Read S'gaw Karen လံာ်တၢ်ဟးထီၣ်ကွံာ် 28 Bible Online

လံာ်တၢ်ဟးထီၣ်ကွံာ် 28 - S'gaw Karen bible

လံာ်တၢ်ဟးထီၣ်ကွံာ် 28

¹ကိးဖှိၣ်နဒီပုၢ်ဝဲၢ်ခွါစီၤအၤဟရိၣ်ဒီးအဖိခွါတဖၣ်လၢအမ့ၢ်ဝဲ စီၤနၤဒး, စီၤအဘံဟူၤ, စီၤအလၤဧစၢ်, ဒီးစီၤအံသမၢ်တက့ၢ်. ပာ်လီၤဆီအီၤဒီးကီၢ်အံၣ်စရ့လးအပှၤဂီၢ်မုၢ်ဒ်သိးအကမၤယတၢ် မၤဒ်ပှၤလုၢ်တၢ်အခိၣ်တဖၣ်အသိးတက့ၢ်.

²မၤန့ၢ်ပှၤလုၢ်တၢ်အခိၣ်အကူအသိးတဖၣ်လၢနဒီပုၢ်ဝဲၢ်ခွါစီၤအၤဟရိၣ်အဂီၢ်ဒ်သိး အကဟ့ၣ်အီၤတၢ်အသူးအသ့ၣ်ဒီးတၢ်ဃံတၢ်လၤတက့ၢ်.

³ကိးန့ၢ်ပှၤစုသ့ခဲလၢာ်လၢယဟ့ၣ်လီၤတ့ၢ်အီၤတၢ်သ့တၢ်ဘၣ်ဒီး တဲဘၣ်အဝဲသ့ၣ်လၢကမၤန့ၢ်စီၤအၤဟရိၣ်အကူအသိးတဖၣ်ဒ်သိး အဝဲပာ်စီဆှံထီၣ်အသးဒ်ပှၤလုၢ်တၢ်အခိၣ်တဂၤလၢယတၢ်ဖံးတၢ်မၤအပူၤကသ့ဝဲန့ၣ်တက့ၢ်.

⁴တဲဘၣ်အဝဲသ့ၣ်လၢကမၤန့ၢ်ပှၤလုၢ်တၢ်အခိၣ်သဃိးတဘ့ၣ်, အ့ဖိးတဘ့ၣ်, ဆ့ကၤဖးထီတဘ့ၣ်, ဆ့ကၤဆးကံၣ်အသးတဘ့ၣ်, ခိၣ်ဖၢၣ်တဘ့ၣ်, ဒီးယီၢ်တကိးတဘိတက့ၢ်. အဝဲသ့ၣ်ကဘၣ်မၤပှၤလုၢ်တၢ်အခိၣ်အကူအသိးတဖၣ်အံၤလၢနဒီပုၢ် ဝဲၢ်ခွါစီၤအၤဟရိၣ်ဒီးအဖိခွါတဖၣ်အဂီၢ်ဒ်သိးအဝဲသ့ၣ်မၤ ယတၢ်မၤဒ်ပှၤလုၢ်တၢ်အခိၣ်တဖၣ်အသိးကသ့ဝဲန့ၣ်လီၤ.

⁵ပှၤစုသ့တဖၣ်န့ၣ်ကဘၣ်သူတၢ်အလွဲၢ်အလါအဲး, အလွဲၢ်လုးတကုာ်ဒီးသိဆူၣ်ဂီၤ, သွဲထူဒီးတၢ်ကံးယာ်လုၣ် အဂ့ၤန့ၣ်တက့ၢ်.

⁶အဝဲသ့ၣ်ကဘၣ်ဆးအ့ဖိးလၢတၢ်အလွဲၢ်အလါအဲး, အလွဲၢ်လုးတကုာ်, ဒီးသိဆူၣ်ဂီၤ, သွဲထူ, ဒီးတၢ်ကံးယာ်လုၣ် အဂ့ၤဒီးကယၢကယဲအီၤဒီးတၢ်ဆးဒဲးကံၣ်ဒဲးဝ့ၤန့ၣ်လီၤ.

⁷ပျံၤလၢဖံဘၣ်ခိၣ်ခံဘိလၢတၢ်စၢဃးအီၤသ့ဝဲန့ၣ်, တၢ်ကဘၣ်ဆးတံာ်အီၤဖဲအကပၤန့ၣ်လီၤ.

⁸ယီၢ်တကိးအဂ့ၤမးတဘိလၢအဘၣ်တၢ်ထါအီၤ, လၢတမံၤဃီဒီးဆ့ကၤအတၢ်ပီးတၢ်လီအံၤကဘၣ်တၢ်ထီထီၣ် အီၤလၢအ့ဖိးအလိၤဒ်သိးကမ့ၢ်တၢ်တမံၤဃီန့ၣ်လီၤ.

⁹ဟံးန့ၢ်လၢၢ်တၢ်မျၢ်သူခံဖျၢၣ်ဒီးစိးပျၤလီၤစီၤယၤကိာ်အဖိခွါတဆံခံဂၤအမံၤလၢအလိၤ,

¹⁰ဒ်အတၢ်အိၣ်ဖျဲၣ်ထီၣ်တဂၤဝံၤတဂၤအိၣ်ဒီးအမံၤဃုဖျၢၣ်လၢလၢၢ် တဖျၢၣ်အလိၤ, ဒီးအဂၤဃုဖျၢၣ်လၢလၢၢ်အဂၤတဖျၢၣ်အလိၤန့ၣ်တက့ၢ်.

¹¹မၤန့ၢ်ပှၤပိာ်လၢၢ်ဖိလၢအသ့အဘၣ်ကတၢၢ်တဂၤလၢကစိးပျၤစီၤယၤ ကိာ်အဖိခွါတဖၣ်အမံၤလၢလၢၢ်တဖၣ်အလိၤဒီးပိာ်ဝးတရံးလၢၢ်တဖၣ် အကနူၤလၢထူန့ၣ်တက့ၢ်.

¹²ပာ်အီၤလၢအ့ဖိးအဖံထံခိၣ်အပျံၤအလိၤဒ်သိးကမ့ၢ်ခၢၣ်စးလၢ ပှၤအံၣ်စရ့လးဖိတဆံခံဒူၣ်အဂီၢ်န့ၣ်တက့ၢ်. မၤသးဒ်န့ၣ်ဒီး, စီၤအၤဟရိၣ်ကစိာ်အဝဲသ့ၣ်အမံၤလၢအဖံထံခိၣ် အလိၤ, ဒ်သိးယၤ, ယွၤ, ကသ့ၣ်နီၣ်ထီၣ်ယပှၤဂီၢ်မုၢ်ထီဘိအဂီၢ်န့ၣ်လီၤ.

¹³ပိာ်တၢ်အကနူၤဝးတရံးခံခါန့ၣ်လၢထူ, ဒီးမၤန့ၢ်သွဲခံဘိလၢထူစီဒ်ပျံၤတဖၣ်ပိၤဃးအသိးဒီးဘျး စဲအီၤဖဲတၢ်အကနူၤန့ၣ်တက့ၢ်.

¹⁴

¹⁵မၤသဃိးတခါလၢပှၤလုၢ်တၢ်အခိၣ်အဒိၣ်အဂီၢ်ဒ်သိးကသူဝဲလၢတၢ် ဃုသ့ၣ်ညါကစၢ်ယွၤအတၢ်ဘၣ်အသးအဂီၢ်တက့ၢ်. တၢ်န့ၣ်ကဘၣ်တၢ်မၤအီၤလၢတၢ်ပီးတၢ်လီတမံၤဃီဒ်တၢ်မၤအ့ဖိး, အိၣ်ဒီးတၢ်ဆးဒဲးကံၣ်ဒဲးဝ့ၤတမံၤဃီန့ၣ်လီၤ.

¹⁶တၢ်န့ၣ်ကဘၣ်မ့ၢ်အကပၤလွံၢ်ခီဃူလိာ်အသး, ဆးအီၤခံကထၢလၢ အထီမ့ၢ်တထါ, အလဲၢ်မ့ၢ်တထါန့ၣ်လီၤ.

¹⁷ပိာ်တၢ်မျၢ်လုၢ်ဒိၣ်ပှ့ၤဒိၣ်လွံၢ်ကျိၤလၢအလိၤတက့ၢ်. ဒီးလၢအခီၣ်ထံးတကျိၤန့ၣ်ပိာ်တၢ်မျၢ်ဆီသွံၣ်တဖျၢၣ်, တၢ်မျၢ်ဘီတဖျၢၣ်ဒီးတၢ်မျၢ်ဟ့မၠးတဖျၢၣ်တက့ၢ်.

¹⁸ခံကျိၤတကျိၤန့ၣ်ပိာ်တၢ်မျၢ်ဂီၤတဖျၢၣ်, တၢ်မျၢ်နံၤလါတဖျၢၣ်, တၢ်မျၢ်ဆှံတဖျၢၣ်တက့ၢ်.

¹⁹သၢကျိၤတကျိၤန့ၣ်ပိာ်တၢ်မျၢ်ဂီၤဘီတဖျၢၣ်, တၢ်မျၢ်သူကံၢ်ဃ့တဖျၢၣ်, ဒီးတၢ်မျၢ်သကီၤဖီ တဖျၢၣ်တက့ၢ်.

²⁰လွံၢ်ကျိၤတကျိၤန့ၣ်ပိာ်တၢ်မျၢ်ဟ့ဘီတဖျၢၣ်, တၢ်မျၢ်သူတဖျၢၣ်, တၢ်မျၢ်ဂီၤလုးတဖျၢၣ်တက့ၢ်. တၢ်မျၢ်ခဲလၢာ်အံၤကဘၣ်တၢ်ပိာ်ဝးတရံးအကနူၤလၢထူလီၤ.

²¹ဒီးလၢလၢၢ်တဆံခံဖျၢၣ်အံၤအလိၤန့ၣ်တၢ်ကဘၣ်စိးပျၤစီၤယၤကိာ်အဖိခွါတဖၣ်အမံၤ, တဖျၢၣ်တဂၤစုာ်စုာ်ဒ်သိးကကဲထီၣ်ပှၤအံၣ်စရ့လးဖိတဆံခံဒူၣ်အခၢၣ်စးန့ၣ်လီၤ.

²²လၢသဃိးအဂီၢ်န့ၣ်မၤသွဲတဖၣ်လၢထူစီဒီးပိၤအီၤဒ်ပျံၤတဖၣ်အသိးန့ၣ်တက့ၢ်.

²³မၤကွီၤထူခံကွီၤဒီးထီထီၣ်အီၤဖဲသဃိးအသနၢၣ်လၢအဖီခိၣ်တတီၤန့ၣ်,

²⁴ဒီးစၢတံၢ်သွဲထူခံဘိဖဲကွီၤခံကွီၤန့ၣ်တက့ၢ်.

²⁵စၢတံၢ်သွဲထူခံဘိအထိးနါလၢအဂၤတခီန့ၣ်ဖဲလၢၢ်တၢ်မျၢ်သူ ခံဖျၢၣ်အကနူၤတဖၣ်ဒီးလၢကျဲဒ်အံၤဘျးစဲအီၤဖဲအ့ဖိးအဖံထံ ခိၣ်အပျံၤခံဘိအမဲာ်ညါန့ၣ်တက့ၢ်.

²⁶အန့ၣ်ဝံၤဒီးမၤထူအကွီၤခံကွီၤဒီးဘျးစဲအီၤဖဲသဃိးအခီၣ် ထံးအသနၢၣ်တဖၣ်ဖဲအ့ဖိးအိၣ်ဝဲအလီၢ်အစိးနါတက့ၢ်.

²⁷မၤအါထီၣ်ထူခံကွီၤဒီးဘျးစဲအီၤဆူအ့ဖိးအဖံထံခိၣ် အပျံၤခီၣ်ထံးလၢအမဲာ်ညါတကပၤ, ဘူးဒီးပှၤဆးတၢ်အကျိၤဒီးယီၢ်တကိးလၢထါအသးဂ့ၤဂ့ၤအထးခီ န့ၣ်တက့ၢ်.

²⁸စၢသဃိးအကွီၤတဖၣ်ဒီးအ့ဖိးအကွီၤတဖၣ်လၢပျံၤအလါအဲးတဘိဒ် သိးသဃိးကအိၣ်ဖဲယီၢ်တကိးအထးခီဒီးအသုတလီၤဘီၣ်တဂ့ၤန့ၣ်တက့ၢ်.

²⁹ဖဲစီၤအၤဟရိၣ်ဟဲနုာ်လီၤဆူတၢ်အလီၢ်စီဆှံဒီးအဝဲကသိးထီၣ် ဝဲသဃိးအံၤလၢပှၤအံၣ်စရ့လးဖိအဒူၣ်တဖၣ်အမံၤစိးပျၤတ့ၢ်အသး လၢအလိၤဒ်သိးယၤ, ယွၤ, ကသ့ၣ်နီၣ်ထီၣ်ယပှၤဂီၢ်မုၢ်တဘိယူၢ်ဃီန့ၣ်လီၤ.

³⁰ပာ်အူၣ်ရံၣ်ဒီးတူမံၣ်လၢသဃိးအပူၤဒ်သိးစီၤအၤဟရိၣ်ကစိာ် အီၤဖဲအဟဲနုာ်လီၤဆူယအိၣ်ယဆိးအလီၢ်စီဆှံအပူၤအဂီၢ်န့ၣ် လီၤ. လၢအကတီၢ်ဒ်န့ၣ်သိးတဖၣ်အပူၤန့ၣ်အဝဲကဘၣ်သိးထီၣ် ဃာ်သဃိးထီဘိဒ်သိးကသ့ၣ်ညါယတၢ်ဘၣ်သးလၢကီၢ် အံၣ်စရ့လးအပှၤဂီၢ်မုၢ်အဂီၢ်န့ၣ်လီၤ.

³¹ဆ့ကၤဖးထီလၢတၢ်ကသိးထီၣ်အီၤလၢအ့ဖိးအဖီလာ်န့ၣ်ကဘၣ်တၢ် ဆးအီၤဒီဘ့ၣ်ညါလၢသိဆူၣ်အလါအဲးန့ၣ်လီၤ.

³²ကဘၣ်အိၣ်ဒီးအပူၤတပူၤလၢခိၣ်အဂီၢ်ဒီးတၢ်ပူၤအံၤကဘၣ်တၢ်မၤ ကျၢၤထီၣ်အီၤလၢတၢ်ထါဆးကံၢ်အသးဒ်သိးအသုကယာ်ကွံာ်တဂ့ၤ အဂီၢ်န့ၣ်လီၤ.

³³လၢအခီၣ်ထံးဝးတရံးအသရ့ၤန့ၣ်, ဆးန့ၢ်သလဲသၣ်အလွဲၢ်လါတဖၣ်, အလွဲၢ်လုးတကုာ်တဖၣ်ဒီးသိဆူၣ် ဂီၤဃုာ်ဒီးဒၢလွဲထူဖိတဖၣ်အိၣ်လၢအဘၢၣ်စၢၤန့ၣ်တက့ၢ်.

³⁴

³⁵စီၤအၤဟရိၣ်ကဘၣ်သိးဆ့ကၤဖးထီအံၤဖဲအမၤပှၤလုၢ်တၢ်အခိၣ် အတၢ်မၤအခါန့ၣ်လီၤ. ဖဲအဝဲဟဲနုာ်လီၤဆူယမဲာ်ညါလၢတၢ်အလီၢ်စီဆှံ အပူၤမ့ၢ်ဂ့ၤ, ဖဲအဟးထီၣ်လၢတၢ်လီၢ်အံၤမ့ၢ်ဂ့ၤ, ဒၢလွဲတဖၣ်အသီၣ်ကဘၣ်တၢ်နၢ်ဟူအီၤဒ်သိးအသုတဘၣ်တၢ်မၤသံကွံာ် အီၤတဂ့ၤလီၤ.

³⁶ဒီးမၤတၢ်ကယၢကယဲတမံၤလၢထူစီဒီးစိးပျၤတၢ်ကွဲးအသးအလိၤ, ‘တၢ်ပာ်စီဆှံဆူယွၤ’ န့ၣ်တက့ၢ်.

³⁷စၢတံၢ်အီၤဖဲခိၣ်ဖၢၣ်အမဲာ်ညါလၢပျံၤအလါအဲးတဘိတက့ၢ်.

³⁸စီၤအၤဟရိၣ်ကဘၣ်ဖၢၣ်ထီၣ်အီၤဖဲအခိၣ်တိသၣ်ဒ်သိးယၤ, ယွၤကတူၢ်လိာ်တၢ်လုၢ်ထီၣ်မၤဘူၣ်ခဲလၢာ်လၢပှၤအံၣ်စရ့လးဖိ တဖၣ်ပာ်စီဆှံထီၣ်အီၤဆူယအိၣ်, ဖဲပှၤဂီၢ်မုၢ်မၤတ့ၢ်တၢ်ကမူၤ ကမၣ်တနီၤနီၤလၢအတၢ်လုၢ်ထီၣ်ပာ်ထီၣ်အပူၤဒၣ်လဲာ်န့ၣ်လီၤ.

³⁹ထါန့ၢ်စီၤအၤဟရိၣ်အဆ့ကၤလၢလုၣ်အဂ့ၤ, ဒီးမၤန့ၢ်အခိၣ်ဖၢၣ် တဘ့ၣ်လၢတၢ်ကံးယာ်လုၣ်အဂ့ၤဒီးယီၢ်တကိးတဘိစ့ၢ်ကီးကယၢ ကယဲအီၤလၢတၢ်ဆးဒဲးကံၣ်ဒဲးဝ့ၤန့ၣ်တက့ၢ်.

⁴⁰မၤဆ့ကၤတဖၣ်, ယီၢ်တကိးတဖၣ်ဒီးခိၣ်သလုးတဖၣ်လၢစီၤအၤဟရိၣ် အဖိခွါတဖၣ်အဂီၢ်ဒ်သိးကအိၣ်ဖျါဝဲဒီးအလၤကပီၤဒီးတၢ်ဃံတၢ်လၤအဂီၢ်န့ၣ်တက့ၢ်.

⁴¹ဒုးသိးထီၣ်တၢ်ကူတၢ်သိးတဖၣ်အံၤလၢနဒီပုၢ်ဝဲၢ်စီၤအၤဟရိၣ် ဒီးအဖိခွါတဖၣ်အလိၤတက့ၢ်. အန့ၣ်ဝံၤဒီးဖှူအီၤဒီးပာ်စီဆှံအီၤလၢသ့ၣ်စၤယံးအသိဒ်သိး အကမၤယတၢ်မၤဒ်ပှၤလုၢ်တၢ်အခိၣ်တဖၣ်အသိးအဂီၢ်န့ၣ်တက့ၢ်.

⁴²ဆးန့ၢ်အဝဲသ့ၣ်လၢဖျီၣ်ခံတၢ်ကံးညာ်ဖိတဖၣ်စးထီၣ်လၢအယီၢ်ဒ့ တုၤအကံၣ်ဒုၣ်ဒ်သိးအတၢ်မဲာ်ဆှးသုတအိၣ်ဖျါတဂ့ၤအဂီၢ်တက့ၢ်.

⁴³စီၤအၤဟရိၣ်ဒီးအဖိခွါတဖၣ်ကဘၣ်သိးအီၤတဘိယူၢ်ဃီဖဲ အလဲၤနုာ်ဆူယအိၣ်ယဆိးအဒဲစီဆှံအပူၤအခါမ့ၢ်ဂ့ၤ, ဖဲအသုးဘူးဃီၤအသးဆူတၢ်လုၢ်လီၢ်လၢအကမၤတၢ်ဒ်ပှၤလုၢ်တၢ် အခိၣ်ဖဲတၢ်အလီၢ်စီဆှံအပူၤအခါမ့ၢ်ဂ့ၤဒ်သိးအသု တဘၣ်တၢ်မၤသံအီၤလၢအတၢ်မဲာ်ဆှးအိၣ်ဖျါအဃိတဂ့ၤန့ၣ်လီၤ. တၢ်အံၤမ့ၢ်တၢ်သိၣ်တၢ်သီအဂၢၢ်အကျၢၤတမံၤလၢစီၤအၤဟရိၣ်ဒီး အစၢၤအသွဲၣ်တဖၣ်အဂီၢ်န့ၣ်လီၤ.