Read S'gaw Karen စံးထီၣ်ပတြၢၤ 44 Bible Online

စံးထီၣ်ပတြၢၤ 44 - S'gaw Karen bible

စံးထီၣ်ပတြၢၤ 44

¹ကစၢ်ယွၤဧၢ, ပနၢ်ဟူတ့ၢ်လၢပနၢ်, ပပၢ်သ့ၣ်တဖၣ်တဲတ့ၢ်ပှၤ တၢ်ဖံးတၢ်မၤလၢနမၤတ့ၢ်လၢအမုၢ်နံၤတဖၣ်, မုၢ်နံၤလၢပျၢၤန့ၣ်လီၤ.

²လၢနစုဒၣ်နဲနနီၣ်ဟးထီၣ်ကွံာ်ပှၤတဘူၣ် ထီၣ်ဘါထီၣ်နၤသ့ၣ်တဖၣ်, ဒီးပာ်လီၤနပှၤဂီၢ်မုၢ်လၢ အဝဲသ့ၣ်အကီၢ်ပူၤဒ်လဲၣ်, နစံၣ်ညီၣ်ဃၣ်ပှၤကလုာ်ဂၤတဖၣ် ဒီးဒုးဘီၣ်ထီၣ်ညီထီၣ်နပှၤဂီၢ်မုၢ်ဒၣ်နဲဒ်လဲၣ်န့ၣ်လီၤ.

³တမ့ၢ်လၢအနးဒၣ်ဝဲအဃိဒီးအဝဲသ့ၣ်မၤန့ၢ်ထံကီၢ်, တမ့ၢ်လၢအစုဒုၣ်စုတီၤဟ့ၣ်အီၤတၢ်မၤနၢၤန့ၣ်ဘၣ်. မ့ၢ်ဒၣ်လၢနစုထွဲဒီးနစုဒုၣ်စုတီၤ, ဒီးနမဲာ်အတၢ်ကပီၤအဃိန့ၣ်လီၤ. အဂ့ၢ်ဒ်အံၤနဘၣ်သူၣ်ဘၣ်သးလၢအဝဲသ့ၣ်န့ၣ်လီၤ.

⁴နမ့ၢ်ယစီၤပၤဒီးယကစၢ်ယွၤ, နဟ့ၣ်တၢ်မၤနၢၤလၢ နအပှၤဂီၢ်မုၢ်အဂီၢ်န့ၣ်လီၤ.

⁵ဒီးလၢနတၢ်စိတၢ်ကမီၤန့ၣ်, ပမၤနၢၤပဒုၣ်ပဒါတဖၣ်န့ၣ်လီၤ.

⁶ယတနာ်န့ၢ်ယချံၣ် မ့တမ့ၢ်ယနးလၢ ကမၤပူၤဖျဲးယၤန့ၣ်ဘၣ်.

⁷ဘၣ်ဆၣ်နမၤပူၤဖျဲးတ့ၢ်ပှၤလၢပဒုၣ်ပဒါသ့ၣ်တဖၣ် ဒီးမၤနၢၤတ့ၢ်ပှၤလၢအသးဟ့ပှၤန့ၣ်လီၤ.

⁸ပကစံးထီၣ်ပတြၢၤနၤထီဘိ ဒီးစံးဘျုးစံးဖှိၣ်နၤလီၤစိၤလီၤထီန့ၣ်လီၤ. စ့လၤ

⁹ဘၣ်ဆၣ်ခဲအံၤနညိကွံာ်ပှၤဒီး ပျဲပဘၣ်တၢ်မၤနၢၤတ့ၢ်ပှၤန့ၣ်လီၤ. နတလဲၤတၢ်ဒီးပပှၤသုးမုၢ်သံၣ်ဘိ သ့ၣ်တဖၣ်န့ၣ်လၢၤဘၣ်.

¹⁰နဒုးဃ့ၢ်ကွံာ်ပှၤလၢပဒုၣ်ပဒါသ့ၣ်တဖၣ်အမဲာ်ညါ ဒီးတၢ်လၢအမ့ၢ်ပတၢ်သ့ၣ်တဖၣ်န့ၣ် အဝဲသ့ၣ်ဟံးန့ၢ်ကွံာ်လၢအဂီၢ်န့ၣ်လီၤ.

¹¹နပျဲတၢ်မၤသံအီၣ်ပှၤဒ်သိတဖၣ်အသိး, ဒီးမၤလီၤပြံလီၤပြါတ့ၢ်ပှၤလၢ ပှၤကလုာ်သ့ၣ်တဖၣ်အကျါန့ၣ်လီၤ.

¹²နဆါကွံာ်နပှၤဂီၢ်မုၢ်ဒ် တၢ်အလုၢ်အပှ့ၤတအိၣ်ဘၣ်အသိး, နတဃ့တၢ်အပှ့ၤထဲတစဲးဧိၤလၢအဂီၢ်ဘၣ်.

¹³ပှၤအိၣ်လၢပဃၢၤတဖၣ်ထံၣ်ဝဲတၢ်လၢနမၤတ့ၢ်ပှၤ, ဒီးအဝဲသ့ၣ်ဒုၣ်ဒွဲၣ်ပှၤဒီးနံၤဘၣ်ဖၣ်လဲပှၤန့ၣ်လီၤ.

¹⁴နဒုးကဲထီၣ်ပှၤလၢတၢ်လီၤသးဘၣ်အၢ လၢပှၤကလုာ်တဖၣ်အကျါ, အဝဲသ့ၣ်ကျၢၢ်ကျာ်အခိၣ်လၢ တၢ်တပာ်ကဲဘၣ်ပှၤအပူၤန့ၣ်လီၤ.

¹⁵ထီဘိယအိၣ်ယဲလၢတၢ်မဲာ်ဆှးအပူၤ, ယဘၣ်တၢ်လုၣ်ဘၢယၤလၢတၢ်မဲာ်ဆှး,

¹⁶မ့ၢ်လၢယနၢ်ဟူဘၣ်ယဒုၣ်ယဒါ ဒီးပှၤလၢအသးဟ့ယၤသ့ၣ်တဖၣ် အတၢ်ကတိၤဒုၣ်ဒွဲၣ်ယၤဒီးမၤတရီတပါယၤ အဃိန့ၣ်လီၤ.

¹⁷ကယဲၢ်တၢ်ခဲလၢာ်ဟဲဘၣ်ပှၤ ဖဲပတသးပ့ၤနီၣ်နၤအခါဒၣ်လဲာ်, မ့တမ့ၢ်ဖဲပတမၤဟးဂီၤဘၣ် တၢ်အၢၣ်လီၤအီလီၤလၢ နမၤတ့ၢ်ဒီးပှၤဒၣ်လဲာ်န့ၣ်လီၤ.

¹⁸ပသးတဂုၤက့ၤဆူအလီၢ်ခံ ဒီးပခီၣ်ထွဲတၢ်တဖၣ်တဟးဖးဖျိးကွံာ် လၢနကျဲဘၣ်,

¹⁹ဒ်သိးနကမၤဟးဂီၤကွံာ်ပှၤလၢ ထွံၣ်ဟီၣ်ခိၣ်တဖၣ်အလီၢ်ပူၤ, ဒီးလုၣ်ဘၢတ့ၢ်ပှၤလၢတၢ်သံအတၢ်ခံးယိာ်န့ၣ်ဘၣ်.

²⁰ပမ့ၢ်ဆိကတီၢ်တ့ၢ်ပတၢ်ဘူၣ်ထီၣ်ဘါထီၣ်ကစၢ်ယွၤ ဒီးထုကဖၣ်ထီၣ်တၢ်ဆူပှၤတခီဘီမုၢ်အယွၤန့ၣ်ဒီး,

²¹နကထံၣ်တ့ၢ်လံတၢ်အံၤသပှၢ်တၢၢ်, မ့ၢ်လၢနသ့ၣ်ညါပတၢ်ဆိကမိၣ်ခူသူၣ် သ့ၣ်တဖၣ်အဃိန့ၣ်လီၤ.

²²ဘၣ်ဆၣ်လၢနဃိပဘၣ်တၢ်မၤသံပှၤ ကိးဆၢကိးကတီၢ်ဒဲး, ဒီးပဘၣ်တၢ်ပာ်ပှၤဒ်သိလၢ အကဘၣ်တၢ်မၤသံအီၤအသိးန့ၣ်လီၤ.

²³ယွၤဧၢ, ဖုသံနီၣ်ထီၣ်တက့ၢ်, ဘၣ်မနုၤလၢနမံန့ၣ်လဲၣ်. ဂဲၤထၢၣ်တက့ၢ်. တဘၣ်စူးကွံာ်ပှၤထီဘိန့ၣ်တဂ့ၤ.

²⁴ဘၣ်မနုၤလၢနပာ်သဒၢနသးလၢပှၤန့ၣ်လဲၣ်. တဘၣ်သးပ့ၤနီၣ်ပတၢ်နးတၢ်ဖှီၣ်ဒီး ပတၢ်ကိၢ်တၢ်ဂီၤန့ၣ်တဂ့ၤ.

²⁵ပလီၤဃံၤအီထီလာ်ဆူဟီၣ်ခိၣ်လိၤ, ပမံနီၤလၢတၢ်မၤနၢၤတ့ၢ်ပှၤအပူၤ လၢဖၣ်ဆါအကျါန့ၣ်လီၤ

²⁶ဟဲလၢနကမၤစၢၤပှၤအဂီၢ်, ဒီးမၤပူၤမၤဖျဲးပှၤလၢနတၢ်အဲၣ်လၢ အအိၣ်စံၣ်အိၣ်ကျၢၤအဃိန့ၣ်တက့ၢ်.