Read S'gaw Karen လံာ်စီၤယိၤဘး 29 Bible Online

လံာ်စီၤယိၤဘး 29 - S'gaw Karen bible

လံာ်စီၤယိၤဘး 29

¹စီၤယိၤဘးစးထီၣ်ကတိၤကဒီးတၢ်န့ၣ်လီၤ.

²ယဆၢဒိးန့ၢ်မးယမုၢ်နံၤလၢ အလဲၤကွံာ်တဖၣ်, မုၢ်နံၤတဖၣ်ဖဲ ကစၢ်ယွၤကွၢ်ထွဲတ့ၢ်ယၤန့ၣ်လီၤ.

³အကတီၢ်ဖဲန့ၣ်ကစၢ်ယွၤအိၣ်ဒီးယၤထီဘိ, ဒီးဖဲယလဲၤခီဂာ်တၢ် ခံးတၢ်နၤအခါန့ၣ်ဟ့ၣ်ယၤတၢ်ကပီၤလီၤ.

⁴လၢမုၢ်နံၤအဝဲန့ၣ်တဖၣ်အပူၤယဘၣ်ဘီၣ်ဘၣ်ညီ, ဒီးယတၢ်ရ့တံၤရ့သကိးဒီးယွၤဒုးဘၣ်ဆိၣ်ဂ့ၤယပှၤဟံၣ်ဖိဃီဖိန့ၣ်လီၤ.

⁵အကတီၢ်ဖဲန့ၣ်သ့တၢ်လၢာ်ကစၢ်ယွၤအိၣ်ဒီးယၤဒီးယဖိယလံၤသ့ၣ် တဖၣ်အိၣ်ဝးတရံးယၤလီၤ.

⁶ယဂီၤဖံးမိၢ်တဖၣ်ဒီးမဲာ်တဲးလဲးတဖၣ်ဟ့ၣ်ယၤတၢ်နုၢ်ထံအါမး ဒီးယသ့ၣ်စၤယံးသ့ၣ်တဖၣ်မဲထီၣ်ဝဲလၢလၢၢ်ခိၣ်လ့ကျါအပူၤန့ၣ်လီၤ.

⁷တုၤဝ့ၢ်အသူၣ်က့သးပှၢ်တဖၣ်အိၣ်ဖှိၣ်ရိဖှိၣ်တဘျီလၢ်လၢ်န့ၣ် ယဟံးန့ၢ်ယလီၢ်လၢအဝဲသ့ၣ်အကျါလီၤ.

⁸ပှၤသးစၢ်တဖၣ်တုၤအထံၣ်ယၤတဘျီဃီန့ၣ်ဟ့ၣ်ယၤတၢ်လီၢ်, ဒီးပှၤသးပှၢ်သ့ၣ်တဖၣ်ဂဲၤထၢၣ်ပာ်ဖျါထီၣ်အတၢ်ယူးယီၣ်ပာ် ကဲယၤန့ၣ်လီၤ.

⁹ပှၤဂီၢ်မုၢ်အခိၣ်အနၢ်တဖၣ်ဆိကတီၢ်အတၢ်ကတိၤ,

¹⁰ဒီးပှၤအကါဒိၣ်တဖၣ်ဒၣ်လဲာ်အိၣ်ဃိကလာ်န့ၣ်လီၤ.

¹¹ပှၤကိးဂၤဒဲးလၢအထံၣ်ယၤဒီးနၢ်ဟူယဂ့ၢ်ယကျိၤန့ၣ်အိၣ်ဒီးတၢ် ဂ့ၢ်တၢ်ကျိၤအဂ့ၤအဘၣ်တဖၣ်လၢကကတိၤဝဲဒၣ်ဘၣ်ဃးဒီး တၢ်လၢယမၤတ့ၢ်လံတဖၣ်န့ၣ်လီၤ.

¹²တုၤပှၤဖှီၣ်ဖိယာ်ဖိကိးထီၣ်ဝဲဒၣ်န့ၣ်ဒီးယမၤစၢၤအီၤ, ဒီးယမၤစၢၤပှၤဖိၣ်ဃဲဖိသ့ၣ်တဖၣ်လၢပှၤကမၤစၢၤအီၤတအိၣ် ဘၣ်န့ၣ်လီၤ.

¹³ပှၤလၢအအိၣ်လၢတၢ်ကိၢ်တၢ်ဂီၤနးနးကလဲာ်အပူၤတဖၣ် စံးထီၣ်ပတြၢၤယၤ, ဒီးယမၤစၢၤမုၣ်ကမဲသ့ၣ်တဖၣ်ဒ်သိး ကထံၣ်န့ၢ်တၢ်ပူၤဖျဲးန့ၣ်လီၤ.

¹⁴ယမၤတၢ်လၢတၢ်စံၣ်ညီၣ်တီဒီးတၢ်တီတၢ်လိၤအပူၤထီဘိန့ၣ်လီၤ.

¹⁵ယမ့ၢ်မဲာ်ချံလၢပှၤမဲာ်တထံၣ်တၢ်အဂီၢ်ဒီးယမ့ၢ်ခီၣ်လၢပှၤခီၣ် ဟးဂီၤသ့ၣ်တဖၣ်အဂီၢ်လီၤ.

¹⁶ယမၤယသးဒ်ပၢ်တဂၤလၢပှၤဖှီၣ်ဖိယာ်ဖိအဂီၢ်အသိး, ဒီးယအိၣ်ပှိၤပှၤတခီဘီမုၢ်ဖိလၢအဘၣ်ကီဘၣ်ခဲတဖၣ်န့ၣ်လီၤ.

¹⁷ယမၤဟးဂီၤကွံာ်ပှၤအၢပှၤသီတဖၣ်အစိကမီၤဒီးအုၣ်က့ၤခီၣ် က့ၤပှၤလၢအဝဲသ့ၣ်မၤအၢမၤနးဝဲဒၣ်တဖၣ်န့ၣ်လီၤ.

¹⁸ယမုၢ်လၢ်ယဲထီဘိလၢယကအိၣ်ကၢအိၣ်ခိးဒီးသံယဲမုာ်မုာ်ခုၣ် ခုၣ်လၢယဒူၣ်ဖိထၢဖိအကျါန့ၣ်လီၤ.

¹⁹ယမၤယသးလီၤဂာ်ဒ်သ့ၣ်လၢအဂံၢ်ဒိးန့ၢ်ထံထီဘိဒီးအဒ့ အဖီတဖၣ်ဘၣ်စီၣ်ဝဲလၢပစီၤထံအသိးန့ၣ်လီၤ.

²⁰ပှၤကိးဂၤဒဲးစံးထီၣ်ပတြၢၤယၤထီဘိ, ဒီးယဂံၢ်ယဘါတလီၤ စၢ်နီတဘျီဘၣ်.

²¹တုၤယဟ့ၣ်ကူၣ်တၢ်န့ၣ်ဒီးပှၤဂီၢ်မုၢ်အိၣ်ဘှီၣ်ကလာ်ဒီးတၢ်လၢယ စံးတဖၣ်န့ၣ်ဒိကနၣ်ဝဲလီၤတံၢ်လီၤဆဲးန့ၣ်လီၤ.

²²တုၤယကတိၤတၢ်ဝံၤန့ၣ်အဝဲသ့ၣ်ကတိၤအါထီၣ်တၢ်အလီၢ် တအိၣ်လၢၤဘၣ်. ယတၢ်စံးတၢ်ကတိၤတဖၣ်လီၤဂာ်ဒ်မူခိၣ် ထံလၢအဒုးစုာ်စီၣ်ဟီၣ်ခိၣ်အသိးန့ၣ်လီၤ.

²³ပှၤကိးဂၤဒဲးတူၢ်လိာ်ယတၢ်ဟ့ၣ်ကူၣ်ဒ်ပှၤထူစံာ်ဖိတူၢ်လိာ် တၢ်စူၤထံလၢတၢ်စူၤလီၤသီအကတီၢ်အသိးန့ၣ်လီၤ.

²⁴ယကွၢ်အဝဲသ့ၣ်လၢတၢ်နံၤကမှံအပူၤဖဲအဝဲသ့ၣ်အတၢ်နာ်နီၢ်နီၢ် လီၤမၢ်ကွံာ်န့ၣ်လီၤ. ဒီးယတၢ်မဲာ်မုာ်နါဆၢဟ့ၣ်ဂံၢ်ဟ့ၣ်ဘါအဝဲသ့ၣ်လီၤ.

²⁵ယဟံးန့ၢ်မူဒါဒီးကဲပှၤအခိၣ်, ယဆှၢအဝဲသ့ၣ်ဒ်စီၤပၤတဂၤ ဆှၢအပှၤသုးမုၢ်သံၣ်ဘိအသိး, ဒီးဟ့ၣ်အီၤလၢတၢ်သူၣ်မံ သးမုာ်လၢတၢ်သူၣ်ဟးဂီၤသးဟးဂီၤအကတီၢ်န့ၣ်လီၤ.