Read S'gaw Karen လံာ်စီၤနဃ့မယၤ 2 Bible Online

လံာ်စီၤနဃ့မယၤ 2 - S'gaw Karen bible

လံာ်စီၤနဃ့မယၤ 2

¹ဒီးလၢစီၤပၤဖးဒိၣ်အၢ်တၤၡါၡတၤအနံၣ်ပှဲၤထီၣ်ခံဆံနံၣ် တနံၣ်လါနံစၣ်အပူၤ, မုၢ်တနံၤဖဲစီၤပၤအီၣ်တၢ်အကတီၢ်န့ၣ်ယဟဲစိာ်န့ၢ်အီၤစပံးထံလီၤ. အဝဲတထံၣ်ဝဲယမဲာ်လီၤသပှၢ်တ့ၢ်ဒ်သိးအံၤနီတဘျီဘၣ်.

²ဒီးအဝဲသံကွၢ်ယၤ “နမဲာ်လီၤသပှၢ်မ့ၢ်အဘၣ်မနုၤလဲၣ်. နတဆူးတဆါဘၣ်. ဒီးကမ့ၢ်ဒၣ်နတသးဖှံအဃိန့ၣ်လီၤ.” ဒီးယပျံၤတၢ်ဒိၣ်ဒိၣ်ကလဲာ်လီၤ.

³ဒီးယစံးဆၢစီၤပၤ, “မ်ယစီၤပၤဖးဒိၣ်မူဝဲလီၤထူလီၤယိာ်တက့ၢ်. ဝ့ၢ်တဖျၢၣ်လၢယမိၢ်ပၢ်ဖံဖုလၢပျၢၤတဖၣ်ဘၣ်တၢ်ခူၣ်လီၤတ့ၢ်အီၤ အံၤအိၣ်လၢတၢ်ဟးဂူာ်ဟးဂီၤအပူၤဒီးအပဲတရီတဖၣ်ဘၣ်တၢ်မၤဟး ဂီၤကွံာ်အီၤလၢမ့ၣ်အူန့ၣ်, ယမဲာ်တလီၤသပှၢ်ဘၣ်န့ၣ်ယအိၣ်ကသ့ဒ်လဲၣ်.”

⁴ဒီးစီၤပၤဖးဒိၣ်သံကွၢ်ယၤ “နသးလီတၢ်မနုၤလဲၣ်.” ယဘါထုကဖၣ်တၢ်ဆူကစၢ်ယွၤလၢအအိၣ်လၢမူခိၣ်လီၤ.

⁵ဒီးယစံးဘၣ်စီၤပၤဖးဒိၣ် “မ့ၢ်ဘၣ်စီၤပၤဖးဒိၣ်အသး, ဒီးသးအိၣ်ဟ့ၣ်တၢ်လၢယဃ့န့ၣ်, ပျဲယလဲၤဆူကီၢ်ယူဒၤ, ဆူဝ့ၢ်လၢယမိၢ်ပၢ်ဖံဖုလၢပျၢၤတဖၣ်ဘၣ်တၢ်ခူၣ်လီၤအီၤဒ်သိး ယသူၣ်ထီၣ်ကဒါက့ၤအီၤကသ့အဂီၢ်တက့ၢ်.”

⁶ဒီးစီၤပၤဖးဒိၣ်ဃုာ်ဒီးနီၢ်ပၤမုၣ်လၢအဆ့ၣ်နီၤလၢအကပၤဘၣ် အသးလီၤ. ဒီးသံကွၢ်ယၤ, “နကလဲၤအခါဖဲလဲၣ်.” ဒီးယသ့ၣ်ဆၢဖးကတီၢ်လၢအဂီၢ်လီၤ.

⁷ဒီးယဃ့လၢကဟ့ၣ်ယၤလံာ်ပရၢတဖၣ်ဆူထံကျိဖရၤသးအမုၢ်နုာ်လီၢ် ကဝီၤအပဒိၣ်ဖးဒိၣ်တဖၣ်အအိၣ်ဒီးတဲဘၣ်အဝဲသ့ၣ်လၢကပျဲယလဲၤတၢ် လၢကီၢ်ယူဒၤအပူၤန့ၣ်လီၤ.

⁸ဒီးယဃ့စ့ၢ်ကီးစီၤပၤလၢကကွဲးန့ၢ်ယၤလံာ်ပရၢတဘ့ၣ်ဆူပှၤ ပၢၤစီၤပၤအသ့ၣ်ပှၢ်စီၤအၤစာ်အအိၣ်ဒီးမၢအီၤလၢအကဟ့ၣ်ယၤသ့ၣ် လၢယွၤအတၢ်လုၢ်ဟံၣ်အဃၢၤတိာ်လၢအဒီသဒၢအီၤအကျဲစၢၤတဖၣ်အထူၣ် အဂီၢ်, ဒီးလၢဝ့ၢ်အခိၣ်ဒူအဂီၢ်ဒီးလၢဟံၣ်လၢယကအိၣ်အဂီၢ်န့ၣ်လီၤ. ဒီးစီၤပၤဟ့ၣ်ယၤကယဲၢ်တၢ်လၢယဃ့ယဲခဲလၢာ်မ့ၢ်လၢကစၢ်ယွၤ အိၣ်ဒီးယၤအဃိန့ၣ်လီၤ.

⁹ဒီးစီၤပၤဖးဒိၣ်ဆှၢလီၤပှၤသုးဖိအခိၣ်တနီၤဒီးပှၤကသ့ၣ် သုးဖိတနီၤဃုာ်ဒီးယၤဒီးယလဲၤဆူဖရၤသးအမုၢ်နုာ်န့ၣ်လီၤ. ဒီးယဟ့ၣ်လီၤစီၤပၤအလံာ်တဖၣ်ဆူပဒိၣ်တဖၣ်အအိၣ်လီၤ.

¹⁰ဒီးတုၤပှၤဃိရၣ်ဖိစီၤစၤနဘၤလး, ပှၤဧၣ်မိၣ်ဖိအပဒိၣ်စီၤ တိၤဘံယၤနၢ်ဟူဝဲဒၣ်လၢပှၤတဂၤဟဲဝဲဒၣ်လၢပှၤအံၣ်စရ့လးဖိ အတၢ်ဂ့ၤအဂီၢ်န့ၣ်အဝဲသ့ၣ်အသူၣ်ဒိၣ်အသးဖျိးဒိၣ်မးန့ၣ်လီၤ.

¹¹ဒီးယလဲၤဆူဝ့ၢ်ယရူၤၡလ့ၣ်ဒီးယအိၣ်ဖဲန့ၣ်သၢနံၤလီၤ.

¹²ယတတဲပှၤနီတဂၤလၢတၢ်လၢကစၢ်ယွၤဟ့ၣ်ဂံၢ်ဟ့ၣ်ဘါ ယၤလၢယကမၤတၢ်လၢဝ့ၢ်ယရူၤၡလ့ၣ်အဂီၢ်န့ၣ်ဘၣ်. ဒီးလၢမုၢ်နၤဖးဖီမုၢ်အကတီၢ်န့ၣ်ယဂဲၤဆၢထၢၣ်ဒီးဟးထီၣ်ဆူ တၢ်ချၢဃုာ်ဒီးယတံၤသကိးတနီၤန့ၣ်လီၤ. ဒီးမ့တမ့ၢ်ဘၣ်လၢကသ့ၣ်ယီၤတဒုလၢယဒိးအီၤဘၣ်န့ၣ်ဆၣ်ဖိ ကီၢ်ဖိအဂုၤအဂၤတအိၣ်ဒီးယၤဘၣ်.

¹³ဒီးယဟးထီၣ်လၢမုၢ်နၤလၢကစၢၢ်ကဆူးအပဲတရီလၢမုၢ်နုာ်ဆူ ကလံၤထံးပယိၤအထံထီၣ်ပၢၢ်ဒီးဆူတၢ်အ့ၣ်အပဲတရီန့ၣ်လီၤ. ဒီးဖဲယလဲၤတၢ်အကတီၢ်န့ၣ်ယကွၢ်ဝ့ၢ်အခိၣ်ဒူလၢအလီၤပှီၢ်သ့ၣ် တဖၣ်ဒီးဝ့ၢ်အပဲတရီတဖၣ်လၢအဘၣ်တၢ်ဆူးထီၣ်ကွံာ် အီၤလၢမ့ၣ်အူန့ၣ်လီၤ.

¹⁴ဒီးယအိၣ်လၢဝ့ၢ်အမုၢ်ထီၣ်တကပၤ, ဒီးယလဲၤဆူကလံၤစိးဆူ ထံထီၣ်ပၢၤအပဲတရီဒီးစီၤပၤအနိၣ်န့ၣ်လီၤ. ကသ့ၣ်ယီၤလၢယဒိးအီၤတဒုန့ၣ်ကလဲၤတၢ်ဆူညါအဂီၢ်ကျဲ တအိၣ်ဘၣ်.

¹⁵ဒီးယလဲၤထီၣ်လၢမုၢ်နၤဆူကစၢၢ်ကဆူးဒီးကွၢ်ဝ့ၢ်အခိၣ်ဒူန့ၣ် လီၤ. ဒီးယဃၣ်ကဒါက့ၤ, ဒီးဟဲက့ၤနုာ်လၢကစၢၢ်ကဆူးအပဲတရီ ဒီးဟဲက့ၤကဒါက့ၤန့ၣ်လီၤ.

¹⁶ဒီးပဒိၣ်တဖၣ်တသ့ၣ်ညါယလဲၤဖဲန့ၣ်မ့ၢ်ဂ့ၤယမၤတၢ်မနုၤလဲၣ်မ့ၢ် ဂ့ၤန့ၣ်ဘၣ်. ဒီးပှၤယူဒၤဖိဂ့ၤ, ပှၤလုၢ်တၢ်အခိၣ်ဂ့ၤ, ပှၤတူၢ်ဒိၣ်ကီၤဒိၣ်ဂ့ၤ, ပဒိၣ်ပပှၢ်ဂ့ၤဒီးပှၤအိၣ်လီၤတဲာ်လၢကမၤတၢ်သ့ၣ်တဖၣ်ဂ့ၤ ယတတဲဘၣ်အဝဲသ့ၣ်တၢ်နီတမံၤဘၣ်.

¹⁷တုၤနုၤတစုယစံးဘၣ်အဝဲသ့ၣ် “သုထံၣ်တၢ်ကိၢ်တၢ်ဂီၤလၢပအိၣ်လၢ အပူၤလီၤ. အဂ့ၢ်ဒ်အံၤ, ဝ့ၢ်ယရူၤၡလ့ၣ်ဟးဂီၤလံ. ဒီးအပဲတရီတဖၣ်ဘၣ်တၢ်ဆူးထီၣ်ကွံာ်အီၤလၢမ့ၣ်အူလံ. ဟဲဘှီထီၣ်ကဒါက့ၤဝ့ၢ်ယရူၤၡလ့ၣ်အခိၣ်ဒူဒ်သိးပသုတကဲ လၢၤတၢ်ဒုၣ်ဒွဲၣ်အလီၢ်တဂ့ၤန့ၣ်တက့ၢ်.”

¹⁸ဒီးယတဲဘၣ်အဝဲသ့ၣ်လၢကစၢ်ယွၤအိၣ်ဒီးယၤဒီးမၤစၢၤယၤဒ် လဲၣ်, ဒီးစီၤပၤတဲယၤဒ်လဲၣ်န့ၣ်လီၤ. ဒီးအဝဲသ့ၣ်စံးဆၢဝဲ, “မ်ပကဘှီထီၣ်ကဒါက့ၤသကိးတၢ်တ က့ၢ်.” ဒီးအဝဲသ့ၣ်အိၣ်ကတဲာ်ကတီၤအသးလၢကမၤတၢ်န့ၣ်လီၤ.

¹⁹ဒီးတုၤစီၤစၤနဘၤလး, စီၤတိၤဘံယၤဒီးပှၤဧ့ရ့းဖိစီၤ က့ၤၡ့ၣ်နၢ်ဟူဝဲတၢ်လၢပသုးကျဲၤလၢပကမၤအီၤန့ၣ်အဝဲသ့ၣ်နံၤ ဘၣ်ပှၤဒီးစံးဝဲ, “တၢ်လၢသုကမၤန့ၣ်သုဆိကမိၣ်လၢအမ့ၢ်တၢ်မနုၤလဲၣ်. မ့ၢ်သုကပူထီၣ်ထီဒါစီၤပၤဖးဒိၣ်န့ၣ်ဧါ.”

²⁰ဒီးယစံးဆၢတၢ်ဒီးစံးဘၣ်အီၤ “ကစၢ်ယွၤလၢမူခိၣ်ကဟ့ၣ်ပှၤတၢ် မၤနၢၤန့ၣ်လီၤ. ပမ့ၢ်အခ့အပှၤဒီးပကဘှီထီၣ်တၢ်လီၤ. မ့မ့ၢ်သုဝဲဒၣ်န့ၣ်သုတအိၣ်ဒီးတၢ်န့ၢ်သါမ့ၢ်ဂ့ၤ, တၢ်ခွဲးတၢ်ယာ်လၢတၢ်ကသ့ၣ်နီၣ်ထီၣ်သုမ့ၢ်ဂ့ၤလၢဝ့ၢ်ယရူၤၡလ့ၣ် အပူၤန့ၣ်ဘၣ်.”