Read S'gaw Karen စံးထီၣ်ပတြၢၤ 91 Bible Online

စံးထီၣ်ပတြၢၤ 91 - S'gaw Karen bible

စံးထီၣ်ပတြၢၤ 91

¹ပှၤလၢအအိၣ်ဝဲဆိးဝဲလၢ တၢ်ထီကတၢၢ်တဂၤအလီၢ်တဒၢ, ဒီးအိၣ်ဝဲလၢတၢ်သ့တၢ်လၢာ်အကဒုပူၤန့ၣ်,

²ကစံးဘၣ်ယွၤ, “နမ့ၢ်ယတၢ်အိၣ်တဒၢအလီၢ်ဒီးယတိာ်, ယကစၢ်ယွၤလၢယသန့ၤယသးလၢအီၤန့ၣ်လီၤ.”

³အဂ့ၢ်ဒ်အံၤ, အဝဲကမၤပူၤဖျဲးနၤလၢ ပှၤဖီၣ်န့ၢ်ခူသူၣ်ထိၣ်အပျံၤသကွီၤ, ဒီးလၢတၢ်သံသ့အတၢ်ဆူးတၢ်ဆါတဖၣ်န့ၣ်လီၤ.

⁴အဝဲကကျၢၢ်ဘၢနၤလၢအဒံးဆ့တဖၣ်, နကဘၣ်တၢ်မၤပူၤဖျဲးနၤလၢ အတၢ်အံးထွဲကွၢ်ထွဲနၤအပူၤ, ဒီးအတၢ်သူၣ်တီသးလိၤ ကကဟုဘံၣ်ကယာ်ဘၢနၤဒီးကဒီသဒၢနၤလီၤ.

⁵နတပျံၤဘၣ်တၢ်ပျံၤတၢ်ဖုးတဖၣ်လၢမုၢ်နၤမ့ၢ်ဂ့ၤ, တၢ်ထီဒါသတူၢ်ကလာ်တဖၣ်လၢမုၢ်ဆါမ့ၢ်ဂ့ၤ,

⁶တၢ်သံသတြိာ်လၢအလဲၤတၢ်လၢတၢ်ခံးကျါမ့ၢ်ဂ့ၤ, ဒီးတၢ်အၢတၢ်သီတဖၣ်လၢ အမၤသံတၢ်လၢမုၢ်ဆါမ့ၢ်ဂ့ၤန့ၣ်ဘၣ်.

⁷ပှၤတကထိကလီၤဃံၤသံလၢနဃၢၤ, ဒီးပှၤတကလးအိၣ်ဝးတရံးနၤ ဘၣ်ဆၣ်နတဘၣ်တၢ်မၤဆါနၤဘၣ်.

⁸နကကွၢ်တၢ်ဒီးထံၣ်ဘၣ်ပှၤတတီတလိၤတဖၣ် ဘၣ်တၢ်သိၣ်ဃီၣ်အီၤဒ်လဲၣ်န့ၣ်လီၤ.

⁹အဂ့ၢ်ဒ်အံၤ, နဒုးကဲထီၣ်တ့ၢ်လံယွၤလၢ နတၢ်ပူၤဖျဲးအလီၢ် ဒီးတၢ်ထီကတၢၢ်တဂၤလၢ နတၢ်အိၣ်တၢ်ဆိးအလီၢ်န့ၣ်လီၤ.

¹⁰တၢ်အၢတလီၤဘၣ်လၢနလိၤနီတမံၤဘၣ်, ဒီးတၢ်သံသတြိာ်တဟဲဘူးဘၣ်ဒီးနၤဘၣ်.

¹¹အဂ့ၢ်ဒ်အံၤ, အဝဲကမၤလိာ်အကလူးတဖၣ်လၢ နဂ့ၢ်နကျိၤဒီး လၢကအံးထွဲကွၢ်ထွဲနၤလၢနကျဲခဲလၢာ်အပူၤလီၤ.

¹²အဝဲသ့ၣ်ကစိာ်ထီၣ်နၤလၢအစုဒ်သိး နခီၣ်အသုတဘၣ်ဒိဘၣ်ထံးဒီး လၢၢ်တဖၣ်တဂ့ၤလီၤ.

¹³နကယီၢ်တံၢ်ခ့ယုၢ်တဖၣ်ဒီးဂုၢ်သီတဖၣ်, ခ့ယုၢ်ဖိဒီးဂုၢ်လၢအစုၣ်အၢန့ၣ်နကယီၢ်တံၢ်အီၤလၢ နခီၣ်အဖီလာ်လီၤ.

¹⁴ကစၢ်ယွၤစံးဝဲဒၣ်, မ့ၢ်အသးစဲဘူးဒီးယၤဒီး ယကမၤပူၤဖျဲးအီၤ, ယကပာ်ထီၣ်ထီအီၤလၢ အသ့ၣ်ညါယမံၤအဃိလီၤ.

¹⁵တုၤအကိးထီၣ်ယၤန့ၣ်ယကစံးဆၢအီၤ, ယကအိၣ်ဒီးအီၤလၢတၢ်ကိၢ်တၢ်ဂီၤအပူၤ, ယကမၤပူၤမၤဖျဲးအီၤဒီးမၤလၤကပီၤအီၤလီၤ.

¹⁶ယကဒုးမံသူၣ်မံသးအီၤလၢတၢ်အိၣ်ကၢအိၣ်ခိး, ဒီးဒုးနဲၣ်အီၤယတၢ်အုၣ်က့ၤခီၣ်က့ၤလီၤ.”