Read S'gaw Karen လံာ်တၢ်ဟးထီၣ်ကွံာ် 35 Bible Online

လံာ်တၢ်ဟးထီၣ်ကွံာ် 35 - S'gaw Karen bible

လံာ်တၢ်ဟးထီၣ်ကွံာ် 35

¹ဒီးစီၤမိၤၡ့ကိးဖှိၣ်ကီၢ်အံၣ်စရ့လးအပှၤဂီၢ်မုၢ်အဒူၣ်အထၢ ဒီဒူၣ်ဒီးစံးဘၣ်အဝဲသ့ၣ်, “အဝဲအံၤမ့ၢ်တၢ်လၢယွၤမၤလိာ်သုလၢသုကဘၣ်မၤအီၤလီၤ.

²သုအိၣ်ဒီးမုၢ်နံၤဃုနံၤဃုသီလၢသုကမၤသုတၢ်မၤန့ၣ်လီၤ. ဘၣ်ဆၣ်ဒီးနွံနံၤတနံၤန့ၣ်ကဘၣ်တၢ်ပာ်စီဆှံအီၤဒ်မုၢ်နံၤစီဆှံလၢတၢ်အိၣ်ဘှံးအဂီၢ်ဆူယၤ, ယွၤအအိၣ်လီၤ. ပှၤတဂၤလၢ်လၢ်လၢအမၤတၢ်မၤတမံၤမံၤလၢမုၢ်နံၤဝဲန့ၣ်အပူၤ န့ၣ်ကဘၣ်တၢ်မၤသံကွံာ်အီၤန့ၣ်လီၤ.

³လၢမုၢ်အိၣ်ဘှံးအနံၤန့ၣ်မၤကဲၤထီၣ်ဒၣ်လဲာ်မ့ၣ်အူလၢသုဟံၣ်အပူၤတဂ့ၤ.”

⁴စီၤမိၤၡ့စံးဘၣ်ကီၢ်အံၣ်စရ့လးအပှၤဂီၢ်မုၢ်ခဲလၢာ်, “အဝဲအံၤမ့ၢ်တၢ်လၢယွၤမၤလိာ်ဝဲလီၤ.

⁵မၤတၢ်လုၢ်မၤဘူၣ်တမံၤဆူယွၤအအိၣ်တက့ၢ်. ပှၤကိးဂၤလၢအသး အိၣ်တၢ်ဒ်န့ၣ်အသိးန့ၣ်, ကဘၣ်ဟဲစိာ်တၢ်လုၢ်မၤဘူၣ်တမံၤလၢထူ, စ့, မ့တမ့ၢ်တိၢ်ဘီ,

⁶တၢ်ကံးယာ်လုၣ်အဂ့ၤကတၢၢ်, အိၣ်ဒီးအလွဲၢ်လါအဲး, အလွဲၢ်လုးတကုာ်, သိဆူၣ်အဂီၤ, တၢ်ကံးယာ်ဘၣ်တၢ်မၤအီၤလၢမဲာ်တဲးလဲးအဆူၣ်,

⁷သိဖါအဖံးလၢဘၣ်တၢ်စုၣ်ဂီၤထီၣ်အီၤ, တၢ်ဖံးအဂ့ၤ, သ့ၣ်ဖှ့ၡံးတၤ,

⁸သိလၢမ့ၣ်အူဒၢတဖၣ်အဂီၢ်, တၢ်နၢမူလၢသိဖှူတၢ်အဂီၢ်, ဒီးတၢ်နၢမူလၢတၢ်လုၢ်ဆိၣ်ကဲၤတၢ်လုၢ်နၢမူအဂီၢ်,

⁹တၢ်မျၢ်သူဒီးတၢ်မျၢ်လုၢ်ဒိၣ်ပှ့ၤဒိၣ်အဂၤလၢတၢ်ပာ်ထီၣ်အီၤလၢ အ့ဖိးအလိၤဒီးပှၤလုၢ်တၢ်အခိၣ်အဒိၣ်အသဃိးအလိၤအဂီၢ်န့ၣ်လီၤ.

¹⁰ကယဲၢ်ပှၤမၤတၢ်သ့နီၢ်နီၢ်လၢသုကျါတဖၣ်ကဘၣ်ဟဲဒီးမၤတၢ်ကိးမံၤဒ်ယွၤမၤလိာ်ဝဲလီၤ.

¹¹ယွၤအဒဲစီဆှံ, အယၣ်ဘျးသဒၢလၢအအိပူၤဒီးလၢအချၢတဖၣ်, အထးဘျးတဖၣ်ဒီးအသ့ၣ်ဘၣ်တဖၣ်, အနီၣ်ဘိတဖၣ်အထူၣ်အဘိတဖၣ်, ဒီးအခီၣ်ထံးတဖၣ်,

¹²တၢ်အၢၣ်လီၤအီလီၤအတလါစီဆှံဒီးအနီၣ်ထိးဘိတဖၣ်, တလါအခိၣ်ကး, ဒီးယၣ်ဘျးသဒၢလၢတၢ်မၤဘၢအီၤ,

¹³စီၢ်နီၤခိၣ်ဒီးအနီၣ်ယိးဘိတဖၣ်, ကယဲၢ်အတၢ်ဖိတၢ်လံၤခဲလၢာ်, ကိၣ်တဖၣ်လၢဘၣ်တၢ်လုၢ်ထီၣ်အီၤဆူကစၢ်ယွၤအအိၣ်န့ၣ်လီၤ.

¹⁴တၢ်ပာ်မ့ၣ်အူအလီၢ်လၢတၢ်ကပီၤအဂီၢ်ဒီးအတၢ်ဖိတၢ်လံၤတဖၣ်, မ့ၣ်အူဒၢတဖၣ်ဒီးအသိ,

¹⁵တၢ်လုၢ်လီၢ်လၢတၢ်ဆိၣ်ကဲၤတၢ်နၢမူအဂီၢ်ဒီးအနီၣ်ထိးဘိတဖၣ်, သိဖှူတၢ်, တၢ်နၢမူလၢအဆၢ, ယၣ်ဘျးသဒၢဖဲဒဲစီဆှံအကျဲစၢၤ,

¹⁶တၢ်လုၢ်လီၢ်ဖဲတၢ်ဆိၣ်ကဲၤတၢ်လုၢ်မ့ၣ်အူဃုာ်ဒီးတိၢ်ဘီဖၣ်ကွာ် ဆီလီၤအသးလၢအလိၤဒီးအနီၣ်ထိးဘိတဖၣ်, ဒီးအတၢ်ဖိတၢ်လံၤခဲလၢာ်, သရာ်လၢတၢ်သ့ကဆှီသးအဂီၢ်ဃုာ်ဒီး အခီၣ်ထံးတဖၣ်,

¹⁷ယၣ်ဘျးသဒၢတဖၣ်လၢတၢ်လုၢ်လီၢ်အအိပူၤ, အထူၣ်တဖၣ်ဒီးအခီၣ်ထံး တဖၣ်, ယၣ်ဘျးသဒၢလၢတၢ်လုၢ်လီၢ်အဒၢးအကျဲစၢၤအဂီၢ်,

¹⁸နီၣ်ခိၣ်စူတဖၣ်ဒီးပျံၤတဖၣ်လၢဒဲစီဆှံဒီးတၢ်အိၣ်လၢအအိပူၤအဂီၢ်,

¹⁹ဒီးတၢ်ကူတၢ်သိးလီၤဘီလီၤမုၢ်တဖၣ်လၢပှၤလုၢ်တၢ်အခိၣ်တဖၣ် ကသိးဝဲဖဲအမၤတၢ်လၢတၢ်အလီၢ်စီဆှံအပူၤလၢအမ့ၢ်, တၢ်ကူတၢ်သိးစီဆှံတဖၣ်လၢစီၤအၤဟရိၣ်ဒီးအဖိခွါတဖၣ်အဂီၢ်န့ၣ်လီၤ.”

²⁰ကယဲၢ်ကီၢ်အံၣ်စရ့လးအပှၤဂီၢ်မုၢ်ခဲလၢာ်ဟးထီၣ်ဝဲ, ဒီးပှၤကိးဂၤဒ်အသးအိၣ်မၤဝဲဒ်န့ၣ်အသိးဟဲစိာ်တၢ်လုၢ်မၤဘူၣ် တဂၤတမံၤဆူယွၤအအိၣ်လၢတၢ်သူၣ်ထီၣ်ယွၤအိၣ်ဝဲဆိးဝဲအဒဲစီ ဆှံအဂီၢ်န့ၣ်လီၤ. အဝဲသ့ၣ်ဟဲစိာ်တၢ်ကိးမံၤဒဲးလၢတၢ်ကသူအီၤလၢ တၢ်ဘူၣ်တၢ်ဘါအဂီၢ်ဒီးတၢ်ကဆးပှၤလုၢ်တၢ်အခိၣ်အဆ့တဖၣ်အဂီၢ်လီၤ.

²²ပှၤကိးဂၤဒဲးလၢအသးအိၣ်တၢ်, ပိာ်မုၣ်မ့ၢ်ဂ့ၤပိာ်ခွါမ့ၢ်ဂ့ၤ ခဲလၢာ်ဟဲစိာ်တၢ်ကယၢကယဲ, ထးကမိာ်ခံတဖၣ်, နၢ်ဒံးတဖၣ်, ပသံးတဖၣ်, ဖဲတဖၣ်ဒီးကယဲၢ်ထူ, တၢ်မျၢ်လုၢ်ဒိၣ်ပှ့ၤဒိၣ်တဖၣ်ဒီးပာ်စီဆှံထီၣ်အီၤဆူ ယွၤအအိၣ်လီၤ.

²³ပှၤကိးဂၤဒဲးလၢအအိၣ်ဒီးတၢ်ကံးယာ်လုၣ်အဂ့ၤကတၢၢ်တဖၣ်လၢ အအိၣ်ဒီးအလွဲၢ်လါအဲး, အလွဲၢ်လူးတကုာ်, မ့တမ့ၢ်သိဆူၣ်ဂီၤ, တၢ်ကံးယာ်ဘၣ်တၢ်မၤအီၤလၢမဲာ်တဲးလဲးအဆူၣ်, သိအဖံးလၢတၢ်စုၣ်ဂီၤအီၤမ့တမ့ၢ်တၢ်ဖံးအဂ့ၤကတၢၢ်န့ၣ်ဟဲစိာ်ဝဲဒၣ်လီၤ.

²⁴ကယဲၢ်ပှၤတဖၣ်လၢအဟ့ၣ်မၤဘူၣ်စ့, မ့တမ့ၢ်တိၢ်ဘီသ့န့ၣ်ဟဲစိာ် အတၢ်လုၢ်မၤဘူၣ်လၢယွၤအဂီၢ်, ဒီးပှၤလၢအအိၣ်ဒီးသ့ၣ်ဖှ့ ၡံးတၤတဖၣ်လၢတၢ်သူအီၤသ့လၢတၢ် ဖံးတၢ်မၤတမံၤမံၤအဂီၢ်န့ၣ်ဟဲစိာ်ဝဲလီၤ.

²⁵ပိာ်မုၣ်လၢအဆးတၢ်သ့နီၢ်နီၢ်တဖၣ်ဟဲစိာ်လုၣ်ဖျ့အဂ့ၤလၢအိၣ် ဒီးအလွဲၢ်လါအဲး, အလွဲၢ်လုးတကုာ်, သိဆူၣ်ဂီၤ, လၢအဝဲသ့ၣ်မၤပာ်ဝဲလီၤ.

²⁶အဝဲသ့ၣ်မၤစ့ၢ်ကီးလုၣ်ဖျ့လၢမဲာ်တဲးလဲးအဆူၣ်တဖၣ်လီၤ.

²⁷ပှၤအခိၣ်တဖၣ်ဟဲစိာ်တၢ်မျၢ်သူတဖၣ်ဒီးတၢ်မျၢ်အဂုၤအဂၤတဖၣ်လၢ တၢ်ကဆီလီၤအီၤလၢအ့ဖိးစီဆှံဒီးသဃိးတဖၣ်အလိၤ,

²⁸တၢ်နၢမူဒီးသိလၢမ့ၣ်အူဒၢတဖၣ်အဂီၢ်, သိဖှူတၢ်ဒီးသိလၢ တၢ်လုၢ်ဆိၣ်ကဲၤနၢမူတဖၣ်အဂီၢ်န့ၣ်လီၤ.

²⁹ကယဲၢ်ကီၢ်အံၣ်စရ့လးအပှၤဂီၢ်မုၢ်လၢအသးအိၣ်ဟဲစိာ်တၢ်လုၢ်မၤ ဘူၣ်ဆူယွၤအအိၣ်လၢတၢ်ဖံးတၢ်မၤအဂီၢ်ဒ်ယွၤမၤလိာ်စီၤမိၤၡ့ လၢကမၤဝဲန့ၣ်, ဟဲစိာ်ဝဲကိးဂၤဒဲးလီၤ.

³⁰ဒီးစီၤမိၤၡ့စံးဘၣ်ပှၤအံၣ်စရ့လးဖိတဖၣ်, “ယွၤဃုထၢစီၤဃူၢ်အလံၤခွါ, စီၤအူၤရံၤအဖိခွါစီၤဘစၤလအ့လးလၢယူဒၤအဒူၣ်န့ၣ်လီၤ.

³¹ကစၢ်ယွၤမၤပှဲၤအီၤဒီးအစိကမီၤဒီးဟ့ၣ်အီၤတၢ်သ့တၢ်ဘၣ်, တၢ်ကူၣ်တၢ်ဆး, ဒီးတၢ်သ့ၣ်ညါနၢ်ပၢၢ်ဘၣ်ဃးတၢ်စုသ့အတၢ်မၤခဲလၢာ်,

³²လၢတၢ်သ့ကူၣ်ကျဲၤတၢ်အက့ၢ်အဂီၤတဖၣ်ပှဲၤဒီးတၢ်ကူၣ်သ့, ဒီးမၤအီၤလၢထူ, စ့ဒီးတိၢ်ဘီအဂီၢ်,

³³လၢတၢ်ဂူာ်လၢၢ်ဒ်သိးကဆီလီၤအဂီၢ်, လၢတၢ်စိးပျၤသ့ၣ်အဂီၢ်, ဒီးကယဲၢ်တၢ်စုသ့အတၢ်မၤကိးကလုာ်ဒဲးအဂီၢ်န့ၣ်လီၤ.

³⁴ယွၤဟ့ၣ်လီၤအဝဲ, ဒီးစီၤအဃံစမးအဖိခွါစီၤအၤဟလံအာ်လၢဒၣ်အဒူၣ်ပူၤ, လၢတၢ်ကူၣ်တၢ်ဆးဒ်သိးကသိၣ်လိအတၢ်သ့တၢ်ဘၣ်တဖၣ်ဆူပှၤအဂၤတဖၣ်အအိၣ်န့ၣ်လီၤ.

³⁵ယွၤဟ့ၣ်လီၤအဝဲသ့ၣ်တၢ်သ့ဖံးသ့မၤလၢကယဲၢ်တၢ်မၤကိးမံၤ ဒဲးလၢဘၣ်တၢ်မၤအီၤလၢပှၤစိးပျၤကွဲးတၢ်တဖၣ်, ပှၤတ့ဖျါထီၣ်တၢ်ဂီၤတဖၣ်, ဒီးပှၤသ့ထါတၢ်ကံးယာ်လုၣ်တဖၣ်လၢ အိၣ်ဒီးအလွဲၢ်လါအဲး, အလွဲၢ်လုးတကုာ်, သိဆူၣ်အဂီၤ, ဒီးတၢ်ကူတၢ်သိးအဂၤတဖၣ်န့ၣ်လီၤ. အဝဲသ့ၣ်မၤကယဲၢ်တၢ်မၤကိးမံၤဒဲးသ့ဝဲဒီးမ့ၢ်ပှၤထုးထီၣ်တၢ်ဂီၤအဒိတဖၣ်သ့ဝဲနီၢ်နီၢ်န့ၣ်လီၤ.