Read S'gaw Karen လံာ်ကွဲးနီၣ်တၢ်ခံဘ့ၣ်တဘ့ၣ် 3 Bible Online

လံာ်ကွဲးနီၣ်တၢ်ခံဘ့ၣ်တဘ့ၣ် 3 - S'gaw Karen bible

လံာ်ကွဲးနီၣ်တၢ်ခံဘ့ၣ်တဘ့ၣ် 3

¹စီၤၡလိၤမိၤအပၢ်စီၤဒၤဝံးကတဲာ်ကတီၤပာ်တ့ၢ်လံတၢ်လီၢ်တတီၤ လၢယွၤအတၢ်လုၢ်ဟံၣ်အဂီၢ်န့ၣ်လီၤ. တၢ်လီၢ်န့ၣ်အိၣ်ဝဲလၢဝ့ၢ်ယရူၤၡလ့ၣ်အပူၤ, လၢကစၢၢ်မိၤရံယၤအဒီခိၣ်တၢ်လီၢ်ဖဲပှၤယဘူၣ်ဖိစီၤအၤရနၤသူ တ့ၢ်ဝဲဒ်ကြဲၢ်တၢ်အလီၢ်တပူၤန့ၣ်လီၤ. စီၤပၤၡလိၤမိၤစးထီၣ်တၢ်သူၣ်ထီၣ်ဘှီထီၣ်,

²ဖဲအဝဲကဲထီၣ်စီၤပၤလွံၢ်နံၣ်တနံၣ်, လါခံလါတလါ, လါထီၣ်ခံနံၤတနံၤန့ၣ်လီၤ.

³ယွၤအတၢ်လုၢ်ဟံၣ်လၢစီၤပၤၡလိၤမိၤသူၣ်ထီၣ်ဝဲန့ၣ်အထီမ့ၢ် အပျၢ်ဃုဆံဒီးအဒီၣ်ဃီၤမ့ၢ်အပျၢ်ခံဆံန့ၣ်လီၤ.

⁴ဒၢးတၢ်မဲာ်ညါလၢအအိၣ်ဝဲဘူးဒီးတၢ်လုၢ်ဟံၣ်အထီမ့ၢ်အပျၢ်ခံ ဆံဒ်တၢ်လုၢ်ဟံၣ်အဒီၣ်ဃီၤအသိး, ဒီးအကစီၤထီၣ်မ့ၢ်အပျၢ်တကယၤခံဆံန့ၣ်လီၤ. တၢ်ဒါလၢဒၢးအပူၤဘၣ်တၢ်ပီၤအီၤလၢထူစီန့ၣ်လီၤ.

⁵သ့ၣ်ဘၣ်တဖၣ်လၢတၢ်ကျးအီၤလၢဒၢးမိၢ်ပှၢ်အခိၣ်ဒုးအဖီလာ်ဒီး တၢ်ဒူၣ်တဖၣ်အလိၤန့ၣ်မ့ၢ်သ့ၣ်ဆှိတဖၣ်လၢတၢ်ပီၤအီၤလၢထူစီ ဒီးဘၣ်တၢ်ဒဲးကံၣ်ဒဲးဝ့ၤအီၤဒီးတၢ်အက့ၢ်အဂီၤတဖၣ်လၢအမ့ၢ် သ့ၣ်စူၣ်ပလူၣ်တဖၣ်အိၣ်စဲဘူးဒ်ထးပျံၤအသိးန့ၣ်လီၤ.

⁶စီၤပၤကယၢကယဲဝဲယွၤအတၢ်လုၢ်ဟံၣ်လၢလၢၢ်အဃံအလၤလုၢ်ဒိၣ်ပှ့ၤ ဒိၣ်တဖၣ်ဒီးထူလၢအဘၣ်တၢ်ဟဲစိာ်အီၤလၢကီၢ်ပးရဝဲၣ်န့ၣ်လီၤ.

⁷အဝဲသူတ့ၢ်ထူလၢကကျးယွၤအတၢ်လုၢ်ဟံၣ်အဒူၣ်တဖၣ်, အကျိၤတဖၣ်, ကျဲအဟဲနုာ်တဖၣ်ဒီးတြဲၤတဖၣ်အဂီၢ်န့ၣ်လီၤ. လၢတၢ်ဒူၣ်တဖၣ်အလိၤန့ၣ်, ပှၤမၤတၢ်ဖိတဖၣ်စိးပျၤခ့ရူာ်အဂီၤ တဖၣ်န့ၣ်လီၤ.

⁸ဒၢးလၢတၢ်သးကံၢ်ပူၤကတၢၢ်လၢအဘၣ်တၢ်ကိးအီၤလၢတၢ်လီၢ်စီဆှံ ကတၢၢ်န့ၣ်အထီမ့ၢ်အပျၢ်ခံဆံ, ဒီးအဒီၣ်ဃီၤမ့ၢ်အပျၢ်ခံဆံဒ်ယွၤအတၢ်လုၢ်ဟံၣ်ဒီတဖျၢၣ်အလဲၢ် အိၣ်ဝဲအသိးန့ၣ်လီၤ. ထူအကံကၢ်ဃုကယၤဘၣ်တၢ်သူအီၤလၢတၢ်ကကျးဘၢ တၢ်အလီၢ်စီဆှံကတၢၢ်အဒူၣ်တဖၣ်အဂီၢ်,

⁹ထူအဃၢလီၤတယၢၢ်ၡက့လးယဲၢ်ဆံဘၣ်တၢ်သူ အီၤလၢတၢ်ကမၤထးပနဲာ်ဖိတဖၣ်အဂီၢ်, ဒီးဒၢးလၢထးခီတဖၣ်အတၢ်ဒူၣ်တဖၣ်ဘၣ်တၢ်ကျးဘၢစ့ၢ်ကီး အီၤလၢထူန့ၣ်လီၤ.

¹⁰စီၤပၤဟ့ၣ်လီၤစ့ၢ်ကီးအကလုၢ်လၢအပှၤမၤတၢ်ဖိတဖၣ်ကစိးပျၤခ့ ရူာ်ခံဂၤလၢစ့တိၢ်ထးဃါဃုာ်အသးဒီးကျးဘၢအီၤလၢထူဒီး ပာ်အီၤလၢတၢ်လီၢ်စီဆှံကတၢၢ်န့ၣ်လီၤ.

¹¹ခ့ရူာ်ခံဂၤအံၤအိၣ်ဒီးအဒံးဆ့ခံဘ့ၣ်စုာ်စုာ်လၢအတၢ်ထိၣ် အထီပာ်ဖှိၣ်ခဲလၢာ်မ့ၢ်ဝဲခံဆံပျၢ်န့ၣ်လီၤ.

¹²ခ့ရူာ်အခီၣ်ထံးတဂၤအဒံးဆ့တခီလၢအထီအိၣ်ယဲၢ်ပျၢ်န့ၣ်, ထိးဘၣ်ဒၢးအဒူၣ်တကပၤဒီးအဒံးဆ့အဂၤတခီလၢအထီအိၣ်ယဲၢ်ပျၢ် န့ၣ်, ထိးဘၣ်ခ့ရူာ်ခံဂၤတဂၤအဒံးဆ့တခီလၢအထီအိၣ်ယဲၢ်ပျၢ်န့ၣ် လီၤ. ဒီးခ့ရူာ်ခံဂၤတဂၤအဒံးဆ့အဂၤတခီလၢအထီအိၣ်ယဲၢ်ပျၢ်န့ၣ်, ထိးဘၣ်ဒၢးအဒူၣ်အဂၤတကပၤန့ၣ်လီၤ.

¹³ခ့ရူာ်ခံဂၤအံၤဘၣ်တၢ်ပာ်ဆၢထၢၣ်သဃဲၤအီၤအိၣ်ဒီးအဒံးဆ့ တဖၣ်ယူာ်ထီၣ်အသး, ဒီးအမဲာ်အိၣ်ဃၣ်အသးဆူကျဲစၢၤဟဲနုာ်လီၤန့ၣ်လီၤ.

¹⁴ယၣ်ဘျးသဒၢတၢ်တဘ့ၣ်လၢတၢ်လီၢ်စီဆှံကတၢၢ်အဂီၢ်န့ၣ်, ဘၣ်တၢ်ဆးအီၤလၢဖှီဝါကဆှၣ်ဒီးတၢ်အဂၤတဖၣ်လၢအဘၣ်တၢ်စုၣ် လွဲၢ်လါဟ့, စုၣ်လွဲၢ်လုးတကုးဒီးစုၣ်လွဲၢ်ဂီၤအီၤ, အိၣ်ဒီးခ့ရူာ်အဂီၤတဖၣ်လၢတၢ်ဆးဖျါထီၣ်အီၤလၢအလိၤန့ၣ် လီၤ.

¹⁵လၢယွၤအတၢ်လုၢ်ဟံၣ်အမဲာ်ညါန့ၣ်, စီၤပၤမၢပှၤမၤဒီးပာ်လီၤ ထူၣ်ခံထူၣ်လၢ, တထူၣ်စုာ်စုာ်န့ၣ်အထီအိၣ်ဝဲသၢဆံ သၢပျၢ်လီၤ. ဒီးထူၣ်တထူၣ်ဘၣ်တထူၣ်န့ၣ်အိၣ်ဒီးအခိၣ်ထိးတခါ စုာ်စုာ်လၢအထီအိၣ်ဝဲယဲၢ်ပျၢ်န့ၣ်လီၤ.

¹⁶ထူၣ်အခိၣ်ထိးတဖၣ်ဘၣ်တၢ်ကယၢကယဲအီၤလၢတၢ်အက့ၢ်အဂီၤတမံၤလၢ အမ့ၢ်ဝဲ, ပျံၤသွဲထါဘံပကံအသးတဖၣ်ဒီးသလဲသၣ်တိၢ်ဘီအဖျၢၣ် တကယၤလၢအလိၤန့ၣ်လီၤ.

¹⁷ထူၣ်တဖၣ်ဘၣ်တၢ်ပာ်အီၤလၢတၢ်လဲၤနုာ်ဆူယွၤအတၢ်လုၢ်ဟံၣ်အကျဲ စၢၤအကပၤ, ဒီးထူၣ်လၢအအိၣ်ဖဲကလံၤထံးတထူၣ်န့ၣ်ဘၣ်တၢ်ကိးအီၤလၢယၤကံၣ် ဒီးထူၣ်လၢအအိၣ်ဖဲကလံၤစိးတထူၣ်န့ၣ်ဘၣ်တၢ်ကိးအီၤလၢဘိၤဧး န့ၣ်လီၤ.