Read S'gaw Karen လံာ်စီၤဧ့စြၤ 6 Bible Online

လံာ်စီၤဧ့စြၤ 6 - S'gaw Karen bible

လံာ်စီၤဧ့စြၤ 6

¹လၢတၢ်န့ၣ်အဃိစီၤပၤဖးဒိၣ်ဒၤရယါဝ့ၣ်ဟ့ၣ်လီၤအကလုၢ်လၢတၢ် ကဃုထံၣ်န့ၢ်တၢ်လၢစီၤပၤအတၢ်ကွဲးနီၣ်တဖၣ်အပူၤလၢအဘၣ် တၢ်ပာ်အီၤလၢကီၢ်ဘၤဘူၤလိၣ်န့ၣ်လီၤ.

²ဘၣ်ဆၣ်ဒီးလံာ်ထူတထူလၢအဘၣ်ထွဲဒီးတၢ်ဂ့ၢ်န့ၣ်, ဘၣ်တၢ်ထံၣ်န့ၢ်အီၤလၢဝ့ၢ်အၤဃမသါလၢကီၢ်မၤဒဲအပူၤတခီ, အိၣ်ဒီးအတၢ်ကွဲးနီၣ်ဒ်လာ်အံၤလီၤ.

³“ဖဲစီၤပၤဖးဒိၣ်ကိရ့ၣ်ပၢတၢ်အခီၣ်ထံးတနံၣ်န့ၣ်အဝဲမၤလိာ် တ့ၢ်ဝဲလၢဝ့ၢ်ယရူၤၡလ့ၣ်အတၢ်လုၢ်ဟံၣ်ကဘၣ်တၢ်သူၣ်ထီၣ်ကဒါက့ၤ အီၤဒ်တၢ်လီၢ်တတီၤဖဲတၢ်လုၢ်တၢ်ပာ်တဖၣ်ဘၣ်တၢ်မၤအီၤ, ဒီးတၢ်မၤဘူၣ်တဖၣ်ဘၣ်တၢ်ဆိၣ်ကဲၤအီၤန့ၣ်လီၤ. တၢ်လုၢ်ဟံၣ်န့ၣ်ကဘၣ်ထီအပျၢ်ဃုဆံဒီးကဘၣ်လဲၢ်အပျၢ်ဃုဆံ န့ၣ်လီၤ.

⁴တၢ်ဒူၣ်တဖၣ်ကဘၣ်တၢ်ဘှီထီၣ်အီၤအိၣ်ဒီးလၢၢ်သၢဂ့ၢ်အဖီခိၣ်သ့ၣ် တဂ့ၢ်တဆီဘၣ်တဆီန့ၣ်လီၤ. ကယဲၢ်တၢ်လၢာ်ဘူၣ်လၢာ်စ့ၤခဲလၢာ်ကဘၣ်တၢ်ထုးထီၣ်အီၤလၢစီၤပၤ အစ့ပာ်ဖှိၣ်အလီၢ်န့ၣ်လီၤ.

⁵ဒ်န့ၣ်အသိး, တၢ်အဃၢၤအဃိၢ်ထူဒီးစ့လၢစီၤပၤနဘူၤကးန့စၢ် ဟဲက့ၤစိာ်ဆူကီၢ်ဘၤဘူၤလိၣ်လၢဝ့ၢ်ယရူၤၡလ့ၣ်အတၢ်လုၢ်ဟံၣ် ပူၤတဖၣ်န့ၣ်မ်တၢ်ကဆှၢကဒါက့ၤဆူအလီၢ်ဘၣ်ကျဲဘၣ်လၢဝ့ၢ်ယရူၤ ၡလ့ၣ်အတၢ်လုၢ်ဟံၣ်ပူၤန့ၣ်တက့ၢ်.”

⁶တုၤနုၤတစုစီၤပၤဖးဒိၣ်ဒၤရယါဝ့ၣ်ဆှၢလီၤတၢ်စံးဆၢဒ်လာ် အံၤအသိးန့ၣ်လီၤ. “ဆူကီၢ်ဖရၤသးအမုၢ်နုာ်အပဒိၣ်ဖးဒိၣ်စီၤတးနဲ, စီၤၡသၢ်ဘိစနဲၤဒီးပဒိၣ်ပပှၢ်ကဒဲကဒဲလၢကီၢ်ဖရၤသးအမုၢ်နုာ် တဖၣ်,

⁷အိၣ်ယံၤဒီးတၢ်လုၢ်ဟံၣ်ဒီးမၤတံာ်တာ်တၢ်သူၣ်ထီၣ်ဘှီထီၣ်အီၤ န့ၣ်တဂ့ၤ. မ်ကီၢ်ယူဒၤအပဒိၣ်ဖးဒိၣ်ဒီးပှၤယူဒၤဖိအခိၣ်အနၢ်တဖၣ်သူၣ် ထီၣ်ကဒါက့ၤကစၢ်ယွၤအတၢ်လုၢ်ဟံၣ်ဖဲအိၣ်ပာ်စၢၤလၢညါအလီၢ်န့ၣ် တက့ၢ်.

⁸အအံၤမ့ၢ်ယတၢ်မၤလိာ်လၢသုကဘၣ်မၤစၢၤအဝဲသ့ၣ်လၢအတၢ်သူၣ်ထီၣ် ကဒါက့ၤတၢ်လုၢ်ဟံၣ်န့ၣ်လီၤ. အဝဲသ့ၣ်အတၢ်လၢာ်တဖၣ်ကဘၣ်တၢ်ဟ့ၣ်အီၤဘၣ်ဆၢဘၣ်ကတီၢ်လၢစီၤပၤ အကျိၣ်အစ့လၢအမၤန့ၢ်ဝဲလၢတၢ်ခိတၢ်သွဲ လၢကီၢ်ဖရၤသးအမုၢ်နုာ်အပူၤဒ်သိးတၢ်ဖံးတၢ်မၤအသုတဘၣ်တံာ် တာ်တဂ့ၤအဂီၢ်န့ၣ်လီၤ.

⁹တနံၤဘၣ်တနံၤန့ၣ်, သုကဘၣ်ဟ့ၣ်တၢ်ဒီးတဘၣ်လီၤတိၢ်ဘၣ်, ဆူပှၤလုၢ်တၢ်အခိၣ်တဖၣ်လၢဝ့ၢ်ယရူၤၡလ့ၣ်, တၢ်တမံၤလၢ်လၢ်လၢ အဝဲသ့ၣ်တဲသုလၢအလိၣ်ဘၣ်ဝဲဒ်အမ့ၢ်, ကျီၢ်ဖါဖိတဖၣ်, သိတဖၣ်မ့တမ့ၢ်သိဖိတဖၣ်လၢတၢ်ကဆူးကဲၤအီၤလၢတၢ်ကလုၢ်ထီၣ် အီၤလၢကစၢ်ယွၤလၢမူခိၣ်အဂီၢ်မ့ၢ်ဂ့ၤ, ဘုဧိၤဟုဧိၤ, အံသၣ်, စပံးထံမ့တမ့ၢ်သ့ၣ်စၤယံးအသိမ့ၢ်ဂ့ၤ ဒ်တၢ်မၤဘူၣ်တဖၣ်ဆူကစၢ်ယွၤလၢမူခိၣ်အအိၣ်န့ၣ်လီၤ.

¹⁰တၢ်အံၤမ့ၢ်တၢ်လၢတၢ်ကဘၣ်မၤအီၤဒ်သိးအဝဲသ့ၣ်လုၢ်ထီၣ်ပာ်ထီၣ် တၢ်လုၢ်တၢ်ပာ်တဖၣ်လၢကစၢ်ယွၤလၢမူခိၣ်တူၢ်လိာ်အီၤကသ့ဝဲဒီး ဃ့ဘါထုကဖၣ်လၢအတၢ်ဆိၣ်ဂ့ၤကအိၣ်လၢယလိၤဒီးလၢယဖိခွါတဖၣ် အလိၤကသ့ဝဲန့ၣ်လီၤ.

¹¹ယမၤလိာ်အါထီၣ်စ့ၢ်ကီးလၢပှၤတဂၤဂၤမ့ၢ်တစူၢ်ဘၣ်တၢ်ကလုၢ်အံၤ န့ၣ်ဒီး, မ်ပှၤထဲးထီၣ်န့ၢ်သ့ၣ်ကျိၤတဘိလၢအဟံၣ်, မၤစူအထိးနါတကပၤဒီးဆဲးဖျိအနီၢ်ကစၢ်န့ၣ်တက့ၢ်. ဒီးမ်အဟံၣ်ကဲထီၣ်တၢ်တပှိာ်တပှာ်အပူၣ်တဖၣ်တက့ၢ်.

¹²မ်စီၤပၤတဂၤလၢ်လၢ်မ့ၢ်ဂ့ၤ, ပှၤတကလုာ်လၢ်လၢ်မ့ၢ်ဂ့ၤ, လၢအခီၣ်ဆၢတၢ်မၤလိာ်အံၤဒီးဂုာ်ကျဲးစၢးလၢကမၤဟးဂီၤတၢ် လုၢ်ဟံၣ်ဖဲန့ၣ်, ဘၣ်တၢ်တ့ၢ်လီၤကွံာ်အီၤလၢကစၢ်ယွၤလၢအဃုထၢဝ့ၢ်ယရူၤၡလ့ၣ်ဒ် တၢ်လီၢ်ဖဲအဝဲကဘၣ်တၢ်ဘူၣ်ထီၣ်ဘါထီၣ်အီၤန့ၣ်တက့ၢ်. ယၤ, စီၤဒၤရယါဝ့ၣ်ဟ့ၣ်လီၤလံတၢ်ကလုၢ်အံၤလီၤ. တၢ်အံၤတၢ်ကဘၣ်စူၢ်အီၤလၢလၢပှဲၤပှဲၤန့ၣ်လီၤ.”

¹³တုၤနုၤတစုပဒိၣ်ဖးဒိၣ်စီၤတးနဲ, စီၤၡသၢ်ဘိစနဲၤဒီးအပဒိၣ် ကဒဲကဒဲတဖၣ်မၤဝဲဒ်စီၤပၤဖးဒိၣ်မၤလိာ်တ့ၢ်ဝဲအသိးန့ၣ်လီၤ.

¹⁴ပှၤယူဒၤဖိအခိၣ်အနၢ်တဖၣ်မၤတၢ်လဲၤထီၣ်လဲၤထီဂ့ၤဂ့ၤလၢတၢ် ဘှီထီၣ်ကဒါက့ၤတၢ်လုၢ်ဟံၣ်အိၣ်ဒီးတၢ်ဟ့ၣ်ဂံၢ်ဟ့ၣ်ဘါအဝဲသ့ၣ် လၢဝံဃးကဲဒီးဝံစကၤရယၤတဖၣ်န့ၣ်လီၤ. အဝဲသ့ၣ်မၤဝံၤကွံာ်တၢ်လုၢ်ဟံၣ်ဒ်အဝဲသ့ၣ်ဘၣ်တၢ်မၤလိာ်တ့ၢ် အီၤလၢအံၣ်စရ့လးအကစၢ်ယွၤဒီးကီၢ်ပၤရၣ်အစီၤပၤဖးဒိၣ်တဖၣ် လၢအမ့ၢ်စီၤကိရ့ၣ်, စီၤဒၤရယါဝ့ၣ်ဒီးစီၤအၢ်တၤၡါၡတၤန့ၣ်လီၤ.

¹⁵လၢစီၤပၤဖးဒိၣ်ဒၤရယါဝ့ၣ်ပၢတၢ်ဃုနံၣ်တနံၣ်လါအးဒၢ်လါ ထီၣ်သၢသီတသီန့ၣ်အဝဲသ့ၣ်မၤဝံၤတၢ်လုၢ်ဟံၣ်န့ၣ်လီၤ.

¹⁶အန့ၣ်ဒီးပှၤအံၣ်စရ့လးဖိလၢအမ့ၢ်, ပှၤလုၢ်တၢ်အခိၣ်တဖၣ်, ပှၤလ့ၤဝံဖိတဖၣ်, ဒီးကယဲၢ်ပှၤအဂၤလၢအဟဲက့ၤလၢတၢ်စိာ်မၢ ကဲကုၢ်အလီၢ်န့ၣ်, ပာ်စီဆှံတၢ်လုၢ်ဟံၣ်လၢတၢ်သူၣ်ခု သးခုအပူၤန့ၣ်လီၤ.

¹⁷လၢတၢ်ပာ်စီဆှံအဂီၢ်န့ၣ်, အဝဲသ့ၣ်လုၢ်ထီၣ်ပာ်ထီၣ်ကျီၢ်ဖါဖိ တကယၤ, သိအဒု ခံကယၤဒီး, သိဖိအဒုလွံၢ်ကယၤ, ဒ်တၢ်လုၢ်တၢ်ပာ်တဖၣ်အသိး, ဒီးမဲာ်တဲးလဲးဖါတဆံခံဒု ဒ်တၢ်လုၢ်တၢ်ဒဲးဘးအသိး, တဒုလၢပှၤအံၣ်စရ့လးဖိတဒူၣ်စုာ် စုာ်အဂီၢ်န့ၣ်လီၤ.

¹⁸ဒ်တၢ်မၤလိာ်အိၣ်တ့ၢ်ဝဲလၢစီၤမိၤၡ့အလံာ်တၢ်ကွဲးအပူၤအသိး န့ၣ်, အဝဲသ့ၣ်ကရၢကရိထီၣ်စ့ၢ်ကီးပှၤလုၢ်တၢ်အခိၣ်တဖၣ်ဒီးပှၤလ့ၤဝံ ဖိတဖၣ်လၢတၢ်လုၢ်ဟံၣ်အတၢ်ဖံးတၢ်မၤတဖၣ်အဂီၢ်လၢဝ့ၢ်ယရူၤၡလ့ၣ် အပူၤန့ၣ်လီၤ.

¹⁹ပှၤဂီၢ်မုၢ်လၢအဟဲက့ၤကဒါက့ၤလၢတၢ်စိာ်မၢကဲကုၢ်န့ၣ်, မၤဘူၣ်လဲၤကပာ်ဖဲန့ၣ်ပိာ်ထွဲထီၣ်အခံလၢခံတနံၣ်လါအခီၣ်ထံး တလါထီၣ်တဆံလွံၢ်သီအနံၤန့ၣ်လီၤ.

²⁰ကယဲၢ်ပှၤလုၢ်တၢ်အခိၣ်ဒီးပှၤလ့ၤဝံဖိခဲလၢာ်မၤကဆှီထီၣ်အသး ဒီးကဆှီဝဲဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ. ပှၤလ့ၤဝံဖိတဖၣ်မၤသံဆၣ်ဖိကီၢ်ဖိလၢဘူၣ်လဲၤကပာ်အတၢ်လုၢ် တၢ်ပာ်တဖၣ်အဂီၢ်, လၢကယဲၢ်ပှၤလၢအဟဲက့ၤလၢတၢ်စိာ်မၢကဲကုၢ်အလီၢ်, လၢပှၤလုၢ်တၢ်အခိၣ်တဖၣ်ဒီးလၢအဝဲသ့ၣ်အနီၢ်ကစၢ်ဒၣ်ဝဲအဂီၢ်န့ၣ် လီၤ.

²¹ကယဲၢ်ပှၤအံၣ်စရ့လးဖိလၢအဟဲက့ၤလၢတၢ်စိာ်မၢကဲကုၢ်အလီၢ်, ဒီးပှၤလၢအညိကွံာ်ပှၤဂီၢ်မုၢ်လၢအအိၣ်ညအဆိးတ့ၢ်လၢထံကီၢ် အပူၤအတၢ်တစူၢ်တနာ်ယွၤအကျဲ, ဒီးပှၤတဖၣ်လၢအဟဲဒ်သိးကဘူၣ်ထီၣ်ဘါထီၣ်ယွၤ, အံၣ်စရ့လးအကစၢ်ယွၤအီၣ်ကွံာ်တၢ်လုၢ်တၢ်ပာ်တဖၣ်န့ၣ်လီၤ.

²²လၢနွံသီအတီၢ်ပူၤန့ၣ်, အဝဲသ့ၣ်မၤတၢ်သ့ၣ်နီၣ်မၤလၤကပီၤဘူၣ် တအိၣ်ဘၣ်ဒီးကိၣ်မံၣ်လၢတၢ်သူၣ်ခုသးခုအပူၤန့ၣ်လီၤ. အဝဲသ့ၣ်ပှဲၤဒီးတၢ်သူၣ်ခုသးခုမ့ၢ်လၢယွၤထိးဘၣ်တ့ၢ်ကီၢ်အၤ ၡူၢ်အစီၤပၤဖးဒိၣ်အသးလၢကကွၢ်မဲာ်အဝဲသ့ၣ်, တုၤဒၣ်လဲာ်မၤစၢၤအဝဲသ့ၣ်လၢအတၢ်ဖံးတၢ်မၤလၢတၢ်သူၣ်ထီၣ်ကဒါ က့ၤပှၤအံၣ်စရ့လးဖိအကစၢ်ယွၤအတၢ်လုၢ်ဟံၣ်အပူၤအဃိန့ၣ်လီၤ.