Read S'gaw Karen လံာ်စီၤယိၤဘး 33 Bible Online

လံာ်စီၤယိၤဘး 33 - S'gaw Karen bible

လံာ်စီၤယိၤဘး 33

¹ခဲကနံၣ်အံၤစီၤယိၤဘးဧၢ, ဒိကနၣ်ကယဲၢ်တၢ်လၢယစံးကတိၤ ခဲလၢာ်ထံထံတက့ၢ်.

²ကွၢ်ကွၢ်ယအိၣ်ကတဲာ်ကတီၤလံယသးလၢယကစံးကတိၤ တၢ်လၢယသးကံၢ်ပူၤန့ၣ်လီၤ.

³ယတၢ်ကတိၤတဖၣ်ပာ်ဖျါယသးအတၢ်တီတၢ်လိၤ, ဒီးယပျူၤကတိၤတၢ်မ့ၢ်တၢ်တီနီၢ်နီၢ်လီၤ.

⁴ကစၢ်ယွၤအသးတ့လီၤယၤဒီးသ့တၢ်လၢာ်အတၢ်သါဟ့ၣ် ယၤတၢ်မူလီၤ.

⁵နကတိၤဆၢက့ၤယၤမ့ၢ်သ့ဒီးကတိၤတက့ၢ်. ကတဲာ်ကတီၤနတၢ် ကတိၤဆၢက့ၤဒီးဆၢထၢၣ်လၢယမဲာ်ညါတက့ၢ်.

⁶ကွၢ်ကွၢ်, လၢကစၢ်ယွၤအမဲာ်ညါန့ၣ်, နၤဒီးယၤပမ့ၢ်တၢ်ဒ်သိး သိးလီၤ. ပဘၣ်တၢ်တ့ပှၤလၢကပံာ်ခံဂၤလိာ်လီၤ.

⁷မ်ဒ်န့ၣ်ဒီးအလီၢ်တအိၣ်လၢနကပျံၤယၤန့ၣ်ဘၣ်. ယတမၤနၢၤမၤပ့ၤနၤန့ၣ်ဘၣ်.

⁸ဒီးခဲကနံၣ်အံၤယနၢ်ဟူတ့ၢ်တၢ်လၢနစံးအီၤလီၤ.

⁹ယကဆှီယဲ, ယတၢ်ကမၣ်တအိၣ်ဘၣ်. ယစီယဲဒီးတၢ်ဒဲးဘး တအိၣ်လၢယပူၤန့ၣ်ဘၣ်.

¹⁰ဘၣ်ဆၣ်ဒီးကစၢ်ယွၤဃုထံၣ်တၢ်ဂ့ၤတဖၣ်လၢကထီဒါယၤဒီး ပာ်ယၤဒ်အဒုၣ်အဒါအသိးန့ၣ်လီၤ.

¹¹ကျီၤဃာ်ယခီၣ်လၢသိးပူၤဒီးကွၢ်ဟုၣ်ကယဲၢ်တၢ်လၢ ယမၤအီၤန့ၣ်လီၤ.

¹²ဘၣ်ဆၣ်ဒီးစီၤယိၤဘးဧၢ, လၢတၢ်အံၤအဂ့ၢ်န့ၣ်နကမၣ်လံ. အဂ့ၢ်ဒ်အံၤ, ကစၢ်ယွၤဒိၣ်န့ၢ်ပှၤကညီတက့ၢ်လီၤ.

¹³နကဒူးကဒ့ၣ်လၢကစၢ်ယွၤအလိၤဒီးစံးလၢအတစံးဆၢဘၣ် ပှၤကညီအတၢ်ကတိၤနီတဘျီဘၣ်န့ၣ်, မ့ၢ်အဘၣ်မနုၤလဲၣ်.

¹⁴ကစၢ်ယွၤကတိၤတၢ်ဒ်အံၤတဘျီဝံၤစံးကဒီးလၢကျဲအဂၤ တဘိဒၣ်လဲာ်ဒီးတၢ်လၢအစံးဝဲန့ၣ်ပှၤကညီတပာ်သူၣ်ပာ်သးလၢ အဂ့ၢ်နီတဂၤဘၣ်.

¹⁵လၢမုၢ်နၤလၢပှၤကညီမံအခါကစၢ်ယွၤကတိၤတၢ်လၢတၢ်မံ မီၢ်တဖၣ်ဒီးတၢ်ထံၣ်လၢညါခီတဖၣ်လီၤ.

¹⁶အဝဲကတိၤတၢ်လၢပှၤကညီအနၢ်ပူၤဒီးမၤပျံၤမၤဖုးအီၤလၢ အတၢ်ဟ့ၣ်ပလီၢ်တဖၣ်န့ၣ်လီၤ.

¹⁷ကစၢ်ယွၤမၢအဆိကတီၢ်လၢအမၤတၢ်ဒဲးဘးဒီးတြီအီၤဒ်သိး အသုတပာ်ထီၣ်ထီအသးတဂ့ၤန့ၣ်လီၤ.

¹⁸တပျဲအဝဲသ့ၣ်ကဘၣ်တၢ်မၤဟးဂီၤအီၤဘၣ်. ဒီးတြီအသးသမူဒ်သိးအသုတသံလၢနးတဂ့ၤလီၤ.

¹⁹ကစၢ်ယွၤဆှၢလီၤတၢ်ဆူးတၢ်ဆါဒီးမၤပှဲၤပှၤကညီအနီၢ်ခိလၢ တၢ်ဆိးကဲၤဒ်သိးအကသိၣ်ဃီၣ်အီၤလီၤ.

²⁰ပှၤဘၣ်ဆူးဘၣ်ဆါတဖၣ်အသးလၢာ်ကွံာ်တၢ်အီၣ်အဝံၣ်အဆၢဒီးသး ဘၣ်အၢတၢ်အီၣ်အဂ့ၤကတၢၢ်တဖၣ်ဒၣ်လဲာ်လီၤ.

²¹အဝဲအဖံးအညၣ်လီၤကွံာ်ဝဲဒီးနထံၣ်ကယဲၢ်အဃံခဲလၢာ်သ့,

²²ဒီးဘူးတ့ၢ်မးလၢအဝဲကလဲၤဆူတၢ်သံအကီၢ်န့ၣ်လီၤ.

²³ဘၣ်သ့ၣ်သ့ၣ် ကလူးတဂၤ, လၢအမ့ၢ်ကစၢ်ယွၤအကလူးအကထိ တဖၣ်အကျါတဂၤ ကဟဲမၤစၢၤအီၤဒီး ဒုးသ့ၣ်နီၣ်ပှၤကညီ လၢအမူအဒါန့ၣ်လီၤ.

²⁴လၢတၢ်သးကညီၤအပူၤ, ကလူးန့ၣ်ကစံးဘၣ်အီၤ, “ပျၢ်ဖျဲးအီၤတက့ၢ်. အဝဲတဘၣ်လဲၤလီၤဆူ တၢ်သံအကီၢ် ဘၣ်. အအံၤမ့ၢ်တၢ်ပှ့ၤထီၣ်က့ၤတၢ်လၢ ကမၤထူၣ်ဖျဲးအီၤအဂီၢ်လီၤ.”

²⁵အဝဲအနီၢ်ခိကဒိၣ်ထီၣ်ဒ် ပှၤအသးစၢ်ဒီး ဂံၢ်ဆူၣ်ဘါဆူၣ်ထီၣ် ကဒီးအသိးန့ၣ်လီၤ.

²⁶တုၤအဝဲဃ့ဘါထုကဖၣ်တၢ်ဒီးကစၢ်ယွၤကစံးဆၢအီၤ, ဒီးကဘူၣ်ထီၣ်ဘါထီၣ်ကစၢ်ယွၤလၢတၢ်သူၣ်ဖှံသးညီအပူၤလီၤ. ကစၢ်ယွၤကမၤဘၣ်လီၢ်ဘၣ်စးက့ၤတၢ်လၢ အဂီၢ်လီၤ.

²⁷အဝဲစံးတၢ်လၢပှၤဂီၢ်မုၢ်အမဲာ်ညါ, “ယမၤတ့ၢ်လံတၢ်ဒဲးဘးလံ. ယတမၤတၢ်လၢ အဘၣ်ဘၣ်. ဘၣ်ဆၣ်ဒီးကစၢ်ယွၤပျၢ်ဖျဲးယၤလီၤ.

²⁸အဝဲတပျဲယလဲၤဆူ တၢ်သံအကီၢ်ပူၤဘၣ်. ဒီးယအိၣ်မူဒံးယဲလီၤ.”

²⁹ကစၢ်ယွၤမၤကယဲၢ်တၢ်ခဲလၢာ်အံၤဒီးပှၤကညီခံဘျီ, ဒီးတုၤလၢသၢဘျီဒၣ်လဲာ်,

³⁰ဒ်သိးကဒုးဟဲက့ၤကဒါက့ၤအီၤလၢတၢ်သံအကီၢ်ပူၤ, ဒ်သိးကဒုးကပီၤဘၣ်အီၤတၢ်မူအတၢ်ကပီၤလီၤ.

³¹ဒီးခဲကနံၣ်အံၤစီၤယိၤဘးဧၢ, ဒိကနၣ်တၢ်လၢယစံးဘၣ်တဲဘၣ် နၤ, အိၣ်ဘှီၣ်ဒီးပျဲယကတိၤတၢ်တက့ၢ်.

³²နကတိၤတၢ်အလီၢ်မ့ၢ်အိၣ်ဒီးစံးဆၢယၤတက့ၢ်. ကတိၤတၢ်တက့ၢ်. အဂ့ၢ်ဒ်အံၤဘၣ်ယသးလၢနကဖျါ တီဖျါလိၤလီၤ.

³³မ့တမ့ၢ်ဒ်န့ၣ်ဘၣ်ဒီးအိၣ်ဃိကလာ်ဒီးဒိကနၣ်ယၤတက့ၢ်. ဒီးယကသိၣ်လိနၤလၢနကကဲထီၣ်ပှၤကူၣ်ဘၣ်ကူၣ်သ့ဒ်လဲၣ်န့ၣ်လီၤ.