Read S'gaw Karen စံးထီၣ်ပတြၢၤ 103 Bible Online

စံးထီၣ်ပတြၢၤ 103 - S'gaw Karen bible

စံးထီၣ်ပတြၢၤ 103

¹ယသးဧၢ, စံးထီၣ်ပတြၢၤယွၤတက့ၢ်. ဒီးကယဲၢ်တၢ်အိၣ်လၢယပူၤခဲလၢာ်သ့ၣ်ဧၢ, စံးထီၣ်ပတြၢၤအမံၤစီဆှံန့ၣ်တက့ၢ်.

²ယသးဧၢ, စံးထီၣ်ပတြၢၤယွၤတက့ၢ်. ဒီးအတၢ်မၤဂ့ၤတဖၣ်န့ၣ် မ်နသုတသးပ့ၤနီၣ်နီတမံၤတဂ့ၤ.

³အဝဲဒၣ်န့ၣ်, မ့ၢ်ပှၤလၢအပျၢ်နတၢ်သရူးနတၢ်ကမၣ်ခဲလၢာ်, ဒီးမ့ၢ်ပှၤလၢအမၤဘျါက့ၤ နတၢ်ဆူးတၢ်ဆါကိးမံၤဒဲး,

⁴မ့ၢ်ပှၤလၢအပှ့ၤက့ၤနသးသမူလၢတၢ်ဟးဂီၤ, ဒီးမ့ၢ်ပှၤလၢအဒုးကုာ်ထီၣ်နၤလၢ တၢ်အဲၣ်ဂၢၢ်ကျၢၤဒီးတၢ်သးကညီၤ,

⁵မ့ၢ်ပှၤလၢအဒုးမံသူၣ်မံသးနထးခိၣ်လၢ တၢ်ဂ့ၤဖဲနအိၣ်မူဒံးအခါ, ဒီးနဖိၣ်သၣ်ခွါထီၣ်က့ၤကဒီးဒ် လံာ်ဧိၤတြၤဧိၤအသိးန့ၣ်လီၤ.

⁶ယွၤမၤတၢ်တီတၢ်လိၤဒီးတၢ်မ့ၢ်တၢ်တီလၢ ကယဲၢ်ပှၤလၢတၢ်မၤအၢမၤနးအီၤအဂီၢ်လီၤ.

⁷အဝဲဒုးသ့ၣ်ညါစီၤမိၤၡ့လၢအကျဲဧိၤကပူၤဧိၤ, ဒီးပှၤအံၣ်စရ့လးဖိလၢ အတၢ်ဖံးတၢ်မၤတဖၣ်န့ၣ်လီၤ.

⁸ယွၤသူၣ်ကညီၤသးကညီၤတၢ်ဒီး သူၣ်အိၣ်သးအိၣ်တၢ်, အသးထီၣ်ကီဒီးအတၢ်အဲၣ်ဂၢၢ်ကျၢၤ အိၣ်ဝဲအါမးလီၤ.

⁹တသိၣ်ဃီၣ်တၢ်တထံၣ်ဃီဘၣ်, ဒီးအတၢ်သးထီၣ်န့ၣ်တပာ်ဝဲလီၤထူလီၤယိာ်ဘၣ်.

¹⁰တမၤဘၣ်ပှၤဒ်ပတၢ်ဒဲးဘးအသိးဘၣ်, ဒီးတဟ့ၣ်ကၣ်ပှၤဒ်ပတၢ်သရူးကမၣ်အသိးဘၣ်.

¹¹အဂ့ၢ်ဒ်အံၤ, ဒ်မူခိၣ်ကစီၤထီၣ်ဝဲလၢ ဟီၣ်ခိၣ်အဖီခိၣ်အသိးန့ၣ် အတၢ်အဲၣ်ဂၢၢ်ကျၢၤဒိၣ်ဝဲအါဝဲလၢ ပှၤလၢအပျံၤအီၤအဂီၢ်ဒ်န့ၣ်အသိးလီၤ.

¹²ဒ်မုၢ်ထီၣ်တခီယံၤဝဲဒီးမုၢ်နုာ်အသိးန့ၣ်, အဝဲသုးကွံာ်ပတၢ်သရူးကမၣ်ဒီးပှၤလီၤ.

¹³ဒ်ပၢ်သူၣ်ကညီၤသးကညီၤအဖိအလံၤအသိးန့ၣ်, ယွၤသူၣ်ကညီၤသးကညီၤပှၤလၢအပျံၤအီၤလီၤ.

¹⁴အဂ့ၢ်ဒ်အံၤ, သ့ၣ်ညါဝဲပဘၣ်တၢ်တ့ပှၤဒ်လဲၣ်န့ၣ်လီၤ. အဝဲသ့ၣ်နီၣ်ထီၣ်က့ၤဝဲလၢ ပမ့ၢ်ဟီၣ်ခိၣ်အကမူၣ်လီၤ.

¹⁵တၢ်လၢပှၤကညီအံၤ, အမုၢ်နံၤမၤအသးဒ် နီၣ်ဧိၤမံၤဧိၤအသိးလီၤ. အဝဲဟဲထီၣ်ဝဲဒ်သံၣ်ဧိၤဖီဧိၤလၢပျီပူၤအသိးလီၤ.

¹⁶အဂ့ၢ်ဒ်အံၤ, ကလံၤအူတၢ်လၢအလိၤ, ဒီးလဲၤပူၤကွံာ်ဝဲန့ၣ်လီၤ. ဒီးပှၤတထံၣ်လၢၤဘၣ်အီၤနီတဂၤဘၣ်.

¹⁷မ့မ့ၢ်ယွၤအတၢ်အဲၣ်ဂၢၢ်ကျၢၤအိၣ်ဝဲလၢ ပှၤလၢအပျံၤအီၤတဖၣ်အလိၤလီၤစိၤလီၤထီ ဒီးအတၢ်ဂ့ၤတၢ်ဝါန့ၣ်အိၣ်ဂၢၢ်ဆိးကျၢၤကိးစိၤဒဲး,

¹⁸ဒီးလၢပှၤလၢအတိၢ်န့ၢ်အတၢ်အၢၣ်လီၤအီလီၤ ဒီးသ့ၣ်နီၣ်ထီၣ်က့ၤအတၢ်မၤလိာ်ဒ်သိး အကတိၢ်န့ၢ်ဟံးဃာ်အီၤလီၤ.

¹⁹ယွၤပာ်လီၤအလီၢ်ပစိာ်လၢမူခိၣ်, ဒီးအဘီအမုၢ်န့ၣ် ပၢတၢ်လၢတၢ်ခဲလၢာ်အဖီခိၣ်လီၤ.

²⁰အကလူးလၢအဂံၢ်ဆူၣ်ဘါဆူၣ်, ဒီးမၤအတၢ်, ဒီးကနၣ်အတၢ်ကတိၤအသီၣ်သ့ၣ်ဧၢ, စံးထီၣ်ပတြၢၤယွၤတက့ၢ်.

²¹ကယဲၢ်အပှၤသုးမုၢ်, အခ့အပှၤလၢ အမၤတၢ်ဘၣ်အသးသုဝဲသ့ၣ်ဧၢ, စံးထီၣ်ပတြၢၤယွၤတက့ၢ်.

²²ကယဲၢ်တၢ်လၢယွၤတ့လီၤဝဲကိးမံၤဒဲး လၢအအိၣ်ဝဲလၢအဘီအမုၢ်အပူၤ တမံၤလၢ်လၢ်သ့ၣ်ဧၢ, စံးထီၣ်ပတြၢၤယွၤတက့ၢ်. ယသးဧၢ, စံးထီၣ်ပတြၢၤယွၤတက့ၢ်.