ်အံၤ, လၢသုးမုၢ်ဖးဒိၣ်လၢအဟဲထီၣ်ဒုးပှၤအမဲာ်ညါန့ၣ်, ပမၤစၢၤလီၤက့ၤပသးတဘၣ်ဘၣ်. ပကဘၣ်မၤတၢ်မနုၤလဲၣ်န့ၣ်ပတသ့ၣ် ညါဘၣ်. မ့မ့ၢ်ပကွၢ်ထီၣ်တၢ်ဆူနအိၣ်လၢတၢ်မၤစၢၤအဂီၢ်န့ၣ်လီၤ.”

¹³ကယဲၢ်ပှၤပိာ်ခွါလၢကီၢ်ယူဒၤအပူၤခဲလၢာ်ဃုာ်ဒီးအမါတဖၣ်ဒီး အဖိတဖၣ်န့ၣ်, ဆၢထၢၣ်ဝဲဖဲန့ၣ်, လၢယွၤအတၢ်လုၢ်ဟံၣ်န့ၣ်လီၤ.

¹⁴ယွၤအသးဟဲလီၤဘၣ်ပှၤလ့ၤဝံဖိတဂၤအလိၤ, လၢအအိၣ်လၢပှၤဂီၢ်မုၢ်အကျါန့ၣ်လီၤ. အဝဲအမံၤမ့ၢ်, စီၤစကၤရယၤအဖိခွါစီၤယၤဃစအ့လးန့ၣ်လီၤ. အဝဲမ့ၢ်ပှၤတဂၤလၢစီၤအၤစာ်အဒူၣ်ထၢပူၤ, ဒီးမ့ၢ်ပှၤဟဲလီၤ စၢၤလၢစီၤအၤစာ်ခီဖျိစီၤမးတၤနယၤ, စီၤယံးအ့လး, ဒီး စီၤဘနါယၤန့ၣ်လီၤ.

¹⁵စီၤယၤဃစအ့လးစံးဝဲ, “နဲဒၣ်တၢ်ဒိၣ်စီၤပၤဖးဒိၣ်ဒီး ကယဲၢ်သုဝဲပှၤဂီၢ်မုၢ်လၢကီၢ်ယူဒၤဒီးဝ့ၢ်ယရူၤၡလ့ၣ်အပူၤ သ့ၣ်ဧၢ, ယွၤစံးဝဲဒၣ်, လၢသုတ့ၢ်စၢ်လီၤသုဂံၢ်သုဘါမ့ၢ်ဂ့ၤ, ပျံၤတၢ်ဖုးတၢ်လၢသုကကွၢ်ဆၢၣ်မဲာ်သုးမုၢ်ဖးဒိၣ်အံၤမ့ၢ်ဂ့ၤ, အလီၢ်တအိၣ်ဘၣ်. တၢ်ဒုးန့ၣ်သန့ၤထီၣ်အသးလၢယွၤအဖီခိၣ်ဒီး တမ့ၢ်ဘၣ်လၢသုဖီခိၣ်ဘၣ်.

¹⁶လဲၤထီၣ်ဒုးအဝဲသ့ၣ်ခဲမုၢ်ဆ့ၣ်, ဖဲအဝဲသ့ၣ်ဟဲထီၣ်လၢဝ့ၢ်စံာ် အကျဲဟဲထီၣ်န့ၣ်တက့ၢ်. သုကဘၣ်သဂၢၢ်ဒီးအဝဲသ့ၣ်ဖဲတြီၤလၢအလဲၤ ဆူယရူၤအ့လးအပှၢ်မုၢ်ကနၢအထိးနါန့ၣ်လီၤ.

¹⁷သုတဘၣ်ဒုးတၢ်ဒုးအံၤဘၣ်. မ့မ့ၢ်ထဲဟံးန့ၢ်သုလီၢ်တဖၣ်ဒီး ခိးတၢ်တက့ၢ်. သုကထံၣ်ဘၣ်လၢယွၤဟ့ၣ်သုတၢ်မၤနၢၤန့ၣ်လီၤ. ပှၤဂီၢ်မုၢ်လၢကီၢ်ယူဒၤဒီးဝ့ၢ်ယရူၤၡလ့ၣ်ဖိသ့ၣ်ဧၢ, မၤယံာ်မၤနီၢ်သုသးဒီးပျံၤတၢ်တဂ့ၤ. လဲၤထီၣ်ဆူတၢ်ဒုးတ က့ၢ်. ဒီးယွၤကအိၣ်ဒီးသုလီၤ.”

¹⁸အန့ၣ်ဒီး, စီၤပၤယဟိၡၤဖးသကူးလီၤအသး, အိၣ်ဒီးအမဲာ်ကျးလီၤအသးလၢဟီၣ်ခိၣ်လိၤဒီးကယဲၢ်ပှၤဂီၢ်မုၢ် ခဲလၢာ်သကူးလီၤအသးဃုာ်ဒီးအီၤ, ဒီးဘူၣ်ထီၣ်ဘါထီၣ်ယွၤန့ၣ်လီၤ.

¹⁹ပှၤလ့ၤဝံဖိလၢပှၤကဃးဒီးပှၤကိရးအဒူၣ်ထၢပူၤတဖၣ်ဂဲၤဆၢ ထၢၣ်ဒီးလၢအကလုၢ်ဖးဒိၣ်န့ၣ်စံးထီၣ်ပတြၢၤယွၤအံၣ်စရ့လး အကစၢ်ယွၤန့ၣ်လီၤ.

²⁰လၢမုၢ်ဆ့ၣ်ထီၣ်ဂီၤဂီၤန့ၣ်, ပှၤဂီၢ်မုၢ်လဲၤဃီၤဝဲဆူပှၢ်မုၢ် ကနၢဘူးဒီးသဝီတကိၤန့ၣ်လီၤ. တချုးလၢအဝဲသ့ၣ်စးထီၣ်လဲၤတၢ်ဒံးန့ၣ်, စီၤယဟိၡၤဖးကတိၤလီၤတၢ်ဆူအဝဲသ့ၣ်အအိၣ်လၢတၢ်ကတိၤတဖၣ်အံၤ န့ၣ်လီၤ. “ပှၤကီၢ်ယူဒၤဒီးဝ့ၢ်ယရူၤၡလ့ၣ်ဖိသ့ၣ်ဧၢ, ပာ်သုတၢ်နာ်လၢယွၤ, သုကစၢ်ယွၤအပူၤဒီး, သုကဆၢထၢၣ်ဂၢၢ်ကျၢၤန့ၣ်လီၤ. စူၢ်က့ၤနာ်က့ၤတၢ်လၢအဝဲအဝံတဖၣ်တဲဘၣ်သု, ဒီးသု ကမၤနၢၤတၢ်န့ၣ်လီၤ.”

²¹တုၤအကူၣ်လိာ်ဖးလိာ်သကိးအသးဒီးပှၤဂီၢ်မုၢ်ဝံၤအလီၢ်ခံန့ၣ်, စီၤပၤဟ့ၣ်လီၤအကလုၢ်လၢပှၤသးဝံၣ်တၢ်ဖိတနီၤကကူထီၣ်သိးထီၣ် အဆ့ကၤဒိၣ်တဖၣ်လၢအဝဲသ့ၣ်ကူသိးဝဲဖဲဘူၣ်စီဆှံအကတီၢ်တဖၣ်န့ၣ်, ဒီးကလဲၤတၢ်လၢသုးမုၢ်အမဲာ်ညါဒီးသးဝံၣ်ထီၣ်တၢ်, “စံးထီၣ်ပတြၢၤယွၤတက့ၢ်. အဝဲအတၢ်အဲၣ်မ့ၢ်တၢ်လီၤထူလီၤ ယိာ်န့ၣ်လီၤ.”

²²ဖဲအဝဲသ့ၣ်စးထီၣ်သးဝံၣ်တၢ်ဒီးစံးထီၣ်ပတြၢၤတၢ်န့ၣ်, ယွၤပာ်လီၤတၢ်ခိးခးခူသူၣ်တဖၣ်ထီဒါကီၢ်ဧၤမိၣ်, ကီၢ်မိၤအးဒီးကစၢၢ်စ့ဧၤအပှၤကညီတဖၣ်လၢအဟဲထီၣ်ဒုးကီၢ်ယူဒၤ, ဒီးအဝဲသ့ၣ်ဘၣ်တၢ်မၤနၢၤကွံာ်အီၤန့ၣ်လီၤ.

²³ပှၤဧၣ်မိၣ်ဖိတဖၣ်ဒီးပှၤမိၤအးဖိတဖၣ်ဒုးတၢ်ထီဒါကီၢ်အဒိၣ် အသုးမုၢ်ဒီးမၤဟးဂီၤကွံာ်ဝဲလၢာ်လၢာ်ဆ့ဆ့, ဝံၤဒီးအဝဲသ့ၣ်ကဒဲကဒဲဒုးလိာ်အသးဆူၣ်ဆူၣ်ကလဲာ်န့ၣ်လီၤ.

²⁴တုၤကီၢ်ယူဒၤအသုးမုၢ်လဲၤတုၤဝဲဆူပှၤခိးတၢ်အလီၢ်တတီၤလၢ အအိၣ်လၢပှၢ်မုၢ်ကနၢအပူၤန့ၣ်, အဝဲသ့ၣ်ကွၢ်စိဃီၤဆူအဒုၣ်အဒါတဖၣ်အအိၣ်ဒီးထံၣ်ဘၣ်ဝဲလၢအဝဲ သ့ၣ်ခဲလၢာ်လီၤဃံၤသံကွံာ်လၢဟီၣ်ခိၣ်လိၤလံန့ၣ်လီၤ. ပှၤတပူၤဖျဲးဘၣ်နီတဂၤဘၣ်,

²⁵စီၤယဟိၡၤဖးဒီးအပှၤသုးဖိတဖၣ်ဟဲနုာ်လၢကဟံးန့ၢ်တၢ်ဂုာ် န့ၢ်တဖၣ်ဒီးအဝဲသ့ၣ်ထံၣ်ဘၣ်ဂီၤဘုၣ်ဂီၤဖံးအါအါဂီၢ်ဂီၢ်, တၢ်လၢပှၤသူအီၤအလီၢ်အိၣ်တဖၣ်, တၢ်ကူတၢ်ကၤဒီးတၢ်ပီးတၢ်လီလုၢ်ဒိၣ်ပှ့ၤဒိၣ်အဂုၤအဂၤတဖၣ်န့ၣ်လီၤ. အဝဲသ့ၣ်ထၢဖှိၣ်တၢ်ဂုာ်န့ၢ်ယံာ်ဝဲသၢသီ, ဘၣ်ဆၣ်, တၢ်အိၣ်ဝဲ ဂီၢ်မုၢ်ဂီၢ်ပၤတုၤဒၣ်လဲာ်အဝဲသ့ၣ်က့ၤစိာ်တၢ်တန့ၢ်ခဲလၢာ်ဘၣ်န့ၣ်လီၤ.

²⁶လၢလွံၢ်သီတသီန့ၣ်အဝဲသ့ၣ်ပာ်ဖှိၣ်ထီၣ်အသးလၢဘရၤကၤအတၢ် တြီၤပူၤဒီးစံးထီၣ်ပတြၢၤယွၤလၢကယဲၢ်တၢ်လၢအမၤတၢ်ဝဲခဲ လၢာ်အဃိန့ၣ်လီၤ. လၢတၢ်န့ၣ်အဃိတၢ်တြီၤပူၤအံၤဘၣ်တၢ်ကိးအီၤလၢ, “ဘရၤကၤ” န့ၣ်လီၤ.

²⁷စီၤယဟိၡၤဖးက့ၤဆှၢက့ၤအပှၤသုးဖိတဖၣ်ဆူဝ့ၢ်ယရူၤၡလ့ၣ် အပူၤအိၣ်ဒီးတၢ်မၤနၢၤ, မ့ၢ်လၢယွၤမၤနၢၤကွံာ်အဝဲသ့ၣ်အဒုၣ်အဒါတဖၣ်အဃိန့ၣ်လီၤ.

²⁸ဖဲအဝဲသ့ၣ်က့ၤတုၤဆူဝ့ၢ်န့ၣ်, အဝဲသ့ၣ်လဲၤထီၣ်ဆူယွၤအတၢ် လုၢ်ဟံၣ်အိၣ်ဒီးတၢ်သးဝံၣ်အသီၣ်လၢသီတူၢ်တဖၣ်, ဒီးကွဲၤတဖၣ်န့ၣ်လီၤ.

²⁹ပှၤကလုာ်ခဲလၢာ်လၢအနၢ်ဟူဘၣ်တ့ၢ်ယွၤမၤနၢၤကွံာ်ကီၢ်အံၣ်စရ့ လးအဒုၣ်အဒါတဖၣ်ဒ်လဲၣ်အဂ့ၢ်န့ၣ်, ဒီးပျံၤတၢ်ဖုးတၢ်လီၤ.

³⁰လၢတၢ်န့ၣ်အဃိစီၤယဟိၡၤဖးပၢဘၣ်တၢ်မုာ်မုာ်ခုၣ်ခုၣ်ဒီးကစၢ် ယွၤဟ့ၣ်အီၤတၢ်ဘံၣ်တၢ်ဘၢလၢတၢ်ကိးကပၤဒဲးန့ၣ်လီၤ.

³¹စီၤယဟိၡၤဖးကဲထီၣ်ကီၢ်ယူဒၤအစီၤပၤဖဲအသးအိၣ်သၢဆံယဲၢ် နံၣ်, ဒီးပၢတ့ၢ်တၢ်လၢဝ့ၢ်ယရူၤၡလ့ၣ်အပူၤခံဆံယဲၢ်နံၣ်န့ၣ်လီၤ. အဝဲအမိၢ်မ့ၢ်ဝဲစီၤၡံးလဃံအဖိမုၣ်နီၢ်ဧစူဘၤန့ၣ်လီၤ.

³²ဒ်အပၢ်စီၤအၤစါလၢအဝဲအမဲာ်ညါအသိးန့ၣ်, အဝဲမၤတ့ၢ်တၢ်အဘၣ်လၢယွၤအမဲာ်ညါလီၤ.

³³ဘၣ်ဆၣ်ပှၤဘါတၢ်ဂီၤတၢ်ဖီၣ်အတၢ်ဘါအလီၢ်တဖၣ်, တဘၣ်တၢ်မၤဟးဂီၤကွံာ်အီၤဘၣ်. ပှၤဂီၢ်မုၢ်တဃၣ်က့ၤအသးလၢာ် လၢာ်ဆ့ဆ့လၢသူၣ်ဒီဖျၢၣ်သးဒီဖျၢၣ်အပူၤဆူတၢ်ဘူၣ်ထီၣ်ဘါ ထီၣ်အမိၢ်ပၢ်ဖံဖုလၢပျၢၤတဖၣ်အကစၢ်ယွၤဒံးဘၣ်န့ၣ်လီၤ.

³⁴ကယဲၢ်တၢ်အဂုၤအဂၤခဲလၢာ်လၢစီၤယဟိၡၤဖးမၤတ့ၢ်ဝဲ, စးထီၣ်လၢအဝဲပၢတၢ်အခီၣ်ထံးတုၤလၢအတၢ်ပၢအကတၢၢ်န့ၣ်ဘၣ်တၢ် ကွဲးနီၣ်ကွဲးဃါအီၤလၢစီၤဃနၤနံအဖိခွါစီၤယ့ၤဟူ အလံာ်တၢ်စံၣ်စိၤတဲစိၤအပူၤ, လၢအမ့ၢ်ကီၢ်အံၣ်စရ့လးအစီၤပၤ တဖၣ်အလံာ်တၢ်စံၣ်စိၤတဲစိၤအကျါတခါန့ၣ်လီၤ.

³⁵တဘျီန့ၣ်, ကီၢ်ယူဒၤအစီၤပၤစီၤယဟိၡၤဖးမၤတ့ၢ်တၢ်ဒီသိၣ် ဒီမှံၤဒီးစီၤအဃၤစယၤလၢအမ့ၢ်ကီၢ်အံၣ်စရ့လးအစီၤပၤတဂၤ လၢအမၤတ့ၢ်တၢ်အၢတၢ်သီအါမံၤန့ၣ်လီၤ.

³⁶ဖဲဝ့ၢ်ဧ့စယိၣ်ကဘ့ၢ်အကဘီသန့န့ၣ်အဝဲသ့ၣ်ဘှီထီၣ်ကဘီတဖၣ်လၢ အလဲၤတၢ်လၢပီၣ်လဲၣ်ပူၤန့ၣ်လီၤ.

³⁷ဘၣ်ဆၣ်စီၤဒိဒၤဝၤအဖိခွါစီၤအလၤဧစၢ်လၢဝ့ၢ်မရ့ၡၤဟ့ၣ် ပလီၢ်စီၤယဟိၡၤဖးစံးဝဲ, “မ့ၢ်လၢနမၤတ့ၢ်တၢ်ဒီသိၣ်ဒီမှံၤဒီးစီၤအဃၤစယၤအဃိ, ယွၤကမၤဟးဂီၤကွံာ်တၢ်လၢနဘှီထီၣ်န့ၣ်လီၤ.” ဒီးကဘီတဖၣ်ဟးဂီၤကွံာ်ဝဲဒီးတလဲၤဘၣ်တၢ်နီတစုဘၣ်