Read S'gaw Karen လံာ်တၢ်ဟးထီၣ်ကွံာ် 29 Bible Online

လံာ်တၢ်ဟးထီၣ်ကွံာ် 29 - S'gaw Karen bible

လံာ်တၢ်ဟးထီၣ်ကွံာ် 29

¹အအံၤမ့ၢ်တၢ်လၢနကဘၣ်မၤအီၤလၢတၢ်ပာ်စီဆှံစီၤအၤဟရိၣ်ဒီး အဖိခွါသ့ၣ်တဖၣ်ဒ်ပှၤလုၢ်တၢ်အခိၣ်တဖၣ်အသိးလၢယတၢ်ဖံးတၢ်မၤအပူၤအဂီၢ်လီၤ. ဟံးန့ၢ်ဂီၤဖံးဖါအသးစၢ်ဖိတဒုဒီးသိဖါခံဒုလၢအမဲၣ်သူမဲၣ်ဂီၤတအိၣ်ဘၣ်န့ၣ်တက့ၢ်.

²ဟံးန့ၢ်ဘုကၠူၣ်အကမူၣ်အဂ့ၤကတၢၢ်လၢတအိၣ်ဘၣ်ဒီးကိၣ်မံၣ်ဒီး မၤကိၣ်တနီၤလၢသ့ၣ်စၤယံးအသိ, ဒီးတနီၤလၢတအိၣ်ဘၣ်ဒီးသ့ၣ်စၤယံးအသိဒီးတနီၤမၤအီၤဒ်ကိၣ် ဘ့ၣ်ဘၣ်ဘူတလါလၢတၢ်ဖှူအီၤလၢသိတက့ၢ်.

³ဒၢနုာ်အီၤလၢကုတဒုအပူၤဒီးမၤဘူၣ်အီၤဆူယအိၣ်ဖဲနလုၢ်ထီၣ် ဂီၤဖံးဖါဒီးသိဖါခံဒုန့ၣ်တက့ၢ်.

⁴ဟဲကိးစီၤအၤဟရိၣ်ဒီးအဖိခွါတဖၣ်ဆူယအိၣ်ယဆိးအဒဲစီဆှံ အကျဲစၢၤဒီးမၢအဝဲသ့ၣ်လုၣ်ကဆှီထီၣ်အသးဒ်တၢ်အလုၢ်အလၢ်အိၣ် ဝဲအသိးတက့ၢ်.

⁵အန့ၣ်ဝံၤဒီးဒုးကူထီၣ်သိးထီၣ်စီၤအၤဟရိၣ်လၢပှၤလုၢ်တၢ် အခိၣ်အကူအသိးတဖၣ်ဒ်ပစံးတၢ်အသိးဆ့ကၤ, အ့ဖိး, ဆ့ကၤထီလၢအ့ဖိးအဖီလာ်, သဃိးဒီးယီၢ်တကိးတက့ၢ်.

⁶ပာ်ထီၣ်ခိၣ်ဖၢၣ်လၢအဝဲအလိၤဒီးလၢခိၣ်ဖၢၣ်အလိၤန့ၣ်စၢထီၣ်တၢ် ပာ်စီဆှံသးအပနီၣ် ‘တၢ်ပာ်စီဆှံဆူယွၤ’ န့ၣ်တက့ၢ်.

⁷အန့ၣ်ဝံၤဒီးဟံးန့ၢ်သိဖှူတၢ်, ဒီးလူလီၤလၢအခိၣ်လိၤဒီးဖှူ အီၤတက့ၢ်.

⁸ဟဲကိးအဖိခွါတဖၣ်ဒီးဒုးသိးထီၣ်အဝဲသ့ၣ်လၢဆ့ကၤတဖၣ်,

⁹စၢထီၣ်ယီၢ်တကိးတဖၣ်လၢအယီၢ်ဒ့ဒီးဒုးဖၢၣ်ထီၣ်အခိၣ်တဖၣ်လၢ ခိၣ်ဖၢၣ်တဖၣ်တက့ၢ်. တၢ်အံၤမ့ၢ်တၢ်လၢနကဘၣ်မၤအီၤဒ်သိးနကဖှူစီၤအၤဟရိၣ်ဒီးအဖိ ခွါတဖၣ်အဂီၢ်ဒ်လဲၣ်န့ၣ်လီၤ. အဝဲသ့ၣ်ဒီးအစၢၤအသွဲၣ်တဖၣ်ကဘၣ်မၤယတၢ်မၤဒ်ပှၤလုၢ်တၢ်အခိၣ် တဖၣ်အသိးအစိၤစိၤအဃၣ်ဃၣ်လီၤ.

¹⁰ဟဲစိာ်ဂီၤဖံးဖါဆူယအိၣ်ယဆိးအဒဲစီဆှံအမဲာ်ညါဒီးတဲဘၣ် စီၤအၤဟရိၣ်ဒီးအဖိခွါတဖၣ်လၢကပာ်ထီၣ်အစုလၢဂီၤဖံးဖါ အခိၣ်လိၤန့ၣ်တက့ၢ်.

¹¹မၤသံဂီၤဖံးဖါတဒုန့ၣ်ဖဲယအိၣ်ယဆိးအဒဲစီဆှံအကျဲစၢၤန့ၣ်တက့ၢ်.

¹²ဟံးန့ၢ်ဂီၤဖံးဖါတဒုန့ၣ်အသွံၣ်တနီၤလၢနစုမုၢ်ဒီးထွါအီၤလၢတၢ်လုၢ်လီၢ်အနၢၤတဖၣ် အလိၤန့ၣ်တက့ၢ်. အန့ၣ်ဝံၤဒီးတၢ်သွံၣ်လၢအိၣ်လီၤတဲာ်တဖၣ်န့ၣ်လူလီၤအီၤလၢတၢ် လုၢ်လီၢ်အခီၣ်ထံးန့ၣ်တက့ၢ်.

¹³မၤကဒီးတစု, ဟံးန့ၢ်ကယဲၢ်တၢ်အသိလၢအကျးဘၢအပှံာ်အကဖုတဖၣ်န့ၣ်ခဲလၢာ်, ဒီးတၢ်အဂ့ၤကတၢၢ်လၢအသူၣ်, ဒီးအကလ့ၢ်ခံဖျၢၣ်ဃုာ်ဒီးအသိလၢအလိၤဒီးဆူးကဲၤထီၣ်အီၤလၢတၢ်လုၢ်လီၢ်အလိၤဒ် တၢ်လုၢ်မၤဘူၣ်တမံၤအသိးဆူယအိၣ်တက့ၢ်.

¹⁴မ့မ့ၢ်, ဂီၤဖံးဖါအညၣ်, အဖံးတဖၣ်ဒီးအပှံာ်အကဖုတဖၣ်န့ၣ်ဆူးကဲၤထီၣ်အီၤလၢသူၣ်ဒဲလီၢ်အချၢတက့ၢ်. အဝဲအံၤမ့ၢ်တၢ်လုၢ်မၤဘူၣ်တခါလၢကတြူာ်ကွံာ်ပှၤလုၢ်တၢ်အခိၣ်တဖၣ်အတၢ်ဒဲးဘးတဖၣ်န့ၣ်လီၤ.

¹⁵ဟံးန့ၢ်သိဖါတဖၣ်အကျါတဒုဒီးတဲဘၣ်စီၤအၤဟရိၣ်ဒီးအဖိခွါ တဖၣ်လၢကပာ်အစုလၢသိဖါန့ၣ်အခိၣ်လိၤတက့ၢ်.

¹⁶မၤသံအီၤဒီးဟံးန့ၢ်အသွံၣ်ဒီးဖှံအီၤလၢတၢ်လုၢ်လီၢ်အကပၤလွံၢ်ခီလိာ်န့ၣ်တက့ၢ်.

¹⁷ကျီတဲာ်ကွံာ်သိဖါန့ၣ်တကူာ်, တကူာ်, သ့စီကွံာ်အပှံာ်အကဖု တဖၣ်ဒီးအကံၣ်ဒုၣ်ခံခီဒီးပာ်အီၤလၢအခိၣ်ဒီးအညၣ်အကူာ်အဂၤတဖၣ်အဖီခိၣ်တက့ၢ်.

¹⁸ဆူးကဲၤထီၣ်သိဖါဒီဒုန့ၣ်လၢတၢ်လုၢ်လီၢ်အဖီခိၣ်ဒ်တၢ်လုၢ် ထီၣ်ပာ်ထီၣ်တၢ်အိၣ်တမံၤအသိးတက့ၢ်. တၢ်လုၢ်မၤဘူၣ်အံၤအတၢ်နၢမူန့ၣ်မၤမုာ်ယသးလီၤ.

¹⁹ဟံးန့ၢ်သိဖါအဂၤတဒု, သိဖါလၢတၢ်သူအီၤလၢတၢ်ပာ်စီဆှံ အဂီၢ်ဒီးတဲဘၣ်စီၤအၤဟရိၣ်ဒီးအဖိခွါတဖၣ်လၢကပာ်အစုလၢသိဖါန့ၣ်အခိၣ်လိၤတက့ၢ်.

²⁰မၤသံကွံာ်အီၤ, ဒီးဟံးန့ၢ်အသွံၣ်တနီၤဒီးထွါအီၤဖဲစီၤအၤဟရိၣ်ဒီးအဖိခွါတဖၣ်အနၢ်အစဲၤအထွဲ တဖၣ်ဒီးလၢအစုမုၢ်ကျၢၢ်အထွဲတဖၣ်, အခီၣ်မုၢ်ကျၢၢ်အထွဲတဖၣ်အလိၤန့ၣ်တက့ၢ်. တၢ်သွံၣ်အိၣ်တ့ၢ်အဂၤတဖၣ်ဖှံလီၤအီၤလၢတၢ်လုၢ်လီၢ်အကပၤလွံၢ်ခီတက့ၢ်.

²¹ဟံးန့ၢ်တၢ်သွံၣ်တနီၤလၢအအိၣ်လၢတၢ်လုၢ်လီၢ်အဖီခိၣ်န့ၣ်ဒီး သိဖှူတၢ်တနီၤဒီးဖှံအီၤလၢစီၤအၤဟရိၣ်ဒီးအဖိခွါတဖၣ်အတၢ် ကူတၢ်သိးအလိၤတက့ၢ်. အန့ၣ်တစုအဝဲဒၣ်ဒီးအဖိခွါတဖၣ်ဒီးအတၢ်ကူတၢ်သိးတဖၣ်န့ၣ် ကဘၣ်တၢ်ပာ်စီဆှံအီၤဆူယအိၣ်န့ၣ်လီၤ.

²²ကူးတဲာ်ကွံာ်သိဖါအသိ, အမဲၢ်ဘီၣ်, တၢ်အသိလၢအကျးဘၢအပှံာ် အကဖုတဖၣ်, တၢ်အဂ့ၤကတၢၢ်လၢအသူၣ်ကျါ, အကလ့ၢ်ခံဖျၢၣ်ဒီးအသိ အိၣ်လၢအလိၤ, ဒီးအကံၣ်ဒုၣ်လၢအထွဲတခီန့ၣ်တက့ၢ်.

²³ဟံးန့ၢ်ကိၣ်တလိၣ်စုာ်စုာ်ဒ်အကလုာ်ဒၣ်ဝဲအသိးလၢကိၣ်အကုပူၤ လၢဘၣ်တၢ်လုၢ်ထီၣ်အီၤဆူယအိၣ်န့ၣ်တက့ၢ်. ဟံးန့ၢ်တလိၣ်လၢအဘၣ်တၢ်မၤအီၤလၢသ့ၣ်စၤယံးအသိ, အဂၤတလိၣ်လၢတဘၣ်တၢ်မၤအီၤလၢသိဘၣ်, ဒီးကိၣ်ဘ့ၣ်ဘၣ်ဘူတလါတဘ့ၣ်တက့ၢ်.

²⁴ဒၢနုာ်တၢ်အီၣ်တဖၣ်အံၤခဲလၢာ်ဆူစီၤအၤဟရိၣ်ဒီးအဖိခွါတဖၣ် အစုပူၤဒီးတဲဘၣ်အဝဲသ့ၣ်လၢကပာ်စီဆှံထီၣ်အီၤဆူယအိၣ်ဒ်တၢ် ဟ့ၣ်လီၤဆီတမံၤအသိးတက့ၢ်.

²⁵အန့ၣ်ဝံၤဒီးဟံးန့ၢ်တၢ်တဖၣ်အံၤလၢအဝဲသ့ၣ်အအိၣ်ဒီးဆူးကဲၤ ထီၣ်အီၤလၢတၢ်လုၢ်လီၢ်အဖီခိၣ်, ပာ်အီၤလၢတၢ်လုၢ်မ့ၣ်အူ ခဲလၢာ်အဖီခိၣ်ဒ်တၢ်လုၢ်တၢ်အီၣ်တမံၤလၢယဂီၢ်တက့ၢ်. တၢ်လုၢ်အံၤအတၢ်နၢမူမၤမုာ်ယသးလီၤ.

²⁶ဟံးန့ၢ်သိဖါအံၤအသးနါပှၢ်ဒီးပာ်စီဆှံအီၤဆူယအိၣ်ဒ်တၢ် ဟ့ၣ်လီၤဆီတမံၤအသိးတက့ၢ်. ဆၣ်ဖိကီၢ်ဖိအညၣ်အံၤကမ့ၢ်ဝဲလၢနဂီၢ်လီၤ.

²⁷ဖဲပှၤလုၢ်တၢ်အခိၣ်တဂၤဘၣ်တၢ်ဖှူအီၤန့ၣ်သိဖါအသးနါပှၢ်ဒီး အကံၣ်ဒုၣ်လၢဘၣ်တၢ်သူအီၤလၢတၢ်ဖှူပှၤလုၢ်တၢ်အခိၣ်အဂီၢ်န့ၣ် ကဘၣ်တၢ်ပာ်စီဆှံအီၤဆူယအိၣ်ဒ်တၢ်ဟ့ၣ်လီၤဆီတမံၤအသိးဒီး ကဘၣ်တၢ်ပာ်လီၤဆီအီၤလၢပှၤလုၢ်တၢ်အခိၣ်တဖၣ်အဂီၢ်န့ၣ်လီၤ.

²⁸တၢ်န့ၣ်မ့ၢ်ယတၢ်ပာ်လီၤသးလၢအတဆီတလဲအသးဘၣ်, လၢဖဲယပှၤဂီၢ်မုၢ်မၤအတၢ်လုၢ်မၤဃူမၤဖိးတဖၣ်န့ၣ်ဆၣ်ဖိကီၢ် ဖိအသးနါပှၢ်ဒီးအကံၣ်ဒုၣ်တဖၣ်အံၤဘၣ်ဃးဒီးပှၤလုၢ်တၢ်အခိၣ်တဖၣ်န့ၣ်လီၤ. အအံၤမ့ၢ်ပှၤဂီၢ်မုၢ်အတၢ်ဟ့ၣ်ဆူယၤ, ယွၤအအိၣ်န့ၣ်လီၤ.

²⁹စီၤအၤဟရိၣ်အပှၤလုၢ်တၢ်အခိၣ်အကူအသိးတဖၣ်န့ၣ်ကဘၣ်တၢ်ဟ့ၣ်လီၤ အီၤတဆီဘၣ်တဆီဆူအဖိခွါတဖၣ်အအိၣ်ဖဲ အဝဲသံအလီၢ်ခံလၢအဝဲသ့ၣ်ကသိးထီၣ်ဝဲဖဲအဘၣ်တၢ်ဖှူအီၤအခါန့ၣ်လီၤ.

³⁰စီၤအၤဟရိၣ်အဖိခွါလၢအထီၣ်အပၢ်အလီၢ်ဒ်ပှၤလုၢ်တၢ်အခိၣ်အသိး ဒီးပှၤတဂၤလၢအလဲၤနုာ်လီၤဆူယအိၣ်ယဆိးအဒဲစီဆှံအပူၤလၢ ကမၤယတၢ်မၤလၢတၢ်အလီၢ်စီဆှံန့ၣ်ကဘၣ်သိးတၢ်ကူ တၢ်သိးတဖၣ်အံၤနွံသီန့ၣ်လီၤ.

³¹ဟံးန့ၢ်သိဖါအညၣ်လၢဘၣ်တၢ်သူအီၤလၢတၢ်ဖှူစီၤအၤဟရိၣ်ဒီး အဖိခွါတဖၣ်န့ၣ်, ဒီးချီအီၤလၢတၢ်အလီၢ်စီဆှံအပူၤတတီၤန့ၣ်တက့ၢ်.

³²အဝဲသ့ၣ်ကဘၣ်အီၣ်တၢ်ညၣ်အံၤဃုာ်ဒီးကိၣ်လၢအအိၣ်လီၤတဲာ်လၢကု ပူၤန့ၣ်ဖဲယအိၣ်ယဆိးအဒဲစီဆှံအကျဲစၢၤန့ၣ်လီၤ.

³³အဝဲသ့ၣ်ကဘၣ်အီၣ်တၢ်အီၣ်လၢဘၣ်တၢ်သူအီၤဒ်တၢ်ပျၢ်တၢ်ဒဲးဘး အတၢ်ဘူၣ်တၢ်ဘါအလုၢ်အလၢ်, ဖဲတၢ်ဖှူအဝဲသ့ၣ်အကတီၢ်န့ၣ်လီၤ. ထဲပှၤလုၢ်တၢ်အခိၣ်တဖၣ်ဧိၤ ကဘၣ်အီၣ်တၢ်အီၣ်အံၤန့ၣ်လီၤ. အဂ့ၢ်ဒ်အံၤမ့ၢ်ဝဲတၢ်စီဆှံန့ၣ်လီၤ.

³⁴ဒီးတၢ်ဖံးတၢ်ညၣ်ဒီးကိၣ်တနီၤလၢတဘၣ်တၢ်အီၣ်အီၤတုၤလၢမုၢ် ဆ့ၣ်ထီၣ်န့ၣ်ကဘၣ်တၢ်ဆူးကဲၤထီၣ်ကွံာ်အီၤလီၤ. တၢ်တဘၣ်အီၣ်အီၤလၢၤဘၣ်. အဂ့ၢ်ဒ်အံၤ, မ့ၢ်ဝဲတၢ်စီဆှံလီၤ.

³⁵မၤတၢ်ဖှူတၢ်အလုၢ်အလၢ်လၢစီၤအၤဟရိၣ်ဒီးအဖိခွါတဖၣ်အဂီၢ်နွံ သီလီၤတံၢ်လီၤဆဲးဒ်ယမၤလိာ်တ့ၢ်နၤအသိးတက့ၢ်.

³⁶နကဘၣ်လုၢ်ထီၣ်ဂီၤဖံးဖါတဒုဒ်တၢ်လုၢ်တၢ်ပာ်တမံၤအသိးကိးနံၤ ဒဲးဒ်သိးတၢ်ဒဲးဘးကဘၣ်တၢ်ပျၢ်ကွံာ်အီၤလီၤ. တၢ်အံၤကမၤကဆှီထီၣ်တၢ်လုၢ်လီၢ်န့ၣ်လီၤ. အန့ၣ်ဝံၤဒီးနကဘၣ်ဖှူအီၤလၢသ့ၣ်စၤယံးအသိလၢတၢ်မၤစီဆှံ အီၤအဂီၢ်န့ၣ်လီၤ.

³⁷မၤတၢ်အံၤကိးနံၤဒဲးနွံသီတက့ၢ်. အန့ၣ်ဒီးတၢ်လုၢ်လီၢ်ကစီဆှံထီၣ်ဝဲလၢလၢပှဲၤပှဲၤန့ၣ်လီၤ. ဒီးပှၤတဂၤဂၤမ့ၢ်ဂ့ၤ, တၢ်တမံၤမံၤမ့ၢ်ဂ့ၤလၢအထိးဘၣ်အီၤ န့ၣ်ကဘၣ်တၢ်မၤဘၣ်ဒိအီၤလၢတၢ်စီဆှံအံၤအစိအကမီၤန့ၣ်လီၤ.

³⁸လုၢ်ထီၣ်ပာ်ထီၣ်သိဖိတနံၣ်ဖိခံဒုလၢတၢ်လုၢ်လီၢ်အဖီခိၣ်ကိး မုၢ်နံၤဒဲးတဘိယူၢ်ဃီလၢဆၢကတီၢ်လၢအကဟဲန့ၣ်တက့ၢ်.

³⁹လုၢ်ထီၣ်ပာ်ထီၣ်သိဖိတဖၣ်အကျါတဒုလၢမုၢ်ဂီၤဒီးအဂၤတဒုလၢမုၢ်ဟါတက့ၢ်.

⁴⁰ဃုာ်ဒီးသိဖိအခီၣ်ထံးတဒုန့ၣ်မၤဘူၣ်ဘုကၠူၣ်အကမူၣ်အဂ့ၤ ကတၢၢ်လၢအဃၢတအ့စရိးဃါဃုာ်အသးလၢသ့ၣ်စၤယံးအသိတဟံၣ်လွံၢ် ပူတပူတက့ၢ်. လူလီၤစပံးထံဟံၣ်လွံၢ်ပူတပူဒ်တၢ်မၤဘူၣ်တမံၤအသိးတက့ၢ်.

⁴¹လုၢ်ထီၣ်ပာ်ထီၣ်သိဖိခံဒုတဒုန့ၣ်လၢမုၢ်ဟါခီဒီးမၤဘူၣ် ဃုာ်ကိၣ်ကမူၣ်, သ့ၣ်စၤယံးအသိဒီးစပံးထံပှဲၤသိးသိးလၢမုၢ်ဂီၤအကတီၢ်န့ၣ် တက့ၢ်. တၢ်အံၤမ့ၢ်တၢ်လုၢ်တၢ်အီၣ်တၢ်အီဆူယၤ, ယွၤအအိၣ်ဒီးတၢ်လုၢ်အတၢ်နၢမူန့ၣ်မၤမုာ်ယသးန့ၣ်လီၤ.

⁴²ခဲအံၤဒီးဆူညါထီဘိန့ၣ်တၢ်လုၢ်မ့ၣ်အူအံၤကဘၣ်တၢ်မၤဘူၣ် အီၤလၢယအိၣ်ယဆိးအဒဲစီဆှံအကျဲစၢၤလၢယမဲာ်ညါန့ၣ်လီၤ. အဝဲန့ၣ်မ့ၢ်တၢ်လီၢ်ဖဲယကသဂၢၢ်ယပှၤဂီၢ်မုၢ်ဒီးကတိၤတၢ်ဆူသုအိၣ်န့ၣ်လီၤ.

⁴³ဖဲန့ၣ်ယကသဂၢၢ်ကီၢ်အံၣ်စရ့လးအပှၤဂီၢ်မုၢ်ဒီးယတၢ်အိၣ်ဝဲဆိးဝဲ အတၢ်ကပြုၢ်ကပြီၤန့ၣ်ကမၤစီဆှံတၢ်လီၢ်န့ၣ်လီၤ.

⁴⁴ယကမၤစီဆှံယွၤအဒဲစီဆှံ, တၢ်လုၢ်လီၢ်စီဆှံ, ဒီးယကပာ်လီၤဆီ စီၤအၤဟရိၣ်ဒီးအဖိခွါတဖၣ်လၢကမၤယတၢ်မၤဒ်ပှၤလုၢ်တၢ်အခိၣ်တဖၣ်အသိးန့ၣ်လီၤ.

⁴⁵ယကအိၣ်ဆိးလၢကီၢ်အံၣ်စရ့လးအပှၤဂီၢ်မုၢ်အသိးအကျါဒီးယကမ့ၢ် အဝဲသ့ၣ်အကစၢ်ယွၤလီၤ.

⁴⁶အဝဲသ့ၣ်ကသ့ၣ်ညါလၢယမ့ၢ်ယွၤ, အဝဲသ့ၣ်အကစၢ်ယွၤလၢအထုးထီၣ် ကွံာ်အီၤလၢကီၢ်အဲၤကူပတူးအပူၤဒ်သိးယအိၣ်ဆိးလၢအသိးအကျါကသ့န့ၣ်လီၤ. ယမ့ၢ်ယွၤ, အဝဲသ့ၣ်အကစၢ်ယွၤလီၤ.