Read S'gaw Karen လံာ်ကွဲးနီၣ်တၢ်ခံဘ့ၣ်တဘ့ၣ် 34 Bible Online

လံာ်ကွဲးနီၣ်တၢ်ခံဘ့ၣ်တဘ့ၣ် 34 - S'gaw Karen bible

လံာ်ကွဲးနီၣ်တၢ်ခံဘ့ၣ်တဘ့ၣ် 34

¹စီၤယိၤၡံယၤကဲထီၣ်ကီၢ်ယူဒၤအစီၤပၤဖဲအသးအိၣ်ဃိးနံၣ်, ဒီးအဝဲပၢတ့ၢ်တၢ်ဖဲဝ့ၢ်ယရူၤၡလ့ၣ်အပူၤသၢဆံတနံၣ်န့ၣ်လီၤ.

²အဝဲမၤတ့ၢ်တၢ်လၢအဘၣ်ယွၤအသး, အဝဲလူၤပိာ်ထွဲအပၢ်ဖးဒိၣ်လၢ ပျၢၤစီၤဒၤဝံးအဒိအတဲာ်အခံ, ဒီးစူၢ်ကယဲၢ်ကစၢ်ယွၤအတၢ်သိၣ်တၢ်သီတဖၣ်လီၤတံၢ်လီၤဆဲးန့ၣ် လီၤ.

³ဖဲစီၤယိၤၡံယၤကဲထီၣ်စီၤပၤဃိးနံၣ်တနံၣ်အပူၤ, ဖဲအသးစၢ်ဒံးဒိၣ်မးအခါန့ၣ်, အဝဲစးထီၣ်ဘူၣ်ထီၣ်ဘါထီၣ်အပၢ်ဖးဒိၣ်စီၤဒၤဝံး အကစၢ်ယွၤန့ၣ်လီၤ. လွံၢ်နံၣ်ပူၤကွံာ်ဝံၤအလီၢ်ခံ, အဝဲစးထီၣ်မၤဟးဂီၤကွံာ်ပှၤတစူၢ်တနာ်ယွၤအတၢ်ဘူၣ်ထီၣ် ဘါထီၣ်တၢ်ဂီၤတၢ်ဖီၣ်အလီၢ်တဖၣ်, ကစၢ်မုၣ်အၡ့ရၤအတၢ်ပနီၣ်တဖၣ်ဒီးကယဲၢ်တၢ်ဂီၤတၢ်ဖီၣ်အဂၤတဖၣ် ခဲလၢာ်န့ၣ်လီၤ.

⁴လၢအဝဲအတၢ်ကျဲၤအပူၤန့ၣ်, အဝဲအပှၤတဖၣ်တီၢ်လီၤကလဲ ကွံာ်တၢ်လုၢ်လီၢ်တဖၣ်ဖဲဘဧၤလးဘၣ်တၢ်ဘူၣ်ထီၣ်ဘါထီၣ်တ့ၢ်အီၤ, ဒီးမၤလီၤပှီၢ်ကွံာ်တၢ်လုၢ်နၢမူအတၢ်လုၢ်လီၢ်တဖၣ်လၢအအိၣ်ဘူးဖဲန့ၣ်, န့ၣ်လီၤ. အဝဲသ့ၣ်မၤလီၤကမူၣ်ကွံာ်ကစၢ်မုၣ်အၡ့ရၤအဂီၤတဖၣ် ဒီးကယဲၢ်တၢ်ဂီၤတၢ်ဖီၣ်အဂၤတဖၣ်, ဝံၤဒီးဖှံလီၤကွံာ်တၢ်ကမူၣ်တဖၣ်လၢပှၤဂီၢ်မုၢ်လၢအလုၢ်ထီၣ် တၢ်ဆူအဝဲသ့ၣ်တဖၣ်အတၢ်သွၣ်ခိၣ်အလိၤန့ၣ်လီၤ.

⁵အဝဲဒွဲၣ်အူကွံာ်ပှၤတစူၢ်တနာ်ယွၤအပှၤလုၢ်တၢ်အခိၣ်တဖၣ်အဃံအ ကွဲလၢတၢ်လုၢ်လီၢ်တဖၣ်လၢအဝဲသ့ၣ်ဘူၣ်ထီၣ်ဘါထီၣ်တ့ၢ်တၢ် အဖီခိၣ်န့ၣ်လီၤ. ခီဖျိတၢ်မၤတဖၣ်အံၤခဲလၢာ်န့ၣ်, အဝဲမၤကဆှီထီၣ်ကွံာ်ကဒီးကီၢ်ယူဒၤဒီးဝ့ၢ်ယရူၤၡလ့ၣ်ဒ်တၢ် ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.

⁶အဝဲမၤတၢ်တမံၤဃီဒ်သိးအံၤလၢဝ့ၢ်တဖၣ်ဒီးတၢ်လီၢ်လၢတၢ်မၤဟး ဂီၤကွံာ်တ့ၢ်လံတဖၣ်လၢအအိၣ်လၢမနၤၡ့ၤ, အ့ဖရဲၣ်ဒီးစူၤမ့းအိၣ်အဒူၣ်အလီၢ်ကဝီၤပူၤဒီးလဲၤဝဲယံၤ တုၤလၢကလံၤစိးနးသၤလံအဒူၣ်အလီၢ်ကဝီၤပူၤန့ၣ်လီၤ.

⁷လၢကလံၤစိးဘီမုၢ်အလီၢ်ကဝီၤသကုၤဆးဒးန့ၣ်, အဝဲမၤလီၤကလဲကွံာ်တၢ်လုၢ်လီၢ်တဖၣ်ဒီးကစၢ်မုၣ်အၡ့ရၤ အတၢ်ပနီၣ်တဖၣ်, မၤလီၤကမူၣ်ကွံာ်တၢ်ဂီၤတၢ်ဖီၣ်တဖၣ်ဆူဖၣ်ဆါ, ဒီးမၤကၢ်ကွံာ်ကယဲၢ်တၢ်လုၢ်နၢမူအတၢ်လုၢ်လီၢ်တဖၣ်ဆူ တၢ်အက့က့အခီခီန့ၣ်လီၤ. ဝံၤဒီးအဝဲဟဲက့ၤကဒါက့ၤဆူ ဝ့ၢ်ယရူၤၡလ့ၣ်န့ၣ်လီၤ.

⁸လၢအဝဲပၢတၢ်တဆံဃိးနံၣ်တနံၣ်အပူၤ, ဖဲအဝဲမၤကဆှီထီၣ်ထံ ဧိၤကီၢ်ဧိၤဒီးယွၤအတၢ်လုၢ်ဟံၣ်ခီဖျိတၢ်မၤကတၢၢ်ကွံာ်ပှၤ တစူၢ်တနာ်ယွၤအတၢ်ဘူၣ်တၢ်ဘါဝံၤအလီၢ်ခံန့ၣ်, စီၤပၤယိၤၡံယၤမၢလီၤပှၤသၢဂၤလၢကဘှီဂ့ၤထီၣ်က့ၤယွၤ, ကစၢ်ယွၤအတၢ်လုၢ်ဟံၣ်န့ၣ်လီၤ. ပှၤတဖၣ်န့ၣ်မ့ၢ်ဝဲ, စီၤအစါလံယၤအဖိခွါစီၤၡၤဖၣ်, ဝ့ၢ်ယရူၤၡလ့ၣ်အပဒိၣ်ဖးဒိၣ်စီၤမၤစယၤ, ဒီးပဒိၣ်ဖးဒိၣ်တဂၤလၢအမ့ၢ်စီၤယဟိအါဃးအဖိခွါစီၤယိအၤ န့ၣ်လီၤ.

⁹စ့လၢပှၤလ့ၤဝံဖိလၢအပၢၤယွၤအတၢ်လုၢ်ဟံၣ်တဖၣ်ထၢဖှိၣ်ဝဲလၢ ယွၤအတၢ်လုၢ်ဟံၣ်အပူၤန့ၣ်, ဘၣ်တၢ်ဟ့ၣ်လီၤအီၤဆူပှၤ လုၢ်တၢ်အခိၣ်အဒိၣ်ကတၢၢ်စီၤဃံးလကံယၤအအိၣ်န့ၣ်လီၤ. (စ့န့ၣ်ဘၣ်တၢ်ထၢဖှိၣ်အီၤလၢအ့ဖရဲၣ်ဒီးမနၤၡ့ၤအဒူၣ်အပှၤ ဂီၢ်မုၢ်တဖၣ်ဒီးပှၤအိၣ်လီၤတဲာ်လၢကလံၤစိးဘီမုၢ်အအိၣ်, ဒီးလၢယူဒၤဒီးဘံၣ်ယၤမံၣ်အဒူၣ်ဒီးဝ့ၢ်ယရူၤၡလ့ၣ်အပှၤဂီၢ် မုၢ်အအိၣ်န့ၣ်လီၤ.)

¹⁰ဝံၤဒီးစ့အံၤဘၣ်တၢ်ဟ့ၣ်လီၤအီၤဆူပှၤအခိၣ်သၢဂၤလၢအကွၢ် ထွဲတၢ်ဘှီဂ့ၤက့ၤယွၤအတၢ်လုၢ်ဟံၣ်ဒီးအဝဲသ့ၣ်ဟ့ၣ်လီၤဝဲဆူ,

¹¹ပှၤမၤတၢ်စုသ့အတၢ်မၤတဖၣ်ဒီးပှၤသူၣ်ထီၣ်ဘှီထီၣ်တၢ်ဖိ တဖၣ်လၢကပှ့ၤလၢၢ်တဖၣ်ဒီးသ့ၣ်တဖၣ်လၢတၢ်ကသူ အီၤလၢတၢ်ဘှီက့ၤတၢ်သူၣ်ထီၣ်တဖၣ်လၢကီၢ်ယူဒၤ အစီၤပၤတဖၣ်ပာ်ဟးဂူာ်ဟးဂီၤတ့ၢ်ဝဲန့ၣ်လီၤ.

¹²ပှၤလၢအမၤတၢ်တဖၣ်မ့ၢ်ပှၤသူၣ်တီသးလိၤနီၢ်နီၢ်န့ၣ်လီၤ. အဝဲသ့ၣ်ဘၣ်တၢ်ကွၢ်ထွဲပၢဆှၢအီၤလၢပှၤလ့ၤဝံဖိလွံၢ်ဂၤလၢ အမ့ၢ်ဝဲစီၤယၤဃးဒီးစီၤဧိၤဘါဒယၤလၢပှၤမရၤရံအဒူၣ်ထၢ, ဒီးစီၤစကၤရယၤဒီးစီၤမၡူလၣ်လၢပှၤကဃးဖိအဒူၣ်ထၢန့ၣ်လီၤ. (ပှၤလ့ၤဝံဖိတဖၣ်န့ၣ်မ့ၢ်ပှၤသ့ပှၤဘၣ်လၢတၢ်ဒ့တၢ်အူ တကပၤန့ၣ်လီၤ.)

¹³ပှၤလ့ၤဝံဖိအဂၤတဖၣ်မ့ၢ်ပှၤအခိၣ်လၢတၢ်ဆှၢထီၣ်ဆှၢလီၤတၢ် ပီးတၢ်လီတဖၣ်, ဒီးတၢ်ကွၢ်ထွဲပၢဆှၢပှၤမၤတၢ်ဖိတဖၣ်လၢတၢ်မၤအကလုာ်ကလုာ် အဂီၢ်ဒီးတနီၤပၢၤဃးတၢ်ကွဲးနီၣ်ကွဲးဃါတဖၣ်ဒီးမၤတၢ်ဒ်ပှၤ ပၢၤတၢ်တဖၣ်အသိးန့ၣ်လီၤ.

¹⁴ဖဲစ့ဘၣ်တၢ်ထုးထီၣ်အီၤလၢတၢ်ပာ်ဖှိၣ်အဒၢးအခါန့ၣ်, စီၤဃံးလကံယၤထံၣ်န့ၢ်ဝဲလံာ်လၢအမ့ၢ်ယွၤအတၢ်သိၣ်တၢ်သီ လၢပှၤယူဒၤဖိအဂီၢ်ဒီးယူဒၤအတၢ်သိၣ်တၢ်သီလၢကစၢ်ယွၤဟ့ၣ် တ့ၢ်စီၤမိၤၡ့န့ၣ်လီၤ.

¹⁵အဝဲစံးဘၣ်စီၤၡၤဖၣ်, “ယထံၣ်န့ၢ်ယူဒၤအတၢ်သိၣ်တၢ်သီအလံာ်လၢယွၤ အတၢ်လုၢ်ဟံၣ်အပူၤန့ၣ်လီၤ.” အဝဲဟ့ၣ်ဃီၤစီၤၡၤဖၣ်လၢလံာ်န့ၣ်,

¹⁶ဒီးစီၤၡၤဖၣ်လဲၤစိာ်လံာ်န့ၣ်ဆူစီၤပၤအအိၣ်လီၤ. အဝဲပာ်ဖျါထီၣ်ဝဲ, “တၢ်လၢနမၤလိာ်တ့ၢ်ပှၤန့ၣ်, ပမၤအီၤဝံၤကိးမံၤလံ.

¹⁷ဒီးပထုးထီၣ်စ့လၢအဘၣ်တၢ်ပာ်အီၤလၢယွၤအတၢ်လုၢ်ဟံၣ် အပူၤဒီးဟ့ၣ်လီၤအီၤဆူပှၤမၤတၢ်ဖိတဖၣ်ဒီးပှၤကွၢ်ထွဲပၢဆှၢအဝဲသ့ၣ် တဖၣ်အအိၣ်န့ၣ်လီၤ.”

¹⁸ဒီးစံးအါထီၣ်ကဒီးဝဲ “အအံၤ, ယအိၣ်ဒီးလံာ်တဘ့ၣ်လၢစီၤဃံးလကံယၤဟ့ၣ်ယၤန့ၣ်လီၤ.” ဒီးအဝဲဖးထီၣ်န့ၢ်စီၤပၤ, လၢအကလုၢ်ဖးဒိၣ်န့ၣ်လီၤ.

¹⁹တုၤစီၤပၤနၢ်ဟူလံာ်န့ၣ်ဘၣ်တၢ်ဖးန့ၢ်အီၤဒီး, အဝဲဖှီယာ်အကူအသိးလၢတၢ်သူၣ်ပျံၤသးဖုးဒီးတၢ်ကမၢ ကမၣ်ဖးဒိၣ်အပူၤ,

²⁰ဒီးဟ့ၣ်လီၤအကလုၢ်ဒ်လၢလာ်အံၤဆူစီၤဃံးလကံယၤ, စီၤၡၤဖၣ်အဖိခွါစီၤအဃံကၣ်, စီၤမံၤကါအဖိခွါစီၤဧးဘဒိၣ်, ကွီၢ်ဘျီၣ်အပှၤကွဲးလံာ်ဒိၣ်စီၤၡၤဖၣ်, ဒီးစီၤပၤအပှၤကွၢ်ထွဲ မၤစၢၤအီၤစီၤဧစါယၤန့ၣ်လီၤ.

²¹“လဲၤဒီးသံကွၢ်တၢ်လၢယွၤ, လၢယဂီၢ်ဒီးလၢပှၤဂီၢ်မုၢ်လၢ အအိၣ်တ့ၢ်ဒံးဝဲလၢကီၢ်အံၣ်စရ့လးဒီးကီၢ်ယူဒၤအပူၤအဂီၢ် န့ၣ်တက့ၢ်. ဃုထံၣ်သ့ၣ်ညါလံာ်အံၤအတၢ်သိၣ်တၢ်သီတဖၣ် အဂ့ၢ်တက့ၢ်. ယွၤသးထီၣ်ပှၤ, မ့ၢ်လၢပမိၢ်ပၢ်ဖံဖုလၢပျၢၤတဖၣ်တစူၢ်ယွၤအကလုၢ်ဒီးတမၤ ဘၣ်တၢ်လၢလံာ်အံၤတဲဘၣ်အီၤလၢကဘၣ်မၤဝဲတဖၣ် အဃိန့ၣ်လီၤ.”

²²တုၤစီၤပၤဟ့ၣ်လီၤအကလုၢ်န့ၣ်, စီၤဃံးလကံယၤဒီးပှၤအဂၤတဖၣ် လဲၤဝဲဒ်သိးကသံကွၢ်သံဒိးတၢ်လၢပှၤပိာ်မုၣ်တဂၤလၢအမံၤမ့ၢ် ဝဲနီၢ်ဃူလဒါအအိၣ်န့ၣ်လီၤ. အဝဲမ့ၢ်ဝံမုၣ်တဂၤလၢအအိၣ်ဆိးဝဲလၢဝ့ၢ်ယရူၤၡလ့ၣ်အတၢ်လီၢ် အသီတတီၤန့ၣ်လီၤ (အဝဲအဝၤစီၤၡၣ်လူၣ်လၢအမ့ၢ်စီၤတံးကဝၤအဖိခွါဒီး စီၤယၤစရၤအလံၤခွါန့ၣ်မ့ၢ်ပှၤပၢၤယွၤအတၢ်လုၢ်ဟံၣ် အဆ့ကၤဖးထီတဖၣ်န့ၣ်လီၤ.) အဝဲသ့ၣ်ပာ်ဖျါန့ၢ်အီၤတၢ်လၢအမၤတ့ၢ်အသး,

²³ဒီးဝံမုၣ်န့ၣ်တဲဘၣ်အဝဲသ့ၣ်လၢကက့ၤကဒါက့ၤဆူစီၤပၤအအိၣ် ဒီးဟ့ၣ်အီၤ,

²⁴တၢ်ကစီၣ်ဟဲလၢယွၤအအိၣ်ဒ်လၢလာ်အံၤန့ၣ်လီၤ. “ယကစံၣ်ညီၣ်ဝ့ၢ်ယရူၤၡလ့ၣ်, ဒီးအပှၤဂီၢ်မုၢ်ခဲလၢာ်လၢတၢ် ဆိၣ်အၢတဖၣ်လၢအဘၣ်တၢ်ကွဲးလီၤအီၤလၢလံာ်လၢဘၣ်တၢ်ဖးန့ၢ်စီၤ ပၤအပူၤန့ၣ်လီၤ.

²⁵အဝဲသ့ၣ်ညိကွံာ်တ့ၢ်ယၤဒီးလုၢ်ထီၣ်ပာ်ထီၣ်တၢ်လုၢ်တၢ်ပာ်ဆူ ကစၢ်အဂၤတဖၣ်အအိၣ်, ဒီးလၢတၢ်န့ၣ်အဃိ, ထိၣ်ဂဲၤထီၣ်ယတၢ်သးဒိၣ်ထီၣ်ခီဖျိတၢ်လၢအဝဲသ့ၣ်မၤတ့ၢ်ဝဲ ခဲလၢာ်န့ၣ်လီၤ. ယတၢ်သးဒိၣ်ထီၣ်ထီဒါဝ့ၢ်ယရူၤၡလ့ၣ်လၢအဘၣ် တၢ်ထိၣ်ဂဲၤထီၣ်တ့ၢ်အီၤန့ၣ်, တလီၤပံာ်ကွံာ်ဝဲဘၣ်.

²⁶လၢစီၤပၤအနီၢ်ကစၢ်ဒၣ်ဝဲအဂီၢ်န့ၣ်, အအံၤမ့ၢ်တၢ်လၢယၤ, ယွၤအံၣ်စရ့လးအကစၢ်ယွၤစံးဝဲန့ၣ်လီၤ. နဒိကနၣ်တ့ၢ်တၢ်လၢအကွဲးအသးလၢလံာ်န့ၣ်အပူၤလံ.

²⁷ဒီးနပီၢ်ယၢ်လီၤက့ၤတ့ၢ်နသးဒီးဆီၣ်လီၤတ့ၢ်နသးလၢယမဲာ်ညါ, နဖှီနကူနသိးတဖၣ်ဒီးဟီၣ်တၢ်ယၢၤတၢ်ဖဲနနၢ်ဟူတ့ၢ်ယတၢ်မၤ ပျံၤမၤဖုးလၢယကစံၣ်ညီၣ်ဝ့ၢ်ယရူၤၡလ့ၣ်ဒီးအပှၤဂီၢ်မုၢ်ဒ်လဲၣ် န့ၣ်လီၤ. ယနၢ်ဟူတ့ၢ်လံနတၢ်ထုကဖၣ်,

²⁸ဒီးတၢ်စံၣ်ညီၣ်လၢယကဒုးလီၤဘၣ်အီၤလၢဝ့ၢ်ယရူၤၡလ့ၣ်အလိၤန့ၣ် ကဟဲတုၤဒၣ်လၢနသံဝံၤအလီၢ်ခံလီၤ. ယကပျဲနသံမုာ်မုာ်န့ၣ်လီၤ.” ပှၤတဖၣ်န့ၣ်က့ၤကဒါက့ၤဆူစီၤပၤယိၤၡံယၤအအိၣ်, အိၣ်ဒီးတၢ်ကစီၣ်အံၤလီၤ.

²⁹စီၤပၤယိၤၡံယၤကိးဖှိၣ်ကယဲၢ်ကီၢ်ယူဒၤဒီးဝ့ၢ်ယရူၤရှလ့ၣ် အခိၣ်အနၢ်ခဲလၢာ်,

³⁰ဒီးအဝဲသ့ၣ်လဲၤဃုာ်သကိးတပူၤဃီဆူယွၤအတၢ်လုၢ်ဟံၣ်, အိၣ်ဃုာ်ဝဲဒီးပှၤလုၢ်တၢ်အခိၣ်တဖၣ်, ပှၤလ့ၤဝံဖိတဖၣ်, ဒီးကယဲၢ်ပှၤဂီၢ်မုၢ်အဂၤခဲလၢာ်, ထူးတီၤမ့ၢ်ဂ့ၤဖှီၣ်ယာ်မ့ၢ် ဂ့ၤန့ၣ်လီၤ. လံာ်တၢ်အၢၣ်လီၤအီလီၤလၢအဘၣ်တၢ်ထံၣ်န့ၢ်အီၤလၢယွၤ အတၢ်လုၢ်ဟံၣ်အပူၤန့ၣ်စီၤပၤဖးထီၣ်အီၤလၢအကလုၢ်ဖးဒိၣ်, လၢအဝဲသ့ၣ်ခဲလၢာ်အမဲာ်ညါန့ၣ်လီၤ.

³¹အဝဲဂဲၤဆၢထၢၣ်လၢတၢ်လီၢ်ဖဲတၢ်ပာ်လီၤဆီအီၤလၢစီၤပၤအဂီၢ် န့ၣ်, ဒီးမၤတၢ်အၢၣ်လီၤအီလီၤတမံၤဒီးယွၤ, လၢကစူၢ်အီၤ, ကတိၢ်န့ၢ်ဖံးဃာ်အဝဲအတၢ်သိၣ်တၢ်သီတဖၣ်ဒီးအတၢ် မၤလိာ်တဖၣ်လၢအသူၣ်ကံၢ်သးလဲဒီးအသးဒီဖျၢၣ်ညါ, ဒီးမၤထွဲအဝဲအတၢ်အဲၣ်ဒိးလၢအဃ့ဝဲတဖၣ်လၢအအိၣ်စဲဃုာ်အသး ဒီးတၢ်အၢၣ်လီၤအီလီၤန့ၣ်, ဒ်တၢ်ကွဲးလီၤအီၤလၢလံာ်န့ၣ်အပူၤ, အသိးန့ၣ်လီၤ.

³²အဝဲမၢဘံၣ်ယၤမံၣ်အပှၤဂီၢ်မုၢ်ဒီးပှၤအဂၤလၢအအိၣ်လၢဝ့ၢ်ယရူၤ ရှလ့ၣ်အပူၤ အၢၣ်လီၤအသးလၢကတိၢ်န့ၢ် တၢ်အၢၣ်လီၤအီလီၤန့ၣ်လီၤ. ဒီးလၢတၢ်န့ၣ်အဃိ, ဝ့ၢ်ယရူၤရှလ့ၣ်အပှၤဂီၢ်မုၢ်စူၢ်တၢ်အၢၣ်လီၤ အီလီၤအတၢ်အဲၣ်ဒိးတဖၣ်လၢအဝဲသ့ၣ်မၤတ့ၢ်ဒီးအမိၢ်ပၢ်ဖံဖု လၢပျၢၤတဖၣ်အကစၢ်ယွၤန့ၣ်လီၤ.

³³စီၤပၤယိၤၡံယၤမၤဟးဂီၤကွံာ်, ကယဲၢ်တၢ်ဂီၤတၢ်ဖီၣ်လီၤ သးဘၣ်အၢတဖၣ်, လၢအအိၣ်လၢအံၣ်စရ့လးအပှၤဂီၢ်မုၢ် အလီၢ်ကဝီၤအပူၤ, ဒီးဖဲအဝဲအိၣ်မူဒံးဝဲအဖၢမုၢ်န့ၣ်, အဝဲမၢပှၤဂီၢ်မုၢ်လၢကမၤယွၤ, အမိၢ်ပၢ်ဖံဖုလၢပျၢၤတဖၣ်အကစၢ်ယွၤအတၢ်မၤန့ၣ်လီၤ.