Read S'gaw Karen လံာ်ကွဲးနီၣ်တၢ်ခံဘ့ၣ်တဘ့ၣ် 36 Bible Online

လံာ်ကွဲးနီၣ်တၢ်ခံဘ့ၣ်တဘ့ၣ် 36 - S'gaw Karen bible

လံာ်ကွဲးနီၣ်တၢ်ခံဘ့ၣ်တဘ့ၣ် 36

¹ကီၢ်ယူဒၤအပှၤဂီၢ်မုၢ်ဃုထၢစီၤယိၤၡံယၤအဖိခွါစီၤယဟိအါ ဃးဒီးဖှူအီၤလၢသိဒ်စီၤပၤလၢဝ့ၢ်ယရူၤရှလ့ၣ်အပူၤန့ၣ်လီၤ.

²ဖဲစီၤယဟိအါဃးကဲထီၣ်ကီၢ်ယူဒၤအစီၤပၤန့ၣ်အဝဲအသးအိၣ်ခံ ဆံသၢနံၣ်, ဒီးပၢတ့ၢ်တၢ်လၢဝ့ၢ်ယရူၤရှလ့ၣ်အပူၤသၢလါန့ၣ်လီၤ.

³ကီၢ်အဲၤကူပတူးအစီၤပၤနကိၤဖီၣ်အီၤဒ်ပှၤဘၣ်စၢဃာ်အသိးဒီး မၢကီၢ်ယူဒၤဟ့ၣ်စ့အကံကၢ်တယၤဒီးထူတကံကၢ်ဒ်တၢ်ခိ တၢ်သွဲအသိးန့ၣ်လီၤ.

⁴စီၤပၤနကိၤဒုးကဲထီၣ်စီၤယဟိအါဃးအဒီပုၢ်ဝဲၢ်ခွါစီၤအ့ လယါကံၣ်လၢကီၢ်ယူဒၤအစီၤပၤ, ဒီးလဲလိာ်ကွံာ်ဝဲအမံၤဆူစီၤယဟိ ယါကံၣ်န့ၣ်လီၤ. စီၤယဟိအါဃးဘၣ်တၢ်က့ၤကိးအီၤဆူ ကီၢ်အဲၤကူပတူးလၢစီၤပၤနကိၤန့ၣ်လီၤ.

⁵စီၤယဟိယါကံၣ်အသးအိၣ်ခံဆံယဲၢ်နံၣ်ဖဲအဝဲကဲထီၣ်ကီၢ်ယူဒၤ အစီၤပၤ, ဒီးအဝဲပၢတ့ၢ်တၢ်ဖဲဝ့ၢ်ယရူၤရှလ့ၣ်တဆံတနံၣ်န့ၣ်လီၤ. အဝဲမၤတၢ်ဒဲးဘးထီဒါယွၤအကစၢ်ယွၤန့ၣ်လီၤ.

⁶ကီၢ်ဘၤဘူၤလိၣ်အစီၤပၤနဘူးကးန့စၢ်ဟဲဒုးကီၢ်ယူဒၤဒီး ဖီၣ်န့ၢ်စီၤယဟိယါကံၣ်, ဒီးစၢဃးအီၤလၢထးသွဲဒီးက့ၤကိးအီၤဆူ ကီၢ်ဘၤဘူၤလိၣ်န့ၣ်လီၤ.

⁷စီၤနဘူၤကးန့စၢ်စိာ်ကွံာ်တၢ်ထူးတၢ်တီၤတနီၤလၢယွၤအတၢ်လုၢ် ဟံၣ်အပူၤဒီးက့ၤပာ်ဝဲလၢအဝဲအနီပူၤလၢအအိၣ်လၢကီၢ်ဘၤဘူၤ လိၣ်အပူၤန့ၣ်လီၤ.

⁸ကယဲၢ်တၢ်လၢစီၤယဟိယါကံၣ်မၤတ့ၢ်ဝဲ, ဃုာ်ဒီးအဝဲ အတၢ်မၤလၢအလီၤသးဘၣ်အၢတဖၣ်ဒီးတၢ်အၢတၢ်သီလၢအဝဲမၤတ့ၢ်ဝဲ န့ၣ်, ဘၣ်တၢ်ကွဲးနီၣ်ကွဲးဃါအီၤလၢကီၢ်အံၣ်စရ့လးဒီးကီၢ်ယူဒၤ အစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ. အဝဲအဖိခွါစီၤယဟိယါခံၣ်ကဲထီၣ်စီၤပၤလၢအလီၢ်န့ၣ်လီၤ.

⁹စီၤယဟိယါခံၣ်အသးအိၣ်ဝဲတဆံဃိးနံၣ်, ဖဲအဝဲကဲထီၣ်ကီၢ်ယူ ဒၤအစီၤပၤ, ဒီးအဝဲပၢတ့ၢ်တၢ်ဖဲဝ့ၢ်ယရူၤရှလ့ၣ်အပူၤသၢလါဒီးအသီတဆံ န့ၣ်လီၤ. အဝဲစ့ၢ်ကီးမၤတ့ၢ်တၢ်ဒဲးဘးထီဒါယွၤန့ၣ်လီၤ.

¹⁰ဖဲတၢ်မဲထီၣ်သီအကတီၢ်တုၤဝဲန့ၣ်, စီၤပၤနဘူၤကးန့စ့ၢ်က့ၤ ကိးစီၤပၤယဟါယါခံၣ်ဒ်ပှၤဘၣ်တၢ်စၢဃာ်တဂၤအသိးဆူကီၢ်ဘၤ ဘူၤလိၣ်ဒီးစိာ်ထီၣ်ကွံာ်ယွၤအတၢ်လုၢ်ဟံၣ်အတၢ်ထူးတၢ်တီၤတဖၣ် န့ၣ်လီၤ. အန့ၣ်ဒီး, စီၤပၤနဘူၤကးန့စၢ်ဒုးကဲထီၣ်စီၤယဟိယါခံၣ်အဖါ တံၢ်စီၤစံးဒကံယၤလၢကီၢ်ယူဒၤဒီးဝ့ၢ်ယရူၤရှလ့ၣ်အစီၤပၤန့ၣ်လီၤ.

¹¹စီၤစံးဒကံယၤအသးအိၣ်ခံဆံတနံၣ်ဖဲအဝဲကဲထီၣ်ကီၢ်ယူဒၤ အစီၤပၤဒီးအဝဲပၢတ့ၢ်တၢ်ဖဲဝ့ၢ်ယရူၤရှလ့ၣ်တဆံတနံၣ်န့ၣ်လီၤ.

¹²အဝဲမၤတ့ၢ်တၢ်ဒဲးဘးထီဒါယွၤဒီးတဒိကနၣ်ယွၤအတၢ်ကတိၤလၢ ဝံယံးရမံယၤကတိၤဝဲန့ၣ်, လၢတၢ်ဆီၣ်လီၤသးအပူၤဘၣ်.

¹³စီၤပၤစံးဒကံယၤပူထီၣ်ထီဒါစီၤပၤနဘူၤကးန့စၢ်, လၢအမၢဆူၣ်အီၤဒ်သိးအကဆိၣ်လီၤအသးလၢကစၢ်ယွၤအမံၤအပူၤ, လၢအဝဲကဘၣ်အိၣ်ဒီးတၢ်သူၣ်တီသးရၤန့ၣ်လီၤ. အဝဲဂ့ၢ်လိာ်ဝဲဆူၣ်ဆူၣ်ကလဲာ်လၢကပီၢ်ယၢ်လီၤက့ၤအသးဒီးဃၣ် က့ၤအသးဆူယွၤ, အံၣ်စရ့လးအကစၢ်ယွၤအအိၣ်န့ၣ်လီၤ.

¹⁴အါန့ၢ်အန့ၣ်ကီၢ်ယူဒၤအခိၣ်အနၢ်တဖၣ်, ပှၤလုၢ်တၢ်အခိၣ်တဖၣ်ဒီး ပှၤဂီၢ်မုၢ်, ပိာ်ထွဲပှၤကလုာ်လၢအအိၣ်ဝးတရံးအဝဲသ့ၣ်အတၢ်မၤဒဲးဘးအဒိ အတဲာ်တဖၣ်အခံ, ခီဖျိတၢ်ဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်, ဒီးလၢတၢ်န့ၣ်အဃိအဝဲသ့ၣ်မၤဘၣ်အၢယွၤအတၢ်လုၢ်ဟံၣ်လၢယွၤ အနီၢ်ကစၢ်ဒၣ်ဝဲပာ်ကဆှီတ့ၢ်ဝဲန့ၣ်လီၤ.

¹⁵ယွၤ, အဝဲသ့ၣ်အမိၢ်ပၢ်ဖံဖုလၢပျၢၤတဖၣ်အကစၢ်ယွၤ, ဆှၢလီၤတ့ၢ်ဝံသ့ၣ်တဖၣ်တထံၣ်ဃီလၢကဟ့ၣ်ပလီၢ်အပှၤဂီၢ်မုၢ်, မ့ၢ်လၢအဝဲအသးအိၣ်ဒုးပူၤဖျဲးအဝဲသ့ၣ်မ့ၢ်ဂ့ၤ, ယွၤအတၢ်လုၢ်ဟံၣ်မ့ၢ်ဂ့ၤအဃိန့ၣ်လီၤ.

¹⁶ဘၣ်ဆၣ်အဝဲသ့ၣ်မၤကလိာ်ကလာ်ကစၢ်ယွၤအပှၤစိာ်တၢ်ကစီၣ်တဖၣ်, တပာ်လ့ၣ်ပာ်ကါအဝဲသ့ၣ်အတၢ်ကတိၤတဖၣ်ဒီးနံၤဘၣ်ကစၢ်ယွၤအဝံတ ဖၣ်, တုၤလၢလၢခံကတၢၢ်ယွၤအတၢ်သးထီၣ်ထီဒါအပှၤဂီၢ်မုၢ်န့ၣ်ဒိၣ် ဝဲတုၤဒၣ်လဲာ်တၢ်ထူၣ်ဖျဲးတအိၣ်ဝဲလၢၤဘၣ်.

¹⁷လၢတၢ်န့ၣ်အဃိယွၤဒုးဟဲတ့ၢ်ကီၢ်ဘၤဘူၤလိၣ်အစီၤပၤလၢကဒုး အဝဲသ့ၣ်အဂီၢ်န့ၣ်လီၤ. စီၤပၤမၤသံကွံာ်ကီၢ်ယူဒၤအပှၤသးစၢ်တဖၣ်လၢယွၤအတၢ်လုၢ်ဟံၣ် အပူၤဒၣ်လဲာ်န့ၣ်လီၤ. အဝဲတသးကညီဘၣ်ပှၤနီတဂၤ, ပှၤသးစၢ်မ့ၢ်ဂ့ၤ, ပှၤသးပှၢ်မ့ၢ်ဂ့ၤ, ပှၤပိာ်ခွါမ့ၢ်ဂ့ၤ, ပှၤပိာ်မုၣ်မ့ၢ်ဂ့ၤ, ပှၤဆူးပှၤဆါမ့ၢ်ဂ့ၤ, ပှၤအိၣ်ဆူၣ်အိၣ်ချ့မ့ၢ်ဂ့ၤန့ၣ်ဘၣ်. ကစၢ်ယွၤဟ့ၣ်လီၤကွံာ်အဝဲသ့ၣ်ခဲလၢာ်ဆူကီၢ်ဘၤဘူၤလိၣ်အစီၤ ပၤအစုပူၤန့ၣ်လီၤ.

¹⁸ကီၢ်ဘၤဘူၤလိၣ်အစီၤပၤဂုာ်န့ၢ်ကွံာ်ယွၤအတၢ်လုၢ်ဟံၣ်အဃၢၤ အဃိၢ်တဖၣ်, တၢ်လုၢ်ဟံၣ်အကျိၣ်ဧိၤစ့ဧိၤ, ဒီးစီၤပၤဒီးပဒိၣ်ပပှၢ်တဖၣ်အတၢ် ထူးတၢ်တီၤ, ဒီးက့ၤစိာ်ကယဲၢ်တၢ်ခဲလၢာ်န့ၣ်, ဆူကီၢ်ဘၤဘူၤလိၣ်လီၤ.

¹⁹အဝဲဒွဲၣ်အူထီၣ်ကွံာ်ယွၤအတၢ်လုၢ်ဟံၣ်, ဒီးဝ့ၢ်, ဃုာ်ဒီးအနီတဖၣ်ဒီးတၢ်ထူးတၢ်တီၤတဖၣ်ဒီးမၤလီၤပှီၢ်ကွံာ် ဝ့ၢ်ခိၣ်ဒူန့ၣ်လီၤ.

²⁰အဝဲက့ၤကိးကယဲၢ်ပှၤလၢအအိၣ်မူလီၤတဲာ်ဒံးတဖၣ်ဆူကီၢ်ဘၤဘူၤ လိၣ်, တၢ်လီၢ်ဖဲအဝဲသ့ၣ်မၤကီၢ်ဘၤဘူၤလိၣ်အစီၤပၤဒီးအဝဲ အစၢၤအသွဲၣ်တဖၣ်အတၢ်ဒ်ကုၢ်တဖၣ်အသိး, တုၤပၤရၣ်အဘီအမုၢ်ဟဲအိၣ်ထီၣ်ဝဲတစုန့ၣ်လီၤ.

²¹ဒီးလၢတၢ်န့ၣ်အဃိတၢ်လၢယွၤတဲဆိတ့ၢ်ဝဲခီဖျိဝံယံးရမံ ယၤန့ၣ်လၢထီၣ်ပှဲၤထီၣ်ဝဲလီၤ. စံးဝဲ, “ထံကီၢ်ကအိၣ်သယုၢ်လၢအနံၣ်နွံဆံအတီၢ်ပူၤ, ဒ်သိးကမၤပှဲၤက့ၤတၢ်အိၣ်ဘှံးအနံၣ်လၢတၢ်တတိၢ်န့ၢ်မၤထွဲတ့ၢ် အီၤဘၣ်န့ၣ်လီၤ.”

²²ဖဲကီၢ်ပၤရၣ်အစီၤပၤကိရ့ၣ်ပၢတၢ်အခီၣ်ထံးတနံၣ်အပူၤန့ၣ်, ယွၤမၤလၢထီၣ်ပှဲၤထီၣ်တၢ်လၢအစံးဘၣ်တ့ၢ်ဝဲခီဖျိဝံယံးရမံ ယၤန့ၣ်လီၤ. အဝဲထိၣ်ဟူးထိၣ်ဂဲၤစီၤကိရ့ၣ်အသးလၢကထုးထီၣ်ရၤလီၤတၢ်မၤ လိာ်လၢလာ်အံၤဒီးဆှၢလီၤအီၤခီဖျိတၢ်ကွဲးဒ်သိးကဘၣ်တၢ်ဖး သီၣ်ထီၣ်အီၤဒိၣ်ဒိၣ်လၢတၢ်လီၢ်တပူၤလၢ်လၢ်, လၢအဝဲအဘီအမုၢ်အပူၤအဂီၢ်န့ၣ်လီၤ.

²³“တၢ်အံၤမ့ၢ်ကီၢ်ပၤရၣ်အစီၤပၤဖးဒိၣ်ကိရ့ၣ်အတၢ်မၤလိာ်န့ၣ် လီၤ. ယွၤ, မူခိၣ်အကစၢ်ယွၤဒုးကဲထီၣ်တ့ၢ်ယၤလၢပှၤပၢဘၣ်တၢ်လၢဟီၣ် ခိၣ်ဒီဘ့ၣ်ညါအဖီခိၣ်ဒီးဟ့ၣ်လီၤတ့ၢ်ယၤမူဒါလၢယကဘှီထီၣ်တၢ်လုၢ် ဟံၣ်တဖျၢၣ်လၢအဂီၢ်လၢကီၢ်ယူဒၤ, ဝ့ၢ်ယရူၤရှလ့ၣ်အပူၤန့ၣ်လီၤ. ခဲအံၤ, ကယဲၢ်သုဝဲခဲလၢာ်လၢအမ့ၢ်ကစၢ်ယွၤအပှၤဂီၢ်မုၢ်တဖၣ်, လဲၤသုဝဲဖဲန့ၣ်ဒီးမ်ယွၤသုကစၢ်ယွၤအိၣ်ဒီးသုတက့ၢ်.”