Read S'gaw Karen လံာ်စီၤနဃ့မယၤ 4 Bible Online

လံာ်စီၤနဃ့မယၤ 4 - S'gaw Karen bible

လံာ်စီၤနဃ့မယၤ 4

¹ဒီးတုၤစီၤစၤနဘၤလးနၢ်ဟူဝဲဒၣ်လၢပဝဲပှၤယူဒၤဖိတဖၣ်ပစး ထီၣ်ဘှီကဒါက့ၤဝ့ၢ်ခိၣ်ဒူန့ၣ်အသးထီၣ်ဝဲဒီးစးထီၣ်နံၤဘၣ် ဖၣ်လဲပှၤန့ၣ်လီၤ.

²ဒီးလၢအတံၤသကိးသ့ၣ်တဖၣ်, ဒီးၡၤမရံအပှၤသုးဖိသ့ၣ်တဖၣ် အမဲာ်ညါန့ၣ်စံးဝဲ, “ပှၤယူဒၤဖိလၢအတဂိာ်တသီၣ်တၢ်သ့ၣ်တဖၣ်အံၤမ့ၢ်အဆိကမိၣ်ဝဲ လၢအမၤတၢ်မနူၤန့ၣ်လဲၣ်. မ့ၢ်အဝဲသ့ၣ်အဲၣ်ဒိးသူၣ်ထီၣ်ကဒါက့ၤဝ့ၢ်န့ၣ်ဧါ. မ့ၢ်အဆိကမိၣ်ဝဲဒၣ်လၢခီဖျိအတၢ်လုၢ်ထီၣ်ပာ်ထီၣ်တၢ်န့ၣ်မၤတၢ် လၢတနံၤဃီအတီၢ်ပူၤကဝံၤန့ၣ်ဧါ. မ့ၢ်အမၤကဲထီၣ်လၢၢ်လၢတၢ်တဂိာ်တသီၣ်လၢမ့ၣ်အူအီၣ်အီၤအကျါ န့ၣ်ကသ့စ့ၢ်ကီးဧါ.”

³ဒီးပှၤဧၣ်မိၣ်ဖိစီၤတိၤဘံယၤဆၢထၢၣ်ဖဲန့ၣ်လၢအကပၤဒီးစံး ဝဲဒၣ် “ဝ့ၢ်ခိၣ်ဒူလၢအမၤဝဲန့ၣ်မ့ၢ်မနုၤလဲၣ်. ထွံၣ်ဟီၣ်ခိၣ်တဒုဒၣ်လဲာ်မၤလီၤပှီၢ်ကွံာ်သ့ဝဲဒၣ်န့ၣ်လီၤ.”

⁴ဒီးယဘါထုကဖၣ်ယဲ “ကစၢ်ယွၤဧၢ, ကနၣ်လၢ်တက့ၢ်. အဂ့ၢ်ဒ်အံၤ, ပဘၣ်တၢ်မၤတရီတပါပှၤလီၤ. မ်အတၢ်ကတိၤဒုၣ်ဒွဲၣ်လီၤဘၣ်က့ၤလၢအခိၣ်ဒၣ်ဝဲအလိၤန့ၣ်တ က့ၢ်. မ်ကယဲၢ်တၢ်လၢအအိၣ်ဒီးအီၤဘၣ်တၢ်ဂုာ်န့ၢ်ဒီးမ်အဘၣ်တၢ်စိာ် ကွံာ်အီၤဆူပှၤဂၤအထံအကီၢ်ဒ်ပှၤဘၣ်တၢ်ဖီၣ်န့ၢ်အီၤအသိးန့ၣ်တ က့ၢ်.

⁵ပျၢ်ကွံာ်တၢ်အၢလၢအမၤဝဲဒီးသးပ့ၤနီၣ်ကွံာ်အတၢ်ဒဲးဘးတဖၣ် န့ၣ်တဂ့ၤ. အဂ့ၢ်ဒ်အံၤ, အဝဲသ့ၣ်မၤတရီတပါပဝဲလၢပမ့ၢ်ပှၤဘှီထီၣ်တၢ်တဖၣ်န့ၣ်လီၤ.”

⁶ဒီးပဘှီဝ့ၢ်ခိၣ်ဒူဒီးဝံၤဝဲတုၤအကစီၤထီၣ်အဖးဖီမ့ၢ်လၢ ပှၤဂီၢ်မုၢ်တဖၣ်အိၣ်ဒီးတၢ်သးဆူၣ်လၢကမၤတၢ်အဂီၢ်အဃိန့ၣ်လီၤ.

⁷ဒီးတုၤစီၤစၤနဘၤလး, စီၤတိၤဘံယၤ, ပှၤဧ့ရ့းဖိ, ဒီးပှၤအၤစဒိးဖိသ့ၣ်တဖၣ်နၢ်ဟူဝဲဒၣ်လၢပအိၣ်ဒီးပတၢ်မၤအတၢ် လဲၤထီၣ်လဲၤထီလၢတၢ်ဘှီထီၣ်ကဒါက့ၤဝ့ၢ်ယရူၤၡလ့ၣ်အခိၣ်ဒူ ဒီးတၢ်ဘၢၣ်ဖျိအိၣ်လၢဝ့ၢ်ခိၣ်ဒူဘၣ်တၢ်ကးတံၢ်အီၤန့ၣ်အဝဲ သ့ၣ်အသးထီၣ်ဝဲဒိၣ်ဒိၣ်ကလဲာ်န့ၣ်လီၤ.

⁸ဒီးလၢတၢ်န့ၣ်အဃိအဝဲသ့ၣ်ခဲလၢာ်ကူၣ်ဝဲဒၣ်လၢကဟဲထီဒါဝ့ၢ် ယရူၤရှလ့ၣ်ဒီးဒုးအိၣ်ထီၣ်တၢ်သဘံၣ်ဘုၣ်န့ၣ်လီၤ.

⁹ဘၣ်ဆၣ်ပဘါထုကဖၣ်ဆူကစၢ်ယွၤဒီးပာ်လီၤပှၤလၢအခိးထီဒါအဝဲ သ့ၣ်လၢနံၤဒီးနၤန့ၣ်လီၤ.

¹⁰ဒီးပှၤယူဒၤဖိအိၣ်ဒီးတၢ်သးဝံၣ်လၢအသးဝံၣ်ဝဲ, “ပလီၤဘှံးလၢပတၢ်ဝံတၢ်ယိးအဃိလံဒီး ပအိၣ်ဒီးလၢၢ်အက့အခီတဖၣ်လၢပကဘၣ် စိာ်ကွံာ်အီၤလီၤ. တနံၤအံၤပသူၣ်ထီၣ်ဝ့ၢ်ခိၣ်ဒူကသ့ဒ်လဲၣ်.”

¹¹ပဒုၣ်ပဒါတဖၣ်ဆိကမိၣ်ဝဲဒၣ်လၢပတထံၣ်အဝဲသ့ၣ်မ့ၢ်ဂ့ၤ, ပတသ့ၣ်ညါလၢတၢ်မၤအသးတုၤလၢအဝဲသ့ၣ်ကအိၣ်လၢပလိၤ, ဒီးမၤသံပှၤ, ဒီးမၤကတၢၢ်ကွံာ်ပတၢ်မၤမ့ၢ်ဂ့ၤန့ၣ်ဘၣ်လီၤ.

¹²ဒီးတကတီၢ်ဘၣ်တကတီၢ်ပှၤယူဒၤဖိလၢအအိၣ်လၢပဒုၣ်ပဒါတဖၣ် အကျါဟဲဟ့ၣ်ပလီၢ်ပှၤလၢပဒုၣ်ပဒါအတၢ်ကူၣ်ကျဲၤထီဒါပှၤန့ၣ်လီၤ.

¹³ဒီးလၢတၢ်န့ၣ်အဃိဝ့ၢ်ခိၣ်ဒူမ့ၢ်တဝံၤဒံးဒၣ်လဲာ်ယပာ်လီၤပှၤ ဂီၢ်မုၢ်ဒ်အဒူၣ်ထၢဒၣ်ဝဲလၢဝ့ၢ်ခိၣ်ဒူအလီၢ်ခံအိၣ်ဒီးအနး, အဘီဒီးအချံၣ်န့ၣ်လီၤ.

¹⁴ဒီးယထံၣ်လၢပှၤဂီၢ်မုၢ်တဖၣ်ဘၣ်ယိၣ်ဘၣ်ဘှီတၢ်န့ၣ်လီၤ. လၢတၢ်န့ၣ်အဃိယစံးဘၣ်အဝဲသ့ၣ်, အခိၣ်အနၢ်တဖၣ်ဒီးအပဒိၣ်တဖၣ်, “ပျံၤပဒုၣ်ပဒါတဂ့ၤ. သ့ၣ်နီၣ်ထီၣ်လၢယွၤန့ၣ်ဒိၣ်ဝဲဒီးလီၤပျံၤထဲလဲၣ်န့ၣ်တက့ၢ်. ဒီးဒုးတၢ်လၢသုထံဖိကီၢ်ဖိသ့ၣ်တဖၣ်, သုဖိသုလံၤသ့ၣ်တဖၣ်, သုမါတဖၣ်ဒီးသုဟံၣ်တဖၣ်အဂီၢ်န့ၣ်တက့ၢ်.”

¹⁵ဒီးပဒုၣ်ပဒါသ့ၣ်တဖၣ်နၢ်ဟူဝဲဒၣ်လၢပသ့ၣ်ညါတၢ်လၢအဝဲသ့ၣ် ကူၣ်ဝဲ, ဒီးအဝဲသ့ၣ်နၢ်ပၢၢ်ဝဲဒၣ်လၢကစၢ်ယွၤမၤနၢၤအဝဲသ့ၣ်အတၢ်သုး တၢ်ကျဲၤတဖၣ်လံန့ၣ်လီၤ. ဒီးပဝဲခဲလၢာ်ပက့ၤကဒါက့ၤဆူတၢ်ဘှီထီၣ်ကဒါက့ၤဝ့ၢ်ခိၣ်ဒူန့ၣ်လီၤ.

¹⁶ဒီးစးထီၣ်ဖဲန့ၣ်ယပှၤမၤတၢ်ဖိတဝာ်မၤတၢ်ဒီးအတဝာ်ခိးတၢ်ဒီး သိးထီၣ်စုကဝဲၤအိၣ်ဒီးဘီ, ကတီၤဒီးချံၣ်န့ၣ်လီၤ.

¹⁷ဒီးပခိၣ်ပနၢ်တဖၣ်မၤစၢၤပှၤဂီၢ်မုၢ်လၢအဘှီဝ့ၢ်ခိၣ်ဒူတဖၣ်လၢ လၢပှဲၤပှဲၤန့ၣ်လီၤ. ပှၤလၢအမၤတၢ်သ့ၣ်တဖၣ်ဒၣ်လဲာ်စိာ်ဝဲတၢ်ပီးတၢ်လီလၢတၢ်သူၣ် ထီၣ်ဘှီထီၣ်အဂီၢ်လၢအစုတခီဒီးအတခီန့ၣ်ဖီၣ်ဝဲစုကဝဲၤန့ၣ်လီၤ.

¹⁸ဒီးကယဲၢ်ပှၤလၢအမၤတၢ်သ့ၣ်တဖၣ်အနးကံာ်တူာ်အသးလၢ အကပၤစုာ်စုာ်န့ၣ်လီၤ. ဒီးပှၤလၢအအူကွဲၤလၢတၢ်ဟ့ၣ်ပလီၢ်အဂီၢ်အိၣ်ဒီးယၤန့ၣ်လီၤ.

¹⁹ဒီးယတဲဘၣ်ပှၤဂီၢ်မုၢ်, အပဒိၣ်တဖၣ်ဒီးအခိၣ်အနၢ်တဖၣ်, “တၢ်မၤရၤလီၤအသးဆူတၢ်လီၢ်အယံၤဒီးပလီၤဖးလိာ်ပသး တဂၤဒီးတဂၤလၢဝ့ၢ်ခိၣ်ဒူအလိၤန့ၣ်လီၤ.

²⁰ဒီးသုမ့ၢ်နၢ်ဟူကွဲၤအသီၣ်န့ၣ်ဟဲပာ်ဖှိၣ်သုသးလၢယအိၣ်တ က့ၢ်. ပကစၢ်ယွၤကဒုးတၢ်လၢပဂီၢ်န့ၣ်လီၤ.”

²¹ဒီးလၢတၢ်န့ၣ်အဃိကိးမုၢ်နံၤဒဲးစးထီၣ်လၢမုၢ်ဂီၤတုၤလီၤ လၢမုၢ်ဟါဆၣ်သ့ၣ်တဖၣ်ဖျါထီၣ်ဝဲန့ၣ်, ပပှၤတဝာ်ကမၤတၢ်လၢဝ့ၢ်ခိၣ်ဒူအလိၤဒီးအဂၤတဝာ်ကခိးတၢ်အိၣ် ဒီးဘီန့ၣ်လီၤ.

²²ဒီးလၢအကတီၢ်အံၤန့ၣ်ယတဲဘၣ်ပှၤကွၢ်ထွဲတၢ်မၤသ့ၣ်တဖၣ်လၢအဝဲ သ့ၣ်ဒီးပှၤမၤစၢၤအဝဲသ့ၣ်ကအိၣ်လၢဝ့ၢ်ယရူၤၡလ့ၣ်လၢမုၢ်နၤဒ် သိးပကကွၢ်ထွဲဝ့ၢ်လၢမုၢ်နၤဒ်ပမၤတၢ်လၢမုၢ်ဆါအဆၢကတီၢ်အသိး န့ၣ်လီၤ.

²³ဒီးယၤမ့ၢ်ဂ့ၤ, ယတံၤသကိးသ့ၣ်တဖၣ်မ့ၢ်ဂ့ၤ, ယခ့ယပှၤတဖၣ်မ့ၢ်ဂ့ၤ, ပှၤကွၢ်ထွဲယၤမ့ၢ်ဂ့ၤလၢမုၢ်နၤအကတီၢ်ဒၣ်လဲာ်ပတဘ့ၣ်လီၤပကူ ပသိးဘၣ်. ဒီးပဝဲခဲလၢာ်ပဟံးဃာ်ပစုကဝဲၤလၢပစုပူၤန့ၣ်လီၤ.