Read S'gaw Karen လံာ်တၢ်ဟးထီၣ်ကွံာ် 14 Bible Online

လံာ်တၢ်ဟးထီၣ်ကွံာ် 14 - S'gaw Karen bible

လံာ်တၢ်ဟးထီၣ်ကွံာ် 14

¹ဒီးယွၤစံးဘၣ်စီၤမိၤၡ့, “တဲဘၣ်ပှၤအံၣ်စရ့လးဖိတဖၣ်လၢကဃၣ်ကဒါက့ၤအသးဒီးသူၣ်ထီၣ် အဒဲတဖၣ်လၢပံၤဟဃံရိးအမဲာ်ညါ, လၢအအိၣ်ဖဲမံးကဒိးလးဒီးပီၣ်လဲၣ်ဂီၤအဘၢၣ်စၢၤဘူးဒီးဘဧၤ လးစဖိၣ်န့ၣ်တက့ၢ်.

³စီၤပၤကဆိကမိၣ်လၢပှၤအံၣ်စရ့လးဖိတဖၣ်လဲၤဝ့ၤဝီၤတၢ်လၢ ကီၢ်ပူၤဒီးဟဲဘူးထီၣ်ဝဲဒၣ်လၢပှၢ်မုၢ်ကနၢအပူၤလံန့ၣ်လီၤ.

⁴ယကမၤကိၤထီၣ်အဝဲအသးဒီးအဝဲကလူၤထွဲသုခံဒီးယတၢ်မၤနၢၤ စီၤပၤဒီးအသုးမုၢ်ကဟဲစိာ်တၢ်လၤကပီၤလၢယဂီၢ်န့ၣ်လီၤ. အန့ၣ်တစုပှၤအဲၤကူပတူးဖိတဖၣ်ကသ့ၣ်ညါလၢယမ့ၢ်ယွၤန့ၣ်လီၤ.” ဒီးပှၤအံၣ်စရ့လးဖိတဖၣ်မၤဝဲဒ်တၢ်စံးတ့ၢ်အီၤအသိးန့ၣ်လီၤ.

⁵တုၤပှၤတဲဘၣ်ကီၢ်အဲၤကူပတူးအစီၤပၤလၢပှၤအံၣ်စရ့လးဖိ တဖၣ်ထူၣ်ဖျဲးကွံာ်လံန့ၣ်, အဝဲဒီးအပဒိၣ်ပပှၢ်တဖၣ်လဲလိာ်ကွံာ် အတၢ်ပာ်လီၤအသးဒီးစံးဝဲ, “ဘၣ်မနုၤလၢပမၤတၢ်အံၤလၢပပျဲထူၣ်ဖျဲးကွံာ်ပှၤအံၣ်စရ့လး ဖိလၢအမ့ၢ်ပကုၢ်န့ၣ်လဲၣ်.”

⁶ဒီးစီၤပၤကတဲာ်ကတီၤထီၣ်အလ့ၣ်ကဟၣ်သုးဒီးအသုးမုၢ်သံၣ်ဘိတဖၣ်န့ၣ်လီၤ.

⁷အဝဲဟးထီၣ်ဒီးအလ့ၣ်ကဟၣ်သုးခဲလၢာ်ဃုာ်ဒီးအလ့ၣ်ကဟၣ်သုးအဂ့ၤ ကတၢၢ်အဆိဃုကယၤလၢအဘၣ်တၢ်ပၢဆှၢအီၤလၢပှၤအခိၣ်တဖၣ်န့ၣ်လီၤ.

⁸ဒီးယွၤမၤကိၤထီၣ်စီၤပၤအသး, ဒီးအဝဲလူၤထွဲပှၤအံၣ်စရ့လးဖိတဖၣ်လၢအဟးထီၣ်ကွံာ်အိၣ်ဒီး တၢ်သးခုလၢတၢ်မၤနၢၤအပူၤန့ၣ်လီၤ.

⁹ကီၢ်အဲၤကူပတူးအသုးမုၢ်, ဃုာ်ဒီးကယဲၢ်ကသ့ၣ်တဖၣ်, လ့ၣ်ကဟၣ်တဖၣ်, ပှၤနီၣ်လ့ၣ်ကဟၣ်တဖၣ်လူၤထွဲပှၤအံၣ်စရ့လး ဖိဒီးချုးန့ၢ်အဝဲသ့ၣ်ဖဲအသူၣ်ဒဲအလီၢ်လၢပီၣ်လဲၣ်ဂီၤ, ဘူးဒီးပံၤဟဃံရိးဒီးဘဧၤလးစဖိၣ်န့ၣ်လီၤ.

¹⁰ဖဲပှၤအံၣ်စရ့လးဖိတဖၣ်ထံၣ်ဘၣ်စီၤပၤဒီးအသုးမုၢ်ဟဲဘူး ထီၣ်ဒ်သိးကထီဒါအီၤန့ၣ်, အဝဲသ့ၣ်ပျံၤတၢ်နးနးကလဲာ်ဒီး ကိးပသူထီၣ်ဆူယွၤအအိၣ်လၢတၢ်မၤစၢၤအဂီၢ်န့ၣ်လီၤ.

¹¹ဒီးအဝဲသ့ၣ်စံးဘၣ်စီၤမိၤၡ့, “လၢကီၢ်အဲၤကူပတူးအပူၤ န့ၣ်မ့ၢ်တၢ်သွၣ်ခိၣ်တအိၣ်ဘၣ်အဃိနဟဲကိးပှၤဆူပှၢ်မုၢ်ကနၣ်အပူၤအံၤလၢပကသံအဂီၢ်ဧါ. ဘၣ်မနုၤလၢနမၤပှၤလၢတၢ်အံၤလၢနထုးထီၣ်ပှၤလၢကီၢ်အဲၤကူပတူးအပူၤန့ၣ်လဲၣ်.

¹²မ့ၢ်ပတတဲဘၣ်နၤတချုးပဟးထီၣ်ဒံးဘၣ်န့ၣ်လၢတၢ်ကမၤအသးဒ်သိး အံၤဘၣ်ဧါ. ပတဲတ့ၢ်နၤလၢနကပျဲပအိၣ်ဒၣ်ဒ်န့ၣ်ဒီးကဲဒၣ်ပှၤအဲၤကူပတူးဖိ တဖၣ်အကုၢ်န့ၣ်လီၤ. တၢ်ကဲကုၢ်ဖဲန့ၣ်, ဂ့ၤဒိၣ်န့ၢ်ဒံးတၢ်သံဖဲအံၤလၢပှၢ်မုၢ်ကနၢ အပူၤတက့ၢ်န့ၣ်လီၤ.”

¹³ဒီးစီၤမိၤၡ့စံးဆၢဝဲဒၣ်, “ပျံၤတၢ်တဂ့ၤ, အိၣ်ဂၢၢ်ဆိးကျၢၤတက့ၢ်. ဒီးသုကထံၣ်ဘၣ်ယွၤကမၤတၢ်တနံၤအံၤလၢကအုၣ်က့ၤခီၣ်က့ၤသု အဂီၢ်န့ၣ်လီၤ. သုတထံၣ်ဘၣ်ကဒီးလၢၤပှၤအဲၤကူပတူးဖိနီ တစုလၢၤဘၣ်.

¹⁴ယွၤကဒုးတၢ်လၢသုဂီၢ်ဒီးဖဲန့ၣ်အလီၢ်တအိၣ်လၢသုကမၤတၢ်နီ တမံၤဘၣ်.”

¹⁵ဒီးယွၤစံးဘၣ်စီၤမိၤၡ့, “ဘၣ်မနုၤနကိးပသူထီၣ်လၢတၢ်မၤ စၢၤအဂီၢ်လဲၣ်. တဲဘၣ်ပှၤဂီၢ်မုၢ်ဒ်သိးအကလဲၤဆူညါတက့ၢ်.

¹⁶ယူာ်ထီၣ်နီၣ်ထိးဘိဒီးဖီၣ်ဃးအီၤလၢပီၣ်လဲၣ်အဖီခိၣ်တက့ၢ်. ထံကနီၤဖးလီၤအသးဒီးပှၤအံၣ်စရ့လးဖိတဖၣ်လဲၤတၢ်လၢဟီၣ် ခိၣ်အဃ့ထီအဖီခိၣ်ကသ့ဝဲလီၤ.

¹⁷ယကမၤကိၤထီၣ်ပှၤအဲၤကူပတူးဖိတဖၣ်အသးတုၤအဝဲသ့ၣ်ကလူၤပိာ် ထွဲသုခံ, ဒီးယကဒိးန့ၢ်ဘၣ်တၢ်လၤကပီၤခီဖျိယတၢ်မၤနၢၤလၢစီၤပၤ, အဝဲအသုးမုၢ်, အဝဲအလ့ၣ်ကဟၣ်ဒုးသုးဒီးအပှၤနီၣ်တၢ်တဖၣ်အဖိခိၣ်န့ၣ်လီၤ.

¹⁸ဖဲယမၤနၢၤအဝဲသ့ၣ်န့ၣ်ပှၤအဲၤကူပတူးဖိတဖၣ်ကသ့ၣ်ညါလၢယမ့ၢ်ယွၤန့ၣ်လီၤ.”

¹⁹ဒီးကစၢ်ယွၤအကလူးလၢအအိၣ်တ့ၢ်လံလၢကီၢ်အံၣ်စရ့လးအသုးမုၢ် မဲာ်ညါန့ၣ်သုးအသးဒီးလဲၤဆူအဝဲသ့ၣ်အလီၢ်ခံတကပၤန့ၣ်လီၤ. တၢ်အၢၣ်အထူၣ်စ့ၢ်ကီးသုးအသးတုၤလၢပှၤအဲၤကူပတူးဖိတဖၣ်ဒီးပှၤအံၣ်စရ့လးဖိတဖၣ် အဘၢၣ်စၢၤန့ၣ်လီၤ.

²⁰တၢ်အၢၣ်မၤခံးသူတၢ်လၢပှၤအဲၤကူပတူးဖိတဖၣ်အဂီၢ်ဘၣ်ဆၣ်ဒီး ဟ့ၣ်တၢ်ကပီၤဆူပှၤအံၣ်စရ့လးဖိတဖၣ်အအိၣ်လီၤ. မၤသးဒ်န့ၣ်ဒီး, သီတနၤကျၢၤန့ၣ်သုးမုၢ်တဖၣ်တဖုဒီးတဖု သုးဘူးလိာ်အသးတသ့ဘၣ်န့ၣ်လီၤ.

²¹စီၤမိၤၡ့ယူာ်ထီၣ်အစုလၢပီၣ်လဲၣ်အဖီခိၣ်ဒီးယွၤနီၣ်ကဒါ က့ၤပီၣ်လဲၣ်ခီဖျိကလံၤဆူၣ်လၢမုၢ်ထီၣ်တခီန့ၣ်လီၤ. ကလံၤန့ၣ်အူတၢ်သီတနၤကျၢၤတုၤပီၣ်လဲၣ်ကဲထီၣ်ဟီၣ်ခိၣ်ဃ့ထီလီၤ. ထံနီၤဖးလီၤအသးခံခီ,

²²ဒီးပှၤအံၣ်စရ့လးဖိတဖၣ်လဲၤခီဂာ်ပီၣ်လဲၣ်လၢဟီၣ်ခိၣ်ဃ့ထီ အလိၤအိၣ်ဒီးထံအဒူၣ်ခံခီယၢ်ခီန့ၣ်လီၤ.

²³ပှၤအဲၤကူပတူးဖိတဖၣ်လူၤပိာ်ထွဲအဝဲသ့ၣ်အခံဆူပီၣ်လဲၣ်ပူၤ ဃုာ်ဒီးကယဲၢ်အကသ့ၣ်တဖၣ်, လ့ၣ်ကဟၣ်ဒုးသုးတဖၣ်ဒီးပှၤနီၣ်တၢ်တဖၣ်န့ၣ်လီၤ.

²⁴ဘူးလၢမုၢ်ကဆ့ၣ်ထီၣ်ဂီၤထၢၣ်သၢန့ၣ်ယွၤကွၢ်လီၤတၢ်ဆူ ပှၤအဲၤကူပတူးဖိတဖၣ်အအိၣ်လၢမ့ၣ်အူဒီးတၢ်အၢၣ်အထူၣ်အလိၤ ဒီးမၤပျံၤမၤဖုးအဝဲသ့ၣ်နးနးကလဲာ်လီၤ.

²⁵ယွၤမၤကတံာ်ကွံာ်အဝဲသ့ၣ်အလ့ၣ်ကဟၣ်အပၣ်တဖၣ်ဒ်သိးကသုးအသးအိၣ် ဒီးတၢ်ကီတၢ်ခဲဖးဒိၣ်န့ၣ်လီၤ. ပှၤအဲၤကူပတူးဖိတဖၣ်စံးဝဲ, “ယွၤဒုးတၢ်လၢပှၤအံၣ်စရ့လးဖိတဖၣ်အဂီၢ်ထီဒါပှၤလီၤ. မ်ပဟးထီၣ်ကွံာ်လၢတၢ်လီၢ်ဖဲအံၤတက့ၢ်.”

²⁶ဒီးယွၤစံးဘၣ်စီၤမိၤၡ့, “ယူာ်ထီၣ်နစုလၢပီၣ်လဲၣ်ဖီခိၣ်တက့ၢ်. ဒီးထံကဟဲက့ၤကဒါက့ၤဒီးလုၣ်ဘၢကွံာ်ပှၤအဲၤကူပတူးဖိတဖၣ် ဒီးအလ့ၣ်ကဟၣ်ဒုးသုးတဖၣ်ဒီးအပှၤနီၣ်တၢ်တဖၣ်န့ၣ်လီၤ.”

²⁷မၤသးဒ်န့ၣ်ဒီး, စီၤမိၤၡ့ယူာ်ထီၣ်အစုလၢပီၣ်လဲၣ်ဖီခိၣ်ဒီး ဖဲမုၢ်ဆ့ၣ်ဝါထီၣ်န့ၣ်ထံဟဲက့ၤပှဲၤထီၣ်ဝဲဒၣ်ဒ်အလီၢ်လီၢ်န့ၣ် လီၤ. ပှၤအဲၤကူပတူးဖိတဖၣ်ကျဲးစၢးဒ်သိးကပူၤဖျဲးထီၣ်လၢထံကျါ ဘၣ်ဆၣ်ဒီးယွၤတြူာ်ကွံာ်အဝဲသ့ၣ်လၢပီၣ်လဲၣ်အသးကံၢ်ပူၤန့ၣ်လီၤ.

²⁸ထံဟဲက့ၤကဒါက့ၤဒီးလုၣ်ဘၢကွံာ်လ့ၣ်ကဟၣ်ဒုးသုးတဖၣ်, ပှၤနီၣ်တၢ်တဖၣ်ဒီးကယဲၢ်ပှၤအဲၤကူပတူးအသုးမုၢ်လၢအလူၤထွဲ ပှၤအံၣ်စရ့လးဖိတဖၣ်အခံဆူပီၣ်လဲၣ်ပူၤန့ၣ်လီၤ. ပှၤတဂၤဒၣ်လဲာ်တအိၣ်တ့ၢ်ဘၣ်.

²⁹မ့မ့ၢ်ပှၤအံၣ်စရ့လးဖိတဖၣ်ဟးဝဲလၢဟီၣ်ခိၣ်ဃ့ထီအဖီခိၣ် ခီဂာ်ပီၣ်လဲၣ်လၢအအိၣ်ဒီးထံအဒူၣ်ခံခီန့ၣ်လီၤ.

³⁰ဒီးလၢမုၢ်တနံၤန့ၣ်ယွၤအုၣ်က့ၤခီၣ်က့ၤကီၢ်အံၣ်စရ့လးအပှၤ ဂီၢ်မုၢ်လၢပှၤအဲၤကူပတူးဖိတဖၣ်အစုပူၤဒီးပှၤအံၣ်စရ့လး ဖိတဖၣ်ထံၣ်ဘၣ်အဝဲသ့ၣ်လီၤအုးသံလၢပီၣ်လဲၣ်ကၢၢ်နံၤန့ၣ်လီၤ.

³¹ဖဲပှၤအံၣ်စရ့လးဖိတဖၣ်ထံၣ်ဘၣ်တၢ်စိတၢ်ကမီၤဖးဒိၣ်လၢယွၤ မၤနၢၤကွံာ်ပှၤအဲၤကူပတူးဖိတဖၣ်ဒီးပှၤဂီၢ်မုၢ်ပျံၤယွၤ ဒီးအဝဲသ့ၣ်နာ်ယွၤဒီးအခ့အပှၤစီၤမိၤၡ့န့ၣ်လီၤ.