Read S'gaw Karen စံးထီၣ်ပတြၢၤ 114 Bible Online

စံးထီၣ်ပတြၢၤ 114 - S'gaw Karen bible

စံးထီၣ်ပတြၢၤ 114

¹တုၤပှၤအံၣ်စရ့လးဖိဟးထီၣ်ကွံာ်လၢအဲၤကူပတူး, တုၤစီၤယၤကိာ်အစၢၤအသွဲၣ်ဟးထီၣ်ကွံာ်လၢ ပှၤတခီဘီမုၢ်ဖိအကီၢ်န့ၣ်ဒီး,

²ယူဒၤကဲထီၣ်ယွၤအပှၤဂီၢ်မုၢ်စီဆှံ, အံၣ်စရ့လးကဲထီၣ်အတၢ်န့ၢ်သါဒၣ်ဝဲလီၤ.

³ပီၣ်လဲၣ်ဂီၤကွၢ်ဝဲဒီးဃ့ၢ်ကွံာ်ဝဲ, ထံကျိယၢ်ဒ့ၣ်တယွၤလီၤလၢၤဘၣ်န့ၣ်လီၤ.

⁴ကစၢၢ်တဖၣ်စံၣ်ဖှံသလိးဒ်သိဖါတဖၣ်အသိး ဒီးတၢ်စိခိၣ်တဖၣ်န့ၣ်စံၣ်ဝဲဒ် သိဖိတဖၣ်အသိးန့ၣ်လီၤ.

⁵ပီၣ်လဲၣ်ဧၢ, ပီၣ်လဲၣ်ဧၢ, တၢ်မနုၤမၤအသးလၢ ကဒုးဃ့ၢ် ကွံာ်နၤလဲၣ်. ဒီးနဲဒၣ်ထံကျိယၢ်ဒ့ၣ်ဧၢ, ဘၣ်မနုၤ နဆိကတီၢ်ယွၤလီၤလဲၣ်. ထံကျိယၢ်ဒ့ၣ်ဧၢ, ဘၣ်မနုၤလၢ နဂုၤက့ၤဆူလီၢ်ခံန့ၣ်လဲၣ်.

⁶ကစၢၢ်သ့ၣ်ဧၢ, သုစံၣ်ဖှံသလိးဒ်သိဖါတဖၣ်အသိး, တၢ်စိခိၣ်သ့ၣ်ဧၢ, သုစံၣ်တၢ်ဒ် သိဖိတဖၣ်အသိးန့ၣ်ဘၣ်မနုၤလဲၣ်.

⁷ဟီၣ်ခိၣ်ဧၢ, ကနိးကစုာ် လၢယွၤအမဲာ်ညါဖဲအဝဲဟဲ လၢစီၤယၤကိာ်အကစၢ်ယွၤမဲာ်ညါ,

⁸ပှၤတဂၤလၢအလဲလိာ်ကွံာ်လၢၢ်တဖၣ်ဆူ ထံနိၣ်တဖၣ်, ဒီးလ့ကဘျၣ်အကိၤဆူ ထံထီၣ်ပၢၢ်လၢအယွၤလီၤဝဲ, အမဲာ်ညါန့ၣ်တက့ၢ်.