Read S'gaw Karen လံာ်ကွဲးနီၣ်တၢ်ခံဘ့ၣ်တဘ့ၣ် 33 Bible Online

လံာ်ကွဲးနီၣ်တၢ်ခံဘ့ၣ်တဘ့ၣ် 33 - S'gaw Karen bible

လံာ်ကွဲးနီၣ်တၢ်ခံဘ့ၣ်တဘ့ၣ် 33

¹ဖဲစီၤမနၤၡ့ၤကဲထီၣ်ကီၢ်ယူဒၤအစီၤပၤန့ၣ်, အဝဲအသးအိၣ်တဆံခံနံၣ်ဒီးအဝဲပၢတ့ၢ်တၢ်ဖဲဝ့ၢ်ယရူၤၡလ့ၣ် အပူၤယဲၢ်ဆံယဲၢ်နံၣ်န့ၣ်လီၤ.

²စီၤမနၤၡ့ၤမၤတ့ၢ်တၢ်လီၤသးဘၣ်အၢအတၢ်မၤတဖၣ်ဒီးမၤတၢ်ဒဲး ဘးထီဒါယွၤ, ဒ်ပှၤကလုာ်တဖၣ်လၢယွၤဟီထီၣ်ကွံာ်တ့ၢ်အီၤလၢကီၢ်ပူၤဖဲ အပှၤဂီၢ်မုၢ်ဟဲနုာ်ဝဲ, မၤတ့ၢ်အသိးန့ၣ်လီၤ.

³အဝဲဘှီထီၣ်ကဒါက့ၤပှၤတစူၢ်တနာ်ယွၤအတၢ်ဘူၣ်ထီၣ်ဘါထီၣ်အလီၢ် တဖၣ်လၢအပၢ်စီၤဃံးစကံယၤမၤဟးဂီၤတ့ၢ်ဝဲန့ၣ်လီၤ. အဝဲဘှီထီၣ်တၢ်လုၢ်လီၢ်တဖၣ်လၢတၢ်ဘူၣ်ထီၣ်ဘါထီၣ်ဘဧၤလးအဂီၢ်, ဒီးမၤကစၢ်မုၢ်အၡ့ရၤအဂီၤတဖၣ်ဒီးဘူၣ်ထီၣ်ဘါထီၣ်ဆၣ်ဧိၤဖီဧိၤ တဖၣ်န့ၣ်လီၤ.

⁴အဝဲဘှီထီၣ်ပှၤတစူၢ်တနာ်ယွၤအတၢ်လုၢ်လီၢ်တဖၣ်လၢယွၤအတၢ်လုၢ် ဟံၣ်အပူၤ, တၢ်လီၢ်ဖဲယွၤစံးတ့ၢ်လၢအဝဲကဘၣ်တၢ်ဘူၣ်ထီၣ်ဘါထီၣ် အီၤလီၤစိၤလီၤထီန့ၣ်လီၤ.

⁵လၢယွၤအတၢ်လုၢ်ဟံၣ်အဂၢၤခံတီၤအပူၤန့ၣ်, အဝဲဘှီထီၣ်တၢ်လုၢ် လီၢ်တဖၣ်လၢတၢ်ဘူၣ်ထီၣ်ဘါထီၣ်ဆၣ်ဧိၤဖီဧိၤတဖၣ်အဂီၢ်န့ၣ်လီၤ.

⁶အဝဲလုၢ်ထီၣ်တ့ၢ်အဖိခွါတဖၣ်လၢဟံၣ်နိၣ်အတၢ်တြီၤအပူၤဒ်တၢ် လုၢ်မ့ၣ်အူတဖၣ်အသိးန့ၣ်လီၤ. အဝဲမၤတၢ်ဒ်ပှၤနာ်တၢ်ဝံတၢ်ကလၤဒီးတၢ်မၤကဒါမဲာ်ဒီးသံကွၢ် တၢ်လၢပှၤဒွးတၢ်ဟဲဝံဟဲစိာ်ဒီးပှၤအိၣ်ဒီးပှၤသံအကလၤတဖၣ် န့ၣ်လီၤ. အဝဲမၤတၢ်ဒဲးဘးဖးဒိၣ်ထီဒါယွၤဒီးထိၣ်ဂဲၤထီၣ်အတၢ်သးထီၣ် န့ၣ်လီၤ.

⁷အဝဲပာ်လီၤတၢ်ဂီၤတၢ်ဖီၣ်တခါလၢယွၤအတၢ်လုၢ်ဟံၣ်အပူၤလီၤ. တၢ်လီၢ်န့ၣ်မ့ၢ်တၢ်လီၢ်ဖဲကစၢ်ယွၤစံးဘၣ်တ့ၢ်စီၤဒၤဝံးဒီးအဖိခွါ စီၤၡလိၤမိၤ, “လၢယွၤအတၢ်လုၢ်ဟံၣ်အပူၤ, ဖဲဝ့ၢ်ယရူၤၡလ့ၣ်အပူၤအံၤ, မ့ၢ်တၢ်လီၢ်တတီၤလၢယဃုထၢတ့ၢ်အီၤလၢကယဲၢ်အံၣ်စရ့လးတဆံခံ ဒူၣ်အလီၢ်ကဝီၤအကျါ, ဒ်တၢ်လီၢ်လၢတၢ်ကဘူၣ်ထီၣ်ဘါထီၣ်ယၤအဂီၢ်န့ၣ်လီၤ.

⁸ဒီးဖဲကီၢ်အံၣ်စရ့လးအပှၤဂီၢ်မုၢ်စူၢ်ကယဲၢ်ယတၢ်မၤလိာ်တဖၣ် ဒီးတိၢ်န့ၢ်ဖံးဃာ်ယူဒၤအတၢ်ဘူၣ်တၢ်ဘါအတၢ်သိၣ်တၢ်သီခဲလၢာ် လၢယခ့ယပှၤစီၤမိၤၡ့ဟ့ၣ်လီၤတ့ၢ်အဝဲသ့ၣ်န့ၣ်, ယတပျဲအဝဲသ့ၣ်ကဘၣ်တၢ်ဟီထီၣ်ကွံာ်အီၤလၢထံကီၢ်လၢယဟ့ၣ်လီၤ တ့ၢ်အဝဲသ့ၣ်အမိၢ်ပၢ်ဖံဖုလၢပျၢၤအပူၤန့ၣ်ဘၣ်.”

⁹စီၤမနၤၡ့ၤဆှၢဃီၤကီၢ်ယူဒၤအပှၤဂီၢ်မုၢ်, ဒ်သိးကမၤတၢ်ဒဲးဘးဒိၣ်န့ၢ်အါန့ၢ်ဒံးဒၣ်လဲာ်ပှၤကလုာ်တဖၣ်လၢ ယွၤမၤဟးဂီၤအီၤလၢကီၢ်ပူၤဖဲအဝဲအပှၤဂီၢ်မုၢ်ဟဲနုာ်, မၤတ့ၢ်လံဝဲန့ၣ်လီၤ.

¹⁰ယွၤဟ့ၣ်ပလီၢ်တ့ၢ်စီၤမနၤၡ့ၤဒီးအပှၤဂီၢ်မုၢ်သနာ်က့, အဝဲသ့ၣ်တဒိကနၣ်ဝဲဘၣ်.

¹¹လၢတၢ်န့ၣ်အဃိ, ယွၤပျဲကီၢ်စူၤရံအသုးမုၢ်အခိၣ်အနၢ်တဖၣ်လၢ ကလဲၤနုာ်လီၤဒုးကီၢ်ယူဒၤန့ၣ်လီၤ. ဒီးအဝဲသ့ၣ်ဖီၣ်န့ၢ်စီၤမနၤၡ့ၤ, ဘျးထီၣ်ထးက့ၣ်ခိၣ်တဖၣ်လၢအလိၤ, စၢဃးအီၤလၢထးသွဲဒီးက့ၤမိၤအီၤဆူကီၢ်ဘၤဘူၤလိၣ်န့ၣ်လီၤ.

¹²လၢအဝဲအတၢ်တူၢ်ဘၣ်ခီၣ်ဘၣ်အပူၤန့ၣ်, အဝဲဆီၣ်လီၤက့ၤအသး, ဃၣ်ဃီၤက့ၤအသးဆူယွၤ, အကစၢ်ယွၤအအိၣ်, ဒီးဃ့ကညးအီၤလၢတၢ်မၤစၢၤအဂီၢ်န့ၣ်လီၤ.

¹³ကစၢ်ယွၤတူၢ်လိာ်တ့ၢ်စီၤမနၤၡ့ၤအတၢ်ထုကဖၣ်ဒီးစံးဆၢအီၤခီ ဖျိပျဲအက့ၤကဒါက့ၤဆူဝ့ၢ်ယရူၤၡလ့ၣ်ဒီးပၢကဒီးတၢ်န့ၣ်လီၤ. တၢ်မၤအသးအံၤဒုးနာ်စီၤမနၤၡ့ၤလၢ, ယွၤန့ၣ်, မ့ၢ်ကစၢ်ယွၤန့ၣ်လီၤ.

¹⁴တၢ်မၤအသးအံၤဝံၤအလီၢ်ခံန့ၣ်, စီၤမနၤၡ့ၤမၤထီၣ်စီၤဒၤဝံး အဝ့ၢ်ခိၣ်ဒူလၢအချၢတတီၤလၢမုၢ်ထီၣ်တကပၤ, စးထီၣ်လၢကံဃိၣ်အထံထီၣ်ပၢၢ်တုၤလၢညၣ်အတြဲၤအကလံၤစိး, ဝ့ၢ်အလီၢ်ကဝီၤလၢတၢ်ကိးအီၤလၢဧိၤဖ့လးန့ၣ်လီၤ. အဝဲပာ်စ့ၢ်ကီးသုးမုၢ်တဖုအခိၣ်တဂၤလၢတၢ်ပၢဆှၢသုးဖိ တဖုအဂီၢ်, လၢကီၢ်ယူဒၤအဝ့ၢ်လၢအအိၣ်ဒီးတိာ်ဧိၤတာ်ဧိၤတဝ့ၢ် စုာ်စုာ်အပူၤန့ၣ်လီၤ.

¹⁵အဝဲသုးကွံာ်ပှၤတခီဘီမုၢ်ဖိအယွၤတဖၣ်ဒီးတၢ်ဂီၤတၢ်ဖီၣ်လၢ အဝဲပာ်လီၤဝဲဖဲန့ၣ်, လၢယွၤအတၢ်လုၢ်ဟံၣ်အပူၤ, ဒီးပှၤတစူၢ်တနာ်ယွၤအတၢ်လုၢ်လီၢ်တဖၣ်လၢအအိၣ်လၢယွၤ အတၢ်လုၢ်ဟံၣ်အိၣ်ဆၢထၢၣ်အတၢ်လူၢ်ဒီခိၣ်မ့ၢ်ဂ့ၤဒီးလၢ တၢ်လီၢ်အဂၤတဖၣ်လၢဝ့ၢ်ယရူၤၡလ့ၣ်အပူၤမ့ၢ်ဂ့ၤန့ၣ်လီၤ. အဝဲစိာ်ကွံာ်တၢ်တဖၣ်အံၤခဲလၢာ်ဆူဝ့ၢ်အချၢဒီးစူးကွံာ်ဝဲန့ၣ်လီၤ.

¹⁶အဝဲဘှီကဒါက့ၤစ့ၢ်ကီးတၢ်လုၢ်လီၢ်ဖဲယွၤဘၣ်တၢ်ဘူၣ်ထီၣ်ဘါ ထီၣ်တ့ၢ်အီၤ, ဒီးအဝဲလုၢ်ထီၣ်ပာ်ထီၣ်တၢ်လုၢ်မၤဃူမၤဖိးတဖၣ်ဒီးတၢ်လုၢ် စံးထီၣ်ပတြၢၤတဖၣ်လၢအဖီခိၣ်န့ၣ်လီၤ. အဝဲဟ့ၣ်လီၤအကလုၢ်လၢကယဲၢ်ကီၢ်ယူဒၤအပှၤဂီၢ်မုၢ်ခဲလၢာ်ကဘူၣ် ထီၣ်ဘါထီၣ်ယွၤ, အံၣ်စရ့လးအကစၢ်ယွၤန့ၣ်လီၤ.

¹⁷ပှၤဂီၢ်မုၢ်လုၢ်ထီၣ်ထွဲဒံးတၢ်လုၢ်တၢ်ပာ်တဖၣ်လၢတၢ်ဘူၣ်တၢ်ဘါ အလီၢ်အဂၤတဖၣ်ဒၣ်လဲာ်, အဝဲသ့ၣ်လုၢ်ထီၣ်ဒၣ်တၢ်န့ၣ်တဖၣ်ဖဲ ဆူယွၤအအိၣ်န့ၣ်လီၤ.

¹⁸ကယဲၢ်တၢ်အဂုၤအဂၤတမံၤလၢ်လၢ်လၢစီၤမနၤၡ့ၤမၤတ့ၢ်ဝဲ, တၢ်ထုကဖၣ်လၢအဝဲဃ့ဝဲဆူအကစၢ်ယွၤအအိၣ်, ဒီးတၢ်ကစီၣ်တဖၣ်လၢဝံတဖၣ်စံးဘၣ်တ့ၢ်အီၤလၢယွၤ, အံၣ်စရ့လးအကစၢ်ယွၤအမံၤအပူၤန့ၣ်, ခဲလၢာ်ဘၣ်တၢ်ကွဲးနီၣ် ကွဲးဃါအီၤလၢကီၢ်အံၣ်စရ့လးအစီၤပၤတဖၣ်အလံာ်တၢ်စံၣ်စိၤတဲ စိၤအပူၤန့ၣ်လီၤ.

¹⁹စီၤပၤအတၢ်ထုကဖၣ်ဒီးကစၢ်ယွၤအတၢ်စံးဆၢက့ၤအီၤ, ဒီးတၢ်ဂ့ၢ်ဘၣ်ထွဲဒီးတၢ်ဒဲးဘးတဖၣ်လၢအဝဲမၤတ့ၢ်တချုးလၢ အပီၢ်ယၢ်လီၤက့ၤအသး, တၢ်အၢတၢ်သီလၢအမၤတ့ၢ်ဝဲ, ပှၤတစူၢ်တနာ်ယွၤအတၢ်ဘူၣ်တၢ်ဘါအလီၢ်တဖၣ်ဒီးကစၢ်မုၣ်အၡ့ရၤ အတၢ်ပနီၣ်တဖၣ်လၢအမၤထီၣ်တ့ၢ်ဝဲဒီးတၢ်ဂီၤတၢ်ဖီၣ်တဖၣ်လၢအဝဲ ဘူၣ်ထီၣ်ဘါထီၣ်တ့ၢ်ဝဲ, ခဲလၢာ်န့ၣ်ဘၣ်တၢ်ကွဲးနီၣ်ကွဲးဃါအီၤလၢဝံတဖၣ်အတၢ်စံၣ်စိၤ တဲစိၤအလံာ်ပူၤန့ၣ်လီၤ.

²⁰စီၤမနၤၡ့ၤသံဝဲဒီးဘၣ်တၢ်ခူၣ်လီၤကွံာ်အီၤဖဲနီပူၤ, ဒီးအဖိခွါစီၤအၤမိၣ်ကဲထီၣ်စီၤပၤလၢအလီၢ်န့ၣ်လီၤ.

²¹ဖဲစီၤအၤမိၣ်ကဲထီၣ်ကီၢ်ယူဒၤအစီၤပၤန့ၣ်အသးအိၣ်ခံဆံခံ နံၣ်ဒီးအဝဲပၢတ့ၢ်တၢ်လၢဝ့ၢ်ယရူၤၡလ့ၣ်အပူၤခံနံၣ်န့ၣ်လီၤ.

²²ဒ်အပၢ်စီၤမနၤၡ့ၤအသိး, အဝဲမၤတ့ၢ်တၢ်ဒဲးဘးထီဒါယွၤ, ဒီးအဝဲဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်လၢအပၢ်ဘူၣ်ထီၣ်ဘါ ထီၣ်တ့ၢ်ဝဲန့ၣ်လီၤ.

²³ဘၣ်ဆၣ်အဝဲတဆီၣ်လီၤအသးဒီးဃၣ်က့ၤအသးဆူယွၤအအိၣ်ဒ်အပၢ်မၤ တ့ၢ်ဝဲအသိးန့ၣ်ဘၣ်. အဝဲမၤတၢ်ဒဲးဘးဒိၣ်န့ၢ်ဒံးအပၢ်ဒၣ်လဲာ်တက့ၢ်လီၤ.

²⁴စီၤအၤမိၣ်အပဒိၣ်ပပှၢ်တဖၣ်ကူၣ်ထီၣ်တၢ်အၢထီဒါအီၤဒီးမၤသံ ကွံာ်အီၤလၢနီအပူၤန့ၣ်လီၤ.

²⁵ကီၢ်ယူဒၤအပှၤဂီၢ်မုၢ်မၤသံကွံာ်ပှၤတဖၣ်လၢအမၤသံစီၤအၤ မိၣ်, ဒီးဒုးကဲထီၣ်အဖိခွါစီၤယိၤၡံယၤလၢစီၤပၤ န့ၣ်လီၤ.