Read S'gaw Karen စံးထီၣ်ပတြၢၤ 95 Bible Online

စံးထီၣ်ပတြၢၤ 95 - S'gaw Karen bible

စံးထီၣ်ပတြၢၤ 95

¹အိဟဲ, မ်ပသးဝံၣ်ထီၣ်ယွၤတက့ၢ်. မ်ပကိးထီၣ်လၢတၢ်သးခုဆူပကစၢ်ယွၤလၢအမ့ၢ် တၢ်အုၣ်က့ၤခီၣ်က့ၤအလၢၢ်တက့ၢ်.

²မ်ပဟဲသကိးဆူအမဲာ်ညါလၢတၢ်စံးဘျုးစံးဖှိၣ်, မ်ပကိးထီၣ်အီၤလၢတၢ်သးခု, ဒီးလၢတၢ်စံးထီၣ်ပတြၢၤ အတၢ်သးဝံၣ်တဖၣ်န့ၣ်တက့ၢ်.

³အဂ့ၢ်ဒ်အံၤ, ယွၤမ့ၢ်ကစၢ်ယွၤဖးဒိၣ်တဂၤ, ဒီးစီၤပၤဖးဒိၣ်တဂၤလၢကယဲၢ်ကစၢ် ခဲလၢာ်အဖီခိၣ်န့ၣ်လီၤ.

⁴ဟီၣ်ခိၣ်အတၢ်ယိာ်ပူၤတဖၣ်အိၣ်လၢအစုပူၤ, ဒီးကစၢၢ်ကလိအတၢ်ထီၣ်ထီတဖၣ်န့ၣ်, မ့ၢ်စ့ၢ်ကီးအတၢ်လီၤ.

⁵ပီၣ်လဲၣ်န့ၣ် မ့ၢ်အတၢ်, အဂ့ၢ်ဒ်အံၤမၤတ့ၢ်လံဝဲ, ဒီးဟီၣ်ခိၣ်လၢအဃ့ထီၣ်န့ၣ်တ့ဝဲလၢအစုန့ၣ်လီၤ.

⁶အိဟဲ, မ်ပတီၤလီၤဒီးဘူၣ်ထီၣ်ဘါထီၣ်အီၤန့ၣ်တက့ၢ်. မ်ပတီၤလီၤကဒွံကျိာ်လၢပှၤတ့လီၤပှၤ, ယွၤအမဲာ်ညါန့ၣ်တက့ၢ်.

⁷အဂ့ၢ်ဒ်အံၤ, အဝဲဒၣ်န့ၣ်မ့ၢ်ပကစၢ်ယွၤ, ပမ့ၢ်အတၢ်အီၣ်ဆၣ်အလီၢ်အပှၤဂီၢ်မုၢ်, ဒီးအစုအသိတဖုန့ၣ်လီၤ. ဒိကနၣ်တၢ်လၢအဝဲစံးဝဲတနံၤအံၤတက့ၢ်.

⁸“မၤကိၤထီၣ်သုသးတဖၣ်ဒ်သိး သုမိၢ်ပၢ်ဖံဖုလၢပျၢၤဖဲမရံၤဘါ, ဒ်မုၢ်တနံၤဖဲအဝဲသ့ၣ်အိၣ်လၢ ပှၢ်မုၢ်ကနၢမၤစၤအခါအသိးန့ၣ်တဂ့ၤ.

⁹ဖဲန့ၣ်အဝဲသ့ၣ်တဖၣ်လ့ပစီယၤဒီးမၤကွၢ်ယၤ, ဖဲလၢအဝဲသ့ၣ်ထံၣ်ဘၣ်တၢ်လၢယမၤတ့ၢ်လၢ အဝဲသ့ၣ်အဂီၢ်ဒၣ်လဲာ်န့ၣ်လီၤ.

¹⁰ယသးဘၣ်အၢတ့ၢ်ပှၤတစိၤန့ၣ်လၢအနံၣ်လွံၢ်ဆံ အတီၢ်ပူၤလီၤ. ယစံး “အဝဲသ့ၣ်အကလုၢ်တတီဘၣ်ထဲလဲၣ် အဝဲသ့ၣ်ဂ့ၢ်လိာ်လၢ ကစူၢ်ယတၢ်မၤလိာ်တဖၣ်လီၤ.”

¹¹ယသးဒိၣ်ထီၣ်ဒီးမၤတၢ်အၢၣ်လီၤ သမှံၤသပှၢ်တထံၣ် ဒီးစံး, “သုတလဲၤနုာ်ဘၣ်ဆူ ကီၢ်ဖဲယကဟ့ၣ်သုတၢ် တၢ်အိၣ်ဘှံးအပူၤန့ၣ်နီတစုဘၣ်.”