Read S'gaw Karen စံးထီၣ်ပတြၢၤ 89 Bible Online

စံးထီၣ်ပတြၢၤ 89 - S'gaw Karen bible

စံးထီၣ်ပတြၢၤ 89

¹ယွၤဧၢ, ယကသးဝံၣ်ထီၣ်နတၢ်အဲၣ်ဂၢၢ်ကျၢၤ လီၤထူလီၤယိာ်, ယကဘိးဘၣ်သ့ၣ်ညါနတၢ်သူၣ်တီသးလိၤလၢ ကယဲၢ်စိၤခဲလၢာ်လၢယထးခိၣ်လီၤ.

²အဂ့ၢ်ဒ်အံၤ, နတၢ်အဲၣ်ဂၢၢ်ကျၢၤအိၣ်ဝဲ အစိၤစိၤအဃၣ်ဃၣ်ဒီး နတၢ်သူၣ်တီသးလိၤအိၣ်ဂၢၢ်ဆိးကျၢၤဝဲဒ် မူခိၣ်အသိးလီၤ.

³နစံးတ့ၢ်နဲ, “ယမၤတ့ၢ်တၢ်အၢၣ်လီၤဒီးယပှၤဃုထၢဖိတဂၤ, ယဆိၣ်တၢ်ဒီးယခ့ယပှၤစီၤဒၤဝံးလၢ,

⁴အစၢၤအသွဲၣ်တဂၤကမ့ၢ်စီၤပၤ ထီဘိတထံၣ်ဃီဒီး ယကဒုးအိၣ်ဂၢၢ်ကျၢၤအဘီအမုၢ် အစိၤစိၤအဃၣ်ဃၣ်န့ၣ်လီၤ. ” စ့လၤ

⁵ယွၤဧၢ, မ်မူခိၣ်စံးထီၣ်ပတြၢၤနတၢ်မၤလီၤလးဒီး နတၢ်သူၣ်တီသးလိၤလၢ ပှၤစီဆှံအတၢ်အိၣ်ဖှိၣ်ရိဖှိၣ်အပူၤတက့ၢ်.

⁶အဂ့ၢ်ဒ်အံၤ, မ့ၢ်မတၤအိၣ်လၢမူခိၣ်လၢပက ထိၣ်သတြီၤအီၤဒီးယွၤန့ၣ်လဲၣ်. လၢပှၤမူခိၣ်ဖိတဖၣ်အကျါန့ၣ်, မ့ၢ်မတၤလီၤဂာ်ဒီးယွၤန့ၣ်လဲၣ်.

⁷ယွၤမ့ၢ်တၢ်ပျံၤအလီၢ်လၢပှၤစီဆှံအတၢ်အိၣ်ဖှိၣ်အပူၤ, ဒီးအဝဲသ့ၣ်ခဲလၢာ် ကဆၢထၢၣ်လၢတၢ်ယူးယီၣ် ဒီးတၢ်ပျံၤတၢ်ဖုးအပူၤလီၤ.

⁸ယွၤ, သ့တၢ်လၢာ်အကစၢ်ယွၤဧၢ, မ့ၢ်မတၤအိၣ်ဒီးအစိအကမီၤဒ်နၤအသိးတဂၤလဲၣ်, ယွၤဧၢ, နတၢ်သူၣ်တီသးလိၤအိၣ်ဝးတရံးနၤလီၤ.

⁹နပၢပီၣ်လဲၣ်အလပီမုၢ်ဒိၣ် နဒုးအိၣ်ဂၢၢ်အလၢတဖၣ်ဖဲအဟဲထီၣ်န့ၣ်လီၤ.

¹⁰နမၤလီၤသဘှံးတၢ်မုၢ်ဃၢ်ရၤဃး ဒီးမၤသံကွံာ်အီၤဒီး လၢနဂံၢ်ဆူၣ်ဘါဆူၣ်န့ၣ်, နမၤဃၣ်ကွံာ်နဒုၣ်နဒါတဖၣ်လီၤ.

¹¹မူခိၣ်မ့ၢ်နတၢ်, ဟီၣ်ခိၣ်စ့ၢ်ကီးမ့ၢ်နတၢ်, ဟီၣ်ခိၣ်ဒီးတၢ်လၢအအိၣ်လၢအပူၤခဲလၢာ်န့ၣ် နပာ်လီၤအခီၣ်ထံးလီၤ.

¹²နတ့လီၤကယဲၢ်တၢ်အိၣ်လၢကလံၤစိးဒီးကလံၤထံး, ဒီးကစၢၢ်တၤဘိၢ်ဒီးကစၢၢ်ဃ့ရမိၣ်န့ၣ် စံးထီၣ်ပတြၢၤနမံၤလၢတၢ်သးခုအပူၤလီၤ.

¹³နအိၣ်ဒီးနစုဒုၣ်လၢအဂံၢ်ဆူၣ်ဘါဆူၣ်, နစုန့ၣ်ဆူၣ်ဝဲဒီးနစုထွဲအိၣ်ထီၣ်ထီလီၤ.

¹⁴တၢ်တီတၢ်လိၤဒီးတၢ်စံၣ်ညီၣ်တီန့ၣ် မ့ၢ်နလီၢ်ပစိာ်အခီၣ်ထံးလီၤ. တၢ်အဲၣ်ဂၢၢ်ကျၢၤဒီးတၢ်သူၣ်တီသးလိၤ လဲၤတၢ်လၢနမဲာ်ညါလီၤ.

¹⁵ပှၤဂီၢ်မုၢ်လၢအဘါထီၣ်နၤ အိၣ်ဒီးတၢ်သးဝံၣ်တဖၣ်, လၢအအိၣ်လၢနတၢ်သးကညီၤအတၢ်ကပီၤ အပူၤန့ၣ်ဘၣ်ဆိၣ်ဂ့ၤဝဲလီၤ.

¹⁶လၢနဃိန့ၣ် အဝဲသ့ၣ်သးခုဒီ တနံၤညါဒီး စံးထီၣ်ပတြၢၤနၤလၢ နတၢ်ဂ့ၤတၢ်ဝါအဃိလီၤ.

¹⁷နဟ့ၣ်ပှၤလၢ တၢ်မၤနၢၤဖးဒိၣ်တဖၣ် ဒီးလၢနတၢ်အဲၣ်အပူၤန့ၣ် နဒုးမၤနၢၤပှၤတၢ်န့ၣ်လီၤ.

¹⁸နဲဒၣ်ယွၤဧၢ, နဃုထၢပှၤ, ဒီဒၣ်အိၣ်ပှိၤပှၤ, နဲဒၣ်အံၣ်စရ့လးအကစၢ်ယွၤစီဆှံဧၢ, ဟ့ၣ်ပှၤပစီၤပၤတ က့ၢ်.

¹⁹လၢပျၢၤ, နကတိၤတၢ်ဒီးနပှၤတီပှၤလိၤတဖၣ်လၢ တၢ်ထံၣ်လၢညါခီအပူၤ, ဒီးနစံး, “ယဟ့ၣ်လီၤလံပှၤသုးဖိ မံၤဟူသၣ်ဖျါတဂၤလၢ တၢ်မၤစၢၤ, ယဟ့ၣ်လီၤလံလီၢ်ပစိာ်ဆူပှၤတဂၤ လၢယဃုထၢအီၤလၢ ပှၤဂီၤမုၢ်အကျါလံ.

²⁰ယထံၣ်န့ၢ်ယခ့ယပှၤစီၤဒၤဝံး, ယဖှူအီၤလၢယသိစီဆှံ,

²¹ဒ်သိးယစုကအိၣ်ဂၢၢ်ဆိးကျၢၤဒီးအီၤထီဘိ, ဒီးယစုဒုၣ်ကဒုးဆူၣ်ထီၣ်အီၤစ့ၢ်ကီးန့ၣ်လီၤ.

²²အဒုၣ်အဒါတမၤနၢၤအီၤနီတစုဘၣ်. ပှၤတတီတလိၤတမၤနးမၤဖှီၣ်အီၤဘၣ်.

²³ယကမၤဟးဂီၤအဒုၣ်အဒါလၢအမဲာ်ညါ ဒီးယကမၤလီၤဃံၤပှၤလၢအသးဟ့အီၤလီၤ.

²⁴ယတၢ်သူၣ်တီသးလိၤ ဒီးယတၢ်အဲၣ်ဂၢၢ်ကျၢၤကအိၣ်ဒီးအီၤ ယကဟ့ၣ်အီၤတၢ်မၤနၢၤထီဘိလီၤ.

²⁵ယကမၤလဲၢ်ထီၣ်အဘီအမုၢ်, စးထီၣ်လၢပီၣ်လဲၣ်ဖးဒိၣ် မဲးဒံးထၢၣ်ရ့နယၢၣ်ဒီး တုၤလၢထံကျိဖရၤသးန့ၣ်လီၤ.

²⁶အဝဲဒၣ်ကကိးထီၣ်ဆူယအိၣ် “နဲဒၣ်အံၤနမ့ၢ်ယပၢ်, ယကစၢ်ယွၤ, ဒီးတၢ်အုၣ်က့ၤခီၣ်က့ၤယၤအလၢၢ်လီၤ.”

²⁷ဒီးယကပာ်အီၤလၢယဖိခွါဝဲၢ်ကိ, ပှၤအဒိၣ်ကတၢၢ်လၢ စီၤပၤခဲလၢာ်အကျါန့ၣ်လီၤ.

²⁸ယကပၢၤဃာ်ယတၢ်အဲၣ်ဂၢၢ်ကျၢၤလၢအဂီၢ် အစိၤစိၤအဃၣ်ဃၣ်, ဒီးယတၢ်အၢၣ်လီၤအီလီၤန့ၣ် ကအိၣ်ဂၢၢ်ဆိးကျၢၤလၢအဂီၢ်လီၤ.

²⁹အဝဲအစီၤပၤအစၢၤအသွဲၣ်အတၢ်ပၢဘၣ်န့ၣ် ကအိၣ်ဂၢၢ်ကျၢၤဝဲဒ်မူခိၣ်အသိး, ထီဘိအဝဲအစၢၤအသွဲၣ်တဂၤ ကကဲဘၣ်စီၤပၤန့ၣ်လီၤ.

³⁰ဘၣ်ဆၣ်အဖိတဖၣ်မ့ၢ်လဲၤသဒၣ်ယတၢ်သိၣ်တၢ်သီ, ဒီးတလဲၤတၢ်လၢယတၢ်စံၣ်ညီၣ်အပူၤ,

³¹မ့ၢ်လုၣ်သ့ၣ်ခါပတာ်ယတၢ်သိၣ်တၢ်သီဒီး မ့ၢ်တတိၢ်န့ၢ်ယတၢ်မၤလိာ်ဘၣ်န့ၣ်ဒီး

³²ယကသိၣ်ဃီၣ်အဝဲသ့ၣ်လၢနီၣ်တီၢ် လၢအတၢ်ကမၣ်အဃိ ဒီးအတၢ်အၢလၢတၢ်တီၢ်န့ၣ်လီၤ

³³ဘၣ်ဆၣ် ယတသုးကွံာ်ယတၢ်အဲၣ်ဂၢၢ်ကျၢၤလၢအီၤ, မ့တမ့ၢ်ယတပျဲဟးဂီၤယတၢ်သူၣ်တီသးလိၤန့ၣ်ဘၣ်.

³⁴ယတမၤဟးဂီၤဘၣ်ယတၢ်အၢၣ်လီၤအီလီၤ. မ့တမ့ၢ်ယတဟံးန့ၢ်က့ၤတၢ်ကတိၤလၢ အထီၣ်ဖျဲးလၢယထးခိၣ်န့ၣ်ဘၣ်.

³⁵ယဆိၣ်တၢ်ထဲတဘျီဒီး အဝံၤလၢ ယမံၤစီဆှံအပူၤ, ယတကတိၤဘၣ်တၢ်ကဘျံးကဘျၣ်ဒီး စီၤဒၤဝံးဘၣ်.

³⁶ထီဘိအဝဲကအိၣ်ဒီးအစၢၤအသွဲတဖၣ် ဒီးယကအံးလီၤကွၢ်လီၤအဘီအမုၢ် ယံာ်ဝဲထဲသိးမုၢ်အတၢ်ကပီၤအိၣ်ဝဲန့ၣ်လီၤ.

³⁷ဒ်လါအသိးန့ၣ်ကအိၣ်ဂၢၢ်ဆိးကျၢၤလီၤထူလီၤယိာ် ဒ်တၢ်အုၣ်အသးအတီလၢမူခိၣ်အသိးန့ၣ်လီၤ.” စ့လၤ

³⁸ဘၣ်ဆၣ်, ခဲအံၤနသးထီၣ်ဘၣ်ပှၤလၢနဖှူအီၤ, နလဲၤသဒၣ်ဒီးညိကွံာ်လံအီၤလံ.

³⁹နမၤဟးဂီၤနတၢ်အၢၣ်လီၤအီလီၤဒီးနခ့နပှၤ, ဒီးနတ့ၢ်လီၤကွံာ် အခိၣ်သလုးဆူ ကပံာ်ကျါလီၤ.

⁴⁰နမၤလီၤပှီၢ်ကွံာ်အဝ့ၢ်ခိၣ်ဒူတဖၣ်ခဲလၢာ် ဒီးနမၤဟးဂီၤတ့ၢ်လံအတိာ်ဧိၤတာ်ဧိၤန့ၣ်လံလီၤ.

⁴¹ကယဲၢ်ပှၤလၢအလဲၤခီဂာ်အီၤန့ၣ်ဂုာ်န့ၢ်အတၢ်ဒီး အဝဲကဲထီၣ်တ့ၢ်လံတၢ်ဒုၣ်ဒွဲၣ်အလီၢ်လၢ ပှၤလၢအဃၢၤတဖၣ်အဂီၢ်န့ၣ်လီၤ.

⁴²နပာ်ထီၣ်ထီပှၤထီဒါအီၤအစုထွဲ, နဒုးသးခုအဒုၣ်အဒါခဲလၢာ်လီၤ.

⁴³နဒုးကဲထီၣ်အစုကဝဲၤတဖၣ်ဆူ တၢ်ကလီကလီ ဒီးပျဲအဘၣ်တၢ်မၤဃၣ်အီၤလၢ တၢ်ဒုးအပူၤလီၤ.

⁴⁴နဟံးထီၣ်ကွံာ်အစီၤပၤအနီၣ်ထိး ဒီးနမၤလီၤဃံၤအလီၢ်ပစိာ်ပၢၢ်လၢဟီၣ်ခိၣ်လိၤလီၤ.

⁴⁵နဒုးဖျါပှၢ်အီၤန့ၢ်ဒံးအနံၣ်အလါ အမ့ၢ်အတီ ဒီးလုၣ်ဘၢအီၤဒီး တၢ်လီၤမဲာ်ဆှးန့ၣ်လီၤ. စ့လၤ

⁴⁶ဆံးယံာ်လဲၣ်, ယွၤဧၢ, မ့ၢ်နကပာ်တဒၢနသးလီၤထူလီၤယိာ်လီၤဧါ. မ့ၢ်နတၢ်သးထီၣ် ကအီၣ်တၢ်ဒ်မ့ၣ်အူအသိးဆံးယံာ်လဲၣ်.

⁴⁷ယွၤဧၢ, ယဆၢကတီၢ်ဖုၣ်ဆံးဒိၣ်လဲၣ်န့ၣ် သ့ၣ်နီၣ်ထီၣ်တက့ၢ်. ဒီးနတ့လီၤပှၤကညီဖိလၢအသံသ့န့ၣ် သ့ၣ်နီၣ်ထီၣ်တက့ၢ်.

⁴⁸ပှၤလၢအမူဝဲဒီးတထံၣ်န့ၢ်တၢ်သံနီတဘျီ ဒီးကမၤပူၤဖျဲးအသးသမူသ့လၢ တၢ်သံအစိအကမီၤန့ၣ်, မ့ၢ်မတၤတဂၤလဲၣ်. စ့လၤ

⁴⁹ယွၤဧၢ, နတၢ်အဲၣ်ဂၢၢ်ကျၢၤလၢပျၢၤ ဒီးနဆိၣ်တ့ၢ်တၢ်ဒီးစီၤဒၤဝံးလၢ တၢ်သူၣ်တီသးလိၤအပူၤန့ၣ်, မ့ၢ်အအိၣ်ဖဲလဲၣ်.

⁵⁰ယွၤဧၢ, သ့ၣ်နီၣ်ထီၣ်က့ၤနခ့နပှၤဘၣ်တၢ်ဒုၣ်ဒွဲၣ်ဒ်လဲၣ်, ဒီးယစိာ်ပှၤအါကလုာ်အတၢ်ဒုၣ်ဒွဲၣ်လၢ ယသးနါပှၢ်အပူၤဒ်လဲၣ်န့ၣ်တက့ၢ်.

⁵¹ယွၤဧၢ, နဒုၣ်နဒါတဖၣ်ဒုၣ်ဒွဲၣ်စီၤပၤလၢနဃုထၢအီၤလီၤ. အဝဲသ့ၣ်ဒုၣ်ဒွဲၣ်အီၤဖဲ အလဲၤတၢ်တပူၤလၢ်လၢ်န့ၣ်လီၤ.

⁵²မ်ယွၤဘၣ်တၢ်စံးထီၣ်ပတြၢၤလီၤထူလီၤယိာ်တက့ၢ်. အၤမ့ၣ်, ဒီးအၤမ့ၣ်.