Read S'gaw Karen လံာ်စီၤဧ့စြၤ 4 Bible Online

လံာ်စီၤဧ့စြၤ 4 - S'gaw Karen bible

လံာ်စီၤဧ့စြၤ 4

¹ယူဒၤဒီးဘံၣ်ယၤမံၣ်အပှၤဂီၢ်မုၢ်အဒုၣ်အဒါတဖၣ်နၢ်ဟူဝဲလၢပှၤ လၢအဟဲက့ၤကဒါက့ၤလၢတၢ်စိာ်မၢကဲကုၢ်တဖၣ်သူၣ်ထီၣ်ကဒါက့ၤ ယွၤ, ပှၤအံၣ်စရ့လးဖိအကစၢ်ယွၤအတၢ်လုၢ်ဟံၣ်န့ၣ်လီၤ.

²လၢတၢ်န့ၣ်အဃိအဝဲသ့ၣ်လဲၤထံၣ်စီၤစရူၤဘၤဘ့လးဒီးဒူၣ်ထၢ အခိၣ်တဖၣ်ဒီးစံးဝဲ, “ပျဲပပာ်ဖှိၣ်ဃုာ်ပသးဒီးသုလၢတၢ်သူၣ်ထီၣ်တၢ်လုၢ်ဟံၣ်န့ၣ်တ က့ၢ်. ပဘူၣ်ထီၣ်ဘါထီၣ်ကစၢ်ယွၤတဂၤဃီ လၢသုဘူၣ်ထီၣ်ဘါထီၣ်အီၤ, ဒီးပလုၢ်ထီၣ်တ့ၢ်လံတၢ်လုၢ်တၢ်ပာ် တဖၣ်ဆူအီၤစးထီၣ်တ့ၢ်လံလၢကီၢ်အၤၡူၢ်အစီၤပၤဖးဒိၣ်စီၤ အ့ၤစၢ်ဃးဒိၣ်ဆှၢလီၤပှၤလၢပကအိၣ်ကဆိးဖဲအံၤလံၤလံၤန့ၣ် လီၤ.”

³စီၤစရူၤဘၤဘ့လး, စီၤယိၤၡူဒီးဒူၣ်ထၢအခိၣ်တဖၣ်တဲဘၣ်အဝဲ သ့ၣ်, “ပတလိၣ်ဘၣ်သုတၢ်မၤစၢၤလၢတၢ်ဘှီထီၣ်တၢ်လုၢ်ဟံၣ်တ ဖျၢၣ်လၢယွၤ, ပကစၢ်ယွၤအဂီၢ်ဘၣ်. ပကဘှီထီၣ်ဒၣ်ပတၢ်ဒၣ်ဝဲဒ်ကီၢ်ပၤရၣ်အစီၤပၤစီၤကိရ့ၣ်မၤလိာ် တ့ၢ်ပှၤအသိးန့ၣ်လီၤ.”

⁴တုၤနုၤတစုပှၤဂီၢ်မုၢ်လၢအအိၣ်တ့ၢ်လံလၢထံကီၢ်ပူၤတဖၣ်ကျဲး စၢးမၤသးဟးဂီၤဒီးမၤပျံၤမၤဖုးပှၤယူဒၤဖိတဖၣ်ဒီးမၤ တံာ်တာ်အဝဲသ့ၣ်လၢကဘှီထီၣ်တၢ်လုၢ်ဟံၣ်အဂီၢ်န့ၣ်လီၤ.

⁵အဝဲသ့ၣ်ဟ့ၣ်ခိၣ်ဖးလာ်ဆှိးဆူကီၢ်ပၤရၣ်အပဒိၣ်ပပှၢ်တဖၣ်အအိၣ်ဒ် သိးကမၤတၢ်ထီဒါပှၤယူဒၤဖိန့ၣ်လီၤ. အဝဲသ့ၣ်မၤတၢ်အံၤတပယူာ်ဃီစးထီၣ်လၢစီၤပၤဖးဒိၣ်ကိရ့ၣ် အစိၤဒီးတုၤလီၤလၢစီၤပၤဖးဒိၣ်ဒၤရယါဝ့ၣ်အစိၤန့ၣ်လီၤ.

⁶ဖဲစီၤပၤဖးဒိၣ်အဃၤၡဝ့ရိၣ်စးထီၣ်ပၢတၢ်န့ၣ်ပှၤဂီၢ်မုၢ်လၢ အအိၣ်ဆိးလၢကီၢ်ယူဒၤဒီးဝ့ၢ်ယရူၤၡလ့ၣ်အပူၤအဒုၣ်အဒါတဖၣ်ဟဲ စိာ်လံာ်လၢတၢ်ကွဲးပာ်တၢ်ကမၣ်ထီဒါပှၤယူဒၤဖိတဖၣ်န့ၣ်လီၤ.

⁷မၤကဒီးလၢကီၢ်ပၤရၣ်အစီၤပၤဖးဒိၣ်စီၤအၢ်တၤၡါၡတၤအစိၤ န့ၣ်, စီၤဘံးၡလၣ်, စီၤမံးသြၤဒး, စီၤတၤဘ့လးဒီးပှၤမၤသဃဲၤတၢ် ဒီးအဝဲသ့ၣ်တဖၣ်ကွဲးလံာ်ပရၢတဘ့ၣ်ဆူစီၤပၤဖးဒိၣ်အအိၣ်န့ၣ် လီၤ. လံာ်ပရၢအံၤဘၣ်တၢ်ကွဲးအီၤလၢပှၤအရၣ်ဖိအကျိာ်ဒီးကဘၣ်တၢ်တဲ ကျိာ်ထံက့ၤအီၤဖဲတၢ်ဖးအီၤန့ၣ်လီၤ.

⁸ဒ်န့ၣ်အသိးပဒိၣ်ဖးဒိၣ်စီၤရဃူၣ်ဒီးစီၤၡံးမၡဲလၢအမ့ၢ်ကီၢ်အပှၤကွဲးလံာ်, ကွဲးလံာ်ဒ်လာ်အံၤဆူစီၤပၤဖးဒိၣ်အၢ်တၤၡါၡဘၤအအိၣ်ဘၣ်ထွဲ ဒီးဝ့ၢ်ယရူၤၡလ့ၣ်န့ၣ်လီၤ.

⁹“လၢပဒိၣ်ဖးဒိၣ်စီၤရဃူၣ်, ကီၢ်အပှၤကွဲးလံာ်စီၤၡံးမၡဲ, ပှၤမၤသဃဲၤတၢ်သ့ၣ်တဖၣ်, စံၣ်ညီၣ်ကွီၢ်သ့ၣ်တဖၣ်, ဒီးကယဲၢ်ပဒိၣ်ပပှၢ်အဂၤတဖၣ်လၢအိၣ်ပာ်တ့ၢ်လၢဝ့ၢ်အ့ရ့း, ဝ့ၢ်ဘၤဘူၤလိၣ်ဒီးဝ့ၢ်ၡူၡၣ်လၢကီၢ်ဧ့ၤလၣ်အပူၤလၢပျၢၤလံၤ လံၤ,

¹⁰ဃုာ်ဒီးပှၤဂီၢ်မုၢ်အဂၤတဖၣ်လၢပှၤဒိၣ်စိဒိၣ်ကမီၤစီၤအၤစနး ပၢ်သုးကွံာ်အဟံၣ်တဖၣ်ဒီးဆီလီၤန့ၢ်အဝဲသ့ၣ်လၢဝ့ၢ်ၡၤမရံ ဒီးတၢ်လီၢ်သကုၤဆးဒးလၢကီၢ်ဖရၤသးအမုၢ်နုာ်တဖၣ်.”

¹¹ဒီးအအံၤမ့ၢ်ဝဲလံာ်ပရၢအတၢ်ကတိၤန့ၣ်လီၤ. “ဆူစီၤပၤဖးဒိၣ်အၢ်တၤၡါၡတၤ, လၢနခ့နပှၤတဖၣ်, ပှၤတဖၣ်လၢဖရၤသးအမုၢ်နုာ်.

¹²ပဆၢလၢပကစၢ်, စီၤပၤဖးဒိၣ်ကသ့ၣ်ညါဘၣ်လၢပှၤယူဒၤဖိ တဖၣ်လၢအဟဲဖဲအံၤလၢနတၢ်ပၢအလီၢ်ကဝီၤအဂၤတဖၣ်န့ၣ်ဟဲဆီလီၤ တ့ၢ်အသးလၢဝ့ၢ်ယရူၤၡလ့ၣ်အပူၤဒီးသူၣ်ထီၣ်ဘှီထီၣ်ကဒါက့ၤ ဝ့ၢ်လၢအအၢအသီဒီးပူထီၣ်လီထီၣ်တ့ၢ်တၢ်န့ၣ်လီၤ. အဝဲသ့ၣ်စးထီၣ်သူၣ်ထီၣ်တၢ်အခိၣ်ဒူတဖၣ်ဒီးတယံာ်ဘၣ်ကမၤဝံၤဝဲ ဒၣ်န့ၣ်လီၤ.

¹³ကစၢ်စီၤပၤဖးဒိၣ်ဧၢ, ဝ့ၢ်အံၤမ့ၢ်ဘၣ်တၢ်သူၣ်ထီၣ်ကဒါက့ၤအီၤ, ဒီးအခိၣ်ဒူတဖၣ်မ့ၢ်ဝံၤန့ၣ်, ပှၤဂီၢ်မုၢ်ကဆိကတီၢ်ဟ့ၣ်တၢ်ခိ တၢ်သွဲတဖၣ်, ဒီးတၢ်ခိတၢ်သွဲတဖၣ်လၢအဘၣ်ဃးဒီးစီၤပၤကစှၤလီၤဝဲန့ၣ် လီၤ.

¹⁴ခဲကနံၣ်အံၤဒ်ပမ့ၢ်ပှၤလၢအဘၣ်မၤဆၢက့ၤတၢ်လၢပဂ့ၤမၤဆူ စီၤပၤဖးဒိၣ်အအိၣ်အသိး, ပတအဲၣ်ဒိးထံၣ်တၢ်အံၤမၤအသးဘၣ်အ ဃိ, ပဟ့ၣ်ကူၣ်လၢ,

¹⁵နကဟ့ၣ်လီၤနကလုၢ်လၢပှၤကဃုထံၣ်န့ၢ်က့ၤတၢ်ကွဲးနီၣ်တဖၣ်လၢ နမိၢ်ပၢ်ဖံဖုလၢပျၢၤတဖၣ်ပာ်ကီၤတ့ၢ်အီၤန့ၣ်လီၤ. နမ့ၢ်မၤဒီးနကထံၣ်ဘၣ်လၢဝ့ၢ်အံၤထီဘိပူထီၣ်လီထီၣ်တၢ်ဒီး စးထီၣ်လၢပျၢၤလၢသီလံၤလံၤန့ၣ်, ဟ့ၣ်တ့ၢ်လံတၢ်ကီတၢ်ခဲဆူ စီၤပၤတဖၣ်ဒီးကီၢ်အပှၤပၢတၢ်တဖၣ်န့ၣ်လီၤ. ဝ့ၢ်အံၤအပှၤဂီၢ်မုၢ်မ့ၢ်ပှၤတဖၣ်လၢထီဘိတၢ်ပၢအီၤကီဒိၣ်မး လီၤ. လၢတၢ်န့ၣ်အဃိ, ဝ့ၢ်အံၤဘၣ်တၢ်မၤဟးဂီၤကွံာ်တ့ၢ်အီၤန့ၣ် လီၤ.

¹⁶လၢတၢ်န့ၣ်အဃိနာ်နီၢ်နီၢ်လၢဝ့ၢ်အံၤမ့ၢ်ဘၣ်တၢ်သူၣ်ထီၣ်ကဒါ က့ၤအီၤ, ဒီးဝ့ၢ်အခိၣ်ဒူတဖၣ်မ့ၢ်ဘၣ်တၢ်မၤဝံၤအီၤန့ၣ်, တမ့ၢ်ကစၢ်စီၤပၤဖးဒိၣ်ပၢဘၣ်ကီၢ်ဖရၤသးအမုၢ်နုာ်ကသ့ လၢၤဘၣ်.”

¹⁷စီၤပၤဖးဒိၣ်ဆှၢလီၤကဒါက့ၤတၢ်စံးဆၢအံၤလီၤ. “ယဆှၢလီၤယတၢ်ဆၢဂ့ၤဆၢဝါဆူပဒိၣ်ဖးဒိၣ်စီၤရဃူၣ်, ကီၢ်အပှၤကွဲးလံာ်စီၤၡံးမၡဲ, ဒီးအပှၤမၤသဃဲၤတၢ်တဖၣ်လၢ အအိၣ်လၢကီၢ်ၡၤမရံဒီးတၢ်လီၢ်အိၣ်လီၤတဲာ်လၢကီၢ်ဖရၤသးအမုၢ် နုာ်န့ၣ်လီၤ.

¹⁸လံာ်ပရၢလၢသုဆှၢလီၤန့ၣ်ဘၣ်တၢ်ကျိာ်ထံက့ၤအီၤဒီးဖးန့ၢ် ယၤလီၤ.

¹⁹ယဟ့ၣ်လီၤယကလုၢ်လၢတၢ်ကဃုသ့ၣ်ညါတၢ်အဂီၢ်, ဒီးတၢ်ထံၣ်န့ၢ်ဝဲနီၢ်နီၢ်လၢစးထီၣ်လၢပျၢၤလံၤလံၤန့ၣ်, ဝ့ၢ်ယရူၤၡလ့ၣ်ပူထီၣ်ထီဒါတ့ၢ်စီၤပၤအစိကမီၤ, ဒီးဝ့ၢ်န့ၣ်ပှဲၤဝဲဒီးပှၤပူထီၣ်လီထီၣ်တၢ်တဖၣ်ဒီးပှၤဒုး အိၣ်ထီၣ်တၢ်ကီတၢ်ခဲတဖၣ်န့ၣ်လီၤ.

²⁰စီၤပၤလၢအအိၣ်ဒီးတၢ်စိတၢ်ကမီၤတဖၣ်ပၢတ့ၢ်တၢ်ဖဲန့ၣ်, ဒီးပၢဘၣ်တၢ်လၢကီၢ်ဖရၤသးအမုၢ်နုာ်ဒီးထၢဖှိၣ်ဝဲတၢ်ခိ တၢ်သွဲတဖၣ်, လၢထံလီၢ်ကီၢ်ပူၤဒီးလၢတၢ်ဖိတၢ်လံၤလၢအဟဲလၢ ထံဂၤကီၢ်ဂၤတဖၣ်အဖီခိၣ်န့ၣ်လီၤ.

²¹လၢတၢ်န့ၣ်အဃိသုကဘၣ်ထုးထီၣ်ရၤလီၤတၢ်ကလုၢ်လၢပှၤသ့ၣ်တဖၣ် န့ၣ်ကဘၣ်ဆိကတီၢ်ကွံာ်တၢ်သူၣ်ထီၣ်ကဒါက့ၤဝ့ၢ်ယရူၤၡလ့ၣ်လီၤ. ဒီးတချုးဒံးဘၣ်လၢယဟ့ၣ်လီၤယကလုၢ်ဆူညါန့ၣ်, ဝ့ၢ်အံၤမ်တၢ်သုတသူၣ်ထီၣ်ကဒါက့ၤအီၤတဂ့ၤ.

²²မၤတၢ်အံၤတဘျီဃီဒ်သိးတၢ်ဘၣ်ဃးဒီးယၤတဖၣ်သုတဘၣ်ဒိ ဘၣ်ထံးအါထီၣ်တဂ့ၤန့ၣ်တက့ၢ်.”

²³တစုဃီဖဲလံာ်ပရၢလၢစီၤပၤဖးဒိၣ်အၢ်တၤၡါၡတၤအအိၣ်ဘၣ်တၢ် ဖးန့ၢ်စီၤရဃူၣ်, စီၤၡံးမၡဲ, ဒီးအဝဲသ့ၣ်အပှၤမၤသဃဲၤတၢ်တဖၣ်န့ၣ်, အဝဲသ့ၣ်လဲၤချ့သဒံးဆူဝ့ၢ်ယရူၤၡလ့ၣ်ဒီးမၢဆူၣ်ပှၤယူဒၤဖိ တဖၣ်လၢကဆိကတီၢ်တၢ်သူၣ်ထီၣ်ဘှီထီၣ်ကဒါက့ၤဝ့ၢ်န့ၣ်လီၤ.

²⁴တၢ်ဖံးတၢ်မၤလၢတၢ်လုၢ်ဟံၣ်အဂီၢ်ဘၣ်တၢ်ဆိကတီၢ်ကွံာ်အီၤဒီး ဘၣ်တၢ်ပာ်ဒၣ်အီၤဒ်န့ၣ်တုၤလီၤလၢကီၢ်ပၤရၣ်အစီၤပၤဖးဒိၣ်စီၤ ဒၤရယါဝ့ၣ်ကဲစီၤပၤခံနံၣ်တနံၣ်န့ၣ်လီၤ.