Read S'gaw Karen လံာ်တၢ်ဟးထီၣ်ကွံာ် 21 Bible Online

လံာ်တၢ်ဟးထီၣ်ကွံာ် 21 - S'gaw Karen bible

လံာ်တၢ်ဟးထီၣ်ကွံာ် 21

¹ဟ့ၣ်လီၤပှၤအံၣ်စရ့လးဖိတဖၣ်လၢတၢ်သိၣ်တၢ်သီတဖၣ်ဒ်လာ်အံၤအသိးတက့ၢ်.

²သုမ့ၢ်ပှ့ၤန့ၢ်ပှၤဧ့ၤဘြံၤဖိ ကုၢ်တဂၤဒီးအဝဲကမၤသုတၢ်ခ့တၢ်ပှၤတၢ်မၤဃုနံၣ်လီၤ. လၢနွံနံၣ်တနံၣ်အပူၤန့ၣ်အဝဲကဘၣ်တၢ်ပျၢ်ဖျဲးကွံာ်အီၤဒီးတဘၣ်ဟ့ၣ်တၢ်အပှ့ၤနီတမံၤဘၣ်.

³အဝဲမ့မ့ၢ်ပှၤလိၣ်ဘိတဂၤဖဲအကဲထီၣ်သုကုၢ်အခါန့ၣ်အဝဲတဘၣ် ဟးကိးဃုာ်အမါဒီးအီၤဖဲအဟးထီၣ်ဝဲန့ၣ်ဘၣ်. ဘၣ်ဆၣ်, မ့မ့ၢ်ပှၤအိၣ်ဒီးအမါဖဲအကဲထီၣ်သုကုၢ်အခါန့ၣ်မ် အဟးထီၣ်ဃုာ်ဒီးအမါတက့ၢ်.

⁴အကစၢ်မ့ၢ်ဟ့ၣ်အီၤအမါတဂၤဒီးထီၣ်ဖိန့ၢ်အီၤဖိခွါတဖၣ်မ့ၢ် ဂ့ၤဖိမုၣ်တဖၣ်မ့ၢ်ဂ့ၤဒီးပိာ်မုၣ်ဒီးအဖိတဖၣ်န့ၣ်ဘၣ်ဃးဒီး အကစၢ်လီၤ. ဒီးပှၤတဂၤန့ၣ်ကဘၣ်ဟးထီၣ်ကွံာ်ထဲအနီၢ် ကစၢ်ဒၣ်ဝဲဧိၤန့ၣ်လီၤ.

⁵ဘၣ်ဆၣ်ဒီးကုၢ်တဂၤန့ၣ်မ့ၢ်တဲဖျါထီၣ်ဝဲလၢအအဲၣ်ဘၣ်အကစၢ်, အမါ, ဒီးအဖိတဖၣ်အဃိ, မ့ၢ်တအဲၣ်ဒိးတၢ်ပျၢ်ဖျဲးအီၤန့ၣ်,

⁶အကစၢ်ကဘၣ်လဲၤကိးအီၤဆူတၢ်ဘူၣ်ထီၣ်ဘါထီၣ်အလီၢ်န့ၣ်လီၤ. ဖဲန့ၣ်အကစၢ်ကဘၣ်မၢအဆၢထၢၣ်လၢတြဲၤမ့တမ့ၢ်တြဲၤအထူၣ်အမဲာ်ညါ ဒီးကမၤထူၣ်ဖျိအနၢ်လီၤ. တုၤနုၤတစုအဝဲကကဲထီၣ်အကစၢ်အကုၢ်တစိၤသးန့ၣ်လီၤ.

⁷ပှၤတဂၤမ့ၢ်ဆါလီၤကွံာ်အဖိမုၣ်ဒ်ကုၢ်တဂၤအသိးဒီးပိာ်မုၣ် န့ၣ်တဘၣ်တၢ်ပျၢ်ဖျဲးကွံာ်အီၤဒ်ကုၢ်ပိာ်ခွါတဂၤအသိးဘၣ်.

⁸ပိာ်မုၣ်န့ၣ်မ့ၢ်ဘၣ်တၢ်ဆါလီၤကွံာ်အီၤဆူပှၤတဂၤလၢအတိာ်သူၣ် ပာ်သးဒ်သိးကဒုးကဲထီၣ်အီၤလၢအမါဘၣ်ဆၣ်ဒီးအဝဲမ့ၢ်တဘၣ်သူၣ် ဘၣ်သးလၢပိာ်မုၣ်န့ၣ်ဘၣ်ဒီး, ပိာ်မုၣ်န့ၣ်တၢ်ကဘၣ်ဆါကဒါက့ၤအီၤဆူအပၢ်အအိၣ်လီၤ. အကစၢ်ဆါလီၤကွံာ်အီၤဆူပှၤတခီဘီမုၢ်ဖိတဖၣ်အအိၣ်တသ့ဘၣ်. အဂ့ၢ်ဒ်အံၤ, အဝဲမၤတၢ်တတီတလိၤလၢပိာ်မုၣ်န့ၣ်အဖီခိၣ်အဃိလီၤ.

⁹ပှၤတဂၤမ့ၢ်ပှ့ၤန့ၢ်ကုၢ်ပိာ်မုၣ်တဂၤဒ်သိးအကဟ့ၣ်အီၤဆူအဖိ ခွါအအိၣ်ဒီးအဝဲကဘၣ်ပာ်ကဲပိာ်မုၣ်န့ၣ်ဒ်အဖိမုၣ်တဂၤအသိးလီၤ.

¹⁰ပှၤတဂၤမ့ၢ်ဟံးန့ၢ်အမါခံဂၤတဂၤဒီးကဘၣ်ဟ့ၣ်ထွဲဒံးဒၣ်တၢ် အမါအခီၣ်ထံးတဂၤန့ၣ်လၢတၢ်အီၣ်တၢ်အီဒီးတၢ်ကူတၢ်သိးဒ် အတၢ်ခွဲးတၢ်ယာ်တမံၤဃီဒ်လၢညါအသိးန့ၣ်လီၤ.

¹¹အဝဲမ့ၢ်တမၤပှဲၤမူဒါတဖၣ်အံၤလၢပိာ်မုၣ်အံၤအဂီၢ်ဘၣ်ဒီးကဘၣ် ပျၢ်ဖျဲးပိာ်မုၣ်န့ၣ်ဒီးတဘၣ်ဟံးန့ၢ်တၢ်အပှ့ၤကလံၤနီတစဲးဘၣ်.

¹²ပှၤတဂၤလၢ်လၢ်လၢအဒိအတီၢ်ပှၤတဂၤဒီးမၤသံအီၤန့ၣ်ကဘၣ်တၢ်မၤသံအီၤန့ၣ်လီၤ.

¹³ဘၣ်ဆၣ်ဒီးတၢ်န့ၣ်မ့မ့ၢ်တၢ်ကဲထီၣ်အသးလၢတၢ်တပာ်သူၣ်ပာ်သး အပူၤဒီးတမ့ၢ်လၢတၢ်အဲၣ်ဒိးမၤသံအီၤအဃိဘၣ်ဒီးအဝဲဃ့ၢ်ပူၤ ဖျဲးအသးဆူတၢ်လီၢ်တပူၤလၢယကဃုထၢန့ၢ်သုဒီးဖဲန့ၣ်အဝဲအိၣ် ပူၤအိၣ်ဖျဲးသ့ဝဲဒၣ်လီၤ.

¹⁴ဘၣ်ဆၣ်, ဖဲပှၤတဂၤအသးဒိၣ်ထီၣ်ဒီးမၤသံပှၤအဂၤတဂၤလၢတၢ်ကူၣ် ထီၣ်ဖးလီၤဆိပာ်ဝဲအပူၤန့ၣ်, အဝဲမ့ၢ်ဃ့ၢ်ဆူယတၢ်လုၢ်လီၢ်လၢတၢ်ပူၤဖျဲးအဂီၢ်ဒၣ်လဲာ်ကဘၣ်တၢ် မၤသံကွံာ်အီၤန့ၣ်လီၤ.

¹⁵ပှၤတဂၤလၢ်လၢ်လၢအဒိအတီၢ်အပၢ်မ့ၢ်ဂ့ၤအမိၢ်မ့ၢ်ဂ့ၤန့ၣ်ကဘၣ်တၢ် မၤသံကွံာ်အီၤန့ၣ်လီၤ.

¹⁶ပှၤတဂၤလၢ်လၢ်မ့ၢ်ဟုၣ်န့ၢ်ပှၤကညီလၢကဆါအီၣ်အီၤအဂီၢ်မ့ၢ်ဂ့ၤ, ကမၢကဲကုၢ်အီၤအဂီၢ်မ့ၢ်ဂ့ၤန့ၣ်ကဘၣ်တၢ်မၤသံကွံာ်အီၤလီၤ.

¹⁷ပှၤတဂၤလၢ်လၢ်လၢအဆိၣ်အၢအပၢ်မ့ၢ်ဂ့ၤအမိၢ်မ့ၢ်ဂ့ၤန့ၣ်ကဘၣ်တၢ် မၤသံကွံာ်အီၤန့ၣ်လီၤ.

¹⁸တၢ်အ့ၣ်လိာ်ဆိးက့လိာ်မ့ၢ်အိၣ်ဒီးပှၤတဂၤမ့ၢ်မၤဘၣ်ဒိ ဘၣ်ပှၤအဂၤတဂၤလၢလၢၢ်မ့ၢ်ဂ့ၤ, အစုခိၣ်မ့ၢ်ဂ့ၤ, ဘၣ်ဆၣ်တမၤသံဘၣ်အီၤန့ၣ်တၢ်တဘၣ်စံၣ်ညီၣ်အီၤဘၣ်. ပှၤတဂၤလၢအဘၣ်ဒိဘၣ်ထံးန့ၣ်မ့ၢ်ဘၣ်အိၣ်လၢလီၢ်မံခိၣ်,

¹⁹ဘၣ်ဆၣ်ဒီး, လၢခံဂဲၤဆၢထၢၣ်ဒီးဟးလၢနီၣ်ထိးဘိမ့ၢ်ကဲန့ၣ်, ပှၤတဂၤလၢအမၤဘၣ်ဒိအီၤအံၤဘၣ်လိးက့ၤစ့လၢပှၤဘၣ်ဒိတဂၤဘၣ် ဆိကတီၢ်တၢ်မၤအဃိဒီးအံးထွဲကွၢ်ထွဲအီၤတုၤအအိၣ်ဆူၣ်အိၣ် ချ့ထီၣ်က့ၤတစုန့ၣ်လီၤ.

²⁰ပှၤတဂၤမ့ၢ်ဟံးန့ၢ်နီၣ်တီၢ်တဘိဒီးတီၢ်အကုၢ်ပိာ်မုၣ်မ့ၢ်ဂ့ၤ, အကုၢ်ပိာ်ခွါမ့ၢ်ဂ့ၤ, ဒီးကုၢ်န့ၣ်မ့ၢ်သံတဘျီဃီဖဲန့ၣ်ဒီး, ပှၤတဂၤန့ၣ်ကဘၣ်တၢ်စံၣ်ညီၣ်လီၤ.

²¹ဘၣ်ဆၣ်ဒီးကုၢ်တဂၤန့ၣ်မ့ၢ်တသံဘၣ်လၢတသီခံသီအတီၢ်ပူၤအဃိ န့ၣ်, ကုၢ်အကစၢ်န့ၣ်တဘၣ်တၢ်စံၣ်ညီၣ်အီၤဘၣ်. တၢ်လီၤမၢ်လၢအတၢ်စုလီၢ်ခီၣ်ခိၣ်န့ၣ်မ့ၢ်တၢ်စံၣ်ညီၣ်လၢလၢပှဲၤ ပှဲၤလၢအဂီၢ်လံန့ၣ်လီၤ.

²²ပှၤတနီၤမ့ၢ်အ့ၣ်လိာ်ဆိးက့လိာ်အသးဒီးမၤဘၣ်ဒိဘၣ်ထံးပှၤ ပိာ်မုၣ်အိၣ်ဒီးအဟုးအသးတဂၤတုၤလၢအဖိဟးဂီၤဘၣ်ဆၣ်ပိာ်မုၣ် န့ၣ်မ့ၢ်တဘၣ်ဒိလၢကျဲအဂၤနီတမံၤဘၣ်ဒီးပှၤလၢအမၤဘၣ်ဒိဘၣ် ထံးအီၤန့ၣ်ကဘၣ်လိးက့ၤတၢ်ဒ်ပိာ်မုၣ်တဂၤန့ၣ်အဝၤဃ့ဝဲဒၣ်အသိး, ဒ်စံၣ်ညီၣ်ကွီၢ်အၢၣ်လီၤဆီၣ်ထွဲဝဲအသိးန့ၣ်လီၤ.

²³ဘၣ်ဆၣ်ဒီးပိာ်မုၣ်န့ၢ်အနီၢ်ကစၢ်ဒၣ်ဝဲမ့ၢ်ဘၣ်ဒိဒီးတၢ်စံၣ် ညီၣ်ကဘၣ်မ့ၢ်, သးသမူလၢသးသမူအဂီၢ်,

²⁴မဲာ်ချံတတိၣ်လၢမဲာ်ချံတတိၣ်အဂီၢ်, မဲတဘ့ၣ်လၢမဲတဘ့ၣ်အဂီၢ်,

²⁵တၢ်ကိၢ်သွၣ်လၢတၢ်ကိၢ်သွၣ်အဂီၢ်, တၢ်ပူၤလီၢ်လၢတၢ်ပူၤလီၢ်အဂီၢ်, ဒီးတၢ်အညိးလၢတၢ်အညိးအဂီၢ်လီၤ.

²⁶ပှၤတဂၤမ့ၢ်မၤဘၣ်ဒိဘၣ်ထံးအကုၢ်ပိာ်မုၣ်မ့ၢ်ဂ့ၤ, အကုၢ်ပိာ်ခွါမ့ၢ်ဂ့ၤအမဲာ်ချံတုၤဒၣ်လဲာ်သူက့ၤဝဲတသ့လၢၤ ဒီးအဝဲကဘၣ်ပျၢ်ဖျဲးကုၢ်န့ၣ်ဒ်တၢ်လိးက့ၤအမဲာ်ချံအပှ့ၤအသိးန့ၣ်လီၤ.

²⁷အဝဲမ့ၢ်ဒိကၢ်ဘၣ်အမဲတဘ့ၣ်ဒီးကဘၣ်ပျၢ်ဖျဲးကုၢ်န့ၣ်ဒ်တၢ်လိးက့ၤ အမဲတဘ့ၣ်အပှ့ၤအသိးလီၤ.

²⁸ဒီးကျီၢ်ဖါတဒုမ့ၢ်ဘျၢၣ်သံပှၤတဂၤဂၤဒီးကဘၣ်တၢ်ကွံာ်သံ အီၤလၢလၢၢ်န့ၣ်လီၤ. ဒီးအညၣ်န့ၣ်တဘၣ်တၢ်အီၣ်အီၤဘၣ်. မ့မ့ၢ်ကျီၢ်ဖါအကစၢ်န့ၣ်တဘၣ်တၢ်စံၣ်ညီၣ်အီၤဘၣ်လီၤ.

²⁹ဘၣ်ဆၣ်, ကျီၢ်ဖါန့ၣ်မ့ၢ်အိၣ်တ့ၢ်ဒီးအလုၢ်အလၢ်လၢအဘျၢၣ်ပှၤဒီး အကစၢ်မ့ၢ်ဘၣ်တၢ်ဟ့ၣ်ပလီၢ်တ့ၢ်အီၤဒီးအဝဲမ့ၢ်တကနၣ်ဃုာ်ဘၣ်ဝဲ ဒီး, တုၤကျီၢ်န့ၣ်ဘျၢၣ်သံပှၤတဂၤဂၤလံန့ၣ်အကစၢ်စ့ၢ်ကီးကဘၣ်တၢ်မၤ သံအီၤန့ၣ်လီၤ.

³⁰မ့ၢ်နာ်သက့ဒ်န့ၣ်ဒီး, အကစၢ်မ့ၢ်ဘၣ်တၢ်ပျဲအီၤလၢကဟ့ၣ်တၢ်အပှ့ၤ လၢကမၤပူၤဖျဲးအသးသမူအဂီၢ်ဒီးကဘၣ်ဟ့ၣ်ဝဲ လၢလၢပှဲၤပှဲၤဒ်တၢ်လီၤဘၣ်အီၤအသိးန့ၣ်လီၤ.

³¹ကျီၢ်ဖါတဒုန့ၣ်မ့ၢ်မၤသံဘၣ်ပိာ်ခွါဖိသၣ်တဂၤမ့ၢ်ဂ့ၤပိာ် မုၣ်ဖိသၣ်တဂၤမ့ၢ်ဂ့ၤဒီး, တၢ်သိၣ်တၢ်ဘျၢမ့ၢ်တၢ်တမံၤဃီဒ်န့ၣ်အသိးလီၤ.

³²ကျီၢ်ဖါတဒုန့ၣ်မ့ၢ်မၤသံဘၣ်ကုၢ်ပိာ်ခွါမ့ၢ်ဂ့ၤကုၢ်ပိာ်မုၣ် မ့ၢ်ဂ့ၤန့ၣ်ဒီးအကစၢ်ကဘၣ်ဟ့ၣ်ကုၢ်အကစၢ်လၢစ့အဘ့ၣ်သၢဆံ, ဒီးကျီၢ်န့ၣ်ကဘၣ်တၢ်ကွံာ်သံအီၤလၢလၢၢ်န့ၣ်လီၤ.

³³ပှၤတဂၤမ့ၢ်အိးထီၣ်ကွံာ်တၢ်ပူၤတပူၤအခိၣ်ကၢၢ်မ့ၢ်ဂ့ၤ, မ့ၢ်ခူၣ်တၢ်ပူၤတပူၤဒီးမ့ၢ်တကျၢၢ်ဘၢဘၣ်အီၤမ့ၢ်ဂ့ၤအဃိ, ကျီၢ်ဖါတဒုမ့ၢ်ဂ့ၤ, ကသ့ၣ်ယီၤတဒုမ့ၢ်ဂ့ၤ, မ့ၢ်လီၤတဲာ်နုာ်ဆူတၢ်ပူၤန့ၣ်ဒီး,

³⁴အဝဲကဘၣ်လိးက့ၤဆၣ်ဖိကီၢ်ဖိတဒုန့ၣ်အပှ့ၤလီၤ. အဝဲကဘၣ်ဟ့ၣ်တိၢ်ဆူအကစၢ်အအိၣ်ဒီးဟံးဃာ်ဆၣ်ဖိကီၢ်ဖိ လၢအသံန့ၣ်လီၤ.

³⁵ပှၤတဂၤအကျီၢ်ဖါမ့ၢ်မၤသံပှၤအဂၤတဂၤအကျီၢ်ဖါဒီး, ပှၤခံဂၤန့ၣ်, ကဘၣ်ဆါကွံာ်ကျီၢ်ဖါလၢအမူတဒုန့ၣ်ဒီးနီၤလိာ်အသးတၢ်အပှ့ၤန့ၣ်လီၤ. ဒ်န့ၣ်အသိးကဘၣ်နီၤလိာ်အသးလၢကျီၢ်ဖါလၢအသံတဒုအညၣ်စ့ၢ်ကီးန့ၣ်လီၤ.

³⁶ဘၣ်ဆၣ်ဒီးတၢ်မ့ၢ်သ့ၣ်ညါလၢကျီၢ်ဖါတဒုန့ၣ်အိၣ်ဒီးအလုၢ်အလၢ် လၢအဘျၢၣ်တၢ်ဒီးအကစၢ်မ့ၢ်တဒုးဃာ်အီၤဘၣ်န့ၣ်, ဂ့ၤလၢတၢ်မၢအဝဲလိးက့ၤတၢ်အပှ့ၤခီဖျိတၢ်ဟ့ၣ်လီၤကျီၢ်ဖါ အမူတဒုန့ၣ်ဆူပှၤအဂၤတဂၤန့ၣ်အအိၣ်ဒီးအဝဲကဘၣ်ဟံးန့ၢ်ကျီၢ် ဖါအသံတဒုန့ၣ်လီၤ.