Read S'gaw Karen စံးထီၣ်ပတြၢၤ 84 Bible Online

စံးထီၣ်ပတြၢၤ 84 - S'gaw Karen bible

စံးထီၣ်ပတြၢၤ 84

¹တၢ်သုးမုၢ်ဂီၢ်မုၢ်အယွၤဧၢ, နတၢ်အိၣ်တၢ်ဆိးအလီၢ်အံၤ ယအဲၣ်ယကွံအီၤဆံးဒိၣ်လဲၣ်.

²ယသးဆၢလဲၤဘၣ်ဆူယွၤအဂၢၤတဖၣ်အပူၤ, တုၤယလီၤဘှါဝဲဒၣ်န့ၣ်လီၤ. ယသးဒီးယညၣ်သးဝံၣ်တၢ်လၢတၢ်သူၣ်ခုသးခု ဆူကစၢ်ယွၤလၢအမူဝဲတဂၤအအိၣ်န့ၣ်လီၤ.

³ယွၤ, သ့တၢ်လၢာ်ကစၢ်, ယစီၤပၤဒီးယကစၢ်ယွၤဧၢ, မ့ၢ်မးထိၣ်ဖှံးဖိတဖၣ်ဘှီထီၣ်အဟံၣ်ဒီး ထိၣ်ဘျ့ၣ်ဘျီၣ်တဖၣ်အိၣ်ဒီးအသွံလၢအဂီၢ်ဒၣ်ဝဲ လၢအကပာ်လီၤအဖိလၢ လၢတၢ်လုၢ်လီၢ်တဖၣ်အကပၤဒၣ်လဲာ်လီၤ.

⁴ပှၤလၢအအိၣ်ဝဲဆိးဝဲလၢနတၢ်လုၢ်ဟံၣ်ပူၤဒီး ထီဘိသးဝံၣ်စံးထီၣ်ပတြၢၤနၤန့ၣ် ဘၣ်ဆိၣ်ဂ့ၤဝဲလီၤ. စ့လၤ

⁵ပှၤလၢအဂံၢ်အဘါအိၣ်လၢနပူၤ, ဒီးအသးဆူၣ်လဲၤဆူၣ်တၢ်ဘါတၢ်လၢ ကစၢၢ်စံယိၣ်န့ၣ် ဘၣ်ဆိၣ်ဂ့ၤဝဲလီၤ.

⁶ဖဲအဝဲသ့ၣ်လဲၤခီဂာ်မဲာ်ထံအကစၢၢ်ကဆူး တြီၤလၢအဃ့ထီန့ၣ်, တၢ်လီၢ်န့ၣ် ကဲထီၣ်ထံထီၣ်ပၢၢ်တဖၣ်လီၤ. တၢ်ဟဲစူၤဆိမၤပှဲၤတၢ်လီၢ်န့ၣ် ဒီးကမါတဖၣ်လီၤ.

⁷အဝဲသ့ၣ်တဖၣ်န့ၣ်ဒံးလဲၤတၢ်, အဂံၢ်အဘါဒံးဆူၣ်ထီၣ် ဒီးအဝဲသ့ၣ်ကထံၣ်ဘၣ်ကစၢ်တဖၣ် အကစၢ်ယွၤ လၢစံယိၣ်န့ၣ်လီၤ.

⁸ယွၤ, သ့တၢ်လၢာ်အကစၢ်ယွၤဧၢ, ဒိကနၣ်ယဘါထုကဖၣ်တၢ်တက့ၢ်. စီၤယၤကိာ်အကစၢ်ယွၤဧၢ, ဒိကနၣ်လၢ်တက့ၢ်. စ့လၤ

⁹ကစၢ်ယွၤဧၢ, ဆိၣ်ဂ့ၤပစီၤပၤ စီၤပၤတဂၤလၢ နဃုထၢတ့ၢ်အီၤန့ၣ်တက့ၢ်.

¹⁰အဂ့ၢ်ဒ်အံၤ, ပအိၣ်ပဆိးလၢနဂၢၤတဖၣ်အပူၤတနံၤန့ၣ်, ဂ့ၤန့ၢ်ပအိၣ်ပဆိးလၢတၢ်လီၢ်အဂၤ အနံၤတကထိတက့ၢ်လီၤ. ယဃုထၢတၢ်ပၢၤကျဲစၢၤအလီၢ်လၢ ယကစၢ်ယွၤအဟံၣ်ပူၤန့ၣ် ဂ့ၤဒိၣ်န့ၢ် ယအိၣ်ယဆိးလၢပှၤတတီတလိၤ အဟံၣ်တဖၣ်အပူၤတက့ၢ်လီၤ.

¹¹အဂ့ၢ်ဒ်အံၤ, ယွၤ, ကစၢ်ယွၤန့ၣ်မ့ၢ်မုၢ်, ဒီးကတီၤတဘ့ၣ်လီၤ. အဝဲဟ့ၣ်လီၤတၢ်ဘျုးတၢ်ဖှိၣ်ဒီး တၢ်လၤတၢ်ကပီၤလီၤ. တတြီဘၣ်တၢ်ဂ့ၤလၢပှၤလဲၤတၢ် တီတီလိၤလိၤတဖၣ်န့ၣ်နီတမံၤဘၣ်.

¹²ယွၤ, သ့တၢ်လၢာ်ကစၢ်ဧၢ, ပှၤလၢအသန့ၤအသးလၢနၤန့ၣ် ဘၣ်ဆိၣ်ဂ့ၤဝဲလီၤ.