Read S'gaw Karen လံာ်စီၤနဃ့မယၤ 13 Bible Online

လံာ်စီၤနဃ့မယၤ 13 - S'gaw Karen bible

လံာ်စီၤနဃ့မယၤ 13

¹တုၤစီၤမိၤၡ့အတၢ်သိၣ်တၢ်သီဘၣ်တၢ်ဖးဖျါထီၣ်အီၤသီၣ်ဒိၣ် ဒိၣ်ဆူပှၤဂီၢ်မုၢ်အအိၣ်ဒီးတုၤဖဲတၢ်ကွဲးအသးတတီၤလၢအမ့ၢ် ဝဲပှၤဧၣ်မိၣ်ဖိမ့ၢ်ဂ့ၤ, ပှၤမိၤအးဖိမ့ၢ်ဂ့ၤတၢ်တဟ့ၣ်ဘၣ်အခွဲး လၢကပာ်ဖှိၣ်အသးဒီးကစၢ်ယွၤအပှၤဂီၢ်မုၢ်ဘၣ်န့ၣ်လီၤ.

²တၢ်အံၤမ့ၢ်လၢပှၤဧၣ်မိၣ်ဖိဒီးပှၤမိၤအးဖိတဖၣ်အံၤတဟ့ၣ်ဘၣ် ပှၤအံၣ်စရ့လးဖိတဖၣ်လၢထံဒီးကိၣ်ဖဲအဝဲသ့ၣ်ဟးထီၣ်လၢကီၢ် အဲၤကူပတူးပူၤအခါအဃိန့ၣ်လီၤ. အခိၣ်တလိာ်အဝဲသ့ၣ်ဟ့ၣ်တိၢ်စ့ဆူစီၤဘံးလၣ်ဒ်သိးအကဆိၣ်အၢပှၤ အံၣ်စရ့လးဖိတဖၣ်, ဘၣ်ဆၣ်ပကစၢ်ယွၤလဲလိာ်ကွံာ်တၢ်ဆိၣ်အၢန့ၣ်ဆူတၢ်ဆိၣ်ဂ့ၤတမံၤလီၤ.

³တုၤကီၢ်အံၣ်စရ့လးအပှၤဂီၢ်မုၢ်နၢ်ဟူတၢ်သိၣ်တၢ်သီ အံၤဘၣ်တၢ်ဖးထီၣ်အီၤန့ၣ်, အဝဲသ့ၣ်နီၣ်ထီၣ်ကွံာ်ကယဲၢ်ပှၤတခီ ဘီမုၢ်ခဲလၢာ်လၢအတၢ်ကရၢကရိအပူၤန့ၣ်လီၤ.

⁴ပှၤလုၢ်တၢ်အခိၣ်စီၤဧ့လယၤၡံာ်လၢအမ့ၢ်ပှၤကွၢ်ထွဲတၢ်လုၢ်ဟံၣ် အတၢ်ပာ်ဖှိၣ်အဒၢးတဖၣ်န့ၣ်, မ့ၢ်တ့ၢ်ပှၤဒီတံၤဒီသကိးဒီးစီၤတိၤဘံယၤယံာ်မးလံန့ၣ်လီၤ.

⁵အဝဲပျဲတ့ၢ်စီၤတိၤဘံယၤလၢကသူဝဲဒၢးဖးဒိၣ်တဖျၢၣ်လၢတၢ် ပာ်လီၤဆီအီၤထဲဒၣ်လၢတၢ်ကပာ်တၢ်မၤဘူၣ်လၢဘုဧိၤဟုဧိၤဒီး တၢ်နၢမူ, တၢ်ပီးတၢ်လီလၢတၢ်သူအီၤလၢယွၤအတၢ်လုၢ်ဟံၣ်အပူၤ, တၢ်မၤဘူၣ်တဖၣ်လၢပှၤလုၢ်တၢ်အဒိၣ်တဖၣ်အဂီၢ်, ဒီးတၢ်ဆံဆဲၣ်ပူတပူတဖၣ်လၢဘုဧိၤဟုဧိၤ, စပံးထံ, သ့ၣ်စၤယံးအသိလၢအဘၣ်တၢ်ဟ့ၣ်အီၤဆူပှၤလ့ၤဝံဖိ တဖၣ်ဆူတၢ်လုၢ်ဟံၣ်အပှၤသးဝံၣ်တၢ်ဖိတဖၣ်ဒီးဆူပှၤခိးတၢ်လုၢ် ဟံၣ်တဖၣ်အဂီၢ်န့ၣ်လီၤ.

⁶ဖဲတၢ်အံၤမၤအသးအခါန့ၣ်ယတအိၣ်ဘၣ်လၢဝ့ၢ်ယရူၤရှလ့ၣ်အပူၤဘၣ်, မ့ၢ်လၢဖဲစီၤပၤအၢ်တၤၡါၡတၤကီၢ်ဘၤဘူၤလိၣ်အစီၤပၤသၢဆံ ခံနံၣ်တနံၣ်န့ၣ်ယဘၣ်လဲၤကဒါက့ၤဒီးပာ်ဖျါတၢ်ဆူအအိၣ်အဃိ န့ၣ်လီၤ. တစိၢ်ဖိဝံၤအလီၢ်ခံန့ၣ်ယဒိးန့ၢ်ဘၣ်အဝဲအတၢ်ပျဲ,

⁷ဒီးယကဟဲက့ၤကဒါက့ၤဆူဝ့ၢ်ယရူၤရှလ့ၣ်န့ၣ်လီၤ. ဖဲန့ၣ်ယဖုးဒီးကမၢကမၣ်မးလၢတၢ်ထံၣ်ဘၣ်စီၤဧ့လယၤၡံာ်ပျဲ သူစီၤတိၤဘံယၤလၢဒၢးတဒၢးလၢယွၤအတၢ်လုၢ်ဟံၣ်အပူၤအဃိန့ၣ် လီၤ.

⁸ယသးဒိၣ်ကဲၤထီၣ်ဒီးတ့ၢ်လီၤကွံာ်ကယဲၢ်စီၤတိၤဘံယၤအတၢ်ပီး တၢ်လီခဲလၢာ်န့ၣ်လီၤ.

⁹ယဟ့ၣ်လီၤယကလုၢ်လၢဒၢးတဖၣ်ကဘၣ်တၢ်မၤကဆှီထီၣ်က့ၤအီၤဒ်တၢ် ဘူၣ်တၢ်ဘါအလုၢ်အလၢ်အိၣ်ဝဲအသိးဒီးလၢတၢ်လုၢ်ဟံၣ်အတၢ်ပီးတၢ် လီတဖၣ်, တၢ်မၤဘူၣ်ဘုဧိၤဟုဧိၤ, ဒီးတၢ်နၢမူတဖၣ်ကဘၣ်တၢ်ပာ်ကဒါက့ၤအီၤန့ၣ်လီၤ.

¹⁰ယသ့ၣ်ညါဘၣ်စ့ၢ်ကီးလၢတၢ်လုၢ်ဟံၣ်အပှၤသးဝံၣ်တၢ်ဖိတဖၣ်, ဒီးပှၤလ့ၤဝံဖိအဂၤတဖၣ်ဟးထီၣ်ကွံာ်လံလၢဝ့ၢ်ယရူၤၡလ့ၣ်ဒီး က့ၤကဒါက့ၤဆူအဝဲသ့ၣ်အစံာ်အပျီမ့ၢ်လၢပှၤဂီၢ်မုၢ်တဟ့ၣ်အဝဲ သ့ၣ်တၢ်လၢလၢလီၣ်လီၣ်လၢကအိၣ်မူဝဲအဂီၢ်ဘၣ်အဃိန့ၣ်လီၤ.

¹¹ဒီးယသိၣ်က့ၤသီက့ၤပဒိၣ်ပပှၢ်တဖၣ်ဆါဆါကလဲာ်မ့ၢ်လၢအပျဲ ယွၤအတၢ်လုၢ်ဟံၣ်ဘၣ်တၢ်လဲၤကပာ်ကွံာ်အီၤအဃိန့ၣ်လီၤ. ဒီးယကိးကဒါက့ၤပှၤလ့ၤဝံဖိတဖၣ်ဒီးပှၤသးဝံၣ်တၢ်ဖိသ့ၣ် တဖၣ်ဆူယွၤအတၢ်လုၢ်ဟံၣ်ဒီးပာ်ကဒီးအီၤလၢကမၤက့ၤတၢ်န့ၣ်လီၤ.

¹²အန့ၣ်ဒီးကယဲၢ်ကီၢ်အံၣ်စရ့လးအပှၤဂီၢ်မုၢ်ခဲလၢာ်စးထီၣ်ဟဲ စိာ်က့ၤအဝဲသ့ၣ်အတၢ်ဆံဆဲၣ်ပူတပူလၢဘုဧိၤဟုဧိၤ, စပံးထံဒီးသ့ၣ်စၤယံးအသိဆူတၢ်လုၢ်ဟံၣ်အတၢ်ပာ်ဖှိၣ်အဒၢး တဖၣ်န့ၣ်လီၤ.

¹³ယပာ်လီၤပှၤလၢလာ်တဖၣ်အံၤဒ်ပှၤကကွၢ်ထွဲတၢ်ပာ်ဖှိၣ်အဒၢးတဖၣ် န့ၣ်လီၤ. အဝဲသ့ၣ်တဖၣ်န့ၣ်မ့ၢ်ဝဲပှၤလုၢ်တၢ်အခိၣ်စီၤၡလ့မယၤ, ပှၤတဂၤလၢအသ့ဝဲဘၣ်ဝဲလၢယူဒၤအတၢ်သိၣ်တၢ်သီစီၤစၤဒိး, ဒီးပှၤလ့ၤဝံဖိစီၤပဒါယၤန့ၣ်လီၤ. စီၤဃၤနၣ်လၢအမ့ၢ်စီၤစးကူၢ်အဖိခွါဒီးစီၤမးတၤနယၤအလံၤ ခွါမ့ၢ်ပှၤမၤစၢၤအဝဲသ့ၣ်န့ၣ်လီၤ. ယသ့ၣ်ညါလၢယနာ်န့ၢ်ပှၤတဖၣ်အံၤသ့လၢတၢ်ဟ့ၣ်နီၤလီၤတၢ်တဖၣ်ဆူ ပှၤမၤသကိးတၢ်ဒီးအဝဲသ့ၣ်ကဒဲကဒဲအဂီၢ်န့ၣ်လီၤ.

¹⁴ယကစၢ်ယွၤဧၢ, သ့ၣ်နီၣ်ထီၣ်က့ၤကယဲၢ်တၢ်ခဲလၢာ်လၢယမၤတ့ၢ်ယဲလၢ နတၢ်လုၢ်ဟံၣ်ဒီးအတၢ်ဘူၣ်ထီၣ်ဘါထီၣ်နၤအဂီၢ်န့ၣ်တက့ၢ်.

¹⁵လၢအကတီၢ်ဖဲန့ၣ်ယထံၣ်တ့ၢ်ပှၤကီၢ်ယူဒၤဖိယီၢ်စပံးသၣ်လၢမုၢ် အိၣ်ဘှံးအနံၤန့ၣ်လီၤ. ပှၤအဂၤတနီၤပဒၢးထီၣ်ဘုဧိၤဟုဧိၤ, စပံးထံ, စပံးသၣ်, ချၢၣ်ဒၢသၣ်ဒီးတၢ်အဂၤတဖၣ်ဆူကသ့ၣ်ယီၤအလိၤ, ဒီးလဲၤစိာ်ဝဲဆူဝ့ၢ်ယရူၤရှလ့ၣ်န့ၣ်လီၤ. ယဟ့ၣ်ပလီၢ်အဝဲသ့ၣ်လၢအသုတဆါတၢ်နီတမံၤလၢမုၢ်အိၣ်ဘှံးအနံၤ တဂ့ၤန့ၣ်လီၤ.

¹⁶ပှၤဝ့ၢ်ထါယၢၣ်ဖိတနီၤအိၣ်ဝဲလၢဝ့ၢ်ယရူၤရှလ့ၣ်အပူၤဒီးအဝဲ သ့ၣ်ဟဲစိာ်ဝဲညၣ်ဒီးကယဲၢ်တၢ်ဖိတၢ်လံၤအကလုာ်ကလုာ်ဆူဝ့ၢ်ပူၤ လၢကဆါန့ၢ်ပပှၤဂီၢ်မုၢ်လၢမုၢ်အိၣ်ဘှံးအနံၤန့ၣ်လီၤ.

¹⁷ယသိၣ်ဃီၣ်ပှၤယူဒၤဖိအခိၣ်အနၢ်တဖၣ်ဆါဆါကလဲာ်ဒီးတဲဘၣ်အဝဲ သ့ၣ်, “ကွၢ်တၢ်အၢတၢ်သီလၢသုမၤန့ၣ်တက့ၢ်. သုမၤဘၣ်အၢမုၢ်အိၣ်ဘှံးအနံၤန့ၣ်လီၤ.

¹⁸ကစၢ်ယွၤစံၣ်ညီၣ်တ့ၢ်သုမိၢ်ပၢ်ဖံဖုလၢပျၢၤတဖၣ်, ဖဲအဝဲဒုးလီၤဘၣ်တၢ်ဟးဂီၤလၢဝ့ၢ်အံၤအဖီခိၣ်, မ့ၢ်ဒၣ်လၢတၢ်တမံၤဃီဒ်သိးအံၤမၤတ့ၢ်အသးအဃိန့ၣ်လီၤ. အန့ၣ်ဒၣ်လဲာ်, သုပာ်ဒံးသုသးကျၢၤမုဆှု လၢသုကဟဲစိာ်အါထီၣ် ကစၢ်ယွၤအတၢ်သးဒိၣ်ဘၣ်ကီၢ်အံၣ်စရ့လးခီဖျိ တၢ်မၤဘၣ်အၢမုၢ်အိၣ်ဘှံးနံၤန့ၣ်လီၤ.”

¹⁹လၢတၢ်န့ၣ်အဃိယဟ့ၣ်လီၤယကလုၢ်လၢဝ့ၢ်တြဲၤတဖၣ်ကဘၣ်တၢ်ကးတံၢ် အီၤလၢမုၢ်အိၣ်ဘှံးနံၤကိးနံၤဒဲးစးထီၣ်တကီၢ်ခါဖဲဟါခီ တုၤလီၤလၢမုၢ်အိၣ်ဘှံးနံၤပူၤကွံာ်ဝဲန့ၣ်လီၤ. ယပာ်လီၤယပှၤအကျါတနီၤလၢကအိၣ်ဝဲဖဲတြဲၤတဖၣ်လၢ ကမၤဝဲလီၤတံၢ်လီၤဆဲးဒ်သိးတၢ်နီတမံၤသုတဘၣ်တၢ်ဟဲစိာ်နုာ် အီၤဆူဝ့ၢ်ပူၤလၢအိၣ်ဘှံးအနံၤတဂ့ၤန့ၣ်လီၤ.

²⁰ပှၤကၤတၢ်ဖိတဖၣ်လၢအဆါကယဲၢ်တၢ်ပီးတၢ်လီတဖၣ်န့ၣ်မံဝဲ လၢဝ့ၢ်အခိၣ်ဒူအချၢတဘျီခံဘျီဖဲမုၢ်ယဲၢ်နံၤမုၢ်နၤခီလံန့ၣ်လီၤ.

²¹ယဟ့ၣ်ပလီၢ်အဝဲသ့ၣ်လၢ, “သုမံခိးတၢ်ဖဲန့ၣ်လၢမုၢ်ကဆ့ၣ်ထီၣ်အဂီၢ်န့ၣ်အဘျုးတအိၣ်ဘၣ်. သုမ့ၢ်မၤကဒီးတၢ်အံၤတဘျီန့ၣ်, ယကမၤဆူၣ်ထီၣ်ယစုထီဒါသုန့ၣ်လီၤ.” စးထီၣ်ဖဲန့ၣ်အဝဲသ့ၣ်တဟဲကဒီးဝဲလၢမုၢ်အိၣ်ဘှံးအနံၤလၢၤ ဘၣ်န့ၣ်လီၤ.

²²ယမၤလိာ်ပှၤလ့ၤဝံဖိတဖၣ်လၢကမၤကဆှီထီၣ်အသးဒၣ်ဝဲဒီးလဲၤ ဒီးခိးတြဲၤတဖၣ်လၢကမၤလီၤတံၢ်တၢ်ဒ်သိးမုၢ်အိၣ်ဘှံးနံၤ ကဘၣ်တၢ်ပာ်စီဆှံအီၤအဂီၢ်န့ၣ်လီၤ. ကစၢ်ယွၤဧၢ, သ့ၣ်နီၣ်ထီၣ်က့ၤလၢ်ယၤလၢတၢ်အံၤအဃိစ့ၢ်ကီးဒီး မၤပူၤဖျဲးလၢ်ယၤလၢနတၢ်အဲၣ်လၢအဒိၣ်ဝဲအဃိန့ၣ်တက့ၢ်.

²³လၢအကတီၢ်အဝဲန့ၣ်ယထံၣ်ဘၣ်စ့ၢ်ကီးပှၤယူဒၤဖိပိာ်ခွါအါဂၤ ဟံးန့ၢ်အမါလၢပိာ်မုၣ်တဖၣ်လၢကီၢ်အၤစဒိး, ကီၢ်ဧၣ်မိၣ်ဒီးကီၢ်မိၤအးန့ၣ်လီၤ.

²⁴အဝဲသ့ၣ်အဖိတဝာ်န့ၣ်ကတိၤပှၤအၤစဒိးအကျိာ်မ့တမ့ၢ်ကျိာ်အဂၤ ဒီးတသ့ၣ်ညါကတိၤက့ၤပကျိာ်လၢၤဘၣ်န့ၣ်လီၤ.

²⁵ယသိၣ်ဃီၣ်ပှၤပိာ်ခွါတဖၣ်န့ၣ်ဆါဆါကလဲာ်, ဒီးဆိၣ်အၢအဝဲသ့ၣ်, တီၢ်အဝဲသ့ၣ်ဒီးထဲးကွံာ်အဝဲသ့ၣ်အခိၣ်သူန့ၣ်လီၤ. ဝံၤဒီးယမၢအဝဲသ့ၣ်မၤတၢ်ဆိၣ်တမံၤလၢကစၢ်ယွၤအမံၤအပူၤလၢ အဝဲသ့ၣ်မ့ၢ်ဂ့ၤ, အဖိတဖၣ်မ့ၢ်ဂ့ၤ, တဒိးတ့ဃုာ်ဖျီဃုာ်ကဒီးအသးဒီးပှၤတခီဘီမုၢ်ဖိတဖၣ်ဘၣ်န့ၣ်လီၤ.

²⁶ယစံးဘၣ်အဝဲသ့ၣ်ဒ်အံၤ, “စီၤပၤၡလိၤမိၤမၤတၢ်ဒဲးဘးန့ၣ် မ့ၢ်လၢပှၤတခီဘီမုၢ်ဖိပိာ်မုၣ်တဖၣ်အဃိန့ၣ်လီၤ. အဝဲမ့ၢ်တ့ၢ်ပှၤတဂၤလၢအဒိၣ်န့ၢ်ကယဲၢ်ထံဧိၤကီၢ်ဧိၤအစီၤပၤ အဂၤတဖၣ်တက့ၢ်န့ၣ်လီၤ. ကစၢ်ယွၤအဲၣ်အီၤဒီးဒုးကဲထီၣ်အီၤစီၤပၤလၢကီၢ်အံၣ်စရ့လး ဒီဘ့ၣ်အဖီခိၣ်ဘၣ်ဆၣ်အဝဲလီၤတဲာ်ဆူတၢ်ဒဲးဘးအံၤအပူၤန့ၣ်လီၤ.

²⁷မ့ၢ်ပဝဲပကပိာ်ထွဲအဝဲအဒိအတဲာ်ဒီးတစူၢ်ဘၣ်ပကစၢ်ယွၤခီဖျိ တၢ်ဒိးတ့ဒိးဖျီသးဒီးပှၤတခီဘီမုၢ်ဖိပိာ်မုၣ်တဖၣ်န့ၣ်ဧါ.

²⁸စီၤယဟိယဒါမ့ၢ်ပှၤလုၢ်တၢ်အခိၣ်အဒိၣ်ကတၢၢ်စီၤအ့လယၤၡံာ်အဖိ ခွါ, ဘၣ်ဆၣ်, စီၤယဟိယဒါအဖိခွါတဖၣ်အကျါတဂၤဒိးတ့ဒိးဖျီအသး ဒီးစီၤစၤနဘလးလၢဝ့ၢ်ဃိရၣ်တခီအဖိမုၣ်အဃိယဟီထီၣ် ကွံာ်စီၤယဟိယဒါလၢဝ့ၢ်ယရူၤရှလ့ၣ်န့ၣ်လီၤ.

²⁹ကစၢ်ယွၤဧၢ, သ့ၣ်နီၣ်ထီၣ်က့ၤပှၤဂီၢ်မုၢ်တဖၣ်အံၤမၤဘၣ်အၢပှၤ လုၢ်တၢ်အခိၣ်အတၢ်ဖံးတၢ်မၤဒီးတၢ်အၢၣ်လီၤအီလီၤလၢနမၤဒီး ပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ်န့ၣ်ဒ်လဲၣ်တက့ၢ်.

³⁰ယမၤကဆှီထီၣ်က့ၤပှၤဂီၢ်မုၢ်လၢကယဲၢ်တၢ်လၢအဘၣ်ဃးဒီးပှၤတခီ ဘီမုၢ်ဖိ, ယကတဲာ်ကတီၤတၢ်သိၣ်တၢ်ဘျၢတဖၣ်လၢပှၤလုၢ်တၢ်အခိၣ်တဖၣ်ဒီးပှၤ လ့ၤဝံဖိတဖၣ်အဂီၢ်ဒ်သိးအဝဲသ့ၣ်တဂၤဘၣ်တဂၤကသ့ၣ်ညါအမူအဒါ,

³¹ယကတဲာ်ကတီၤသ့ၣ်လၢတၢ်ကသူအီၤလၢတၢ်ဆိၣ်ကဲၤတၢ်လုၢ်တၢ်ပာ်တဖၣ် အဂီၢ်လၢတၢ်ဟဲကစိာ်အီၤဘၣ်ဆၢဘၣ်ကတီၢ်, ဒီးပှၤဂီၢ်မုၢ်လၢကဟဲစိာ်အတၢ်လုၢ်တၢ်ပာ်တဖၣ်လၢအမ့ၢ်ဘုခ့အ ဆိကတၢၢ်ဒီးအတၤသၣ်တဖၣ်လၢအမံထီၣ်အဆိကတၢၢ်န့ၣ်လီၤ. ကစၢ်ယွၤဧၢ, သ့ၣ်နီၣ်ထီၣ်တၢ်တဖၣ်အံၤခဲလၢာ်ဒီးမၤဘျုးလၢ်ဘၣ် ယၤလၢအဃိန့ၣ်တက့ၢ်.