Read S'gaw Karen စံးထီၣ်ပတြၢၤ 102 Bible Online

စံးထီၣ်ပတြၢၤ 102 - S'gaw Karen bible

စံးထီၣ်ပတြၢၤ 102

¹ယွၤဧၢ, ဒိကနၣ်ယတၢ်ထုကဖၣ်, ဒီးမ်ယတၢ်ကိးထီၣ်လၢတၢ်မၤစၢၤအဂီၢ် ဟဲထီၣ်ဆူနအိၣ်တက့ၢ်.

²လၢယဘၣ်တၢ်ကိၢ်တၢ်ဂီၤအမုၢ်တနံၤန့ၣ် ပာ်တဒၢနမဲာ်လၢယၤတဂ့ၤ. ဒိးနနၢ်လၢယၤ, ဒီးမုၢ်တနံၤလၢယကိးထီၣ်နၤန့ၣ် စံးဆၢလၢ်ယၤချ့ချ့တက့ၢ်.

³အဂ့ၢ်ဒ်အံၤ, ယမုၢ်နံၤဒံကွံာ်ဝဲမ့ၣ်အူခုၣ်အသိး, ဒီးယဃံယကွဲတဖၣ် ကဲၤထီၣ်ဝဲဒ် ဒ်မ့ၣ်အူကဖးအသိးန့ၣ်လီၤ.

⁴ယဘၣ်တၢ်တီၢ်လီၤကွံာ်အီၤဒ်နီၣ်ဧိၤမံၤဧိၤလၢ အဃ့ထီၣ်ကွံာ်အသိးန့ၣ်လီၤ. ယသးပ့ၤနီၣ်လၢယကအီၣ်ယကိၣ်လီၤ.

⁵လၢယတၢ်ကအုကစွါသီၣ်ဒိၣ်ဝဲအဃိ ယဖှံၣ်လီၤဃဲၤလီၤကွံာ်လီၤ.

⁶ယမၤယသးလီၤဂာ်ဒ်ထိၣ်ဝိၣ်ဘိၤလၢ ပှၢ်လၢ်ကျါအသိး ဒီးဒ်ဒိကအိလၢအအိၣ်လၢ တၢ်လီၤပှီၢ်အကျါအသိးန့ၣ်လီၤ.

⁷ယမံတန့ၢ်ဂဲၤတန့ၢ်, ဒီးယမၤသးဒ် ထိၣ်ဖှံးအိၣ်ထဲတဘ့ၣ်ဧိၤ လၢဟံၣ်ခိၣ်အဖီခိၣ်အသိးန့ၣ်လီၤ.

⁸ယဒုၣ်ယဒါတဖၣ်ကတိၤဆါယၤသ့တနံၤကျၢၤ, ဒီးပှၤလၢအဒုၣ်ဒွဲၣ်ယၤတဖၣ်သူယမံၤလၢ အတၢ်ဆိၣ်အၢအပူၤန့ၣ်လီၤ.

⁹ယအီၣ်ဖၣ်ဆါဒ်ကိၣ်အသိး ဒီးယမၤဃါဃုာ်ယတၢ်အီဒီးမဲာ်ထံလီၤ.

¹⁰မ့ၢ်လၢနတၢ်သးဒိၣ်ထီၣ်ဒီး သူၣ်ကဲၤသးကဲၤထီၣ်အဃိ, ဒီးနဟံးထီၣ်ယၤဒီးစူးကွံာ်ယၤန့ၣ်လီၤ.

¹¹ယမုၢ်နံၤတဖၣ်လီၤဂာ်ဒ်မုၢ်ဟါအတၢ်ကဒုတဖၣ်အသိး ဒီးယဃ့ထီၣ်ကွံာ်ဝဲဒ်နီၣ်ဧိၤမံၤဧိၤအသိးန့ၣ်လီၤ.

¹²မ့မ့ၢ်နဲဒၣ်နၤ, ယွၤဧၢ, နပၢတၢ်လီၤစိၤလီၤထီ ဒီးနတၢ်မံၤဟူသၣ်ဖျါန့ၣ် ကအိၣ်ဝဲဆိးဝဲလၢ ကယဲၢ်စိၤခဲလၢာ်အပူၤလီၤ.

¹³နကဂဲၤဆၢထၢၣ်ဒီးသူၣ်ကညီၤသးကညီၤစံယိၣ်လီၤ. အဂ့ၢ်ဒ်အံၤ, တၢ်ဆၢကတီၢ်လၢနသ့ၣ်ပာ်လၢ နကသူၣ်ကညီၤသးကညီၤအီၤန့ၣ်ဘၣ်လံ.

¹⁴မ့ၢ်ဘၣ်တၢ်မၤဟးဂီၤကွံာ်အီၤဒၣ်လဲာ် နခ့နပှၤတဖၣ်အဲၣ်အီၤ, မ့ၢ်အိၣ်လၢတၢ်ဟးဂီၤအပူၤဒၣ်လဲာ် အဝဲသ့ၣ်သးကညီၤဘၣ်အီၤလီၤ.

¹⁵ဒီးပှၤကလုာ်တဖၣ်န့ၣ်ကပျံၤယွၤအမံၤ ဒီးကယဲၢ်ဟီၣ်ခိၣ်အစီၤပၤခဲလၢာ် ကပျံၤအလၤကပီၤလီၤ.

¹⁶အဂ့ၢ်ဒ်အံၤ, ယွၤကသူၣ်ထီၣ်က့ၤစံယိၣ်, ဒီးအဝဲကအိၣ်ဖျါထီၣ်လၢအလၤကပီၤအပူၤလီၤ.

¹⁷အဝဲကဒိကနၣ်ပှၤဖှီၣ်ဖိယာ်ဖိအတၢ်ထုကဖၣ် ဒီးတမၤတရီတပါဘၣ်အတၢ်ဃ့သကွံၢ်ကညးန့ၣ်ဘၣ်.

¹⁸တၢ်လၢယွၤမၤတ့ၢ်ဝဲအံၤ, ကွဲးလီၤအီၤလၢ ပှၤလၢခံတစိၤဂီၢ်, ဒ်သိးပှၤလၢအတအိၣ်ဖျဲၣ်ထီၣ်ဒံးသ့ၣ်တဖၣ် ကစံးထီၣ်ပတြၢၤယွၤန့ၣ်တက့ၢ်.

¹⁹အဝဲကွၢ်လီၤတၢ်လၢအလီၢ်စီဆှံထီၣ်ထီ, လၢမူခိၣ်န့ၣ်ယွၤကွၢ်လီၤတၢ်ဆူဟီၣ်ခိၣ်လီၤ.

²⁰အဝဲနၢ်ဟူပှၤဘၣ်တၢ်စၢဃာ်အတၢ်ကအုကစွါတဖၣ်, ဒီးကမၤပူၤဖျဲးပှၤတဖၣ်လၢအဘၣ်တၢ်စံၣ်ညီၣ် သံအီၤန့ၣ်လီၤ.

²¹လၢတၢ်အံၤအဃိ အဝဲအမံၤကဘၣ်တၢ်ကိးသတြီ အီၤလၢစံယိၣ်အပူၤ, ဒီးကဘၣ်တၢ်စံးထီၣ်ပတြၢၤအီၤလၢ ဝ့ၢ်ယရူၤၡလ့ၣ်အပူၤ,

²²ဖဲပှၤကလုာ်တဖၣ် ဒီးဘီမုၢ်တဖၣ်အိၣ်ဖှိၣ်တပူၤဃီဒီး ဘူၣ်ထီၣ်ဘါထီၣ်ယွၤန့ၣ်လီၤ.

²³ယွၤမၤစၢ်လီၤဝဲယဂံၢ်ယဘါဖဲယသးစၢ်ဒံးအခါ ဒီးမၤဖုၣ်လီၤယသးသမူန့ၣ်လီၤ.

²⁴ကစၢ်ယွၤဧၢ, တချုးလၢယသးပှၢ်ထီၣ်ဒံးဘၣ်န့ၣ် ဟံးထီၣ်ကွံာ်ယၤတဂ့ၤ. ယွၤဧၢ, နမူဝဲလီၤစိၤလီၤထီလီၤ.

²⁵လၢပျၢၤန့ၣ်နတ့ဟီၣ်ခိၣ်ဒီးလၢနစုဒၣ်နဲန့ၣ် နဒုးကဲထီၣ်မူခိၣ်လီၤ.

²⁶တၢ်တဖၣ်န့ၣ်ကလီၤမၢ်ကွံာ်ဝဲ, မ့မ့ၢ်နဲဒၣ်အံၤနကအိၣ်ကဆိးဒံးနဲလီၤ. အဝဲသ့ၣ်ကလီၢ်လံၤခဲလၢာ်ဒ်ဆ့ကၤတဖၣ်အသိး, ဒီးနကစူးကွံာ်အီၤဒ် ဆ့ကၤတဖၣ်အသိး ဒီးကဟါမၢ်ကွံာ်ဝဲလီၤ.

²⁷မ့မ့ၢ်နဲဒၣ်အံၤနမ့ၢ်တၢ်ဒ်လီၢ်လီၢ် ဒီးနနံၣ်နလါတဖၣ် အကတၢၢ်တအိၣ်ဘၣ်န့ၣ်လီၤ.

²⁸နခ့နပှၤတဖၣ်အဖိအလံၤကအိၣ်ကဆိးလၢ တၢ်ဘံၣ်တၢ်ဘၢအပူၤ, ဒီးအချံအသၣ် ကအိၣ်ဂၢၢ်ဆိးကျၢၤလၢနမဲာ်ညါလီၤ.