Read S'gaw Karen လံာ်တၢ်ဟးထီၣ်ကွံာ် 31 Bible Online

လံာ်တၢ်ဟးထီၣ်ကွံာ် 31 - S'gaw Karen bible

လံာ်တၢ်ဟးထီၣ်ကွံာ် 31

¹ယွၤစံးဘၣ်စီၤမိၤၡ့, “ယဃုထၢတ့ၢ်စီၤဘစၤလအ့လးလၢအမ့ၢ်စီၤအူၤရံၤအဖိခွါဒီး စီၤဃူၢ်အလံၤခွါတဂၤန့ၣ်လၢယူဒၤအဒူၣ်အပူၤ,

³ဒီးယမၤပှဲၤအီၤလၢယစိကမီၤလီၤ. ယဟ့ၣ်အီၤလီၤတၢ်သ့ၣ်ညါနၢ်ပၢၢ်, တၢ်သ့မၤတၢ်ဒီးတၢ်သ့တၢ်ဘၣ် ဘၣ်ဃးဒီးကယဲၢ်တၢ်သ့မၤတၢ်လၢစုတမံၤလၢ်လၢ်,

⁴လၢကကူၣ်ကျဲၤလီၤဒီးတ့တၢ်အဒိတဖၣ်ပှဲၤဒီးတၢ်ကူၣ်သ့, ဒီးမၤအီၤလၢထူ, စ့ဒီးတိၢ်ဘီ,

⁵တၢ်ဂူာ်လၢၢ်လုၢ်ဒိၣ်ပှ့ၤဒိၣ်တဖၣ်လၢတၢ်ကဆီလီၤအီၤအဂီၢ်, လၢတၢ်စိးပျၤသ့ၣ်ဒီးကယဲၢ်တၢ်သ့မၤတၢ်လၢစုအတၢ်ကူၣ်သ့ အတၢ်မၤအဂၤတဖၣ်အဂီၢ်န့ၣ်လီၤ.

⁶ယဃုထၢစ့ၢ်ကီးစီၤအၤဟလံအာ်, လၢအမ့ၢ်စီၤအဃံစမးအဖိခွါလၢ ဒၣ်အဒူၣ်, လၢကမၤသကိးတၢ်ဒီးအီၤအဂီၢ်န့ၣ်လီၤ. ယဟ့ၣ်လီၤစ့ၢ်ကီးတၢ်သ့တၢ်ဘၣ်ဖးဒိၣ်ဆူကယဲၢ်ပှၤစုသ့စဲၣ်နီၤ အဂၤတဖၣ်အအိၣ်ဒ်သိးကမၤဝံၤတၢ်ကိးမံၤဒဲးလၢယမၤလိာ်အီၤလၢအမ့ၢ်,

⁷ယွၤအိၣ်ဝဲဆိးဝဲအဒဲစီဆှံ, တၢ်အၢၣ်လီၤအီလီၤအတလါစီဆှံ ဒီးအခိၣ်ကးဒီးကယဲၢ်တၢ်အဃၢၤအဃိာ်လၢယွၤအဒဲစီဆှံအဂီၢ်,

⁸စီၢ်နီၤခိၣ်ဒီးတၢ်အပီးအလီတဖၣ်, တၢ်ပာ်မ့ၣ်အူဒၢအလီၢ်လၢအ ဘၣ်တၢ်မၤအီၤလၢထူစီဒီးကယဲၢ်အတၢ်ပီးတၢ်လီတဖၣ်, တၢ်လုၢ်လီၢ်လၢတၢ်ဆူးကဲၤတၢ်နၢမူအဂီၢ်,

⁹တၢ်လုၢ်လီၢ်လၢတၢ်ဆူးကဲၤထီၣ်တၢ်လုၢ်မ့ၣ်အူတဖၣ်အဂီၢ်ဒီးကယဲၢ် အတၢ်ပီးတၢ်လီတဖၣ်, သရာ်တိၢ်ဘီလၢတၢ်သ့ကဆှီသးအဂီၢ်ဒီးအခံဟံးဃာ်,

¹⁰ပှၤလုၢ်တၢ်အခိၣ်အကူအသိးလီၤဘီလီၤမုၢ်တဖၣ်လၢစီၤအၤဟရိၣ် ဒီးအဖိခွါတဖၣ်ကသူဝဲဖဲအဝဲသ့ၣ်မၤတၢ်ဒ်ပှၤလုၢ်တၢ်အခိၣ်တဖၣ်အသိး,

¹¹သိဖှူတၢ်, ဒီးတၢ်နၢမူနၢဆှီလၢတၢ်အလီၢ်စီဆှံအဂီၢ်န့ၣ်လီၤ. လၢတၢ်မၤကယဲၢ်တၢ်ကိးမံၤဒဲးအံၤအပူၤ, အဝဲသ့ၣ်ကဘၣ်မၤဝဲ လီၤတံၢ်လီၤဆဲးဒ်ယမၤလိာ်တ့ၢ်နၤအသိးန့ၣ်လီၤ.”

¹²ယွၤမၤလိာ်စီၤမိၤၡ့လၢကစံးဘၣ်ကီၢ်အံၣ်စရ့လးအပှၤဂီၢ်မုၢ်,

¹³“ပာ်စီဆှံမုၢ်အိၣ်ဘှံးအနံၤစီဆှံ, မုၢ်နံၤလၢယအိၣ်ဘှံး န့ၣ်တက့ၢ်. အဂ့ၢ်ဒ်အံၤ, တၢ်န့ၣ်မ့ၢ်တၢ်ပနီၣ်လၢသုဝဲဒီးယၤအဘၢၣ်စၢၤလၢ တၢ်ကဒုးနဲၣ်ဖျါထီၣ်လၢယၤ, ယွၤအံၤ, ယဒုးကဲထီၣ်သုလၢယပှၤဂီၢ်မုၢ်ခဲအံၤဒီးဆူညါအစိၤစိၤအဃၣ်ဃၣ်န့ၣ်လီၤ.

¹⁴သုဘၣ်ပာ်စီဆှံမုၢ်အိၣ်ဘှံးအနံၤလီၤ. အဂ့ၢ်ဒ်အံၤ, စီဆှံဝဲလီၤ. ပှၤတဂၤလၢ်လၢ်လၢအတပာ်စီဆှံအီၤ, ဒီးမၤတၢ်လၢမုၢ်တနံၤန့ၣ်, ကဘၣ်တၢ်မၤသံအီၤန့ၣ်လီၤ.

¹⁵သုအိၣ်ဒီးမုၢ်နံၤဃုနံၤဃုသီလၢသုကမၤသုတၢ်မၤအဂီၢ်လီၤ. မ့မ့ၢ်နွံသီတသီန့ၣ်, မ့ၢ်သပှၢ်ကတၢၢ်နံၤအိၣ်ဘှံးလၢတၢ်ပာ်စီဆှံအီၤဆူယအိၣ်လီၤ. ပှၤတဂၤလၢ်လၢ်လၢအမၤတၢ်တမံၤဂ့ၤတမံၤဂ့ၤလၢမုၢ်တနံၤန့ၣ်ကဘၣ်တၢ်မၤသံအီၤလီၤ.

¹⁶ကီၢ်အံၣ်စရ့လးအပှၤဂီၢ်မုၢ်တဖၣ်ကဘၣ်တိၢ်န့ၢ်ဖံးဃာ်မုၢ်တနံၤ အံၤဒ်တၢ်အၢၣ်လီၤအီလီၤအပနီၣ်တမံၤအသိးန့ၣ်လီၤ.

¹⁷အဝဲအံၤမ့ၢ်တၢ်ပနီၣ်အဂၢၢ်အကျၢၤတမံၤလၢကီၢ်အံၣ်စရ့လးအပှၤ ဂီၢ်မုၢ်ဒီးယၤအဘၢၣ်စၢၤန့ၣ်လီၤ. အဂ့ၢ်ဒ်အံၤယၤ, ယွၤအံၤတ့လီၤမူခိၣ်ဒီးဟီၣ်ခိၣ်လၢဃုနံၤဃုသီ အတီၢ်ပူၤ, ဒီးလၢနွံသီတသီန့ၣ်ယဆိကတီၢ်တၢ်မၤဒီးအိၣ်ဘှံးယဲ ဒၣ်လီၤ.”

¹⁸ဖဲကစၢ်ယွၤကတိၤတၢ်ဒီးစီၤမိၤၡ့လၢကစၢၢ်စံၤနါအလိၤဝံၤဝဲန့ၣ်, အဝဲဟ့ၣ်လီၤအီၤလၢလၢၢ်ဘ့ၣ်ဘၣ်ခံဘ့ၣ်လၢကစၢ်ယွၤအနီၢ်ကစၢ်ဒၣ်ဝဲ ကွဲးလီၤတၢ်မၤလိာ်တဖၣ်န့ၣ်လီၤ.