Read S'gaw Karen စံးထီၣ်ပတြၢၤ 55 Bible Online

စံးထီၣ်ပတြၢၤ 55 - S'gaw Karen bible

စံးထီၣ်ပတြၢၤ 55

¹ကစၢ်ယွၤဧၢ, ဒိကနၣ်ယတၢ်ထုကဖၣ်တက့ၢ်, ဒီးပာ်တဒၢနသးလၢယတၢ်ဃ့ကညးန့ၣ်တဂ့ၤ

²ဒိကနၣ်ယကလုၢ်, ဒီးစံးဆၢလၢ်ယၤတက့ၢ်. ယဘၣ်တၢ်မၤနၢၤယၤလၢယတၢ်ကိၢ်တၢ်ဂီၤ တဖၣ်န့ၣ်လီၤ.

³ယသးဒံဝ့ၤဒံဝီၤလၢယဒုၣ်ယဒါအကလုၢ်အဃိ, ဒီးလၢပှၤတတီတလိၤအတၢ်ဆီၣ်ဘံၣ်ဆီၣ်ဘၢအဃိန့ၣ်လီၤ. အဂ့ၢ်ဒ်အံၤ, အဝဲသ့ၣ်ဟဲစိာ်တၢ်ကိၢ်တၢ်ဂီၤလၢယဂီၢ်, ဒီးလၢအတၢ်သးထီၣ်အပူၤ အဝဲသ့ၣ်သးဟ့ယၤလီၤ.

⁴ယသူၣ်ကနိးယသးကနိးလၢယပူၤ, ဒီးတၢ်သံအတၢ်မၤပျံၤမၤဖုး လီၤဘၣ်လၢယလိၤလီၤ.

⁵တၢ်ပျံၤဒီးတၢ်ကနိးလီၤဘၣ်ယၤ, ဒီးတၢ်လီၤပျံၤလီၤဖုးလုၣ်ဘၢယၤလီၤ.

⁶ဒီးယစံး, မ်ယအိၣ်ဒီးဒံးဆ့ဒ်ထိၣ်လွံၢ်အသိးန့ၣ်တ က့ၢ်. ယကယူၤထီၣ်ကွံာ်ဒီးအိၣ်ဘှံးအိၣ်သါလီၤ.

⁷ကွၢ်ကွၢ်, ယကယူၤဝ့ၤဝီၤလၢအယံၤ, ယကအိၣ်လၢပှၢ်မုၢ်ကနၢလီၤ. စ့လၤ

⁸ယကဃုထံၣ်န့ၢ်တၢ်ပူၤဖျဲးအလီၢ်ချ့ချ့ လၢကလံၤမုၢ်ဒီးလၢကလံၤမုၢ်တွၤန့ၣ်လီၤ.

⁹ယွၤဧၢ, မၤဟးဂီၤအတၢ်တိာ်ပာ် ဒီးမၤသဘံၣ်ဘုၣ်အပျ့ၤတဖၣ်န့ၣ်တက့ၢ်. အဂ့ၢ်ဒ်အံၤ, ယထံၣ်တၢ်မၤအၢဒီး တၢ်အ့ၣ်လိာ်ဆိးက့လိာ်လၢဝ့ၢ်ပူၤလီၤ.”

¹⁰လၢမုၢ်ဆါဒီးလၢမုၢ်နၤန့ၣ် လဲၤဝးတရံးဝဲလၢဝ့ၢ်ခိၣ်ဒူအဖီခိၣ်, ဒီးတၢ်မၤဟးဂီၤတၢ်ဒီးတၢ်နးတၢ်ဖှီၣ် အိၣ်ဝဲလၢအပူၤလီၤ.

¹¹တၢ်ဟးဂူာ်ဟးဂီၤအိၣ်လၢလီၢ်ကိးပူၤဒဲးဒီး တၢ်မၤအၢတၢ်ဒီးတၢ်လီတၢ်န့ၣ်, တဟးဖးဘၣ်ဒီးအဖၠါပူၤဘၣ်.

¹²တၢ်အံၤတမ့ၢ်ဘၣ်ဒုၣ်ဒါလၢအဒုၣ်ဒွဲၣ်ယၤဘၣ်. မ့မ့ၢ်ဒ်န့ၣ်ဒီးယတူၢ်ကကဲယဲလီၤ. တမ့ၢ်ဘၣ်ပှၤလၢအသးဟ့ယၤ ပာ်ဒိၣ်အသးလၢယဖီခိၣ်ဘၣ်. မ့မ့ၢ်ဒ်န့ၣ်ဒီးယကပာ်တဒၢယသးလၢအီၤလီၤ.

¹³ဘၣ်ဆၣ်ပှၤအံၤမ့ၢ်နၤ, ယတံၤသကိး, ယတံၤသကိးတံၢ်တံၢ်န့ၣ်လီၤ.

¹⁴ပကတိၤသကိးတၢ်ဘူးဘူးတံၢ်တံၢ်တဂၤဒီးတဂၤ, ဒီးပဘူၣ်သကိးဘါသကိးတပူၤဃီ လၢယွၤအဟံၣ်ပူၤလီၤ.

¹⁵မ်တၢ်သံလီၤဘၣ်လၢယဒုၣ်ယဒါတဖၣ်အလိၤ တချုးအဆၢကတီၢ်ဘၣ်ဒံးတက့ၢ်. မ်အလဲၤလီၤမူဒံးဝဲဆူပျုၤပူၤတက့ၢ်, တၢ်အၢတၢ်သီအိၣ်ဝဲလၢအတၢ်အိၣ်တၢ်ဆိးအလီၢ် ဒီးလၢအသးကံၢ်ပူၤန့ၣ်လီၤ.

¹⁶ဘၣ်ဆၣ်ယကိးထီၣ်ယွၤ, ကစၢ်ယွၤ ဒီးယွၤကမၤပူၤမၤဖျဲးယၤလီၤ.

¹⁷မုၢ်ဟါ, ဒီးမုၢ်ဂီၤ, ဒီးလၢမုၢ်ထူၣ်န့ၣ် ယကအုကစွါဒီးယဟီၣ်ယယၢၤ, ဒီးအဝဲကနၢ်ဟူယကလုၢ်လီၤ.

¹⁸လၢတၢ်ဒုးတၢ်ယၤအပူၤန့ၣ်, ကမၤပူၤဖျဲးယသးလၢယဒုၣ်ယဒါအါဂၤအစုပူၤ ဒီးဟ့ၣ်ယၤတၢ်မုာ်တၢ်ခုၣ်န့ၣ်လီၤ.

¹⁹ကစၢ်ယွၤ, လၢအပၢတၢ်လၢတၢ်လီၤထူလီၤယိာ်န့ၣ် ကနၢ်ဟူယၤဒီးမၤနၢၤအဝဲသ့ၣ်လီၤ. အဂ့ၢ်ဒ်အံၤ, အဝဲသ့ၣ်တလဲလိာ်အသးဘၣ် ဒီးအဝဲသ့ၣ်တပျံၤဘၣ်ယွၤဘၣ်. စ့လၤ

²⁰ယတံၤသကိးယူာ်ထီၣ်အစုထီဒါ အတံၤသကိးသ့ၣ်တဖၣ် ဒီးမၤဟးဂီၤအတၢ်အၢၣ်လီၤအီလီၤတဖၣ်န့ၣ်လီၤ.

²¹အတၢ်စံးတၢ်ကတိၤဘျ့န့ၢ်တၢ်နုၢ်ထံအသိတက့ၢ်လီၤ. မ့မ့ၢ်တၢ်ဒုးသုးအသးန့ၣ်အိၣ်လၢအပူၤလီၤ. အတၢ်ကတိၤတဖၣ်စၢ်န့ၢ်သိတက့ၢ်လီၤ, ဘၣ်ဆၣ်မ့ၢ်နးလၢအဘီၣ်ထီၣ်အသးတဖၣ်လီၤ.

²²ပာ်ထီၣ်နတၢ်ဝံတၢ်ယိးလၢယွၤအလိၤတက့ၢ်. ဒီးအဝဲဒၣ်ကမၤစၢၤနၤလီၤ. အဝဲတပျဲပှၤတီပှၤလိၤဟူးဝးနီတဘျီဘၣ်.

²³ဘၣ်ဆၣ်နဲဒၣ်ကစၢ်ယွၤဧၢ, နကဒုးလဲၤလီၤအဝဲသ့ၣ်ဆူ တၢ်ဟးဂီၤအတၢ်ပူၤလီၤ. ပှၤမၤသံတၢ်ဒီးပှၤလီတၢ်တဖၣ်န့ၣ်, တအိၣ်မူဘၣ် အမုၢ်နံၤမုၢ်သီတဝာ်ဒၣ်လဲာ်န့ၣ်ဘၣ်. မ့မ့ၢ်ယဲဒၣ်အံၤယကသန့ၤယသးလၢနၤလီၤ.