Read S'gaw Karen လံာ်တၢ်ဟးထီၣ်ကွံာ် 33 Bible Online

လံာ်တၢ်ဟးထီၣ်ကွံာ် 33 - S'gaw Karen bible

လံာ်တၢ်ဟးထီၣ်ကွံာ် 33

¹ဒီးယွၤစံးဘၣ်စီၤမိၤၡ့, “နၤဒီးပှၤဂီၢ်မုၢ်လၢနထုးထီၣ် ကွံာ်အီၤလၢကီၢ်အဲၤကူပတူးအပူၤန့ၣ်ဟးထီၣ်လၢတၢ်လီၢ်အံၤ ဒီးလဲၤဆူကီၢ်တဘ့ၣ်လၢယအၢၣ်လီၤအီလီၤတ့ၢ်လၢအက ဟ့ၣ်လီၤဆူစီၤအၤဘြၤဟၣ်, စီၤအံၤစဲး, စီၤယၤကိာ်ဒီးအစၢၤ အသွဲၣ်တဖၣ်အအိၣ်န့ၣ်တက့ၢ်.

²ယကဆှၢလီၤကလူးတဂၤလၢကပၢဆှၢသု, ဒီးယကနီၣ်ထီၣ်ကွံာ်ပှၤကနၤဧၣ်ဖိတဖၣ်, ပှၤအမိၢ်ဖိတဖၣ်, ပှၤဃ့ၤသးဖိတဖၣ်, ပှၤပရးစၤဖိတဖၣ်, ပှၤဃံၤဝံဖိတဖၣ်, ဒီးပှၤယဘူၣ်ဖိတဖၣ်န့ၣ်လီၤ.

³သုကလဲၤဆူကီၢ်လၢအထူးအတီၤဒီးဟီၣ်ခိၣ်ညၣ်ထ့ၣ်ဂ့ၤဝဲ တဘ့ၣ်အပူၤလီၤ. ဘၣ်ဆၣ်ဒီးယနီၢ်ကစၢ်ဒၣ်ယဲယတလဲၤဃုာ်တၢ်ဒီးသုဘၣ်. အဂ့ၢ်ဒ်အံၤ, သုမ့ၢ်ပှၤဂီၢ်မုၢ်တဖုလၢအခိၣ်ကိၤ, ဒီးယကမၤဟးဂီၤဘၣ်ဖုးသုလၢကျဲန့ၣ်လီၤ.”

⁴ဖဲပှၤဂီၢ်မုၢ်နၢ်ဟူတၢ်အံၤဒီးအဝဲသ့ၣ်စးထီၣ်သူၣ်အုးသးအုး ဒီးတကယၢကယဲလၢၤအသးဒီးတၢ်မျၢ်လုၢ်ဒိၣ်ပှ့ၤဒိၣ်လၢၤဘၣ်န့ၣ်လီၤ.

⁵ယွၤမၤလိာ်စီၤမိၤၡ့လၢကစံးဘၣ်အဝဲသ့ၣ်, “သုမ့ၢ်ပှၤဂီၢ်မုၢ်တဖုလၢအခိၣ်ကိၤလီၤ. ယမ့ၢ်လဲၤဃုာ်တၢ်ဒီးသုထဲတစိၢ်တလီၢ်ဧိၤဒၣ်လဲာ်န့ၣ်, ယကမၤဟးဂီၤကွံာ်သုလၢာ်လၢာ်ဆ့ဆ့န့ၣ်လီၤ. ခဲအံၤဘ့ၣ်လီၤကွံာ်သုတၢ်မျၢ်လုၢ်ဒိၣ်ပှ့ၤဒိၣ်တဖၣ်တက့ၢ်. ဒီးယစံၣ်ညီၣ်တဲာ်လၢယကဘၣ်မၤသုဒ်လဲၣ်ဒ်လဲၣ်အဂ့ၢ်န့ၣ်လီၤ.”

⁶မၤသးဒ်န့ၣ်ဒီး, ဖဲအဝဲသ့ၣ်ဟးထီၣ်ကွံာ်လၢကစၢၢ်စံၤနါဝံၤ အလီၢ်ခံန့ၣ်ကီၢ်အံၣ်စရ့လးအပှၤဂီၢ်မုၢ်တကယၢကယဲလၢၤဘၣ်အသး လၢတၢ်မျၢ်လုၢ်ဒိၣ်ပှ့ၤဒိၣ်တဖၣ်လၢၤဘၣ်.

⁷တဘျီလၢ်လၢ်ဖဲအံၣ်စရ့လးအပှၤဂီၢ်မုၢ်သူၣ်ထီၣ်အဒဲန့ၣ်, စီၤမိၤၡ့ကဟံးန့ၢ်ဒဲစီဆှံဒီးသူၣ်ထီၣ်အီၤတဘူးတယံၤဖဲတၢ်သူၣ်ဒဲအလီၢ်န့ၣ်လီၤ. တၢ်န့ၣ်ဘၣ်တၢ်ကိးအီၤလၢယွၤအိၣ်ဝဲဆိးဝဲ အဒဲစီဆှံဒီးပှၤတဂၤလၢ်လၢ်လၢအသးအိၣ်ကူၣ်လိာ်သကိးတၢ်ဒီး ယွၤန့ၣ်ကလဲၤထီၣ်ဆူဒဲအံၤန့ၣ်လီၤ.

⁸ဖဲစီၤမိၤၡ့လဲၤထီၣ်ဆူဒဲအအိၣ်တဘျီလၢ်လၢ်န့ၣ်, ပှၤဂီၢ်မုၢ်ဆၢထၢၣ်ဖဲအဒဲတဖၣ်အတြဲၤဒီးခိးကွၢ်စီၤမိၤၡ့ တုၤလၢအလဲၤနုာ်ဆူဒဲစီဆှံအပူၤတစုန့ၣ်လီၤ.

⁹တုၤစီၤမိၤၡ့လဲၤနုာ်ဝဲတစုန့ၣ်, တၢ်အၢၣ်အထူၣ်ကဟဲလီၤဝဲ, ဒီးအိၣ်ဝဲဖဲယွၤအဒဲစီဆှံအတြဲၤဒီးယွၤကကတိၤတၢ်ဒီးစီၤမိၤၡ့လၢတၢ်အၢၣ်ပူၤန့ၣ်လီၤ.

¹⁰ဖဲပှၤဂီၢ်မုၢ်ထံၣ်ဘၣ်တၢ်အၢၣ်အထူၣ်လၢယွၤအဒဲစီဆှံအတြဲၤ တဘျီဃီန့ၣ်အဝဲသ့ၣ်ကဘၣ်ဆုးလီၤအခိၣ်လီၤ.

¹¹ယွၤကကတိၤတၢ်ဒီးစီၤမိၤၡ့မဲာ်သကိးမဲာ်မၤသးဒ်သိးပှၤတဂၤ ကတိၤသကိးတၢ်ဒီးအတံၤသကိးန့ၣ်လီၤ. အန့ၣ်ဝံၤဒီး, စီၤမိၤၡ့ကဟဲက့ၤဆူတၢ်သူၣ်ဒဲအလီၢ်လီၤ. ဘၣ်ဆၣ်ဒီးပှၤသးစၢ်တဂၤလၢအမၤစၢၤအီၤ, စီၤနိၣ်အဖိခွါစီၤယိၤၡူန့ၣ်အိၣ်တ့ၢ်ဖဲယွၤအဒဲစီဆှံအပူၤန့ၣ်လီၤ.

¹²စီၤမိၤၡ့စံးဘၣ်ကစၢ်ယွၤ, “နတဲတ့ၢ်ယၤလၢယကဘၣ်ဆှၢပှၤဂီၢ်မုၢ်ဆူကီၢ်အဝဲန့ၣ်န့ၣ်, မ့ၢ်ဝဲတီဝဲလီၤ. ဘၣ်ဆၣ်ဒီးနတတဲဘၣ်ယၤလၢနကမၢလီၤမတၤတဂၤဃုာ်ဒီးယၤလဲၣ်န့ၣ် ဘၣ်. နစံးတ့ၢ်လၢနသ့ၣ်ညါယၤဂ့ၤဂ့ၤဒီးဘၣ်နသးလၢယၤလီၤ.

¹³ခဲကနံၣ်အံၤနမ့ၢ်ဘၣ်သူၣ်ဘၣ်သးန့ၣ်ဒီးတဲဘၣ်ယၤလၢနတၢ်သုးတၢ် ကျဲၤဒ်သိးယကမၤနတၢ်မၤဒီးမၤတၢ်ဘၣ်နသးတက့ၢ်. သ့ၣ်နီၣ်ထီၣ်စ့ၢ်ကီးလၢနဃုထၢတ့ၢ်ပှၤကလုာ်အံၤလၢကကဲထီၣ်နတၢ် ဒၣ်နဲန့ၣ်တက့ၢ်.”

¹⁴ယွၤစံးဝဲဒၣ်, “ယကလဲၤဃုာ်တၢ်ဒီးနၤဒီးယကဟ့ၣ်နၤလၢတၢ်မၤနၢၤန့ၣ်လီၤ.”

¹⁵စီၤမိၤၡ့စံးဆၢက့ၤဝဲ, “နမ့ၢ်တလဲၤဃုာ်တၢ်ဒီးပှၤဘၣ်ဒီး, ပျဲပဟးထီၣ်လၢတၢ်လီၢ်အံၤတဂ့ၤ.

¹⁶နမ့ၢ်တလဲၤဃုာ်တၢ်ဒီးပှၤဘၣ်န့ၣ်ပှၤတဂၤဂၤသ့ၣ်ညါဝဲ လၢနဘၣ်သူၣ်ဘၣ်သးလၢနပှၤဂီၢ်မုၢ်ဒီးယၤအံၤကသ့ဒ်လဲၣ်. နတၢ်အိၣ်ဆိးဒီးပှၤအံၤကဒုးလီၤဆီပှၤဒီးပှၤဂုၤပှၤဂၤလၢ ဟီၣ်ခိၣ်ချၢအံၤန့ၣ်လီၤ.”

¹⁷ယွၤစံးဘၣ်စီၤမိၤၡ့, “ယကမၤဒ်နဃ့တ့ၢ်နဲအသိးလီၤ. အဂ့ၢ်ဒ်အံၤ, ယသ့ၣ်ညါနၤဂ့ၤဂ့ၤဒီးယဘၣ်သသူၣ်ဘၣ်သးလၢနၤလီၤ.”

¹⁸အန့ၣ်ဒီးစီၤမိၤၡ့ဃ့ကညးဝဲ, “ဝံသးစူၤပျဲယထံၣ်ဘၣ်နတၢ် အိၣ်ဝဲဆိးဝဲအတၢ်ကပီၤကပြုၢ်ကပြီၤတက့ၢ်.”

¹⁹ယွၤစံးဆၢစီၤမိၤၡ့, “ယကဒုးလဲၤခီဂာ်ယတၢ်ကဟုကညီၢ်ခဲ လၢာ်လၢနမဲာ်ညါ, ဒီးလၢနမဲာ်ညါန့ၣ်ယကကိးထီၣ်ယမံၤစီဆှံလီၤ. ယမ့ၢ်ယွၤဒီးယဒုးနဲၣ်ယတၢ်သူၣ်အိၣ်သးအိၣ်ဒီးသူၣ်ကညီၤသး ကညီၤဘၣ်ပှၤလၢယဃုထၢအီၤတဖၣ်န့ၣ်လီၤ.

²⁰ယတပျဲလၢနကထံၣ်ဘၣ်ယမဲာ်ဘၣ်. အဂ့ၢ်ဒ်အံၤ, ပှၤထံၣ်ဘၣ်ယမဲာ်ဒီးအိၣ်မူဒံးဝဲန့ၣ်တသ့ဘၣ်နီတဂၤဘၣ်.

²¹ဘၣ်ဆၣ်ဒီးဖဲအံၤတၢ်လီၢ်အိၣ်ဝဲတပူၤလၢယကပၤဖဲနဆၢထၢၣ်လၢလၢၢ် တဖျၢၣ်အလိၤသ့ဝဲန့ၣ်လီၤ.

²²ဖဲယတၢ်အိၣ်ဝဲဆိးဝဲအတၢ်ကပီၤကပြုၢ်ကပြီၤလဲၤခီဂာ်ဝဲ န့ၣ်, ယကပာ်နၤလၢလ့ကအိတခါလၢအအိၣ်အိးထီၣ်အသး အပူၤဒီးကျၢၢ်ဘၢနၤလၢယစုတုၤလၢယလဲၤပူၤကွံာ်တစုန့ၣ်လီၤ.

²³အန့ၣ်တစု, ယကသုးကွံာ်ယစု, ဒီးနကထံၣ်ယၤလၢယချၢဒီးတမ့ၢ်ဘၣ် ယမဲာ်သၣ်ဘၣ်န့ၣ်လီၤ.”