Read S'gaw Karen လံာ်စီၤယိၤဘး 27 Bible Online

လံာ်စီၤယိၤဘး 27 - S'gaw Karen bible

လံာ်စီၤယိၤဘး 27

¹ဒီးစီၤယိၤဘးစံးဝဲဒၣ်, ယဆိၣ်လီၤယသးလၢသ့တၢ်လၢာ် ကစၢ်ယွၤလၢအမူဝဲ, လၢအဂ့ၢ်လိာ်ယၤလၢတၢ်မ့ၢ်တၢ်တီ, ဒီးပှၤလၢအမၤနးမၤဖှီၣ်ယတၢ်အိၣ်မူတဂၤန့ၣ်အမဲာ်ညါ,

³ဖဲယသးသမူအိၣ်ဒံးလၢယပူၤဒီးကစၢ်ယွၤဒုးသါထီၣ်သါလီၤ ယၤအဖၢမုၢ်န့ၣ်,

⁴ယထးခိၣ်တစံးဆၢတၢ်အၢနီတစုဒီးယပျ့ၤတလီတၢ်နီတဘျီဘၣ်.

⁵သုမ့ၢ်ပှၤအတီအလိၤန့ၣ်ယတစံးယဲနီတဘျီဘၣ်, ဒီးယကပာ်ယသးကျၢၤမုဆှု လၢယမ့ၢ်ပှၤလၢတၢ်ပာ်တၢ် ကမၣ်လၢအလိၤအလီၢ်တအိၣ်ဘၣ်တဂၤတုၤယသံအမုၢ်နံၤန့ၣ်လီၤ.

⁶ယဟံးဃးယတၢ်တီတၢ်လိၤဒီးယတပျၢ်ဘၣ်အီၤဘၣ်. ယသးတသိၣ်ဃီၣ်ဘၣ်ယၤတစိၤဒၣ်ယၤလီၤ.

⁷မ်ယဒုၣ်ယဒါဒီးပှၤလၢအထီဒါယၤခဲလၢာ်န့ၣ်ကဘၣ်တၢ်စံၣ်ညီၣ် အီၤဒ်ပှၤတတီတလိၤတဖၣ်အသိးန့ၣ်တက့ၢ်.

⁸ပှၤလၢအတယူးတယီၣ်ဘၣ်ယွၤတဖၣ်န့ၣ်တုၤအဆၢကတီၢ်ဘၣ် ဝဲလၢကစၢ်ယွၤကဟံးထီၣ်ကွံာ်အသးသမူဒီးအတၢ်မုၢ်လၢ်မ့ၢ်မနုၤ တမံၤလဲၣ်.

⁹တုၤတၢ်ကိၢ်တၢ်ဂီၤဟဲတုၤဘၣ်အီၤန့ၣ်ဒီးမ့ၢ်ကစၢ်ယွၤကနၢ် ဟူအတၢ်ကိးထီၣ်န့ၣ်ဧါ.

¹⁰အဝဲသ့ၣ်ကြၢးဆၢန့ၢ်ဘၣ်တ့ၢ်တၢ်သးခုလၢယွၤသ့တၢ်လၢာ် ကစၢ်ဟ့ၣ်အီၤဒီးအဝဲသ့ၣ်ကြၢးကိးထီၣ်အီၤလၢတၢ်ထုကဖၣ် အပူၤတဘိယူၢ်ဃီန့ၣ်လီၤ.

¹¹ပျဲယသိၣ်လိသုလၢကစၢ်ယွၤအစိအကမီၤဒိၣ်ထဲလဲၣ်ဒီးဒုး နဲၣ်သုတၢ်လၢသ့တၢ်လၢာ်ကစၢ်ယွၤကူၣ်ထီၣ်ဖးလီၤတ့ၢ်ဝဲ တဖၣ်န့ၣ်တက့ၢ်.

¹²မ့မ့ၢ်သုဝဲခဲလၢာ်သုထံၣ်တ့ၢ်လံတၢ်အံၤလၢသုနီၢ်ကစၢ်ဒၣ်သု ဝဲလံ. မၤသးဒ်န့ၣ်ဒီး, ဘၣ်မနုၤအဃိသုစံးသုကတိၤတၢ်လၢ အခီပညီတအိၣ်ဘၣ်ဒ်အံၤအသိးန့ၣ်လဲၣ်.

¹³အအံၤမ့ၢ်တၢ်လၢသ့တၢ်လၢာ်ကစၢ်ယွၤစံၣ်ညီၣ်ပှၤတတီတလိၤ, ပှၤမၤတၢ်လၢစုဆူၣ်ခီၣ်တကးတဖၣ်ဒ်လဲၣ်န့ၣ်လီၤ.

¹⁴အဝဲသ့ၣ်ကအိၣ်ဝဲဒီးအဖိခွါအါဂၤဘၣ်ဆၣ်ကဘၣ်တၢ်မၤ သံကွံာ်အီၤခဲလၢာ်လၢတၢ်ဒုးတၢ်ယၤအပူၤန့ၣ်လီၤ. အဖိသ့ၣ်တဖၣ်တဘျဲးအီၣ်ဘျဲးအီနီတဘျီဘၣ်န့ၣ်လီၤ.

¹⁵ပှၤလၢအအိၣ်လီၤတဲာ်သ့ၣ်တဖၣ်ကသံဝဲလၢတၢ်ဆူးတၢ်ဆါ, ဒီးအမုၣ်ကမဲတဖၣ်ဒၣ်လဲာ်တဟီၣ်ဘၣ်ဝဲလၢအဝဲသ့ၣ်အတၢ်သံန့ၣ်ဘၣ်.

¹⁶ပှၤတတီတလိၤသ့ၣ်တဖၣ်ကအိၣ်ဝဲဒီးစ့အါမးလၢကဂံၢ်ဝဲအဂီၢ် ဒီးတၢ်ကူတၢ်ကၤအါန့ၢ်ဒံးတၢ်လၢပှၤတဂၤလိၣ်ဘၣ်ဝဲန့ၣ်လီၤ.

¹⁷ဘၣ်ဆၣ်ပှၤဂ့ၤပှၤဝါတနီၤကကၤဝဲတၢ်ကူတၢ်ကၤဒီးပှၤတီပှၤလိၤ တနီၤကဒိးန့ၢ်ဘၣ်စ့န့ၣ်လီၤ.

¹⁸ပှၤတတီတလိၤသူၣ်ထီၣ်ဟံၣ်ဒ်ကပီၤလုၤအသိးမ့ၢ်ဂ့ၤ, ဒ်ကုၢ်လၢအခိးစံာ်ပျီအဒဲအသိးမ့ၢ်ဂ့ၤန့ၣ်လီၤ.

¹⁹အဝဲသ့ၣ်ကမံနီၤလီၤဝဲဒ်ပှၤထူးပှၤတီၤအသိးလၢခံကတၢၢ်တဘျီ, ဒီးတုၤအပၢၢ်ထီၣ်ဒီးကထံၣ်ဝဲလၢအတၢ်ထူးတၢ်တီၤတအိၣ်လၢၤ ဘၣ်န့ၣ်လီၤ.

²⁰တၢ်မၤပျံၤမၤဖုးကလုၣ်ဘၢအီၤဒ်ထံလုၣ်ဘၢတၢ်သတူၢ်ကလာ် အသိး, ဒီးကလံၤလၢမုၢ်နၤကအူဖျိးကွံာ်အီၤ,

²¹ကလံၤလၢမုၢ်ထီၣ်ကအူဖျိးကွံာ်အီၤလၢအဟံၣ်တဖၣ်,

²²ဖဲအဝဲသ့ၣ်ဂုၢ်ကျဲးစၢးသပှၢ်ပှၢ်လၢကပူၤဖျဲးအဂီၢ်န့ၣ်ကလံၤ ကလီၤဘၣ်အဝဲသ့ၣ်တအိၣ်ဒီးတၢ်သးကညီၤဘၣ်န့ၣ်လီၤ.

²³ကလံၤမုၢ်အူဘၣ်အီၤဖဲအဝဲသ့ၣ်ဃ့ၢ်ဝဲ, ဒီးမၤပျံၤမၤဖုးအီၤ လၢတၢ်ဟးရူာ်ဟးဂီၤအစိအကမီၤန့ၣ်လီၤ.