Read S'gaw Karen လံာ်ကွဲးနီၣ်တၢ်ခံဘ့ၣ်တဘ့ၣ် 29 Bible Online

လံာ်ကွဲးနီၣ်တၢ်ခံဘ့ၣ်တဘ့ၣ် 29 - S'gaw Karen bible

လံာ်ကွဲးနီၣ်တၢ်ခံဘ့ၣ်တဘ့ၣ် 29

¹စီၤဃံးစကံယၤကဲထီၣ်ကီၢ်ယူဒၤအစီၤပၤဖဲအသးအိၣ်ခံဆံယဲၢ် နံၣ်, ဒီးအဝဲပၢတ့ၢ်တၢ်လၢဝ့ၢ်ယရူၤၡလ့ၣ်အပူၤခံဆံခွံနံၣ်န့ၣ်လီၤ. အဝဲအမိၢ်မ့ၢ်ဝဲစီၤစကၤရယၤအဖိမုၣ်, နီၢ်အဘံယၤန့ၣ်လီၤ.

²ပိာ်ထွဲထီၣ်အဝဲအပၢ်ဖးဒိၣ်လၢပျၢၤစီၤပၤစီၤဒၤဝံးအဒိ အတဲာ်အခံန့ၣ်, အဝဲမၤတ့ၢ်တၢ်လၢအဘၣ်ယွၤအသးန့ၣ်လီၤ.

³ဖဲစီၤဃံးစကံယၤကဲထီၣ်စီၤပၤအခီၣ်ထံးတနံၣ်, လၢလါအခီၣ်ထံးတလါအပူၤန့ၣ်, အဝဲအိးထီၣ်ကဒါက့ၤယွၤအတၢ်လုၢ် ဟံၣ်အတြဲၤတဖၣ်, ဒီးမၢပှၤဘှီဂ့ၤထီၣ်က့ၤအီၤန့ၣ်လီၤ.

⁴အဝဲကိးဖှိၣ်ဃီၤပှၤတဖုလၢအမ့ၢ်ပှၤလုၢ်တၢ်အခိၣ်တဖၣ်ဆူယွၤ အတၢ်လုၢ်ဟံၣ်အဂၢၤလၢမုၢ်ထီၣ်တကပၤ, ဒီးကတိၤတၢ်ဒီးအဝဲသ့ၣ်ဖဲန့ၣ်လီၤ.

⁵အဝဲစံးဝဲ, “သုဝဲပှၤလ့ၤဝံဖိတဖၣ်သုကဘၣ်ပာ်စီဆှံထီၣ် သုသးဒီးမၤကဆှီထီၣ်ယွၤ, သုမိၢ်ပၢ်ဖံဖုလၢပျၢၤတဖၣ်အကစၢ်ယွၤအတၢ်လုၢ်ဟံၣ်န့ၣ်လီၤ.

⁶ပမိၢ်ပၢ်ဖံဖုလၢပျၢၤတဖၣ်တသူၣ်တီသးရၤတ့ၢ်ဒီးယွၤ, ပကစၢ်ယွၤဘၣ်. ဒီးမၤတ့ၢ်တၢ်လၢအတဘၣ်ယွၤအသးန့ၣ်လီၤ. အဝဲသ့ၣ်လဲၤသဒၣ်ကွံာ်အီၤဒီးဃၣ်ကွံာ်အမဲာ်လၢတၢ်လီၢ်ဖဲယွၤ အိၣ်ဝဲဆိးဝဲန့ၣ်လီၤ.

⁷အဝဲသ့ၣ်ကးတံၢ်ယွၤအတၢ်လုၢ်ဟံၣ်အတြဲၤတဖၣ်, ပျဲမ့ၣ်အူဒၢတဖၣ်လီၤပံာ်ကွံာ်, ဒီးတဆိၣ်ကဲၤထီၣ်တၢ်နၢမူ မ့ၢ်ဂ့ၤ, လုၢ်ထီၣ်ပာ်ထီၣ်တၢ်လုၢ်တဖၣ်မ့ၢ်ဂ့ၤ, လၢကီၢ်အံၣ်စရ့လးအကစၢ်ယွၤအတၢ်လုၢ်ဟံၣ်အပူၤန့ၣ်ဘၣ်.

⁸လၢတၢ်အံၤအဃိယွၤသးထီၣ်ဘၣ်ကီၢ်ယူဒၤဒီးဝ့ၢ်ယရူၤၡလ့ၣ်, ဒီးတၢ်လၢယွၤမၤဘၣ်အဝဲသ့ၣ်န့ၣ်ဒုးကမၢကမၣ်မၤပျံၤမၤဖုး ပှၤကိးဂၤဒဲးန့ၣ်လီၤ. သုသ့ၣ်ညါတၢ်အံၤဂ့ၤဂ့ၤဘၣ်ဘၣ်လီၤ.

⁹ပပၢ်တဖၣ်ဘၣ်တၢ်မၤသံကွံာ်အီၤလၢတၢ်ဒုးတၢ်ယၤအပူၤ, ဒီးပမါတဖၣ်ဒီးပဖိတဖၣ်ဘၣ်တၢ်စိာ်ကွံာ်အီၤဒ်ပှၤဘၣ်တၢ်စၢဃာ် တဖၣ်အသိးန့ၣ်လီၤ.

¹⁰ဒီးခဲကနံၣ်အံၤယပာ်လီၤယသးလၢယကမၤတၢ်အၢၣ်လီၤအီလီၤတမံၤ ဒီးယွၤ, အံၣ်စရ့လးအကစၢ်ယွၤ, ဒ်သိးအဝဲသုတသးထီၣ်ဘၣ်ပှၤလၢၤတဂ့ၤန့ၣ်လီၤ.

¹¹ယဖိခွါသ့ၣ်ဧၢ, မၤလၢာ်တၢ်ဆၢကတီၢ်နီတစဲးတဂ့ၤ. သုမ့ၢ်ပှၤလၢယွၤဃုထၢတ့ၢ်အီၤလၢကဆူးကဲၤထီၣ်တၢ်နၢမူ ဆူအအိၣ်, ဒီးလၢကဆှၢပှၤဂီၢ်မုၢ်လၢတၢ်ဘူၣ်ထီၣ်ဘါထီၣ်အီၤ အဂီၢ်န့ၣ်လီၤ.

¹²ဖဲန့ၣ်ပှၤလ့ၤဝံဖိတဖၣ်လၢအအိၣ်ဖှိၣ်ရိဖှိၣ်မ့ၢ်ဝဲလၢပှၤ ကဃးဖိအဒူၣ်ထၢန့ၣ်, စီၤဧမၤဝဲအဖိခွါစီၤမၤဃးဒီးစီၤဧစၤရယၤ အဖိခွါစီၤယိၤအ့လး, လၢပှၤမရၤရံအဒူၣ်ထၢန့ၣ်, စီၤဧၤဘ့းဒံးအဖိခွါစီၤကံၣ်, ဒီးစီၤယဟးလ့ၤလ့လးအဖိ ခွါစီၤဧစၤရယၤ, လၢပှၤက့ရၡိၣ်အဒူၣ်ထၢန့ၣ်, စီၤစံးမၤအဖိခွါစီၤယိၤအၤ, ဒီးစီၤယိၤအၤအဖိခွါစီၤဧ့ၤဒ့ၣ်,

¹³လၢပှၤအလံစဖၣ်အဒူၣ်ထၢန့ၣ်, စီၤၡံးမရံဒီးစီၤယံးအ့လး, လၢပှၤအၤစာ်အဒူၣ်ထၢန့ၣ်စီၤစကၤရယၤဒီးစီၤမးတၤနယၤ,

¹⁴လၢပှၤဟ့မၣ်အဒူၣ်ထၢန့ၣ်, စီၤယဃ့အ့လးဒီးစီၤၡံးမံၤ, လၢပှၤယဒူသူၣ်အဒူၣ်ထၢန့ၣ်, စီၤၡမါယၤဒီးစီၤဧူးစံၤအ့လးန့ၣ်လီၤ.

¹⁵ပှၤတဖၣ်အံၤဒုးအိၣ်ဖှိၣ်ရိဖှိၣ်ပှၤလ့ၤဝံဖိသကိးသကိးဒီး အီၤတဖၣ်, ဒီးအဝဲသ့ၣ်ခဲလၢာ်မၤကဆှီထီၣ်အသးဒ်တၢ်အလုၢ်အလၢ်အိၣ်ဝဲအသိး န့ၣ်လီၤ. အန့ၣ်ဝံၤဒီး, ဒ်စီၤပၤမၤလိာ်တ့ၢ်အဝဲ သ့ၣ်တၢ်လၢကမၤဝဲအသိးန့ၣ်, အဝဲသ့ၣ်စးထီၣ်မၤကဆှီယွၤအတၢ် လုၢ်ဟံၣ်ဒ်တၢ်အလုၢ်အလၢ်အိၣ်ဝဲအသိး, လီၤပလိာ်ဒီးယူဒၤအတၢ်သိၣ်တၢ်သီလၢယွၤဟ့ၣ်လီၤဝဲန့ၣ်လီၤ.

¹⁶ပှၤလုၢ်တၢ်အခိၣ်တဖၣ်လဲၤနုာ်လီၤဆူယွၤအတၢ်လုၢ်ဟံၣ်အပူၤလၢ ကမၤကဆှီထီၣ်အီၤအဂီၢ်, ဒီးအဝဲသ့ၣ်စိာ်ထီၣ်ကွံာ်တၢ်လၢအတကဆှီဘၣ်ဒ်တၢ်အလုၢ်အလၢ်အိၣ် ဝဲအသိးတဖၣ်ခဲလၢာ်ဆူယွၤအတၢ်လုၢ်ဟံၣ်အဂၢၤပူၤန့ၣ်လီၤ. ပှၤလ့ၤဝံဖိတဖၣ်စိာ်ထီၣ်ကွံာ်တၢ်သ့ၣ်တဖၣ်န့ၣ်ခဲလၢာ်ဖဲန့ၣ်, ဒီးလဲၤစိာ်ဝဲဆူဝ့ၢ်အချၢလၢကံဒြိၣ်အတၢ်တြီၤပူၤန့ၣ်လီၤ.

¹⁷တၢ်မၤဘၣ်တၢ်စးထီၣ်မၤအီၤလၢလါအခီၣ်ထံးတလါ, လါထီၣ်တသီ, ဒီးလၢလါထီၣ်ဃိးသီတသီအနံၤန့ၣ်, အဝဲသ့ၣ်မၤဝံၤကွံာ်အီၤခဲလၢာ်, ဃုာ်ဒီးဒၢးတၢ်မဲာ်ညါလၢတၢ် လဲၤနုာ်ဆူယွၤအတၢ်လုၢ်ဟံၣ်န့ၣ်လီၤ. ဝံၤဒီးအဝဲသ့ၣ်မၤကဒီးတၢ်ဆူညါဃိးသီ, တုၤလၢလါထီၣ်တဆံ ဃုသီအနံၤ, လၢတၢ်ဘူၣ်ထီၣ်ဘါထီၣ်အဂီၢ်န့ၣ်လီၤ.

¹⁸ပှၤလ့ၤဝံဖိတဖၣ်ဟ့ၣ်ထီၣ်က့ၤတၢ်ပာ်ဖျါဒ်လၢလာ်အံၤဆူစီၤပၤ ဃံးစကံယၤအအိၣ်န့ၣ်လီၤ. “ပမၤကဆှီထီၣ်က့ၤယွၤအတၢ်လုၢ်ဟံၣ်ဒီတဖျၢၣ်ညါဒ်တၢ်အလုၢ်အလၢ် အိၣ်ဝဲအသိးဝံၤလံဝဲ, ဃုာ်ဒီးတၢ်လုၢ်လီၢ်လၢတၢ်လုၢ်မ့ၣ်အူတဖၣ်အဂီၢ်, စီၢ်နီၤခိၣ်လၢတၢ်ပာ်ကိၣ်စီဆှံအဂီၢ်ဒီးကယဲၢ်တၢ်အဃၢၤအဃိၢ် ခဲလၢာ်န့ၣ်လီၤ.

¹⁹ကယဲၢ်တၢ်အဃၢၤအဃိၢ်လၢစီၤပၤအၤဃးစိာ်ကွံာ်တ့ၢ်ဖဲနံၣ်တဖၣ်လၢ အဝဲတသးတီဒီးကစၢ်ယွၤအကတီၢ်န့ၣ်, ပဟဲက့ၤစိာ်ကဒါက့ၤစ့ၢ်ကီးဒီးပပာ်စီဆှံထီၣ်ကဒါက့ၤအီၤ ဝံၤလံ. တၢ်န့ၣ်တဖၣ်ခဲလၢာ်အိၣ်ဝဲလၢယွၤအတၢ်လုၢ်လီၢ်အမဲာ်ညါန့ၣ် လီၤ.”

²⁰လၢတၢ်တမၤယံာ်မၤနီၢ်သးအပူၤန့ၣ်, စီၤပၤဃံးစကံယၤကိးဖှိၣ် ဝ့ၢ်အပှၤတူၢ်ဒိၣ်ကီၤဒိၣ်တဖၣ်, ဒီးအဝဲသ့ၣ်လဲၤသကိးဝဲဆူယွၤအတၢ်လုၢ်ဟံၣ်န့ၣ်လီၤ.

²¹အဝဲသ့ၣ်လဲၤစိာ်ဂီၤဖံးဖါနွံဒု, သိနွံဒု, သိဖိနွံဒုဒီးမဲာ်တဲးလဲးနွံဒုဒ်တၢ်လုၢ်တၢ်ပာ်တမံၤအဆိး လၢကစိာ်ထီၣ်ကွံာ်စီၤပၤအဟံၣ်ဖိဃီဖိတဖၣ်ဒီးကီၢ်ယူဒၤ အပှၤဂီၢ်မုၢ်အတၢ်ဒဲးဘးတဖၣ်အဂီၢ်ဒီးလၢတၢ်မၤကဆှီထီၣ် ယွၤအတၢ်လုၢ်ဟံၣ်အဂီၢ်န့ၣ်လီၤ. စီၤပၤစံးဘၣ်ပှၤလုၢ်တၢ်အခိၣ်တဖၣ်လၢအမ့ၢ်စီၤအၤဟရိၣ်အစၢၤ အသွဲၣ်လၢကလုၢ်ထီၣ်ဆၣ်ဖိကီၢ်ဖိတဖၣ်လၢတၢ်လုၢ်လီၢ်အဖီခိၣ်ဒ် တၢ်လုၢ်တၢ်ပာ်တဖၣ်အသိးန့ၣ်လီၤ.

²²အဆိကတၢၢ်ပှၤလုၢ်တၢ်အခိၣ်တဖၣ်မၤသံဂီၤဖံးဖါတဖၣ်, ဝံၤဒီးသိတဖၣ်, ဝံၤဒီးသိဖိတဖၣ်ဒီးဖှံတၢ်လုၢ်တၢ်ပာ်တမံၤ စုာ်စုာ်အသွံၣ်လၢတၢ်လုၢ်လီၢ်အဖီခိၣ်န့ၣ်လီၤ.

²³လၢခံကတၢၢ်အဝဲသ့ၣ်လဲၤစိာ်မဲာ်တဲးလဲးတဖၣ်ဆူစီၤပၤဒီးဆူ ပှၤဘူၣ်တၢ်ဘါတၢ်အဂၤတဖၣ်အအိၣ်ဒီးအဝဲသ့ၣ်ပာ်ထီၣ်အစုလၢမဲာ် တဲးလဲးတဖၣ်အလိၤန့ၣ်လီၤ.

²⁴ဝံၤဒီးပှၤလုၢ်တၢ်အခိၣ်တဖၣ်မၤသံကွံာ်မဲာ်တဲးလဲးတဖၣ်ဒီးလူ လီၤအသွံၣ်, လၢတၢ်လုၢ်လီၢ်အလိၤဒ်တၢ်လုၢ်တၢ်ပာ်တမံၤအသိးလၢကစိာ်ထီၣ်ကွံာ် ပှၤဂီၢ်မုၢ်အတၢ်ဒဲးဘးအဂီၢ်န့ၣ်လီၤ. အဂ့ၢ်ဒ်အံၤ, စီၤပၤမၤလိာ်တ့ၢ်ဝဲလၢတၢ်လုၢ်မ့ၣ်အူတဖၣ်ဒီးတၢ် လုၢ်တၢ်ဒဲးဘးတဖၣ်န့ၣ်ကဘၣ်တၢ်မၤအီၤလၢပှၤအံၣ်စရ့လးဖိခဲ လၢာ်အဂီၢ်န့ၣ်လီၤ.

²⁵စီၤပၤမၤထွဲတၢ်သိၣ်လိနဲၣ်ယုၤတဖၣ်လၢယွၤဟ့ၣ်လီၤတ့ၢ်စီၤ ပၤဒၤဝံးခီဖျိစီၤပၤအဝံစီၤကးဒီးဝံနၤသၣ်တဖၣ်န့ၣ်လီၤ. အဝဲပာ်လီၤပှၤလ့ၤဝံဖိတဖၣ်လၢယွၤအတၢ်လုၢ်ဟံၣ်အပူၤအိၣ်ဒီး သီတူၢ်တဖၣ်ဒီးစှၢၢ်စှံးတဖၣ်,

²⁶တၢ်ပီးတၢ်လီတဖၣ်ဒ်စီၤပၤစီၤဒၤဝံးသူတ့ၢ်ဝဲန့ၣ်လီၤ. ပှၤလုၢ်တၢ်အခိၣ်တဖၣ်စ့ၢ်ကီးဆၢထၢၣ်ဖဲန့ၣ်အိၣ်ဒီးကွဲၤတဖၣ်န့ၣ်လီၤ.

²⁷စီၤဃံးစကံယၤဟ့ၣ်လီၤကလုၢ်လၢတၢ်ကဆူးကဲၤထီၣ်တၢ်လၢတၢ်လုၢ် မ့ၣ်အူကဘၣ်တၢ်မၤအီၤ, ဒီးဖဲတၢ်လုၢ်တၢ်ပာ်ဘၣ်တၢ်စးထီၣ်မၤအီၤန့ၣ်, ပှၤဂီၢ်မုၢ်သးဝံၣ်စံးထီၣ်ပတြၢၤယွၤ, ဒီးပှၤဒ့တၢ်အူတၢ်ဖိ တဖၣ်စးထီၣ်အူထီၣ်ကွဲၤတဖၣ်ဒီးကယဲၢ်တၢ်အပီးအလီ အဂၤတဖၣ်န့ၣ်လီၤ.

²⁸ကယဲၢ်ပှၤခဲလၢာ်လၢအအိၣ်ဖဲန့ၣ်, ဘူၣ်ထီၣ်ဘါထီၣ်သကိးတၢ်, ဒီးတၢ်သူၣ်ဝံၣ်သးဆၢဒီးတၢ်ဒ့တၢ်အူအဂၤတဖၣ်သီၣ်ထွဲဝဲ တုၤလၢကယဲၢ်တၢ်လုၢ်တၢ်ပာ်ခဲလၢာ်ဘၣ်တၢ်ဆူးကဲၤအီၤဝံၤန့ၣ် လီၤ.

²⁹အန့ၣ်ဒီးစီၤပၤဃံးစကံယၤဒီးကယဲၢ်ပှၤဂီၢ်မုၢ်ခဲလၢာ်တီၤ လီၤကဒွံကျိာ်ဒီးဘူၣ်ထီၣ်ဘါထီၣ်ကစၢ်ယွၤန့ၣ်လီၤ.

³⁰စီၤပၤဒီးပှၤကလုာ်အခိၣ်အနၢ်တဖၣ်တဲဘၣ်ပှၤလ့ၤဝံဖိတဖၣ်လၢ ကသးဝံၣ်စံးထီၣ်ပတြၢၤယွၤလၢတၢ်သးဝံၣ်စံးထီၣ်ပတြၢၤလၢ အဘၣ်တၢ်ကွဲးအီၤလၢစီၤဒၤဝံးဒီးဝံအၤစာ်န့ၣ်လီၤ. လၢတၢ်န့ၣ်အဃိပှၤကိးဂၤဒဲးသးဝံၣ်ထီၣ်တၢ်လၢတၢ်သးခု ဖးဒိၣ်အပူၤဖဲအဝဲသ့ၣ်တီၤလီၤကဒွံကျိာ်ဒီးဘူၣ်ထီၣ်ဘါထီၣ် ကစၢ်ယွၤအခါန့ၣ်လီၤ.

³¹စီၤဃံးစကံယၤစံးဘၣ်ပှၤဂီၢ်မုၢ်, “ခဲကနံၣ်အံၤမ့ၢ်လၢသု ကဆှီဒ်တၢ်အလုၢ်အလၢ်အိၣ်အသိးအဃိ, ဟဲစိာ်တၢ်လုၢ်တၢ်ပာ်တဖၣ်ဒ်တၢ်စံးဘျုးစံးဖှိၣ်ယွၤအတၢ်လုၢ် မၤဘူၣ်တဖၣ်တက့ၢ်.” အဝဲသ့ၣ်စူၢ်ဝဲ, ဒီးပှၤအဂၤတနီၤစ့ၢ်ကီးဟဲစိာ်ဆၣ်ဖိကီၢ်ဖိတဖၣ်လၢတၢ်သူၣ်အိၣ် သးအိၣ်အပူၤဒ်သိးကလုၢ်ထီၣ်ဝဲဒ်တၢ်လုၢ်မ့ၣ်အူတဖၣ်အသိးန့ၣ်လီၤ.

³²အဝဲသ့ၣ်ဟဲစိာ်ဂီၤဖံးဖါအဒုနွံဆံ, သိအဒုတကယၤ, ဒီးသိဖိအဒု ခံကယၤဒ်တၢ်လုၢ်မ့ၣ်အူတဖၣ်အသိးလၢယွၤအဂီၢ်န့ၣ်လီၤ.

³³အဝဲသ့ၣ်ဟဲစိာ်စ့ၢ်ကီးဂီၤဖံးဖါအဒုဃုကယၤ, သိအဒုသၢကထိ ဒ်တၢ်လုၢ်တၢ်ပာ်တဖၣ်လၢပှၤဂီၢ်မုၢ်ကအီၣ်ဝဲအဂီၢ်န့ၣ်လီၤ.

³⁴မ့ၢ်လၢပှၤလုၢ်တၢ်အခိၣ်တဖၣ်တအိၣ်လၢလၢလီၣ်လီၣ်လၢကမၤသံကယဲၢ် ဆၣ်ဖိကီၢ်ဖိတဖၣ်အံၤအဃိ, ပှၤလ့ၤဝံဖိတဖၣ်မၤစၢၤအဝဲသ့ၣ်, တုၤလၢတၢ်မၤဝံၤဝဲတစု န့ၣ်လီၤ. တုၤလီၤလၢအကတီၢ်အဝဲန့ၣ်, ပှၤလုၢ်တၢ်အခိၣ်တဖၣ်လၢ အမၤကဆှီထီၣ်အသးဒ်အလုၢ်အလၢ်အိၣ်ဝဲအသိးန့ၣ်, အနီၣ်ဂံၢ်အါထီၣ်ဝဲလီၤ. (ပှၤလ့ၤဝံဖိတဖၣ်သူၣ်တီသးရၤလၢတၢ် မၤကဆှီထီၣ်သးအလုၢ်အလၢ်အါန့ၢ်ဒံးပှၤလုၢ်တၢ်အခိၣ်တဖၣ်မၤဝဲ တက့ၢ်န့ၣ်လီၤ.)

³⁵လၢတၢ်လုၢ်ထီၣ်တၢ်လုၢ်တၢ်ပာ်တဖၣ်လၢကဘၣ်တၢ်ဆူးကဲၤထီၣ်အီၤဒီ တဒုအမဲာ်ညါန့ၣ်, ပှၤလုၢ်တၢ်အခိၣ်တဖၣ်အိၣ်မူ အိၣ်ဒါစ့ၢ်ကီးလၢကဆူးကဲၤထီၣ်တၢ်အသိတဖၣ်လၢအဘၣ်တၢ်လုၢ်ထီၣ် အီၤ, ဟဲလၢတၢ်လုၢ်တၢ်ပာ်တဖၣ်လၢပှၤဂီၢ်မုၢ်အီၣ်ဝဲအပူၤ, ဒီးလၢတၢ်လူလီၤစပံးထံလၢအဘၣ်တၢ်လုၢ်ထီၣ်အီၤဃုာ်ဒီးတၢ် လုၢ်ဆူးကဲၤတဖၣ်န့ၣ်လီၤ. ဒီးလၢတၢ်န့ၣ်အဃိ, တၢ်ဘူၣ်တၢ်ဘါထီၣ်လၢယွၤအတၢ်လုၢ်ဟံၣ်အပူၤ စးထီၣ်ကဒါက့ၤဝဲန့ၣ်လီၤ.

³⁶စီၤပၤဃံးစကံယၤဒီးပှၤဂီၢ်မုၢ်တဖၣ်သူၣ်ဖှံသးညီဝဲမ့ၢ်လၢ ကစၢ်ယွၤမၤစၢၤတ့ၢ်အဝဲသ့ၣ်လၢကမၤတၢ်အံၤခဲလၢာ်ချ့ချ့ အဃိန့ၣ်လီၤ.