Read S'gaw Karen လံာ်စီၤယိၤဘး 9 Bible Online

လံာ်စီၤယိၤဘး 9 - S'gaw Karen bible

လံာ်စီၤယိၤဘး 9

¹ဒီးစီၤယိၤဘးစံးဆၢဝဲဒၣ်, မ့ၢ်လံယသ့ၣ်ညါလၢတၢ်အံၤ မ့ၢ်ဝဲတီဝဲလီၤ. ဘၣ်ဆၣ်ဒီးပှၤကညီကတီဝဲလိၤဝဲလၢ ကစၢ်ယွၤအမဲာ်ညါဒ်လဲၣ်.

³မ့ၢ်မတၤကတိၤဂ့ၢ်လိာ်တၢ်ဒီးအီၤကသ့တဂၤန့ၣ်လဲၣ်. အဝဲသံကွၢ်တၢ်သံကွၢ်လၢအကထိလၢပှၤစံးဆၢကသ့တအိၣ် နီတဂၤဘၣ်န့ၣ်လီၤ.

⁴ကစၢ်ယွၤန့ၣ်ကူၣ်ဘၣ်ကူၣ်သ့ဒီးအစိအကမီၤဒိၣ်နီၢ်မးန့ၣ်လီၤ. ပှၤထီဒါအီၤတန့ၢ်နီတဂၤဘၣ်.

⁵လၢတၢ်တတဲပလီၢ်ပာ်စၢၤအပူၤအဝဲသုးကွံာ်ကစၢၢ်ကလိ တဖၣ်ဒီးလၢတၢ်သးထီၣ်အပူၤမၤဟးဂီၤကွံာ်အဝဲသ့ၣ်န့ၣ်လီၤ.

⁶ကစၢ်ယွၤမၤဟူးဝးဟီၣ်ခိၣ်ဒီးဟီၣ်ခိၣ်ဟူးဝးဝဲဒီးမၤဝးတၢ် အထူၣ်တဖၣ်လၢအယိးဃာ်ဟီၣ်ခိၣ်န့ၣ်လီၤ.

⁷အဝဲတြီဃာ်မုၢ်ဒ်သိး အသုတဟဲထီၣ်တဂ့ၤဒီး ဆၣ်တဖၣ်ဒ်သိး သုတကပီၤထီၣ်လၢ မုၢ်နၤခီတဂ့ၤ န့ၣ်သ့ဝဲလီၤ.

⁸အဝဲမ့ၢ်ပှၤထဲတဂၤဧိၤလၢသလၣ်ထီၣ်မူကပိာ်လိၤဒီးမၤနၢၤပီၣ် လဲၣ်အလပီသ့ၣ်တဖၣ်န့ၣ်လီၤ.

⁹အဝဲမ့ၢ်ပှၤလၢအတ့ဆၣ်ကဆီ, ဆၣ်ယိးမါ, ဆၣ်ဒၢမုၢ်ဒီး ဆၣ်အဒၢးလၢကလံၤထံးတခီန့ၣ်လီၤ.

¹⁰အဝဲမၤတၢ်ဒိၣ်တၢ်ထီလၢပှၤကနၢ်ပၢၢ်အီၤတသ့ဒီးတၢ်လီၤ လးတဖၣ်လၢပှၤကဂံၢ်အီၤတသ့ဘၣ်ဒၣ်လဲာ်န့ၣ်လီၤ.

¹¹ဖဲအဝဲလဲၤခီပတာ်ယၤန့ၣ်ဘၣ်ဆၣ်ယထံၣ်န့ၢ်အီၤတသ့ဘၣ်.

¹²အဝဲဟံးထီၣ်ကွံာ်တၢ်လၢအသးလီဝဲဒီးပှၤတြီအီၤတသ့ နီတဂၤဘၣ်န့ၣ်လီၤ. ပှၤသံကွၢ်အီၤလၢ, “နမၤတၢ်မနုၤလဲၣ်” န့ၣ်တဘူၣ်နီတဂၤဘၣ်န့ၣ်လီၤ.

¹³ကစၢ်ယွၤအတၢ်သးထီၣ်န့ၣ်မ့ၢ်တၢ်တထံၣ်ဃီလီၤ. အဝဲမၤသဘှံးကွံာ်အဒုၣ်အဒါတဖၣ်, ပှၤလၢအမၤစၢၤပီၣ်လဲၣ်ပယိၤရၤဃးထီဒါအီၤန့ၣ်လီၤ.

¹⁴မၤသးဒ်န့ၣ်ဒီးမ့ၢ်ယကစံးဆၢက့ၤကစၢ်ယွၤလၢတၢ်ကတိၤဒ် လဲၣ်တဖၣ်လဲၣ်.

¹⁵ယမ့ၢ်တီမ့ၢ်လိၤဘၣ်ဆၣ်ဒီးတၢ်လၢယမၤသ့ခဲလၢာ်န့ၣ်မ့ၢ်ဒၣ် ယတၢ်ဃ့တၢ်သူၣ်ကညီၤသးကညီၤလၢကစၢ်ယွၤ, ယပှၤစံၣ်ညီၣ်ကွီၢ်န့ၣ်လီၤ.

¹⁶အဝဲမ့ၢ်ပျဲယစံးကတိၤတၢ်ဒၣ်လဲာ်အဝဲကဒိကနၣ်ယၤန့ၣ် ယနာ်တသ့ဘၣ်န့ၣ်လီၤ.

¹⁷လၢတၢ်ဂ့ၢ်တၢ်ကျိၤတအိၣ်ဘၣ်နီတမံၤအပူၤအဝဲဆှၢလီၤကလံၤ မုၢ်တဖၣ်လၢကတီၢ်ယၤဒီးမၤသဘှံးယၤလီၤ.

¹⁸အဝဲတပျဲယချူးန့ၢ်ယတၢ်သါဒီးမၤပှဲၤတ့ၢ်လံယတၢ်အိၣ်မူ လၢတၢ်နးတၢ်ဖှီၣ်နးနးကလဲာ်လံန့ၣ်လီၤ.

¹⁹မ့ၢ်ယကြၢးသူ တၢ်စုဆူၣ်ခီၣ်တကးဧါ. တၢ်စုဆူၣ်ခီၣ်တကးလၢ ကစၢ်ယွၤအဖိခိၣ်န့ၣ်ဧါ. မ့ၢ်ယကြၢးလိာ်ဘၢလိာ်ကွီၢ်အီၤန့ၣ်ဧါ. မတၤမၢအဝဲလဲၤကသ့တဂၤလဲၣ်.

²⁰ယမ့ၢ်တီမ့ၢ်လိၤဒၣ်လဲာ်ယထးခိၣ်ကစံၣ်ညီၣ်က့ၤယၤ, ယမ့ၢ်ပှၤလၢတၢ်ပာ်တၢ်ကမၣ်အလီၢ်တအိၣ်ဘၣ်ဆၣ်အဝဲကပာ် ဖျါဝဲဒၣ်လၢယမ့ၢ်ပှၤလၢအလူၤယသးဒၣ်ယဲန့ၣ်လီၤ.

²¹ယတၢ်ကမၣ်မ့ၢ်တအိၣ် ဒၣ်လဲာ်န့ၣ်, ယတကိၢ်တၢ်လၢ ယဂီၢ်ဒၣ်ယဲဘၣ်. ယသးဘၣ်အၢလီၤက့ၤယတၢ်အိၣ်မူဒၣ်ယဲလီၤ.

²²လၢတၢ်န့ၣ်အဃိ, ယစံးလၢမ့ၢ်ဒၣ်တၢ်ဒ်သိးသိးခဲလၢာ်လီၤ. အဝဲမၤဟးဂီၤကွံာ်ပှၤလၢ တၢ်ပာ်တၢ်ကမၣ်အလီၢ်တအိၣ်ဒီး ပှၤတတီတလိၤန့ၣ်လီၤ.

²³ဖဲနီၣ်ဖျ့ဟဲစိာ်တၢ်သံသတူာ်ကလာ်န့ၣ်အဝဲ ဒုၣ်ဒွဲၣ်ပှၤလၢအတၢ်ကမၣ်တအိၣ်အတၢ်သးဟးဂီၤန့ၣ်လီၤ.

²⁴ကစၢ်ယွၤဟ့ၣ်လီၤဟီၣ်ခိၣ်ဆူပှၤတတီတလိၤအစုပူၤန့ၣ်လီၤ. မၤဘျီၣ်ကွံာ်ပှၤစံၣ်ညီၣ်ကွီၢ်သ့ၣ်တဖၣ်အမဲာ်လီၤ. ကစၢ်ယွၤမ့ၢ် တမၤတၢ်အံၤဘၣ်ဒီးမ့ၢ်မတၤမၤလဲၣ်.

²⁵ယမုၢ်နံၤမုၢ်သီတဖၣ်လဲၤပူၤကွံာ်ဝဲချ့သဒံးန့ၣ်လီၤ. ယူၤထီၣ်ကွံာ်ဝဲဒီးတထံၣ်တၢ်ဂ့ၤနီတမံၤဘၣ်.

²⁶ယတၢ်အိၣ်မူလဲၤပူၤကွံာ်ဝဲ ဒ်ကဘီတဘ့ၣ်လၢ အလဲၤတၢ်ချ့သဒံး, ချ့ဝဲထဲသိးလံာ်ကြီကြာ်တဘ့ၣ် စှီၤန့ၢ်ပဒဲ တဒုအသိးန့ၣ်လီၤ.

²⁷ယမ့ၢ်စံး, ယကသးပ့ၤနီၣ်ကွံာ်ယတၢ်ကအုကစွါ, ယကလဲလိာ်ယတၢ်ပာ်မဲာ်ပာ်နါဒီး နံၤကမှံထီၣ်ဒီး

²⁸ယပျံၤဒံးဒၣ်ယတၢ်နးတၢ်ဖှီၣ်တဖၣ်, မ့ၢ်လၢယသ့ၣ်ညါ လၢနတပျၢ်ယတၢ်ကမၣ်ဒံးဘၣ်အဃိန့ၣ်လီၤ.

²⁹မ့ၢ်လၢယတၢ်ကမၣ် ဘၣ်တၢ်စၢဃာ်အီၤ အဃိဒီး ဘၣ်မနုၤယဘၣ်မၤတံာ်တာ်ယသးန့ၣ်လဲၣ်.

³⁰ချါသိသ့စီကွံာ်ယတၢ်ဒဲးဘးတဖၣ်တန့ၢ်ဘၣ်.

³¹ကစၢ်ယွၤတ့ၢ်လီၤယၤဆူ တၢ်ဘၣ်အၢဘၣ်သီအပူၤ, ဒီးယကူယသိးတဖၣ်ဒၣ်လဲာ်မဲာ်ဆှံးယၤန့ၣ်လီၤ.

³²ကစၢ်ယွၤမ့မ့ၢ်ပှၤကညီသၢပျၢၤယစံးဆၢအီၤကသ့ဒီးပလဲၤဆူ ကွီၢ်ဘျီၣ်ဒီးဆိကမိၣ်ပတၢ်အ့ၣ်လိာ်ကသ့ဝဲဒၣ်န့ၣ်လီၤ.

³³ဘၣ်ဆၣ်ပှၤကဆၢထၢၣ်လၢပဘၢၣ်စၢၤတအိၣ်နီတဂၤ, ပှၤလၢကစံၣ်ညီၣ်ကစၢ်ယွၤဒီးယၤ တအိၣ်နီတဂၤဘၣ်.

³⁴ကစၢ်ယွၤဧၢ, ဆိကတီၢ်ကွံာ်နတၢ်သိၣ်ဃီၣ်ယၤန့ၣ်တက့ၢ်. ပာ်နတၢ်မၤပျံၤမၤဖုးတဖၣ်လၢအယံၤန့ၣ်တက့ၢ်.

³⁵ယတပျံၤတၢ်ဘၣ်. မ့ၢ်လၢယသ့ၣ်ညါယသးဒၣ်ယဲအဃိ ယကစံးကတိၤတၢ်လီၤ.