Read S'gaw Karen စံးထီၣ်ပတြၢၤ 73 Bible Online

စံးထီၣ်ပတြၢၤ 73 - S'gaw Karen bible

စံးထီၣ်ပတြၢၤ 73

¹ကစၢ်ယွၤန့ၣ်မ့ၢ်တၢ်ဂ့ၤလၢပှၤအတီအလိၤ, ဒီးပှၤလၢအသးကဆှီတဖၣ်အဂီၢ်နီၢ်နီၢ်န့ၣ်လီၤ.

²မ့မ့ၢ်ယဲဒၣ်ယၤအံၤ, ယခီၣ်ဘူးလၢကဘၣ်တိၢ် ဒီးယခီၣ်အတၢ်ထွဲတဖၣ်ဘူးတ့ၢ်လံလၢ ကလီၤတလံာ်န့ၣ်လီၤ.

³အဂ့ၢ်ဒ်အံၤ, ယထံၣ်တ့ၢ်လၢ ပှၤတတီတလိၤတဖၣ်ဘီၣ်ထီၣ်ညီထီၣ်, ဒီးယသးက့ၣ်ထီၣ်လၢအဝဲသ့ၣ်လၢ အတၢ်ပာ်ထီၣ်ထီအသးအဃိန့ၣ်လီၤ.

⁴အဝဲသ့ၣ်တတူၢ်ဘၣ်တၢ်ဆါဘၣ်. အဝဲသ့ၣ်အဂံၢ်ဆူၣ်အဘါဆူၣ်ဒီး အိၣ်ဆူၣ်အိၣ်ချ့ဝဲဒၣ်န့ၣ်လီၤ.

⁵အဝဲသ့ၣ်တတူၢ်ဘၣ်တၢ်ဒ်ပှၤဂီၢ်မုၢ်အဂၤတူၢ်ဘၣ်ဝဲ, ဒီးတအိၣ်ဒီးတၢ်ကိၢ်တၢ်ဂီၤဒ်ပှၤဂၤ အိၣ်ဒီးတၢ်ကိၢ်တၢ်ဂီၤအသိးန့ၣ်ဘၣ်.

⁶မၤသးဒ်န့ၣ်ဒီးတၢ်ပာ်ထီၣ်ထီသးန့ၣ်မ့ၢ် အဝဲသ့ၣ်အကိာ်ကွီၤတဖၣ်, ဒီးတၢ်မၤတၢ်လၢတၢ်စုဆူၣ်ခီၣ်တကးလုၣ်ဘၢ အဝဲသ့ၣ်ဒ်တၢ်ကူတၢ်ကၤအသိးန့ၣ်လီၤ.

⁷အဝဲသ့ၣ်အသးတဖၣ်လူလီၤတၢ်အၢတၢ်သီ, ဒီးအသးအတၢ်ဆိကမိၣ်တဖၣ်အါဝဲဒၣ်လၢ တၢ်ကူၣ်ထီၣ်ဖးလီၤအအၢအသီတဖၣ်န့ၣ်လီၤ.

⁸အဝဲသ့ၣ်နံၤဘၣ်ဖၣ်လဲပှၤဂၤဒီး ကတိၤတၢ်အၢတၢ်သီတဖၣ်လီၤ. အဝဲသ့ၣ်ပာ်ထီၣ်ထီအသးဒီးကူၣ်ထီၣ်တၢ်လၢ ကမၤအၢမၤနးပှၤဂၤတဖၣ်န့ၣ်လီၤ.

⁹အဝဲသ့ၣ်ကတိၤတၢ်အၢလၢကစၢ်ယွၤလၢအအိၣ် လၢမူခိၣ်အဂ့ၢ် ဒီးဟ့ၣ်လီၤတၢ်မၤလိာ်လၢ အတၢ်ပာ်ထီၣ်ထီအသးတဖၣ်ဆူ ပှၤလၢအအိၣ်လၢဟီၣ်ခိၣ်ချၢန့ၣ်လီၤ.

¹⁰မၤသးဒ်န့ၣ်ဒီး, ကစၢ်ယွၤအပှၤဂီၢ်မုၢ်ဒၣ်လဲာ် ဃၣ်အသးဆူအဝဲသ့ၣ်အအိၣ် ဒီးတၢ်လၢအဝဲသ့ၣ်စံးဝဲန့ၣ် နာ်ဝဲလၢတၢ်သးဆူၣ်န့ၣ်လီၤ.

¹¹အဝဲသ့ၣ်စံးဝဲ, “ကစၢ်ယွၤတသ့ၣ်ညါဘၣ်, တၢ်ထီကတၢၢ်တဂၤတထံၣ်န့ၢ်ဝဲဘၣ်.”

¹²တၢ်န့ၣ်မ့ၢ်တၢ်လၢပှၤတတီတလိၤ ဘၣ်သူၣ်ဘၣ်သးဝဲန့ၣ်လီၤ. အဝဲသ့ၣ်အိၣ်ဒီးတၢ်လၢတၢ်ပှဲၤဒီး ဒိးန့ၢ်အါထီၣ်ဘၣ်တၢ်ထီဘိန့ၣ်လီၤ.

¹³ယမၤကဆှီယသး, ဒီးသ့စီကွံာ်ယစုလၢ တၢ်ဒဲးဘးတအိၣ်ဘၣ်အပူၤန့ၣ် မ့ၢ်ဒၣ်တၢ်ကလီကလီခဲလၢာ်န့ၣ်လီၤ.

¹⁴ကစၢ်ယွၤဧၢ, ကိးမုၢ်နံၤဒဲးန့ၣ် နဒုးတူၢ်ဘၣ်ယၤတၢ်, ကိးမုၢ်ဂီၤဒဲးနစံၣ်ညီၣ်ယၤလီၤ.

¹⁵ယမ့ၢ်စံၤတ့ၢ်တၢ်ဒ်န့ၣ်အသိးဒီး ယကမ့ၢ်ပှၤတဂၤလၢ အတမၤတၢ် ဒ် နပှၤဂီၢ်မုၢ်အသိးဘၣ်လီၤ.

¹⁶ယကျဲးစၢးဆိကမိၣ်တ့ၢ်တၢ်ကီတၢ်ခဲန့ၣ်လီၤ တံၢ်လီၤဆဲးဘၣ်ဆၣ် မ့ၢ်တၢ်ကီကဲာ်ဆိး လၢယကနၢ်ပၢၢ်အီၤအဂီၢ်,

¹⁷တချုးဒံးလၢယလဲၤနုာ်ဆူ နတၢ်လုၢ်ဟံၣ်အပူၤဘၣ်န့ၣ်လီၤ. အန့ၣ်တစုယနၢ်ပၢၢ်တၢ်လၢ အကဘၣ်ပှၤတတီတလိၤန့ၣ်လီၤ.

¹⁸မ့ၢ်မးကနပာ်အဝဲသ့ၣ်လၢတၢ်လီၤတလံာ်အလီၢ်တဖၣ်, နကဒုးလီၤအဝဲသ့ၣ်ဆူတၢ်ဟးဂူာ်ဟးဂီၤန့ၣ်လီၤ.

¹⁹အဝဲသ့ၣ်ဘၣ်တၢ်မၤဟးဂီၤကွံာ်အီၤလၢ တစိၢ်ဖိအတီၢ်ပူၤ, ဘၣ်တၢ်စိာ်ကွံာ်အီၤလၢာ်လၢာ်ဆ့ဆ့လၢ တၢ်လီၤပျံၤလီၤဖုးတဖၣ်န့ၣ်လီၤ.

²⁰အဝဲသ့ၣ်လီၤဂာ်ဒ်တၢ်မံမီၢ်လၢအလဲၤပူၤကွံာ် လၢမုၢ်ဂီၤအသိးန့ၣ်လီၤ. ကစၢ်ယွၤဧၢ, တုၤနထိၣ်ဂဲၤထီၣ်နသးန့ၣ်ဒီး အဝဲသ့ၣ်ဟါမၢ်ကွံာ်ဝဲဒၣ်န့ၣ်လီၤ.

²¹တုၤယအိၣ်ဒီးတၢ်သးဆါ, တုၤယသးဘၣ်ဆဲးန့ၣ်ဒီး,

²²ယမ့ၢ်ပှၤလၢအသးတပှဲၤဒီး တၢ်သ့ၣ်ညါနၢ်ပၢၢ်တအိၣ်, ယလီၤဂာ်ဒီးဆၣ်ဖိကီၢ်ဖိလၢနမဲာ်ညါလီၤ.

²³မ့ၢ်နာ်သက့ဒ်န့ၣ်ဒီး, ယအိၣ်ဘူးဒီးနၤတထံၣ်ဃီ ဒီးနဟံးထီၣ်ယစုထွဲန့ၣ်လီၤ.

²⁴နဆှၢယၤလၢနတၢ်ကူၣ်ထီၣ်ဖးလီၤ ဒီးလၢခံက့ၤနကတူၢ်လိာ်ယၤလၢ တၢ်လၤတၢ်ကပီၤန့ၣ်လီၤ.

²⁵နမ့ၢ်ဒၣ်ပှၤထဲတဂၤဧိၤလၢ ယဒိးန့ၢ်ဘၣ်လၢမူခိၣ်န့ၣ်လီၤ. မ့ၢ်လၢယဒိးန့ၢ်ဘၣ်လံနၤအဃိ ယလိၣ်ဘၣ်ဒံး တၢ်မနုၤတမံၤလၢဟီၣ်ခိၣ်ချၢန့ၣ်လဲၣ်.

²⁶ယသးဒီးယနီၢ်ခိအဂံၢ်အဘါကစၢ်လီၤဝဲ, ဘၣ်ဆၣ်ကစၢ်ယွၤမ့ၢ်ယဂံၢ်ယဘါလီၤ. အဝဲမ့ၢ်တၢ်ခဲလၢာ်လၢယန့ၢ်ဘၣ်အီၤ အလီၢ်အိၣ်ထီဘိန့ၣ်လီၤ.

²⁷အဂ့ၢ်ဒ်အံၤ, ကွၢ်ကွၢ်, ပှၤလၢအအိၣ်ယံၤဒီးနၤန့ၣ် ကတုၤလၢတၢ်ဟးဂီၤလီၤ. နကမၤဟးဂီၤကွံာ်ပှၤလၢအသးတတီဒီးနၤန့ၣ်လီၤ.

²⁸ဘၣ်ဆၣ်လၢယဂီၢ်တၢ်အိၣ်ဘူးဒီးကစၢ်ယွၤန့ၣ် မ့ၢ်တၢ်ဂ့ၤလီၤ. ယပာ်တၢ်စိတၢ်ကမီၤကစၢ်ယွၤ လၢယတၢ်အိၣ်တဒၢအလီၢ် ဒ်သိးယကစံးဘၣ်တဲဘၣ် အတၢ်မၤခဲလၢာ်တဖၣ်န့ၣ်လီၤ.