Read S'gaw Karen လံာ်နီၢ်အ့ၤစတၢ် 9 Bible Online

လံာ်နီၢ်အ့ၤစတၢ် 9 - S'gaw Karen bible

လံာ်နီၢ်အ့ၤစတၢ် 9

¹မုၢ်တနံၤလၢစီၤပၤအတၢ်ဘိးဘၣ်သ့ၣ်ညါကဘၣ်ကဲထီၣ်လိၣ်ထီၣ်, လါအၢ်ဒးထီၣ်တဆံသၢသီတသီ, မုၢ်တနံၤဖဲပှၤယူဒၤဖိအဒုၣ်အဒါတဖၣ်မုၢ်လၢ်မၤန့ၢ်တၢ်ဒိၣ်စိ လၢပှၤယူဒၤဖိအဖီခိၣ်ဟဲတုၤဝဲလံ. ဘၣ်ဆၣ်လၢတၢ်န့ၣ်အလီၢ်ပှၤယူဒၤဖိတဖၣ်အိၣ်ဒီးတၢ်မၤနၢၤလၢ အဝဲသ့ၣ်အဖီခိၣ်န့ၣ်လီၤ.

²လၢပှၤယူဒၤဖိအိၣ်ဝဲဆိးဝဲအလီၢ်လၢဝ့ၢ်တဖျၢၣ်လၢ်လၢ်လၢဘီမုၢ် အပူၤန့ၣ်, အဝဲသ့ၣ်ကရၢကရိထီၣ်အသးဒ်သိးကထီဒါပှၤတဂၤ လၢ်လၢ်လၢအဟဲမၤအၢအီၤန့ၣ်လီၤ. ပှၤဂီၢ်မုၢ်လၢအအိၣ်လၢတၢ်လီၢ်တပူၤလၢ်လၢ်န့ၣ်ပျံၤဘၣ်အဝဲသ့ၣ်, ဒီးပှၤဆၢထၢၣ်ထီဒါအဝဲသ့ၣ်တဘူၣ်ဘၣ်နီတဂၤဘၣ်.

³ကီၢ်ဆၣ်အပဒိၣ်ပပှၢ်တဖၣ်လၢအမ့ၢ်ပဒိၣ်ဖးဒိၣ်, ကယဲၢ်ပှၤပၢဆှၢတၢ်တဖၣ်ဒီးစီၤပၤအခၢၣ်စးခဲလၢာ်န့ၣ်မၤစၢၤပှၤ ယူဒၤဖိသပှၢ်တၢၢ်လီၤ. အဂ့ၢ်ဒ်အံၤအဝဲခဲသ့ၣ်လၢာ်ပျံၤဘၣ် စီၤမၢ်ဒကဲၤန့ၣ်လီၤ.

⁴ဒီးစီၤမၢ်ဒကဲၤဘၣ်တၢ်သ့ၣ်ညါအီၤလၢဘီမုၢ်သကုၤဆးဒး အပူၤဂ့ၤဂ့ၤကလဲာ်ဒ်အမ့ၢ်ပှၤဒိၣ်စိဒိၣ်ကမီၤတဂၤလၢနီပူၤဒီး အစိကမီၤဒံးယံာ်ဒံးအါထီၣ်န့ၣ်လီၤ.

⁵လၢတၢ်န့ၣ်အဃိပှၤယူဒၤဖိမၤအဒုၣ်အဒါတဖၣ်ဖဲအသးသ့ဝဲလီၤ. အဝဲသ့ၣ်ထီဒါအဒုၣ်အဒါတဖၣ်လၢနးတဖၣ်ဒီးမၤသံအီၤလီၤ.

⁶လၢဝ့ၢ်ခိၣ်ဝ့ၢ်ၡူၡၣ်အပူၤန့ၣ်, ပှၤယူဒၤဖိမၤသံကွံာ်ပှၤယဲၢ်ကယၤဂၤလီၤ.

⁷လၢအကျါန့ၣ်အဝဲသ့ၣ်မၤသံစီၤပၡၤနဒၤသၤ, စီၤဒၤလဖိၣ်,

⁸စီၤအၤစပၤသၤဒီးစီၤပိၤရသး, စီၤအဒၤလယၤ,

⁹ဒီးစီၤအရံၤဒသၤ, ဒီးစီၤပၢ်မၤၡတၤဒီးစီၤအရံစဲၤ, စီၤအရံဒဲၤ ဒီးစီၤဝၤယစၤသၤ

¹⁰လၢအမ့ၢ်စီၤဟးမဒၤသၤအဖိခွါစီၤဟၤမၣ်အဖိခွါ အဂၤတဆံန့ၣ်လီၤ. မ့မ့ၢ်အတၢ်ဖိတၢ်လံၤန့ၣ်တဘၣ်တၢ်ဂုာ်ဆူၣ်အီၤဘၣ်.

¹¹လၢမုၢ်တနံၤဃီန့ၣ်, ပှၤလၢအဘၣ်တၢ်မၤသံအီၤလၢဝ့ၢ်ၡူၡၣ်ပူၤအနီၣ်ဂံၢ်န့ၣ်ဘၣ်တၢ် ပာ်ဖျါထီၣ်အီၤဆူစီၤပၤန့ၣ်လီၤ.

¹²အန့ၣ်ဒီးစီၤပၤစံးဘၣ်နီၢ်ပၤမုၣ်အ့ၤစတၢ်, “ပှၤယူဒၤဖိမၤသံပှၤယဲၢ်ကယၤလၢဝ့ၢ်ၡူၡၣ်အပူၤဃုာ်ဒီး စီၤဟၤမၣ်အဖိခွါအဂၤတဆံလံ. အဝဲသ့ၣ်ကဘၣ်မၤဒံးတၢ်မနုၤလၢကီၢ်ဆၣ်တဖၣ်အပူၤန့ၣ်လဲၣ်. ခဲကနံၣ်အံၤ, နအဲၣ်ဒိးတၢ်မနုၤလဲၣ်. နကဒိးန့ၢ်ဘၣ်လီၤ. တဲဘၣ်ယၤတၢ်လၢနအဲၣ်ဒိးဒံးတက့ၢ်. ဒီးနကဒိးန့ၢ်ဘၣ်လီၤ.”

¹³နီၢ်အ့ၤစတၢ်စံးဆၢဝဲ, “မ့ၢ်ဘၣ်တၢ်ဒိၣ်ကစၢ်စီၤပၤအသးဒီး, မ်ပှၤယူဒၤဖိလၢဝ့ၢ်ၡူၡၣ်အပူၤမၤကဒီးဝဲခဲမုၢ်ဆ့ၣ်တနံၤဒ် တနံၤအံၤတၢ်ပျဲအဝဲသ့ၣ်မၤအသိးန့ၣ်တက့ၢ်. ဒီးမ်ပှၤဘျးထီၣ်စီၤဟၤမၣ်အဖိခွါအဂၤတဆံအစိၣ်လၢသ့ၣ်အလိၤ တက့ၢ်.”

¹⁴စီၤပၤမၤလိာ်ဝဲလၢတၢ်ကမၤအသးဒ်န့ၣ်လီၤ. ဒီးတၢ်ဘိးဘၣ်သ့ၣ်ညါန့ၣ်ဘၣ်တၢ်ရၤလီၤအီၤလၢဝ့ၢ် ၡူၡၣ်အပူၤလီၤ. ပှၤဘျးထီၣ်စီၤဟၤမၣ်အဖိခွါအဂၤတဆံ အစိၣ်လၢကမျၢၢ်အမဲာ်ညါလီၤ.

¹⁵လၢလါအးဒၢ်ထီၣ်တဆံလွံၢ်နံၤတနံၤန့ၣ် ပှၤယူဒၤဖိလၢအအိၣ်လၢဝ့ၢ်ၡူၡၣ်အပူၤတဖၣ်ပာ်ဖှိၣ်ထီၣ်ကဒီး အသး, ဒီးမၤသံပှၤသၢကယၤလၢဝ့ၢ်ပူၤန့ၣ်လီၤ. ဘၣ်ဆၣ်ဒီး, အဝဲသ့ၣ်တဂုာ်ဆူၣ်ပျီဆူၣ်တၢ်နီတမံၤန့ၣ်ဘၣ်.

¹⁶ပှၤယူဒၤဖိလၢအိၣ်လၢကီၢ်ဆၣ်တဖၣ်အပူၤပာ်ဖှိၣ် ထီၣ်စ့ၢ်ကီးအသးဒီးဒီဒၣ်အိၣ်ပှိၤလီၤက့ၤအသးလီၤ. အဝဲသ့ၣ်မၤပူၤဖျဲးအသးလၢအဒုၣ်အဒါအစုပူၤခီဖျိ မၤသံကွံာ်ပှၤဂီၢ်မုၢ်နွံကလးယဲၢ်ကထိ, လၢအသးဟ့အဝဲသ့ၣ်န့ၣ်လီၤ. ဘၣ်ဆၣ်ဒီး, အဝဲသ့ၣ်တဂုာ်ဆူၣ်ပျီဆူၣ်တၢ်နီတမံၤဘၣ်.

¹⁷အအံၤမ့ၢ်ဖဲလါအးဒၢ်ထီၣ်တဆံသၢနံၤတနံၤန့ၣ်လီၤ. လၢခံတနံၤဖဲလါထီၣ်တဆံလွံၢ်နံၤတနံၤန့ၣ် တၢ်မၤသံတအိၣ်လၢၤဘၣ်ဒီး, ပာ်ဝဲဒ်အမ့ၢ်တၢ်သူၣ်ခု သးခုအတၢ်အီၣ်တၢ်အီအမူးအမုၢ်တနံၤန့ၣ်လီၤ.

¹⁸မ့မ့ၢ်, ပှၤယူဒၤဖိလၢအအိၣ်လၢဝ့ၢ်ၡူၡၣ်တဖၣ်န့ၣ်, မၤသံအဒုၣ်အဒါလၢတဆံသၢနံၤတနံၤဒီးတဆံလွံၢ်နံၤတနံၤန့ၣ် လီၤ. ဒီးလၢတဆံယဲၢ်နံၤတနံၤန့ၣ်အိၣ်ဘှံးဝဲဒီးပာ်ဝဲဒ် အမ့ၢ်တၢ်သူၣ်ခုသးခုအတၢ်အီၣ်တၢ်အီအမူးအမုၢ်တနံၤန့ၣ်လီၤ.

¹⁹မၤသးဒ်န့ၣ်ဒီးပှၤယူဒၤဖိလၢအအိၣ်လၢသဝီ ဒီးဝ့ၢ်ဆံးတဖၣ်အပူၤန့ၣ်ပာ်ဝဲဒၣ်လါအးဒၢ်ထီၣ်တဆံလွံၢ်နံၤ တနံၤလၢတၢ်သူၣ်ခုသးခုအနံၤအိၣ်ဘှံးတနံၤ, ဒီးတၢ်အီၣ်တၢ်အီအမူးတနံၤဒီးတၢ်ဟ့ၣ်လိာ်သကိးသး လၢတၢ်အီၣ်တၢ်အီအမုၢ်နံၤန့ၣ်လီၤ.

²⁰စီၤမၢ်ဒကဲၤမၢပှၤကွဲးလီၤတၢ်မၤအသးတဖၣ်အံၤ, ဒီးဆှၢလီၤလံာ်ပရၢတဖၣ်ဆူကယဲၢ်ပှၤယူဒၤဖိခဲလၢာ်အအိၣ် လၢကီၢ်ပၤရၣ်အဘီအမုၢ်အပူၤလၢအဘူးဒီးအယံၤ,

²¹တဲဘၣ်အဝဲသ့ၣ်လၢကဘၣ်တိၢ်န့ၢ်ဖံးဃာ်လါအးဒၢ်ထီၣ်တဆံ လွံၢ်နံၤတနံၤဒီးတဆံယဲၢ်နံၤတနံၤတဖၣ်ဒ်တၢ်အိၣ်ဘှံးအမုၢ်နံၤ တဖၣ်အသိးကိးနံၣ်ဒဲးန့ၣ်လီၤ.

²²မုၢ်နံၤတဖၣ်အံၤမ့ၢ်မုၢ်နံၤလၢပှၤယူဒၤဖိတဖၣ်မၤပူၤ ဖျဲးအသးလၢအဒုၣ်အဒါအတၢ်ကူၣ်အၢ, ဒီးလါအံၤမ့ၢ်လါတလါ လၢအလဲလိာ်ကွံာ်တၢ်သူၣ်အုးသးအုးဒီးတၢ်သးဟးဂီၤ, ဆူတၢ်သူၣ်ခုသးခုဒီးတၢ်သူၣ်ဖှံသးညီန့ၣ်လီၤ. အဝဲသ့ၣ်ကဘၣ်တိၢ်န့ၢ်ဖံးဃာ်မုၢ်နံၤတဖၣ်အံၤ, အိၣ်ဒီးတၢ်အီၣ်တၢ်အီအမူးတဖၣ်ဒီးတၢ်သူၣ်ဖှံသးညီအမူး, တၢ်ဟ့ၣ်လိာ်သကိးအသးလၢတၢ်အီၣ်တၢ် အီတဖၣ်တဂၤဒီးတဂၤဒီးဆူပှၤဖှီၣ်ဖိယာ်ဖိန့ၣ်လီၤ.

²³လၢတၢ်န့ၣ်အဃိပှၤယူဒၤဖိပိာ်ထွဲစီၤမၢ်ဒကဲၤအတၢ်ပိာ်လီၤ နဲၣ်လီၤတဖၣ်အခံဒီးမူးအံၤကဲထီၣ်လုၢ်လၢ်လၢအဘၣ်တၢ်မၤအီၤကိး နံၣ်ဒဲးန့ၣ်လီၤ.

²⁴ယူဒၤအပှၤဂီၢ်မုၢ်အဒုၣ်အဒါ, ပှၤအကၤကးဖိအစၢၤအသွဲၣ်စီၤဟး မဒၤအဖိခွါစီၤဟၤမၣ်, တ့ၢ်လီၤတ့ၢ်တၢ်ဖးတဖၣ် (မ့တမ့ၢ်ဘၣ် “ပူရံၣ်” ဒ်အဝဲသ့ၣ်ကိးဝဲ) လၢကပာ်လီၤမုၢ်တနံၤလၢတၢ်ကမၤဟးဂီၤပှၤယူဒၤဖိတဖၣ်လီၤ. အဝဲကူၣ်ကျဲၤတ့ၢ်လၢကမၤဟးဂီၤကွံာ်အဝဲသ့ၣ်ခဲလၢာ်န့ၣ်လီၤ.

²⁵ဘၣ်ဆၣ်နီၢ်အ့ၤစတၢ်လဲၤဆူစီၤပၤအအိၣ်ဒီးစီၤပၤရၤလီၤအတၢ် မၤလိာ်တဖၣ်လၢတၢ်ကွဲးအီၤအိၣ်ဒီးတၢ်အစၢလၢစီၤဟၤမၣ် တူၢ်ဘၣ်က့ၤအတၢ်ဘူၣ်အၢတီၢ်သီလၢအကူၣ်ကျဲၤဝဲလၢပှၤ ယူဒၤဖိတဖၣ်အဂီၢ်အဝဲဒီးအဖိခွါတဖၣ်ဘၣ်တၢ်ဘျးထီၣ် အီၤလၢသ့ၣ်အလိၤန့ၣ်လီၤ.

²⁶မၤသးဒ်န့ၣ်ဒီး, တၢ်အိၣ်ဘှံးအမုၢ်နံၤတဖၣ်န့ၣ်ဘၣ်တၢ်ကိး အီၤလၢပူရံၣ်လၢအဟဲလၢတၢ်ကတိၤပူရးန့ၣ်လီၤ. လၢစီၤမၢ်ဒကဲၤအတၢ်ပရၢဒီးတၢ်လၢအမၤအသးဒီး အဝဲသ့ၣ်ခဲလၢာ်အဃိ,

²⁷ပှၤယူဒၤဖိတဖၣ်ဒုးကဲထီၣ်အီၤဒ်တၢ်သိၣ်တၢ်သီတမံၤလၢအဂီၢ်, အစၢၤအသွဲၣ်တဖၣ်အဂီၢ်, ဒီးပှၤတဂၤလၢ်လၢ်လၢအကကဲထီၣ်ပှၤ ယူဒၤဖိအဂီၢ်လၢအကတိၢ်န့ၢ်မုၢ်နံၤခံနံၤန့ၣ်လၢအဆၢကတီၢ် ဒၣ်ဝဲဒ်စီၤမၢ်ဒကဲၤအတၢ်ပိာ်လီၤနဲၣ်လီၤအသိးကိးနံၣ်ဒဲးဘၣ်ဆၢဘၣ် ကတီၢ်န့ၣ်လီၤ.

²⁸တၢ်ပာ်လီၤသးအိၣ်ဝဲဒၣ်လၢပှၤယူဒၤဖိတဒူၣ်လၢ်လၢ်လၢစိၤတစိၤ ဘၣ်တစိၤလၢအကဟဲလၢကီၢ်ဆၣ်တဘ့ၣ်လၢ်လၢ်ဒီးလၢဝ့ၢ်တဖျၢၣ် လၢ်လၢ်အပူၤန့ၣ်, ကဘၣ်သ့ၣ်နီၣ်တိၢ်န့ၢ်ဖံးဃာ်ဒီးမၤပူရံၣ်အမုၢ်နံၤ တဖၣ်ကိးဆၢကိးကတီၢ်ဒဲးလၢဆၢကတီၢ်လၢအကဟဲန့ၣ်လီၤ.

²⁹တုၤနုၤတစုစီၤအဘံဃယ့းလးအဖိမုၣ်, နီၢ်ပၤမုၣ်အ့ၤစတၢ်ဒီး စီၤမၢ်ဒကဲၤ, ကွဲးစ့ၢ်ကီးလံာ်ပရၢတဘ့ၣ်လၢအအိၣ်ဒီးနီၢ် အ့ၤစတၢ်အတၢ်စိကမီၤအလၢအပှဲၤဒ်သိးအကမၤဂၢၢ်မၤကျၢၤ လံာ်ပရၢလၢအဘၣ်ထွဲဒီးဘူၣ်ပူရံၣ်လၢစီၤမၢ်ဒကဲၤကွဲးတ့ၢ်လံ ဝဲလၢညါန့ၣ်လီၤ.

³⁰လံာ်ပရၢအံၤဘၣ်တၢ်ကွဲးအီၤဆူကယဲၢ်ပှၤယူဒၤဖိခဲလၢာ်အအိၣ်, ဒီးလံာ်ပရၢအဒိတဖၣ်ဘၣ်တၢ်ဆှၢအီၤဆူကီၢ်ဆၣ်တကယၤခံဆံနွံဘ့ၣ်, လၢကီၢ်ပၤရၣ်အဘီအမုၢ်အပူၤလီၤ. လံာ်အံၤအိၣ်ဃုာ်ဒီးတၢ်ဆၢဂ့ၤ ဆၢဝါပှၤယူဒၤဖိလၢကအိၣ်ဒီးတၢ်ဃူတၢ်ဖိးဒီးတၢ်အိၣ်ဘံၣ်အိၣ်ဘၢ

³¹ဒီးသိၣ်လိနဲၣ်ယုၤအဝဲသ့ၣ်ဒီးအစၢၤအသွဲၣ်တဖၣ်လၢကတိၢ်န့ၢ်ဖံး ဃာ်ဘူၣ်ပူရံၣ်အမုၢ်နံၤတဖၣ်လၢအဆၢကတီၢ်ဒၣ်ဝဲ, ဒ်သိးဒၣ်အဝဲသ့ၣ်အိၣ်ဒီးတၢ်သိၣ်တၢ်သီတဖၣ် ဘၣ်ဃးဒီးတၢ်မၤတၢ်ဒုၣ်တၢ်အီၣ်တၢ်အီတဖၣ်ဒီးတၢ်သူၣ် အုးသးအုးအသိးအဆၢကတီၢ်တဖၣ်န့ၣ်လီၤ. တၢ်အံၤမ့ၢ်စီၤမၢ်ဒကဲၤဒီးနီၢ်ပၤမုၣ်အ့ၤစတၢ်ခံဂၤလိာ်အတၢ် မၤလိာ်န့ၣ်လီၤ.

³²နီၢ်အ့ၤစတၢ်အတၢ်မၤလိာ်, မၤဂၢၢ်မၤကျၢၤတၢ်သိၣ်တၢ်သီတဖၣ်လၢဘူၣ်ပူရံၣ်အဂီၢ်ဒီးဘၣ်တၢ် ကွဲးလီၤအီၤလၢလံာ်အထူအပူၤလီၤ.