Read S'gaw Karen လံာ်စီၤနဃ့မယၤ 11 Bible Online

လံာ်စီၤနဃ့မယၤ 11 - S'gaw Karen bible

လံာ်စီၤနဃ့မယၤ 11

¹ပှၤခိၣ်ပှၤနၢ်တဖၣ်သူၣ်လီၤဆီလီၤအသးလၢဝ့ၢ်ယရူၤၡလ့ၣ်အပူၤ, ဒီးပှၤဂီၢ်မုၢ်အိၣ်လီၤတဲာ်တဖၣ်ဖီၣ်တၢ်ဖးတဖၣ်လၢကဃုထၢဒူၣ် ဖိထၢဖိတဒူၣ်လၢကယဲၢ်ဒူၣ်ဖိထၢဖိတဆံဒူၣ်စုာ်စုာ်အပူၤဒ်သိး ကလဲၤဒီးအိၣ်ဝဲဆိးဝဲလၢဝ့ၢ်ယရူၤရှလ့ၣ်ဝ့ၢ်စီဆှံအပူၤ, ဖဲပှၤအိၣ်လီၤတဲာ်အဂၤတဖၣ်ကဘၣ်လဲၤအိၣ်လၢဝ့ၢ်အဂၤတဖၣ်အပူၤ အခါန့ၣ်လီၤ.

²ပှၤဂီၢ်မုၢ်စံးထီၣ်ပတြၢၤဝဲပှၤတဂၤလၢ်လၢ်လၢအအိၣ်ဝဲဆိးဝဲ လၢဝ့ၢ်ယရူၤၡလ့ၣ်အပူၤဒ်အသးဆူၣ်ဒၣ်ဝဲအသိးန့ၣ်လီၤ.

³လၢဝ့ၢ်အဂၤတဖၣ်အပူၤန့ၣ်ကီၢ်အံၣ်စရ့လးအပှၤဂီၢ်မုၢ်, ပှၤလုၢ်တၢ်အခိၣ်တဖၣ်, ပှၤလ့ၤဝံဖိတဖၣ်, ပှၤမၤတၢ်လၢတၢ်လုၢ် ဟံၣ်တဖၣ်, ဒီးပှၤလီၤစၢၤလီၤသွဲၣ်လၢစီၤၡလိၤမိၤအခ့အပှၤတဖၣ်အိၣ်ဝဲ ဆိးဝဲဖဲဝ့ၢ်တဖၣ်လၢအဝဲသ့ၣ်အတၢ်စုလီၢ်ခီၣ်ခိၣ်ဒၣ်ဝဲအိၣ်, အပူၤန့ၣ်လီၤ. အအံၤမ့ၢ်လီၢ်ကဝီၤလၢကီၢ်ယူဒၤပူၤအထံ ဖိကီၢ်ဖိခိၣ်နၢ်တဖၣ်လၢအအိၣ်ဝဲဆိးဝဲလၢဝ့ၢ်ယရူၤရှလ့ၣ်အပူၤ အမံၤအသၣ်န့ၣ်လီၤ.

⁴ပှၤလၢယူဒၤအဒူၣ်အကျါန့ၣ်မ့ၢ်ဝဲ စီၤဧသါယၤလၢအမ့ၢ်စီၤဧူးစံယါအဖိခွါဒီးစီၤစကၤရယၤ အလံၤခွါန့ၣ်လီၤ. အဝဲအမိၢ်ပၢ်ဖံဖုလၢပျၢၤအဂုၤအဂၤတဖၣ်န့ၣ်အိၣ်ဝဲဃုာ်ဒီးစီၤ အမၤရယါ, စီၤၡဖးတယၤဒီးစီၤမၤဟလၤလ့လးလၢအဟဲ လီၤစၢၤလီၤသွဲၣ်လၢစီၤယူဒၤအဖိခွါစီၤဖ့ၤရ့းန့ၣ်လီၤ.

⁵စီၤမၤစ့ယၤလၢအမ့ၢ်စီၤဘၤရူးအဖိခွါဒီးစီၤကိးလဃိစ့ၤ အလံၤခွါန့ၣ်လီၤ. အဝဲအမိၢ်ပၢ်ဖံဖုလၢပျၢၤအဂုၤအဂၤတဖၣ်အိၣ်ဝဲဃုာ်ဒီးစီၤဃစါယၤ, စီၤဧဒါယၤ, စီၤယိၤရံာ်ဒီးစီၤစကၤရယၤလၢအမ့ၢ်ပှၤဟဲလီၤ စၢၤလီၤသွဲၣ်လၢစီၤယူဒၤအဖိခွါစီၤၡ့လၤန့ၣ်လီၤ.

⁶လၢပှၤဟဲလီၤစၢၤလီၤသွဲၣ်လၢစီၤဖ့ၤရ့းအကျါန့ၣ်ပှၤပိာ်ခွါ စဲၣ်နီၤအိၣ်ဝဲလွံၢ်ကယၤဃုဆံဃိးဂၤလၢအအိၣ်ဝဲဆိးဝဲလၢ ဝ့ၢ်ယရူၤၡလ့ၣ်အပူၤန့ၣ်လီၤ.

⁷ပှၤလၢဘံၣ်ယၤမံၣ်အဒူၣ်အကျါန့ၣ်မ့ၢ်ဝဲ, စီၤစၤလူၤလၢအမ့ၢ်စီၤမၡူလၣ်အဖိခွါဒီးစီၤယိၤဧ့းအလံၤ ခွါန့ၣ်လီၤ. အဝဲအမိၢ်ပၢ်ဖံဖုလၢပျၢၤအဂုၤအဂၤတဖၣ်ပၣ်ဃုာ်ဒီးစီၤပဒါ ယၤ, စီၤကိလယၤ, စီၤမၤစ့ယၤ, စီၤအံသံၤအ့လးဒီးစီၤယၡၤယါ တဖၣ်န့ၣ်လီၤ.

⁸စီၤကးဘဲဒီးစီၤစၤလဲၤမ့ၢ်ပှၤဒီဘူးဒီတံၢ်ဒီးစီၤစၤလူၤန့ၣ်လီၤ. ပှၤဘံၣ်ယၤမံၣ်အဒူၣ်ဖိထၢဖိခဲလၢာ်လၢအအိၣ်ဝဲဆိးဝဲလၢဝ့ၢ် ယရူၤရှလ့ၣ်အပူၤန့ၣ်မ့ၢ်ဝဲပှၤခွံကယၤခံဆံဃိးဂၤန့ၣ်လီၤ.

⁹စီၤယိၤအ့လးလၢအမ့ၢ်စီၤစံးကရံးအဖိခွါန့ၣ်မ့ၢ်အဝဲသ့ၣ် အပှၤအခိၣ်, ဒီးစီၤယူဒၤလၢအမ့ၢ်စီၤစနူအၤအဖိခွါန့ၣ်မ့ၢ်ပဒိၣ်ခံဂၤ တဂၤလၢဝ့ၢ်ပူၤန့ၣ်လီၤ.

¹⁰လၢပှၤလုၢ်တၢ်အခိၣ်တဖၣ်အကျါန့ၣ်မ့ၢ်ဝဲ စီၤယဒါယၤလၢအမ့ၢ်စီၤယိၤရံာ်အဖိခွါ, ဒီးစီၤယၤကံၣ်န့ၣ်လီၤ.

¹¹ဒီးစီၤစရါယၤလၢအမ့ၢ်စီၤဃံးလကံယၤအဖိခွါဒီးစီၤမၡူလၣ် အလံၤခွါန့ၣ်လီၤ. အဝဲအမိၢ်ပၢ်ဖံဖုလၢပျၢၤတဖၣ်အိၣ်ဝဲဃုာ်ဒီးစီၤစၤဒိး, စီၤမရၤယိး, ဒီးစီၤအဃံးတူာ်လၢအမ့ၢ်ပှၤလုၢ်တၢ်အခိၣ်အဒိၣ် ကတၢၢ်န့ၣ်လီၤ.

¹²ပှၤခဲလၢာ်ဃိးကယၤခံဆံခံဂၤလၢဒူၣ်ထၢအံၤအပူၤမၤတၢ်လၢ ယွၤအတၢ်လုၢ်ဟံၣ်အပူၤန့ၣ်လီၤ. ဒီးစီၤဧၤဒါယၤလၢအမ့ၢ်စီၤယရိဃၣ်အဖိခွါဒီးစီၤပလၤလယၤ အလံၤခွါန့ၣ်လီၤ. အဝဲအမိၢ်ပၢ်ဖံဖုလၢပျၢၤတဖၣ်အိၣ်ဝဲဃုာ်ဒီးစီၤအးမစံ, စီၤစကၤရယၤ, စီၤပၤၡဃူၢ်ဒီးစီၤမၤလကံယၤန့ၣ်လီၤ.

¹³ပှၤခဲလၢာ်ခံကယၤလွံၢ်ဆံခံဂၤလၢဒူၣ်ထၢအံၤအပူၤမ့ၢ်ဒူၣ်ဖိ ထၢဖိအခိၣ်အနၢ်တဖၣ်န့ၣ်လီၤ. ဒီးစီၤဧမၤၡဲလၢအမ့ၢ်စီၤဧစၤရ့အဖိခွါဒီးစီၤအၤဃစဲၤအလံၤခွါန့ၣ်လီၤ. အဝဲအမိၢ်ပၢ်ဖံဖုလၢပျၢၤတဖၣ်အိၣ်ဝဲဃုာ်ဒီးစီၤမၡံးလ့မိး ဒီးစီၤအံးမ့ၢ်န့ၣ်လီၤ.

¹⁴ပှၤအိၣ်ဝဲတကယၤခံဆံဃိးဂၤလၢဒူၣ်ထၢအံၤအပူၤလၢအမ့ၢ်ပှၤ သုးဖိစဲၣ်နီၤတဖၣ်န့ၣ်လီၤ. စီၤစးဘဒ့ၤအ့လးလၢအမ့ၢ်ဒူၣ်ဖိထၢဖိလၢအကဲခိၣ်ကဲနၢ်လၢ ဟံၣ်ဒူၣ်ဃီထၢအပူၤတဂၤလၢအမ့ၢ်စီၤဟးကဒိလံၣ်အဖိခွါ, မ့ၢ်အဝဲသ့ၣ်အပှၤအခိၣ်န့ၣ်လီၤ.

¹⁵လၢပှၤလ့ၤဝံဖိတဖၣ်အကျါန့ၣ်မ့ၢ်ဝဲ, စီၤၡမါယၤလၢအမ့ၢ်စီၤဃၤၡူၣ်အဖိခွါဒီးစီၤဧးစရံကၣ်အလံၤ ခွါန့ၣ်လီၤ. အဝဲအမိၢ်ပၢ်ဖံဖုလၢပျၢၤတဖၣ်အိၣ်ဝဲဃုာ်ဒီးစီၤဃၡၤဘယၤဒီး စီၤဘူနံၤန့ၣ်လီၤ.

¹⁶စီၤၡၤဘသဲၤဒီးစီၤယိစဘး, မ့ၢ်ပှၤလ့ၤဝံဖိခိၣ်နၢ်တဖၣ်လၢ တၢ်သ့ၣ်ညါအီၤဒိၣ်ဒၣ်တၢ်တက့ၢ်ဒ်ပှၤကွၢ်ထွဲတၢ်ဖံးတၢ်မၤလၢ ယွၤအတၢ်လုၢ်ဟံၣ်အချၢန့ၣ်လီၤ.

¹⁷ဒီးစီၤမးတၤနယၤလၢအမ့ၢ်စီၤမံၤတါအဖိခွါဒီးစီၤစးဘဒံၤ အလံၤခွါမ့ၢ်ပှၤတဂၤလၢအဟဲလီၤစၢၤလီၤသွဲၣ်လၢစီၤအၤစာ်န့ၣ်လီၤ. အဝဲမ့ၢ်ပှၤဆှၢတၢ်လုၢ်ဟံၣ်အတၢ်သးဝံၣ်ရိဖဲပှၤသးဝံၣ်တၢ်စံး ဘျုးစံးဖှိၣ်အတၢ်ထုကဖၣ်န့ၣ်လီၤ. စီၤဘးကဘူကယၤမ့ၢ်ပှၤမၤစၢၤစီၤမးတၤနယၤန့ၣ်လီၤ. ဒီးစီၤဧၤဘဒါလၢအမ့ၢ်စီၤၡံမူၤအဖိခွါဒီးစီၤကၤလလး အလံၤခွါမ့ၢ်ပှၤတဂၤလၢအဟဲလီၤစၢၤလီၤသွဲၣ်လၢစီၤယဒူသူၣ် န့ၣ်လီၤ.

¹⁸ပှၤလ့ၤဝံဖိခဲလၢာ်လၢအအိၣ်ဝဲဆိးဝဲလၢဝ့ၢ်စီဆှံဝ့ၢ်ယရူၤ လ့ၣ်အပူၤန့ၣ်မ့ၢ်ဝဲပှၤခံကယၤဃိးဆံလွံၢ်ဂၤန့ၣ်လီၤ.

¹⁹ပှၤခိးယွၤအတၢ်လုၢ်ဟံၣ်တဖၣ်မ့ၢ်ဝဲ စီၤဧးကူာ်, စီၤတၤလမိၣ်ဒီးအဝဲသ့ၣ်အဘူးအတံၢ်တဖၣ်ပှၤခဲလၢာ်, ပှၤတကယၤနွံဆံခံဂၤန့ၣ်လီၤ.

²⁰ကီၢ်အံၣ်စရ့လးအပှၤဂီၢ်မုၢ်အဂၤဒီး, ပှၤလုၢ်တၢ်အခိၣ်ဒီးပှၤ လ့ၤဝံဖိလၢအအိၣ်လီၤတဲာ်တဖၣ်န့ၣ်အိၣ်ဝဲဆိးဝဲဖဲအဝဲသ့ၣ် အတၢ်စုလီၢ်ခီၣ်ခိၣ်အိၣ်ဝဲလၢကီၢ်ယူဒၤအဝ့ၢ်အဂၤတဖၣ်အပူၤန့ၣ် လီၤ.

²¹တၢ်လုၢ်ဟံၣ်အပှၤမၤတၢ်ဖိတဖၣ်လၢအမၤတၢ်လၢစီၤစံဃၤဒီးစီၤ ကံးၡပၤအတၢ်ပၢတၢ်ဆှၢအဖီလာ်န့ၣ်အိၣ်ဝဲဆိးဝဲလၢတၢ်လီၢ်လၢ ဝ့ၢ်ယရူၤၡလ့ၣ်အပူၤလၢအမ့ၢ်ဝဲဧိၤဖ့လးန့ၣ်လီၤ.

²²ပှၤလ့ၤဝံဖိလၢအကွၢ်ထွဲတၢ်လၢအအိၣ်ဆိးလၢဝ့ၢ်ယရူၤၡလ့ၣ် အပူၤန့ၣ်မ့ၢ်စီၤဧူၤစံလၢအမ့ၢ်ဝဲစီၤဘၤနံအဖိခွါဒီးစီၤဃၡၤ ဘယၤအလံၤခွါန့ၣ်လီၤ. အဝဲအမိၢ်ပၢ်ဖံဖုလၢပျၢၤတဖၣ်ပၣ်ဃုာ်ဒီးစီၤမးတၤနယၤဒီး စီၤမံၤကါ, လၢအဘၣ်ထွဲဒီးစီၤအၤစာ်အဒူၣ်ထၢဒီးမ့ၢ်ဒူၣ်ထၢလၢ အအိၣ်ဒီးမူဒါလၢတၢ်သူၣ်ဝံၣ်သးဆၢအဂီၢ်လၢတၢ်လုၢ်ဟံၣ် အတၢ်ဖံးတၢ်မၤတဖၣ်အပူၤန့ၣ်လီၤ.

²³စီၤလိၣ်စီၤပၤအတၢ်သိၣ်တၢ်ဘျၢတဖၣ်အိၣ်ဝဲဒၣ်လၢအပာ်ဖျါထီၣ် ဒူၣ်ထၢတဖၣ်ကဘၣ်ဟံးန့ၢ်မူဒါဒ်လဲၣ်လၢကဆှၢတၢ်လုၢ်ဟံၣ်အတၢ်သး ဝံၣ်တနံၤဘၣ်တနံၤအဂီၢ်န့ၣ်လီၤ.

²⁴စီၤပသၤဃိယၤလၢအမ့ၢ်စီၤမၡ့ၤစဘ့လးအဖိခွါ, လၢစီၤစ့ရၤအဒူၣ်ထၢ, ဒီးလၢယူဒၤအဒူၣ်န့ၣ်မ့ၢ်ခၢၣ်စးလၢကီၢ်အံၣ်စရ့လးအပှၤဂီၢ်မုၢ် အဂီၢ်လၢပၤရၣ်ကွီၢ်ဘျီၣ်န့ၣ်လီၤ.

²⁵ပှၤဂီၢ်မုၢ်အါဂၤအိၣ်ဆိးဝဲလၢဝ့ၢ်တဖၣ်လၢအဘူးဒီးအဝဲသ့ၣ် အစံာ်အပျီတဖၣ်န့ၣ်လီၤ. ပှၤတဖၣ်လၢယူဒၤအဒူၣ်န့ၣ်အိၣ်ဝဲဆိးဝဲဖဲ ဝ့ၢ်ကံးရယးအၢ်ဘၤ, ဝ့ၢ်ဒံၤဘိၣ်, ဒီးဝ့ၢ်ယကၤဘစ့လး, ဒီးသဝီတဖၣ်လၢအအိၣ်ဘူးဒီးဝ့ၢ်တဖၣ်အံၤန့ၣ်လီၤ.

²⁶အဝဲသ့ၣ်အိၣ်ဆိးစ့ၢ်ကီးဝဲဒၣ်လၢဝ့ၢ်ယ့ၤၡူ, ဝ့ၢ်မိလဒၤ, ဝ့ၢ်ဘ့ၤသပၤလ့း,

²⁷ဒီးလၢဝ့ၢ်ဃစၢ်ၡူဧလးဒီးလၢဝ့ၢ်ဘ့ၢ်ၡဘၤ, ဒီးသဝီအိၣ်ဝးတရံးအီၤတဖၣ်အပူၤန့ၣ်လီၤ.

²⁸အဝဲသ့ၣ်အိၣ်ဆိးတ့ၢ်ဝဲဒၣ်လၢဝ့ၢ်စံကလး, လၢဝ့ၢ်မကိနၤ, ဒီးအသဝီတဖၣ်အပူၤ,

²⁹လၢဝ့ၢ်ဧ့ၣ်ရံမိၣ်, လၢဝ့ၢ်စၤရဧၤ, ဒီးဝ့ၢ်ယၢ်မူသးတဖၣ်အပူၤ,

³⁰လၢဝ့ၢ်စါနိၤ, ဝ့ၢ်ဧဒူးလၣ်ဒီးသဝီလၢအအိၣ်ဘူးဒီးဝ့ၢ်တဖၣ် အံၤအပူၤန့ၣ်လီၤ. အဝဲသ့ၣ်အိၣ်ဆိးဝဲဒၣ်လၢဝ့ၢ်လၤကံၣ်, ဒီးစံာ်ပျီ လၢအဘူးတဖၣ်, ဒီးလၢဝ့ၢ်ဧစ့ကၤဒီးအသဝီအိၣ်ဘူးတဖၣ်အပူၤ န့ၣ်လီၤ. အခီပညီ, ကီၢ်ယူဒၤအပှၤဂီၢ်မုၢ်အိၣ်ဝဲဆိးဝဲဒၣ်လၢလီၢ်ကဝီၤ ဖဲဝ့ၢ်ဘ့ၤၡဘၤလၢကလံၤထံးတခီဒီးကစၢၢ်ကဆူးဟံၣ်နိၣ်လၢကလံၤ စိးတခီအဘၢၣ်စၢၤန့ၣ်လီၤ.

³¹ဘံၣ်ယၤမံၣ်အဒူၣ်အပှၤဂီၢ်မုၢ်အိၣ်ဆိးဝဲဒၣ်လၢဝ့ၢ်က့ဘၤဝ့ၢ် မံးကမၣ်, ဝ့ၢ်ဂဲ, ဝ့ၢ်ဘ့ၤသ့လးဒီးသဝီအိၣ်ဘူးတဖၣ်အပူၤ,

³²လၢဝ့ၢ်ဧၤနသိး, ဝ့ၢ်နိၤဘး, ဝ့ၢ်ဧနၤနယၤ,

³³ဝ့ၢ်ဃါစိၢ်, ဝ့ၢ်ရၤမါ, ဝ့ၢ်ကံးတယၣ်, ဝ့ၢ်ဃၤဒံး, ဝ့ၢ်စဘိဧံၣ်, ဝ့ၢ်နဘးလး,

³⁵ဝ့ၢ်လိး, ဝ့ၢ်အိနိၤ, ဒီးလၢပှၤစိးပျၤတၢ်ဖိအကစၢၢ်ကဆူးအပူၤန့ၣ်လီၤ.

³⁶ပှၤလ့ၤဝံဖိအကရူၢ်တနီၤလၢအအိၣ်ဆိးတ့ၢ်ဝဲလၢကီၢ်ယူဒၤအလီၢ် ကဝီၤတဖၣ်အပူၤန့ၣ်ဘၣ်တၢ်ပာ်လီၤအီၤလၢကအိၣ်ဆိးဒီးဘံၣ်ယၤ မံၣ်ဖိအဒူၣ်အပှၤဂီၢ်မုၢ်န့ၣ်လီၤ.