Read S'gaw Karen စံးထီၣ်ပတြၢၤ 39 Bible Online

စံးထီၣ်ပတြၢၤ 39 - S'gaw Karen bible

စံးထီၣ်ပတြၢၤ 39

¹ယစံး, “ယကပလီၢ်ပဒီယသးလၢတၢ်လၢယမၤ ဒီးယသုတမၤတၢ်ဒဲးဘးလၢ ယပျ့ၤအဃိန့ၣ်တဂ့ၤ. ယကကးတံာ်ယထးခိၣ် ဖဲပှၤတတီတလိၤတဖၣ်အိၣ်ဘူးဒီးယၤန့ၣ်လီၤ.”

²ယအိၣ်တအုၣ်, ယတကတိၤတၢ်နီတဘီဘၣ်. ယအိၣ်ဘှီၣ်ကလာ်ဘၣ်ဆၣ်အဘျုးတအိၣ်ဘၣ်. ယတၢ်နးတၢ်ဖှီၣ်ဒိၣ်ထီၣ်အါထီၣ်တခီန့ၣ်လီၤ.

³မ့ၣ်အူကဲၤကဖးလၢယသးပူၤ, ဒီးဖဲယဆိကမိၣ်ထီၣ်တၢ်ဒီး မ့ၣ်အူကဲၤကပျီၤထီၣ်ဝဲန့ၣ်လီၤ. တုၤနုၤတစုယကတိၤထီၣ်ဖျဲးတၢ်လီၤ.

⁴“ယွၤဧၢ, ဒုးသ့ၣ်ညါယၤ, ယကအိၣ်မူဆံးယံာ်လဲၣ်. ယကသံအခါဖဲလဲၣ်. ဒီးယတၢ်အိၣ်မူကကတၢၢ်အခါဖဲလဲၣ်.”

⁵ကွၢ်ကွၢ်, နဟ့ၣ်တ့ၢ်ယၤတၢ်အိၣ်မူဖုၣ်ကိာ် ဒီးလၢနမဲာ်ညါန့ၣ်, ယတၢ်အိၣ်မူအကတီၢ်တမ့ၢ်တၢ်နီတမံၤဘၣ်. ပှၤကိးဂၤဒဲးအတၢ်အိၣ်မူန့ၣ် မ့ၢ်ဒၣ်တၢ်သါတဘီဧိၤန့ၣ်လီၤ. စ့လၤ

⁶ပှၤကညီလဲၤဝ့ၤဝီၤတၢ်ဒ်တၢ်ကဒုအသိးလီၤ. မၤတံာ်တာ်အသးလၢတၢ်ကလီကလီအဃိလီၤ. ပှၤကညီပာ်ဖှိၣ်တၢ်ထူးတၢ်တီၤဒီးမတၤ ကမၤန့ၢ်အီၤလဲၣ်န့ၣ်တသ့ၣ်ညါဝဲဘၣ်. စ့လၤ

⁷ကစၢ်ဧၢ, ခဲကနံၣ်အံၤယမုၢ်လၢ်တၢ်မနုၤသ့လဲၣ်. ယတၢ်မုၢ်လၢ်အိၣ်လၢနပူၤလီၤ.

⁸မၤပူၤဖျဲးယၤလၢယတၢ်ကမၣ်ခဲလၢာ်န့ၣ်တက့ၢ်. တဘၣ်ပျဲပှၤဟးဂီၤဖိဒုၣ်ဒွဲၣ်ယၤတဂ့ၤ.

⁹ယအိၣ်တအုၣ်လီၤ. ယတအဲးထီၣ်ယထးခိၣ်ဘၣ်. အဂ့ၢ်ဒ်အံၤ, တၢ်အံၤမ့ၢ်တၢ်လၢနမၤတ့ၢ်နဲလီၤ.

¹⁰တဘၣ်စံၣ်ညီၣ်လၢၤယၤတဂ့ၤ. ယကသံတ့ၢ်မးလၢနတီၢ်ယၤအဃိန့ၣ်လီၤ.

¹¹နသိၣ်ဃီၣ်ပှၤကညီအတၢ်ဒဲးဘးတဖၣ်လၢ နတၢ်သိၣ်က့ၤသီက့ၤ ဒီးတၢ်လၢအဝဲသ့ၣ်အဲၣ်ဝဲတဖၣ်န့ၣ်, နမၤဟးဂီၤကွံာ်ဒ် တၢ်အဃၢ်မၤဟးဂီၤတၢ်အသိးန့ၣ်လီၤ. ပှၤကိးဂၤဒဲးအတၢ်အိၣ်မူန့ၣ်, မ့ၢ်ဒၣ်တၢ်သါတဘီဧိၤန့ၣ်လီၤ. စ့လၤ

¹²ကနၣ်ယတၢ်ထုကဖၣ်တက့ၢ်. ယွၤဧၢ, ဒိကနၣ်ယတၢ်ကိးထီၣ်လၢ တၢ်မၤစၢၤအဂီၢ်န့ၣ်တက့ၢ်. ဖဲလၢယအိၣ်ဒီးတၢ်မဲာ်ထံမဲာ်နိန့ၣ်, အိၣ်ဘှီၣ်နဲတဂ့ၤ. အဂ့ၢ်ဒ်အံၤ, ယမ့ၢ်ဒၣ်နပှၤသမှံၤလၢ အအိၣ်တစိၢ်တလီၢ်ဖိ, ဒ်ယမိၢ်ပၢ်ဖံဖုလၢပျၢၤတဖၣ်အသိးန့ၣ်လီၤ.

¹³တချုးယသးဟးထီၣ်ကွံာ်ဒီးတအိၣ်လၢၤဘၣ်န့ၣ်, ပျဲယၤလၢယကအိၣ်ဘၣ်ဒီး တၢ်သးခုတစဲးတက့ၢ်.