Read S'gaw Karen လံာ်နီၢ်အ့ၤစတၢ် 3 Bible Online

လံာ်နီၢ်အ့ၤစတၢ် 3 - S'gaw Karen bible

လံာ်နီၢ်အ့ၤစတၢ် 3

¹တၢ်န့ၣ်တဖၣ်အလီၢ်ခံ, စီၤပၤအဃၤၡဝ့ရိၣ်သုးထီထီၣ်ပှၤအကၤကးဖိ စီၤဟးမဒၤသၤအဖိခွါစီၤဟၤမၣ်အလီၢ်အလၤဆူကိတိာ်ခိၣ်ကျၢၢ်လီၤ.

²စီၤပၤဟ့ၣ်လီၤအကလုၢ်ဒ်သိးအပဒိၣ်ပပှၢ်ခဲလၢာ်လၢအမၤ တၢ်လၢအနီပူၤကဘၣ်ပာ်ဖျါတၢ်ဟ့ၣ်တၢ် ယူးယီၣ်ဆူစီၤဟၤမၣ်ခီဖျိတၢ်တီၤလီၤကဒွံကျိာ်ဒီးတၢ်သကူး လီၤအသးလၢအမဲာ်ညါန့ၣ်လီၤ. မ့တမ့ၢ်ဘၣ်လၢစီၤမၢ်ဒကဲၤဘၣ်ဒီး, ပှၤအဂၤခဲလၢာ်မၤဝဲဒ်န့ၣ်လီၤ.

³စီၤပၤအပဒိၣ်ပပှၢ်တဖၣ်လၢအမၤတၢ်လၢနီပူၤသံကွၢ်စီၤမၢ်ဒကဲၤ ဘၣ်မနုၤနတဒိကနၣ်စီၤပၤအတၢ်မၤလိာ်လဲၣ်အဂ့ၢ်လီၤ.

⁴တနံၤဘၣ်တနံၤအဝဲသ့ၣ်မၢန့ၢ်ဆီၣ်ခံအီၤဘၣ်ဆၣ်အဝဲတဒိက နၣ်အဝဲသ့ၣ်ဘၣ်. အဝဲစံးဘၣ်အဝဲသ့ၣ်, “ယမ့ၢ်ပှၤယူဒၤဖိ တဂၤလီၤ. ယတီၤလီၤလၢစီၤဟၤမၣ်အမဲာ်ညါတသ့ဘၣ်.” လၢတၢ်န့ၣ်အဃိအဝဲသ့ၣ်တဲဘၣ်စီၤဟၤမၣ်လၢတၢ်ဂ့ၢ်အံၤ, ဒ်သိးကသ့ၣ်ညါဘၣ်ဝဲလၢမ့ၢ်စီၤမၢ်ဒကဲၤအိၣ်ဂၢၢ်ကျၢၤလၢအတၢ် ကတိၤဧါ, မ့တမ့ၢ်တအိၣ်ဂၢၢ်ကျၢၤလၢအတၢ်ကတိၤဘၣ်လဲၣ်န့ၣ်လီၤ.

⁵တုၤစီၤဟၤမၣ်ထံၣ်သ့ၣ်ညါဘၣ်ဝဲလၢစီၤမၢ်ဒကဲၤတတီၤလီၤ ကဒွံကျိာ်ဒီးသကူးလီၤအသးလၢအမဲာ်ညါန့ၣ်အဝဲအသးဒိၣ် ထီၣ်ဒိၣ်ဒိၣ်ကလဲာ်လီၤ.

⁶ဒီးတုၤအသ့ၣ်ညါဘၣ်ဝဲလၢစီၤမၢ်ဒကဲၤမ့ၢ်ပှၤယူဒၤဖိတဂၤန့ၣ်, အဝဲပာ်လီၤအသးလၢကမၤတၢ်အါန့ၢ်ကစံၣ်ညီၣ်စီၤမၢ်ဒကဲၤ ထဲတဂၤဧိၤတက့ၢ်န့ၣ်လီၤ. အဝဲကူၣ်ထီၣ်ဖးလီၤလၢကမၤသံကယဲၢ်ပှၤ ယူဒၤဖိခဲလၢာ်လၢကီၢ်ပၤရၣ်အဘီအမုၢ်ဒီဘ့ၣ်ညါအပူၤန့ၣ်လီၤ.

⁷လၢစီၤပၤအဃၤၡဝ့ရိၣ်ပၢတၢ်တဆံခံနံၣ်တနံၣ်, လါအခီၣ် ထံးတလါလၢအမ့ၢ်လါနံစၣ်အပူၤန့ၣ်, စီၤဟၤမၣ်ဟ့ၣ်လီၤ အကလုၢ်လၢတၢ်ကတ့ၢ်လီၤတၢ်ဖးတဖၣ်လၢအဘၣ်တၢ်ကိး အီၤလၢပူရးဒ်သိးကထံၣ်န့ၢ်နံၤသီဒီးလါအကြၢးကတၢၢ် လၢကမၤဝဲအတၢ်ကူၣ်ခူသူၣ်အဂီၢ်န့ၣ်လီၤ. ဒီးတၢ်ဖးလီၤဘၣ်ဝဲလၢလါတဆံခံလါတလါလၢအမ့ၢ်လါ အးဒၢ်ထီၣ်တဆံသၢနံၤတနံၤန့ၣ်လီၤ.

⁸လၢတၢ်န့ၣ်အဃိစီၤဟၤမၣ်တဲဘၣ်စီၤပၤ, “ပှၤအိၣ်ဝဲဒၣ်တကလုာ်လၢအအိၣ်လီၤပြံလီၤပြါလၢနဘီနမုၢ်ဒီ ဘ့ၣ်ညါအပူၤန့ၣ်လီၤ. အဝဲသ့ၣ်အိၣ်ဒီးအလုၢ်အလၢ်အတၢ်ဆဲးတၢ်လၤတဖၣ်လၢအတ ဒ်သိးဒီးပှၤဘၣ်န့ၣ်လီၤ. အါန့ၣ်အန့ၣ်, အဝဲသ့ၣ်တဒိကနၣ်ဘီ မုၢ်အတၢ်သိၣ်တၢ်သီတဖၣ်ဘၣ်. ဒီးနတကြၢးသူၣ်အိၣ်သးအိၣ်အဝဲသ့ၣ်ဒီးပျဲအဝဲသ့ၣ်ကမၤဒ် အလုၢ်အလၢ်အိၣ်အသိးန့ၣ်ဘၣ်.

⁹မ့ၢ်ဘၣ်စီၤပၤအသးဒီးမ်စီၤပၤကဟ့ၣ်လီၤအကလုၢ်လၢအဝဲ သ့ၣ်ကဘၣ်တၢ်မၤသံအီၤအဂီၢ်န့ၣ်တက့ၢ်. နမ့ၢ်မၤဒ်န့ၣ်ဒီး, ယအုၣ်ခီၣ်ယသးလၢယကဟ့ၣ်စ့အကံကၢ်သၢကလးကလီၢ်ဆူစီၤပၤ အတၢ်ပာ်ဖှိၣ်အလီၢ်လၢဘီမုၢ်အတၢ်ပၢတၢ်ပြးအဂီၢ်န့ၣ်လီၤ.”

¹⁰စီၤပၤဘ့ၣ်လီၤအပသံးလၢအဘၣ်တၢ်သူအီၤဒ်တၢ်စဲပနီၣ်လၢ အဘၣ်ဃးဒီးပဒိၣ်ပပှၢ်အတၢ်ဘိးဘၣ်သ့ၣ်ညါ, ဒီးဟ့ၣ်လီၤဝဲ ဆူပှၤအကၤကးဖိ, စီၤဟးမဒၤသၤအဖိခွါစီၤဟၤမၣ်လၢ အမ့ၢ်ပှၤယူဒၤဖိအဒုၣ်အဒါအစုပူၤန့ၣ်လီၤ.

¹¹စီၤပၤတဲဘၣ်အီၤ, “ပှၤဂီၢ်မုၢ်ဒီးအကျိၣ်အစ့န့ၣ်မ့ၢ်နတၢ်လီၤ. မၤဒ်အဂ့ၤလၢနမဲာ်အသိးန့ၣ်တက့ၢ်.”

¹²လၢတၢ်န့ၣ်အဃိ, လၢလါအခီၣ်ထံးတလါထီၣ်တဆံသၢ သီတနံၤန့ၣ်, စီၤဟၤမၣ်ကိးန့ၢ်စီၤပၤအပှၤ ကွဲးလံာ်တဖၣ်ဒီးကိးထီၣ်ထးခိၣ်န့ၢ်အီၤလၢ တၢ်ဘိးဘၣ်သ့ၣ်ညါတခါလၢကဘၣ်တၢ်ကွဲးကျိးထံ အီၤဆူကျိာ်ကိးကျိာ်ဒဲးလၢတၢ်သူအီၤလၢဘီမုၢ်အ ပူၤခဲလၢာ်ဒီးကဘၣ်တၢ်ရၤလီၤအီၤဆူပှၤပၢတၢ်တဖၣ်, ပဒိၣ်ပပှၢ်ခဲလၢာ်အအိၣ်န့ၣ်လီၤ. လံာ်ဘိးဘၣ်သ့ၣ်ညါအံၤဘၣ်တၢ်ရၤလီၤအီၤလၢစီၤပၤအဃၤၡဝ့ ရိၣ်အမံၤဒီးဘၣ်တၢ်စဲပနီၣ်ဃာ်အီၤလၢစီၤပၤအပသံးန့ၣ်လီၤ.

¹³ပှၤဆှၢလံာ်ဖိတဖၣ်ဟံးန့ၢ်လံာ်ဘိးဘၣ်သ့ၣ်ညါဒီးဆှၢ ဝဲဆူကီၢ်ဆၣ်ကိးဘ့ၣ်ဒဲးလၢအအိၣ်လၢဘီမုၢ်အပူၤန့ၣ်လီၤ. လံာ်ဘိးဘၣ်သ့ၣ်ညါအံၤအိၣ်ဒီးတၢ်ပိာ်လီၤနဲၣ်လီၤ တဖၣ်လၢဖဲလါအးဒၢ်ထီၣ်တဆံသၢနံၤ, တနံၤဃီဧိၤန့ၣ်, ပှၤယူဒၤဖိခဲလၢာ်လၢအမ့ၢ်ပှၤသးစၢ်ဒီးပှၤသးပှၢ်, ပိာ်မုၣ်ဒီးဖိသၣ်တဖၣ်, ကဘၣ်တၢ်မၤသံကွံာ်အီၤန့ၣ်လီၤ. အဝဲသ့ၣ်ကဘၣ်တၢ်မၤသံအီၤလၢတၢ်သးကညီၤတအိၣ်ဘၣ်အပူၤ, ဒီးအတၢ်ဖိတၢ်လံၤတဖၣ်ကဘၣ်တၢ်ဟံးန့ၢ်ကွံာ်အီၤန့ၣ်လီၤ.

¹⁴လံာ်ဘိးဘၣ်သ့ၣ်ညါအံၤအတၢ်ဂ့ၢ်တၢ်ကျိၤတဖၣ် ကဘၣ်တၢ်ဒုးသ့ၣ်ညါအီၤဆူကမျၢၢ်လၢကီၢ်ကိးဘ့ၣ်ဒဲးအပူၤ, ဒ်သိးပှၤကိးဂၤဒဲးကကတဲာ်ကတီၤအသးလၢမုၢ်တနံၤန့ၣ် အဂီၢ်လီၤ.

¹⁵လၢစီၤပၤအကလုၢ်န့ၣ်တၢ်မၤလိာ်ဘၣ်တၢ်ရၤလီၤ အီၤလၢဝ့ၢ်ခိၣ်ဝ့ၢ်ၡူၡၣ်အပူၤဒီး, ပှၤဆှၢလံာ်ဖိတဖၣ်ဆှၢလီၤတၢ်ကစီၣ်ဆူကီၢ်တဖၣ်န့ၣ်လီၤ. စီၤပၤဒီးစီၤဟၤမၣ်ဆ့ၣ်နီၤဝဲဒီးအီတၢ်, ဖဲဝ့ၢ်ၡူၡၣ်ပှဲၤဝဲဒီး တၢ်သဘံၣ်ဘုၣ်ဒီးသူၣ်ကိၢ်သးဂီၤအခါန့ၣ်လီၤ.