Read S'gaw Karen စံးထီၣ်ပတြၢၤ 78 Bible Online

စံးထီၣ်ပတြၢၤ 78 - S'gaw Karen bible

စံးထီၣ်ပတြၢၤ 78

¹ယပှၤဂီၢ်မုၢ်သ့ၣ်ဧၢ, ကနၣ်ယတၢ်သိၣ်လိသီလိ, ဒီးဒိကနၣ်ယထးခိၣ်အတၢ်ကတိၤန့ၣ်တက့ၢ်.

²ယကအဲးထီၣ်ယထးခိၣ်လၢတၢ်ကူၣ်သ့အတၢ်ကတိၤ, ဒီးယကစံၣ်တဲၤတဲလီၤတၢ်ကတိၤခူသူၣ်လၢပျၢၤတဖၣ်,

³လၢတၢ်ဂ့ၢ်တဖၣ်လၢပသ့ၣ်ညါဒီးနၢ်ဟူတ့ၢ်, လၢပပၢ်သ့ၣ်တဖၣ်တဲဘၣ်တ့ၢ်ပှၤန့ၣ်လီၤ.

⁴ပတပာ်တဒၢတၢ်သ့ၣ်တဖၣ်န့ၣ်လၢပဖိတဖၣ်ဘၣ်. ပကတဲဘၣ်ပှၤလၢခံတစိၤ လၢယွၤအတၢ်မၤအဒိၣ်အမုၢ်တဖၣ် ဒီးအစိအကမီၤ, ဒီးအတၢ်မၤလီၤလးတဖၣ်လၢအမၤတ့ၢ်ဝဲန့ၣ်လီၤ.

⁵အဝဲဟ့ၣ်လီၤတၢ်သိၣ်တၢ်သီတဖၣ်ဆူ အံၣ်စရ့လးအပှၤဂီၢ်မုၢ် ဒီးတၢ်မၤလိာ်တဖၣ်ဆူ ယၤကိာ်အစၢၤအသွဲၣ်န့ၣ်လီၤ. အဝဲသိၣ်လိတ့ၢ်လံပပၢ်သ့ၣ်တဖၣ်လၢ ကသိၣ်လိယွၤအတၢ်သိၣ်တၢ်သီ ဆူအဖိအလံၤတဖၣ်,

⁶ဒ်သိးပှၤလၢခံတစိၤကမၤလိတၢ်သ့ၣ်တဖၣ်န့ၣ်, ဒီးမၤကဒီးတဆီအဝဲသ့ၣ်ကတဲက့ၤ အဖိအလံၤတဖၣ်န့ၣ်လီၤ.

⁷လၢကျဲဒ်အံၤ, အဝဲသ့ၣ်စ့ၢ်ကီးကသန့ၤအသးလၢကစၢ်ယွၤအပူၤ, ဒီးတသးပ့ၤနီၣ်တၢ်လၢယွၤမၤတ့ၢ်ဝဲတဖၣ်န့ၣ်ဘၣ်. မ့မ့ၢ်အဝဲသ့ၣ်ကစူၢ်ယွၤအတၢ်မၤလိာ်တဖၣ် ထီဘိန့ၣ်လီၤ.

⁸အဝဲသ့ၣ်တမ့ၢ်ကလီၤဂာ်ဒီးအပၢ်သ့ၣ်တဖၣ် လၢအပူထီၣ်တၢ်ဒီးအတၢ်ဒိကနၣ်တအိၣ်, ပှၤတစိၤလၢအတၢ်နာ်ယွၤတဂၢၢ်တကျၢၤ, ဒီးတအိၣ်လၢၤလၢတၢ်သးတီဒီးယွၤန့ၣ်ဘၣ်လီၤ.

⁹ပှၤအ့ဖရဲၣ်ဖိလၢအအိၣ်ဒီးစုကဝဲၤ လၢအမ့ၢ်ချံၣ်တဖၣ်ဒီးပျၢ်တဖၣ်န့ၣ် ဃ့ၢ်ကွံာ်ဝဲလၢတၢ်ဒုးသုးအမုၢ်တနံၤန့ၣ်လီၤ.

¹⁰အဝဲသ့ၣ်တတိၢ်န့ၢ်ကစၢ်ယွၤ အတၢ်အၢၣ်လီၤအီလီၤဘၣ်, မ့မ့ၢ်သမၢဝဲလၢကလဲၤတၢ်ဒ် ယွၤအတၢ်သိၣ်တၢ်သီအသိးန့ၣ်လီၤ.

¹¹အဝဲသ့ၣ်သးပ့ၤနီၣ်တၢ်လၢယွၤမၤတ့ၢ်ဝဲ ဒီးတၢ်လီၤလးတဖၣ်လၢ အဒုးနဲၣ်တ့ၢ်အဝဲသ့ၣ်န့ၣ်လီၤ.

¹²လၢအပၢ်တဖၣ်အမဲာ်ညါန့ၣ်, ကစၢ်ယွၤမၤတၢ်လီၤလးတဖၣ် လၢကီၢ်အဲၤကူပတူးအပူၤ, ဒီးစိၤဧၣ်အပျီပူၤန့ၣ်လီၤ.

¹³အဝဲဒၣ်မၤသ့ၣ်ဖးပီၣ်လဲၣ်, ဒီးဒုးလဲၤခီဂာ်အဝဲသ့ၣ်, ဒီးပာ်ဆၢထၢၣ်ထံဒ်တၢ်ဒူၣ်အသိးန့ၣ်လီၤ.

¹⁴လၢမုၢ်ဆါယွၤဆှၢအဝဲသ့ၣ်လၢတၢ်အၢၣ်, ဒီးသီတနၤကျၢၤလၢမ့ၣ်အူအတၢ်ကပီၤန့ၣ်လီၤ.

¹⁵အဝဲဒၣ်မၤသ့ၣ်ဖးလၢၢ်တဖၣ်လၢပှၢ်မုၢ်ကနၢ ဒီးဒုးအီအဝဲသ့ၣ်လၢထံလၢလၢပှဲၤပှဲၤ ဒ်လၢထံယိာ်ပူၤအသိးန့ၣ်လီၤ.

¹⁶ဒီးအဝဲဒၣ်ဒုးဟဲထီၣ်ထံထီၣ်ပၢၢ်လၢလၢၢ်ပူၤ, ဒီးဒုးယွၤလီၤထံဒ်ထံကျိတကျိအသိးန့ၣ်လီၤ.

¹⁷ဘၣ်ဆၣ်အဝဲသ့ၣ်မၤကမၣ်တၢ်ထီဒါကစၢ်ယွၤအါထီၣ် ဒီးပူထီၣ်တၢ်ထီကတၢၢ်တဂၤလၢ မဲးမုၢ်ခိၣ်အပူၤန့ၣ်လီၤ.

¹⁸အဝဲသ့ၣ်မၤကွၢ်ကစၢ်ယွၤလၢအသးကံၢ်ပူၤ ခီဖျိဃ့တၢ်အီၣ်လၢအသးကွံဝဲဒၣ်န့ၣ်လီၤ.

¹⁹အဝဲသ့ၣ်ကတိၤတၢ်ထီဒါကစၢ်ယွၤ, ဒီးစံးဝဲ, “ကစၢ်ယွၤကတဲာ်ကတီၤစီၢ်နီၤခိၣ်လၢ ပှၢ်မုၢ်ကနၢဘၣ်ကသ့ဧါ,

²⁰အဝဲတီၢ်လၢၢ်တဖျၢၣ်, ဒီးထံဖျိးထီၣ်ဒီးယွၤလီၤလုၣ်ဘၢတၢ်လံ. ဘၣ်ဆၣ်ဟ့ၣ်လီၤကိၣ်မ့တမ့ၢ်, ကတဲာ်ကတီၤတၢ်ညၣ်လၢအပှၤဂီၢ်မုၢ်အဂီၢ် ဘၣ်ကသ့ဧါ.” န့ၣ်လီၤ.

²¹လၢတၢ်န့ၣ်အဃိ, တုၤကစၢ်ယွၤနၢ်ဟူဝဲဒၣ်န့ၣ်ဒီးအဝဲပှဲၤဒီးတၢ်သးထီၣ်, ထီဒါယၤကိာ်ဒ် မ့ၣ်အူအီၣ်တၢ်အသိး ဒီးအသးကဲၤထီၣ်ထီဒါအံၣ်စရ့လးလီၤ.

²²အဂ့ၢ်ဒ်အံၤ, အဝဲသ့ၣ်တအိၣ်ဒီးတၢ်နာ်လၢယွၤအပူၤနီတစဲးဘၣ်, ဒီးတနာ်ယွၤအတၢ်အုၣ်က့ၤခီၣ်က့ၤ အစိအကမီၤန့ၣ်ဘၣ်.

²³အန့ၣ်ဒၣ်လဲာ်ယွၤမၤလိာ်တၢ်အၢၣ်တဖၣ်လၢထးခီ ဒီးအိးထီၣ်မူခိၣ်အတြဲၤ,

²⁴ဒီးဒုးဟဲစူၤမၤနၤလၢအဖီခိၣ်လၢကအီၣ်ဝဲ, ဒီးဟ့ၣ်လီၤအဝဲသ့ၣ်မူခိၣ်အဘုအဟုတဖၣ်လီၤ.

²⁵ဒီးအဝဲသ့ၣ် အီၣ်ကလူးတဖၣ်အတၢ်အီၣ်, ဒီးကစၢ်ယွၤဟ့ၣ်လီၤအဝဲသ့ၣ်တၢ်အီၣ် လၢလၢပှဲၤပှဲၤန့ၣ်လီၤ.

²⁶အဝဲဒုးအူကလံၤမုၢ်ထီၣ်လၢမူခိၣ် ဒီးလၢအစိအကမီၤန့ၣ် ဒုးအူထီၣ်ကလံၤလၢကလံၤထံးန့ၣ်လီၤ.

²⁷အဝဲဒုးဟဲစူၤလီၤတၢ်ညၣ်လၢအဝဲသ့ၣ်အဖီခိၣ် ဒ်ဟီၣ်ခိၣ်အကမူၣ်အသိး, ဒီးထိၣ်အိၣ်ဒီးအဒံးဆ့, ဒ်ပီၣ်လဲၣ်အမဲးအသိးန့ၣ်လီၤ.

²⁸အဝဲဒုးဟဲလီၤတၢ်သ့ၣ်တဖၣ်န့ၣ် လၢအသူၣ်ဒဲအလီၢ်အသးကံၢ်ပူၤ, ဝးတရံးအဝဲသ့ၣ် အတၢ်အိၣ်တၢ်ဆိးအလီၢ်န့ၣ်လီၤ.

²⁹အဝဲသ့ၣ်အီၣ်ဝဲ, ဒီးအီဝဲဘျဲးအီၣ်ဘျဲးအီန့ၣ်လီၤ. အဂ့ၢ်ဒ်အံၤကစၢ်ယွၤဟ့ၣ်လီၤအဝဲသ့ၣ်လၢ တၢ်လၢအသးကွံဝဲဒၣ်န့ၣ်လီၤ.

³⁰ဘၣ်ဆၣ်အဝဲသ့ၣ်အသးတမံဒံးဘၣ် လၢအတၢ်သးကွံအဃိအီၣ်ဒံးဝဲ,

³¹ဒီးတုၤကစၢ်ယွၤအသးထီၣ်အဝဲသ့ၣ်န့ၣ် ဒီးမၤသံကွံာ်အပှၤဆူၣ်ကတၢၢ်တဖၣ်, အံၣ်စရ့လးအပှၤသးစၢ်လၢ အဂ့ၤကတၢၢ်တဖၣ်န့ၣ်လီၤ.

³²လၢတၢ်အံၤတဖၣ်ခဲလၢာ်အဃိဒၣ်လဲာ် အဝဲသ့ၣ်မၤဒံးတၢ်ဒဲးဘး, ဒီးလၢယွၤမၤလီၤလးတဖၣ်အဃိဒၣ်လဲာ် အဝဲသ့ၣ်တနာ်ဘၣ်အီၤဘၣ်.

³³မၤသးဒ်န့ၣ်ဒီး, အဝဲမၤလၢာ်ကွံာ်အဝဲသ့ၣ်အမုၢ်နံၤတဖၣ် လၢတၢ်ကလီကလီအပူၤ, ဒီးအနံၣ်အလါတဖၣ်လၢတၢ်ကိၢ်တၢ်ဂီၤအပူၤလီၤ.

³⁴တုၤယွၤမၤသံအဝဲသ့ၣ်တနီၤဒီးအဝဲသ့ၣ်ဃုအီၤ, ဒီးပီၢ်ယၢ်လီၤက့ၤအသးဒီးဃုယွၤလၢ တၢ်သူၣ်ဆူၣ်သးဆူၣ်အပူၤလီၤ.

³⁵ဒီးအဝဲသ့ၣ်, သ့ၣ်နီၣ်ထီၣ်က့ၤလၢကစၢ်ယွၤမ့ၢ်အလၢၢ်, ဒီးတၢ်ထီကတၢၢ်ကစၢ်တဂၤန့ၣ်မ့ၢ် ကစၢ်လၢအပှ့ၤက့ၤအီၤန့ၣ်လီၤ.

³⁶ဘၣ်ဆၣ်ဒီးအဝဲသ့ၣ်လီန့ၢ်အီၤလၢအထးခိၣ်, ဒီးကတိၤကဘျံးကဘျၣ်တၢ်ဒီးအီၤလၢအပျ့ၤန့ၣ်လီၤ.

³⁷အဝဲသ့ၣ်အသးတအိၣ်ဂၢၢ်ကျၢၤဘၣ်ဒီးအီၤဘၣ်, ဒီးတတီဒီးအတၢ်အၢၣ်လီၤဒီးယွၤန့ၣ်ဘၣ်.

³⁸ဘၣ်ဆၣ်ကစၢ်ယွၤသူၣ်ကညီၤသးကညီၤအပှၤဂီၢ်မုၢ်လီၤ. အဝဲပျၢ်ကွံာ်အဝဲသ့ၣ်အတၢ်ဒဲးဘး ဒီးအဝဲဘိးဃၣ်ကွံာ်အတၢ်သးထီၣ်အါစုအါဘျီ ဒီးဘိးဃၣ်ကွံာ်အတၢ်သးဒိၣ်လီၤ. ဒီးတထိၣ်ဂဲၤထီၣ်အတၢ်သးကဲၤထီၣ်ဘၣ်.

³⁹အဝဲသ့ၣ်နီၣ်ထီၣ်က့ၤဝဲလၢ အဝဲသ့ၣ်တဖၣ်န့ၣ်မ့ၢ်တၢ်ဖံးတၢ်ညၣ်, လီၤဂာ်ဒီးကလံၤလၢအလဲၤပူၤကွံာ်ဒီး တဟဲကဒါက့ၤလၢၤဘၣ်န့ၣ်လီၤ.

⁴⁰အဝဲသ့ၣ်တဖၣ်န့ၣ်ပူထီၣ်အီၤ ဒီးမၤဆါအသးလၢပှၢ်မုၢ်ကနၢအပူၤပှဲၤဘျီလဲၣ်.

⁴¹အဝဲသ့ၣ်လ့ပစီကစၢ်ယွၤတဘျီဝံၤတဘျီဒီး မၤသးဒိၣ်ထီၣ်အံၣ်စရ့လးအကစၢ်ယွၤစီဆှံ တဂၤန့ၣ်လီၤ.

⁴²အဝဲသ့ၣ်သးပ့ၤနီၣ်ကွံာ်အတၢ်စိတၢ်ကမီၤ, ဒီးမုၢ်တနံၤလၢအဝဲဒၣ်အုၣ်က့ၤခီၣ်က့ၤအဝဲသ့ၣ် လၢအဒုၣ်အဒါတဖၣ်အစုပူၤ,

⁴³ဒီးအမၤတၢ်အဒိၣ်ဒီးတၢ်ပနီၣ်လီၤလးတဖၣ် လၢကီၢ်အဲၤကူပတူးအပူၤဒီး လၢစိၤဧၣ်အပျီပူၤန့ၣ်လီၤ.

⁴⁴အဝဲဒုးကဲထီၣ်ကဒါထံကျိတဖၣ်ဆူတၢ်သွံၣ် ဒီးပှၤအဲၣ်ကူပတူးဖိတဖၣ် တအိၣ်ဒီးထံလၢကအီဝဲနီတစဲးဘၣ်.

⁴⁵အဝဲဆှၢလီၤသၣ်ဘုလါတဖၣ်လၢ အဝဲသ့ၣ်အကျါဒ်သိးကမၤဆါဒီး မၤနးမၤဖှီၣ်အီၤ ဒီးဒ့ၣ်တဖၣ်လၢ အမၤဟးဂီၤကွံာ်အဝဲသ့ၣ်အထံအကီၢ်န့ၣ်လီၤ.

⁴⁶အဝဲဆှၢလီၤဒွဲၣ်တဖၣ်လၢ ကအီၣ်ကွံာ်အတၢ်မုၢ် တၢ်ဘိတဖၣ်ဒီး မၤဟးဂီၤအစံၣ်ပျီတဖၣ်န့ၣ်လီၤ.

⁴⁷အဝဲမၤသံကွံာ်အဝဲသ့ၣ်အစပံးမုၢ်တဖၣ်လၢသူၣ် ဒီးအချၢၣ်ဒၢတဖၣ်လၢ နါဝာ်န့ၣ်လီၤ.

⁴⁸အဝဲမၤသံကွံာ်အဝဲသ့ၣ်အဂီၤဘုၣ်ဂီၤဖံးလၢသူၣ်ဒီး အသိအဖုအဂီၢ်တဖၣ်လၢ လီဝၢ်ဒံးန့ၣ်လီၤ.

⁴⁹အဝဲဒုးလီၤဘၣ်တၢ်ကိၢ်တၢ်ဂီၤဖးဒိၣ်လၢ အဝဲသ့ၣ်အလိၤခီဖျိလူလီၤအတၢ်သးဒိၣ်ဒီး အတၢ်သးကဲၤထီၣ်လၢ အဟဲဒ်တၢ်သံအကလူးတဖၣ်အသိးန့ၣ်လီၤ.

⁵⁰အဝဲတြီဃာ်အတၢ်သးဒိၣ် ဒီးတပျၢ်ဖျဲးအဝဲသ့ၣ်အသးသမူဘၣ် မ့မ့ၢ်မၤသံအဝဲသ့ၣ်လၢတၢ်သံသတြိာ်န့ၣ်လီၤ.

⁵¹အဝဲမၤသံကယဲၢ်ဖိခွါဝဲၢ်ကိတဖၣ်လၢ ကီၢ်အဲၤကူပတူးအဟံၣ်ဖိဃီဖိအကျါန့ၣ်လီၤ.

⁵²အန့ၣ်ဒီး အဝဲဆှၢထီၣ်အပှၤဂီၢ်မုၢ် ဒ်ပှၤကွၢ်သိတဂၤအသိး ဒီးဆှၢခီဖျိအီၤလၢ ပှၢ်မုၢ်ကနၢန့ၣ်လီၤ.

⁵³အဝဲဆှၢအဝဲသ့ၣ်လၢတၢ်ပူၤဖျဲးအပူၤဒ်သိး အသုတပျံၤတၢ်တဂ့ၤ, အဂီၢ်န့ၣ်လီၤ. မ့မ့ၢ်အဒုၣ်အဒါတဖၣ်န့ၣ် ပီၣ်လဲၣ်လုၣ်ဘၢကွံာ်အီၤလီၤ.

⁵⁴ဒီးအဝဲဒုးဟဲအဝဲသ့ၣ်ဆူအလီၢ်စီဆှံ, ဆူကစၢၢ်တဖၣ်လၢအစုထွဲမၤနၢၤတ့ၢ်တၢ်န့ၣ်လီၤ.

⁵⁵အဝဲဟီထီၣ်ကွံာ်ပှၤကလုာ်တဖၣ်လၢအပှၤဂီၢ်မုၢ် အမဲာ်ညါ ဒီးနီၤလီၤအထံအကီၢ်ဆူ အပှၤဂီၢ်မုၢ်ဒ် တၢ်န့ၢ်သါအသိးလၢအဝဲသ့ၣ်အဂီၢ်, ဒီးဒုးအိၣ်ဒုးဆိးအံၣ်စရ့လးအဒူၣ်တဖၣ် လၢအဝဲသ့ၣ်အဟံၣ်ပူၤန့ၣ်လီၤ.

⁵⁶နာ်သက့အဝဲသ့ၣ်လ့ပစီ ဒီးပူထီၣ်တၢ်ထီကတၢၢ်ကစၢ်ယွၤ, ဒီးတတိၢ်န့ၢ်အတၢ်မၤလိာ်ဘၣ်.

⁵⁷မ့မ့ၢ်အဝဲသ့ၣ်ပူထီၣ်လီထီၣ်တၢ်ဒီး အသးတတီဘၣ်ဒ် အမိၢ်ပၢ်ဖံဖုလၢပျၢၤတဖၣ်အသိးဒီး တၢ်နာ်န့ၢ်အီၤတသ့ဘၣ်ဒ်သိးဒၣ်ပျၢ်လၢ အက့ၣ်အဘိန့ၣ်လီၤ.

⁵⁸အဂ့ၢ်ဒ်အံၤ, အဝဲသ့ၣ်မၤသးထီၣ်ယွၤလၢပှၤတဘူၣ်ထီၣ်ဘါထီၣ် ယွၤအတၢ်လီၢ်ထီၣ်ထီ ယွၤအတၢ်ဘူၣ်တၢ်ဘါအလီၢ်တဖၣ်, ဒီးထိၣ်ဂဲၤအတၢ်သးဒိၣ်လၢ အတၢ်ဂီၤတၢ်ဖီၣ်တဖၣ်န့ၣ်လီၤ.

⁵⁹ကစၢ်ယွၤအသးထီၣ်ဝဲဖဲအထံၣ်တၢ်အံၤန့ၣ်လီၤ. လၢတၢ်န့ၣ်အဃိအဝဲပာ်တ့ၢ်ကွံာ် အပှၤဂီၢ်မုၢ်လၢာ်လၢာ်ဆ့ဆ့န့ၣ်လီၤ.

⁶⁰အဝဲလဲၤသဒၣ်ကွံာ် အတၢ်အိၣ်တၢ်ဆိးအလီၢ်လၢၡံလိၤ, ဒဲလၢအဝဲအိၣ်ဝဲလၢပှၤကညီအကျါန့ၣ်လီၤ.

⁶¹အဝဲပျဲပဒုၣ်ပဒါစိာ်ကွံာ်တၢ်အၢၣ်လီၤအီလီၤ အတလါစီဆှံ, အစိကမီၤဒီးအလၤကပီၤအပနီၣ်န့ၣ်လီၤ.

⁶²အဝဲအသးထီၣ်အပှၤဂီၢ်မုၢ်ဒၣ်ဝဲ ဒီးပျဲအဝဲသ့ၣ်ဘၣ်တၢ်မၤသံအီၤလၢ အဒုၣ်အဒါတဖၣ်န့ၣ်လီၤ.

⁶³ပှၤဖိၣ်သၣ်ခွါတဖၣ်ဘၣ်တၢ်မၤသံကွံာ်အီၤ လၢတၢ်ဒုးအပူၤ, ဒီးပိာ်မုၣ်သးစၢ်သ့ၣ်တဖၣ်ကဖျီအသးဒီး ပှၤတအိၣ်နီတဂၤလၢၤဘၣ်.

⁶⁴အပှၤလုၢ်တၢ်အခိၣ်တဖၣ်ဘၣ်တၢ်မၤသံအီၤလၢနး ဒီးအမုၣ်ကမဲတဖၣ်, တၢ်တပျဲအဟီၣ်တၢ်ယၢၤတၢ်ဘၣ်.

⁶⁵အန့ၣ်ဒီးယွၤဖုသံနီၣ်ထီၣ်ဒ်ပှၤလၢအမံအသိး, ဒီးဒ်ပှၤဂံၢ်ဆူၣ်ဘါဆူၣ်လၢအကိးပသူထီၣ်လၢ စပံးထံအဃိအသိးန့ၣ်လီၤ.

⁶⁶အဝဲနီၣ်ကဒါက့ၤအဒုၣ်အဒါတဖၣ် လၢတၢ်မဲာ်ဆှးအတၢ်ဃၣ်ကွံာ်လီၤထူလီၤယိာ်န့ၣ်လီၤ.

⁶⁷ဘၣ်ဆၣ်ဒီးအဝဲညိကွံာ်စီၤယိၤသးအစၢၤအသွဲၣ်တဖၣ် ဒီးတဃုထၢဘၣ်အ့ဖရဲၣ်အဒူၣ်ဘၣ်.

⁶⁸အခိၣ်တလိာ်အဝဲဃုထၢဝဲယူဒၤအဒူၣ်, ဒီးကစၢၢ်စံယိၣ်လၢအအဲၣ်ဝဲဒိၣ်မးန့ၣ်လီၤ.

⁶⁹ဖဲန့ၣ်အဝဲဘှီထီၣ်အတၢ်လုၢ်ဟံၣ် ဒ်အဟံၣ်လၢမူခိၣ်အသိး, မၤကျၢၤအီၤဒ်ဟီၣ်ခိၣ်လၢ အအိၣ်ဂၢၢ်ကျၢၤ အစိၤစိၤဃၣ်ဃၣ်န့ၣ်လီၤ.

⁷⁰အဝဲဃုထၢအခ့အပှၤစီၤဒၤဝံး, ဒီးဟံးန့ၢ်အီၤလၢသိကရၢၢ်အပူၤ,

⁷¹ဖဲအကွၢ်ထွဲအသိအဖုအဂီၢ်တဖၣ် ဒီးဒုးကဲထီၣ်အီၤလၢ အံၣ်စရ့လးအစီၤပၤ, ကစၢ်ယွၤအပှၤဂီၢ်မုၢ်အပှၤကွၢ်သိန့ၣ်လီၤ.

⁷²ဒီးစီၤဒၤဝံးကွၢ်ထွဲအဝဲသ့ၣ်လၢအသးဒီဖျၢၣ်ညါ ဒီးဆှၢအဝဲသ့ၣ်လၢတၢ်ကူၣ်ဘၣ်ကူၣ်သ့အပူၤလီၤ.